[1347] Paccuppannaṁ ārabbha atthi āvajjanā .pe. Paṇidhi
paccuppannārammaṇaṁ cittaṁ sārammaṇanti. Āmantā. Atītaṁ ārabbha
atthi āvajjanā .pe. Paṇidhi atītārammaṇaṁ cittaṁ sārammaṇanti.
Na hevaṁ vattabbe .pe.

[1348] Paccuppannaṁ ārabbha atthi āvajjanā .pe. Paṇidhi
paccuppannārammaṇaṁ cittaṁ sārammaṇanti. Āmantā. Anāgataṁ
ārabbha atthi āvajjanā .pe. Paṇidhi anāgatārammaṇaṁ cittaṁ
sārammaṇanti. Na hevaṁ vattabbe .pe.

[1349] Atītaṁ ārabbha atthi āvajjanā .pe. Paṇidhi atītārammaṇaṁ
cittaṁ anārammaṇanti. Āmantā. Paccuppannaṁ ārabbha
atthi āvajjanā .pe. Paṇidhi paccuppannārammaṇaṁ cittaṁ anārammaṇanti.
Na hevaṁ vattabbe .pe.

[1350] Anāgataṁ ārabbha atthi āvajjanā .pe. Paṇidhi
anāgatārammaṇaṁ cittaṁ anārammaṇanti. Āmantā. Paccuppannaṁ
ārabbha atthi āvajjanā .pe. Paṇidhi paccuppannārammaṇaṁ cittaṁ
anārammaṇanti. Na hevaṁ vattabbe .pe.

[1351] Na vattabbaṁ atītānāgatārammaṇaṁ cittaṁ anārammaṇanti.
Āmantā. Nanu atītānāgataṁ natthīti. Āmantā. Hañci
atītānāgataṁ natthi tena vata re vattabbe atītānāgatārammaṇaṁ
cittaṁ anārammaṇanti .pe.
Anāgatārammaṇakathā
---------
vitakkānupatitakathā

[1352] Sabbaṁ cittaṁ vitakkānupatitanti. Āmantā. Sabbaṁ cittaṁ
vicārānupatitaṁ pītānupatitaṁ sukhānupatitaṁ dukkhānupatitaṁ somanassānupatitaṁ
domanassānupatitaṁ upekkhānupatitaṁ saddhānupatitaṁ viriyānupatitaṁ satānupatitaṁ
samādhānupatitaṁ paññānupatitaṁ rāgānupatitaṁ dosānupatitaṁ
.pe. Anottappānupatitanti. Na hevaṁ vattabbe .pe.

[1353] Sabbaṁ cittaṁ vitakkānupatitanti. Āmantā. Nanu
atthi avitakko vicāramatto samādhīti. Āmantā. Hañci atthi
avitakko vicāramatto samādhi no vata re vattabbe sabbaṁ cittaṁ
Vitakkānupatitanti.

[1354] Sabbaṁ cittaṁ vitakkānupatitanti. Āmantā. Nanu
atthi avitakko avicāro samādhīti. Āmantā. Hañci atthi
avitakko avicāro samādhi no vata re vattabbe sabbaṁ cittaṁ
vitakkānupatitanti.

[1355] Sabbaṁ cittaṁ vitakkānupatitanti. Āmantā. Nanu
tayo samādhī vuttā bhagavatā savitakko savicāro samādhi avitakko
vicāramatto samādhi avitakko avicāro samādhīti. Āmantā.
Hañci tayo samādhī vuttā bhagavatā savitakko savicāro samādhi
avitakko vicārammatto samādhi avitakko avicāro samādhi no
vata re vattabbe sabbaṁ cittaṁ vitakkānupatitanti.
Vitakkānupatitakathā.
--------
Vitakkavipphārasaddakathā

[1356] Sabbaso vitakkayato vicārayato vitakkavipphāro saddoti.
Āmantā. Sabbaso phusayato phassavipphāro saddo sabbaso
vedayato vedanāvipphāro saddo sabbaso sañjānato saññāvipphāro
saddo sabbaso cetayato cetanāvipphāro saddo sabbasocintayato
cittavipphāro saddo sabbaso sarato sativipphāro saddo sabbaso
Pajānato paññāvipphāro saddoti. Na hevaṁ vattabbe .pe.