[1317] Amataṁ ārabbha rāgo uppajjati amataṁ na rāgaṭṭhāniyaṁ
na rajaniyaṁ na kamaniyaṁ na madaniyaṁ na bandhaniyaṁ na mucchaniyanti.
Āmantā. Rūpaṁ ārabbha rāgo uppajjati rūpaṁ na rāgaṭṭhāniyaṁ
.pe. Na mucchaniyanti. Na hevaṁ vattabbe .pe.

[1318] Amataṁ ārabbha doso uppajjati amataṁ na dosaṭṭhāniyaṁ
na kopaṭṭhāniyaṁ na paṭighaṭṭhāniyanti. Āmantā. Rūpaṁ ārabbha doso
uppajjati rūpaṁ na dosaṭṭhāniyaṁ na kopaṭṭhāniyaṁ na paṭighaṭṭhāniyanti.
Na hevaṁ vattabbe .pe.

[1319] Amataṁ ārabbha moho uppajjati amataṁ na mohaṭṭhāniyaṁ
na aññāṇakaraṇaṁ .pe. Nibbānasaṁvattaniyanti. Āmantā.
Rūpaṁ ārabbha moho uppajjati rūpaṁ na mohaṭṭhāniyaṁ na aññāṇakaraṇaṁ
.pe. Nibbānasaṁvattaniyanti. Na hevaṁ vattabbe .pe.

[1320] Na vattabbaṁ amatārammaṇaṁ saññojananti. Āmantā.
Nanu vuttaṁ bhagavatā nibbānaṁ nibbānato sañjānāti nibbānaṁ
nibbānato sañjānitvā nibbānaṁ maññati nibbānasmiṁ maññati
nibbānato maññati nibbānaṁ meti maññati nibbānaṁ abhinandatīti 1
attheva suttantoti. Āmantā. Tena hi amatārammaṇaṁ saññojananti.
Amatārammaṇakathā.
1 Ma. mū. 5.
Rūpaṁ sārammaṇantikathā

[1321] Rūpaṁ sārammaṇanti. Āmantā. Atthi tassa
āvajjanā ābhogo samannāhāro manasikāro cetanā patthanā
paṇidhīti. Na hevaṁ vattabbe .pe. Nanu natthi tassa āvajjanā
ābhogo .pe. Paṇidhīti. Āmantā. Hañci natthi tassa
āvajjanā ābhogo .pe. Paṇidhi no vata re vattabbe rūpaṁ
sārammaṇanti.

[1322] Phasso sārammaṇo atthi tassa āvajjanā ābhogo
.pe. Paṇidhīti. Āmantā. Rūpaṁ sārammaṇaṁ atthi tassa
āvajjanā ābhogo .pe. Paṇidhīti. Na hevaṁ vattabbe .pe.

[1323] Vedanā .pe. Saññā cetanā cittaṁ saddhā viriyaṁ
sati samādhi paññā rāgo doso moho māno diṭṭhi vicikicchā
thīnaṁ uddhaccaṁ ahirikaṁ .pe. Anottappaṁ sārammaṇaṁ atthi tassa
āvajjanā ābhogo .pe. Paṇidhīti. Āmantā. Rūpaṁ sārammaṇaṁ
atthi tassa āvajjanā ābhogo .pe. Paṇidhīti. Na hevaṁ
vattabbe .pe.

[1324] Rūpaṁ sārammaṇaṁ natthi tassa āvajjanā ābhogo
.pe. Paṇidhīti. Āmantā. Phasso sārammaṇo natthi tassa
āvajjanā ābhogo .pe. Paṇidhīti. Na hevaṁ vattabbe .pe.

[1325] Rūpaṁ sārammaṇaṁ natthi tassa āvajjanā ābhogo
.pe. Paṇidhīti. Āmantā. Vedanā saññā .pe. Anottappaṁ
sārammaṇaṁ natthi tassa āvajjanā ābhogo .pe. Paṇidhīti.
Na hevaṁ vattabbe .pe.

[1326] Na vattabbaṁ rūpaṁ sārammaṇanti. Āmantā. Nanu
rūpaṁ sapaccayanti. Āmantā. Hañci rūpaṁ sapaccayaṁ tena
vata re vattabbe rūpaṁ sārammaṇanti.
Rūpaṁ sārammaṇantikathā.
-------------
Anusayā anārammaṇātikathā