[1307] Na vattabbaṁ ānisaṁsadassāvissa saññojanānaṁ pahānanti.
Āmantā. Nanu vuttaṁ bhagavatā idha bhikkhave bhikkhu nibbāne sukhānupassī
viharati sukhasaññī sukhapaṭisaṁvedī satataṁ samitaṁ abbokiṇṇaṁ cetasā
adhimuccamāno paññāya pariyogāhamānoti attheva suttantoti.
Āmantā. Tena hi ānisaṁsadassāvissa saññojanānaṁ pahānanti.
Ānisaṁsakathā.
-------
Amatārammaṇakathā

[1308] Amatārammaṇaṁ saññojananti. Āmantā. Amataṁ
saññojaniyaṁ ganthaniyaṁ oghaniyaṁ yoganiyaṁ nīvaraṇiyaṁ parāmaṭṭhaṁ upādāniyaṁ
saṅkilesikanti. 1 Na hevaṁ vattabbe .pe. Nanu amataṁ asaññojaniyaṁ
aganthaniyaṁ .pe. Asaṅkilesikanti. Āmantā. Hañci amataṁ
asaññojaniyaṁ .pe. Asaṅkilesikaṁ no vata re vattabbe amatārammaṇaṁ
saññojananti.

[1309] Amataṁ ārabbha rāgo uppajjatīti. Āmantā.
Amataṁ rāgaṭṭhāniyaṁ rajaniyaṁ kamaniyaṁ madaniyaṁ bandhaniyaṁ mucchaniyanti. Na
1. Ma. saṅkilesiyaṁ
Hevaṁ vattabbe .pe. Nanu amataṁ na rāgaṭṭhāniyaṁ na rajaniyaṁ na kamaniyaṁ
na madaniyaṁ na bandhaniyaṁ na mucchaniyanti. Āmantā. Hañci amataṁ
na rāgaṭṭhāniyaṁ na rajaniyaṁ na kamaniyaṁ na madaniyaṁ na bandhaniyaṁ na
mucchaniyaṁ no vata re vattabbe amataṁ ārabbha rāgo uppajjatīti.

[1310] Amataṁ ārabbha doso uppajjatīti. Āmantā.
Amataṁ dosaṭṭhāniyaṁ kopaṭṭhāniyaṁ paṭighaṭṭhāniyanti. Na hevaṁ
vattabbe .pe. Nanu amataṁ na dosaṭṭhāniyaṁ na kopaṭṭhāniyaṁ na
paṭighaṭṭhāniyanti. Āmantā. Hañci amataṁ na dosaṭṭhāniyaṁ na
kopaṭṭhāniyaṁ na paṭighaṭṭhāniyaṁ no vata re vattabbe amataṁ
ārabbha doso uppajjatīti.

[1311] Amataṁ ārabbha moho uppajjatīti. Āmantā.
Amataṁ mohaṭṭhāniyaṁ aññāṇakaraṇaṁ acakkhukaraṇaṁ paññānirodhiyaṁ
vighātapakkhiyaṁ anibbānasaṁvattaniyanti. Na hevaṁ vattabbe .pe.
Nanu amataṁ na mohaṭṭhāniyaṁ na aññāṇakaraṇaṁ na acakkhukaraṇaṁ
paññāvuḍḍhiyaṁ avighātapakkhiyaṁ nibbānasaṁvattaniyanti. Āmantā.
Hañci amataṁ na mohaṭṭhāniyaṁ na aññāṇakaraṇaṁ .pe. Nibbānasaṁvattaniyaṁ
no vata re vattabbe amataṁ ārabbha moho uppajjatīti.

[1312] Rūpaṁ ārabbha saññojanā uppajjanti rūpaṁ saññojaniyaṁ
ganthaniyaṁ .pe. Saṅkilesikanti. Āmantā. Amataṁ ārabbha
saññojanā uppajjanti amataṁ saññojaniyaṁ ganthaniyaṁ .pe.
Saṅkilesikanti. Na hevaṁ vattabbe .pe.

[1313] Rūpaṁ ārabbha rāgo uppajjati rūpaṁ rāgaṭṭhāniyaṁ
rajaniyaṁ kamaniyaṁ madaniyaṁ bandhaniyaṁ mucchaniyanti. Āmantā. Amataṁ
ārabbha rāgo uppajjati amataṁ rāgaṭṭhāniyaṁ .pe. Mucchaniyanti.
Na hevaṁ vattabbe .pe.

[1314] Rūpaṁ ārabbha doso uppajjati rūpaṁ dosaṭṭhāniyaṁ
kopaṭṭhāniyaṁ paṭighaṭṭhāniyanti. Āmantā. Amataṁ ārabbha doso
uppajjati amataṁ dosaṭṭhāniyaṁ kopaṭṭhāniyaṁ paṭighaṭṭhāniyanti.
Na hevaṁ vattabbe .pe.

[1315] Rūpaṁ ārabbha moho uppajjati rūpaṁ mohaṭṭhāniyaṁ
aññāṇakaraṇaṁ .pe. Anibbānasaṁvattaniyanti. Āmantā. Amataṁ
ārabbha moho uppajjati amataṁ mohaṭṭhāniyaṁ aññāṇakaraṇaṁ
.pe. Anibbānasaṁvattaniyanti. Na hevaṁ vattabbe .pe.

[1316] Amataṁ ārabbha saññojanā uppajjanti amataṁ
asaññojaniyaṁ aganthaniyaṁ anoghaniyaṁ ayoganiyaṁ anīvaraṇiyaṁ aparāmaṭṭhaṁ
anupādāniyaṁ asaṅkilesikanti. Āmantā. Rūpaṁ ārabbha saññojanā
uppajjanti rūpaṁ asaññojaniyaṁ aganthaniyaṁ .pe. Asaṅkilesikanti.
Na hevaṁ vattabbe .pe.