[1357] Sabbaso vitakkayato vicārayato vitakkavipphāro saddoti.
Āmantā. Vitakkavipphāro saddo sotaviññeyyo sotasmiṁ
paṭihaññati sotassa āpāthaṁ āgacchatīti. Na hevaṁ vattabbe
.pe. Nanu vitakkavipphāro saddo na sotaviññeyyo na sotasmiṁ
paṭihaññati na sotassa āpāthaṁ āgacchatīti. Āmantā. Hañci
vitakkavipphāro saddo na sotaviññeyyo na sotasmiṁ paṭihaññati
na sotassa āpāthaṁ āgacchati no vata re vattabbe sabbaso
vitakkayato vicārayato vitakkavipphāro saddoti.
Vitakkavipphārasaddakathā.
----------
Nayathācittassa vācātikathā

[1358] Na yathācittassa vācāti. Āmantā. Aphassakassa
vācā avedanakassa vācā asaññakassa vācā acetanakassa
vācā acittakassa vācāti. Na hevaṁ vattabbe .pe. Nanu
saphassakassa vācā savedanakassa vācā sasaññakassa vācā
sacetanakassa vācā .pe. Sacittakassa vācāti. Āmantā. Hañci
saphassakassa vācā .pe. Sacittakassa vācā no vata re vattabbe
na yathācittassa vācāti.

[1359] Na yathācittassa vācāti. Āmantā. Anāvajjantassa
vācā anābhogassa vācā .pe. Apaṇidahantassa vācāti. Na
hevaṁ vattabbe .pe. Nanu āvajjantassa vācā ābhogassa vācā
.pe. Paṇidahantassa vācāti. Āmantā. Hañci āvajjantassa
vācā ābhogassa vācā .pe. Paṇidahantassa vācā no vata
re vattabbe na yathācittassa vācāti.

[1360] Na yathācittassa vācāti. Āmantā. Nanu vācā
cittasamuṭṭhānā cittena saha jātā cittena saha ekuppādāti.
Āmantā. Hañci vācā cittasamuṭṭhānā cittena saha jātā cittena
saha ekuppādā no vata re vattabbe na yathācittassa vācāti.

[1361] Na yathācittassa vācāti. Āmantā. Na bhaṇitukāmo
bhaṇati na kathetukāmo katheti na ālapitukāmo ālapati na
voharitukāmo voharatīti. Na hevaṁ vattabbe .pe. Nanu bhaṇitukāmo
bhaṇati kathetukāmo katheti ālapitukāmo ālapati voharitukāmo
voharatīti. Āmantā. Hañci bhaṇitukāmo bhaṇati kathetukāmo
katheti ālapitukāmo ālapati voharitukāmo voharati no vata re
vattabbe na yathācittassa vācāti.

[1362] Na vattabbaṁ na yathācittassa vācāti. Āmantā. Nanu
atthi koci aññaṁ bhaṇissāmīti aññaṁ bhaṇati aññaṁ kathessāmīti
aññaṁ katheti aññaṁ ālapissāmīti aññaṁ ālapati aññaṁ
Voharissāmīti aññaṁ voharatīti. Āmantā. Hañci atthi koci
aññaṁ bhaṇissāmīti aññaṁ bhaṇati .pe. Aññaṁ voharissāmīti
aññaṁ voharati tena vata re vattabbe na yathācittassa vācāti.
Nayathācittassa vācātikathā.
------------
Nayathācittassa kāyakammantikathā

[1363] Na yathācittassa kāyakammanti. Āmantā. Aphassakassa
kāyakammaṁ .pe. Acittakassa kāyakammanti. Na hevaṁ vattabbe
.pe. Nanu saphassakassa kāyakammaṁ .pe. Sacittakassa kāyakammanti.
Āmantā. Hañci saphassakassa kāyakammaṁ .pe. Sacittakassa
kāyakammaṁ no vata re vattabbe na yathācittassa kāyakammanti.

[1364] Na yathācittassa kāyakammanti. Āmantā. Anāvajjantassa
kāyakammaṁ .pe. Apaṇidahantassa kāyakammanti. Na hevaṁ
vattabbe .pe. Nanu āvajjantassa kāyakammaṁ .pe. Paṇidahantassa
kāyakammanti. Āmantā. Hañci āvajjantassa kāyakammaṁ .pe.
Paṇidahantassa kāyakammaṁ no vata re vattabbe na yathācittassa
kāyakammanti.

[1365] Na yathācittassa kāyakammanti. Āmantā. Nanu kāyakammaṁ
cittasamuṭṭhānaṁ cittena saha jātaṁ cittena saha ekuppādanti.
Āmantā. Hañci kāyakammaṁ cittasamuṭṭhānaṁ cittena saha jātaṁ cittena
saha ekuppādaṁ no vata re vattabbe na yathācittassa kāyakammanti.

[1366] Na yathācittassa kāyakammanti. Āmantā. Na
abhikkamitukāmo abhikkamati na paṭikkamitukāmo paṭikkamati na
āloketukāmo āloketi na viloketukāmo viloketi na
sammiñjitukāmo sammiñjeti na pasāretukāmo pasāretīti. Na
hevaṁ vattabbe .pe. Nanu abhikkamitukāmo abhikkamati paṭikkamitukāmo
paṭikkamati āloketukāmo āloketi viloketukāmo
viloketi sammiñjitukāmo sammiñjeti pasāretukāmo pasāretīti.
Āmantā. Hañci abhikkamitukāmo abhikkamati .pe. Pasāretukāmo
pasāreti no vata re vattabbe na yathācittassa kāyakammanti.