[1297] Nirodhaṁ samāpannassa atthi vedanākkhandho .pe.
Saññākkhandho .pe. Viññāṇakkhandhoti. Āmantā. Na
Nirodhasamāpannoti. Na hevaṁ vattabbe .pe.

[1298] Natthi rūpajīvitindriyanti. Āmantā. Asaññasattānaṁ
natthi jīvitindriyanti. Na hevaṁ vattabbe .pe. Asaññasattānaṁ
atthi jīvitindriyanti. Āmantā. Hañci asaññasattānaṁ atthi
jīvitindriyaṁ no vata re vattabbe natthi rūpajīvitindriyanti.

[1299] Asaññasattānaṁ atthi jīvitindriyanti. Āmantā.
Katamakkhandhapariyāpannanti. Saṅkhārakkhandhapariyāpannanti. Asaññasattānaṁ
atthi saṅkhārakkhandhoti. Na hevaṁ vattabbe .pe.
Asaññasattānaṁ atthi saṅkhārakkhandhoti. Āmantā. Asaññasattānaṁ
atthi vedanākkhandho .pe. Saññākkhandho .pe.
Viññāṇakkhandhoti. Na hevaṁ vattabbe .pe. Asaññasattānaṁ
atthi vedanākkhandho .pe. Saññākkhandho .pe. Viññāṇakkhandhoti.
Āmantā. Pañcavokārabhavoti. Na hevaṁ vattabbe .pe.

[1300] Upapattesiyena cittena samuṭṭhitaṁ jīvitindriyaṁ upapattesiye
citte bhijjamāne ekadesaṁ bhijjatīti. Āmantā. Upapattesiyena
cittena samuṭṭhito phasso upapattesiye citte bhijjamāne ekadeso
bhijjatīti. Na hevaṁ vattabbe .pe.

[1301] Upapattesiyena cittena samuṭṭhito phasso upapattesiye
citte bhijjamāne anavaseso bhijjatīti. Āmantā. Upapattesiyena
cittena samuṭṭhitaṁ jīvitindriyaṁ upapattesiye citte bhijjamāne
Anavasesaṁ bhijjatīti. Na hevaṁ vattabbe .pe.

[1302] Dve jīvitindriyānīti. Āmantā. Dvīhi jīvitehi
jīvati dvīhi maraṇehi miyyatīti. Na hevaṁ vattabbe .pe.
Jīvitindriyakathā.
---------
Kammahetukathā

[1303] Kammahetu arahā arahattā parihāyatīti. Āmantā.
Kammahetu sotāpanno sotāpattiphalā parihāyatīti. Na hevaṁ
vattabbe .pe. Kammahetu arahā arahattā parihāyatīti.
Āmantā. Kammahetu sakadāgāmī .pe. Anāgāmī anāgāmiphalā
parihāyatīti. Na hevaṁ vattabbe .pe.

[1304] Kammahetu sotāpanno sotāpattiphalā na parihāyatīti.
Āmantā. Kammahetu arahā arahattā na parihāyatīti. Na
hevaṁ vattabbe .pe. Kammahetu sakadāgāmī .pe. Anāgāmī
anāgāmiphalā na parihāyatīti. Āmantā. Kammahetu arahā
arahattā na parihāyatīti. Hevaṁ vattabbe .pe.

[1305] Kammahetu arahā arahattā parihāyatīti. Āmantā.
Pāṇātipātakammassa hetūti na hevaṁ vattabbe .pe. Adinnādānakammassa
hetu .pe. Kāmesumicchācārakammassa hetu musāvādakammassa
Hetu pisuṇāvācākammassa hetu pharusavācākammassa hetu
samphappalāpakammassa hetu mātughātakakammassa 1 hetu pitughātakakammassa 2
hetu arahantaghātakakammassa 3 hetu ruhiruppādakammassa
hetu saṅghabhedakammassa hetūti. Na hevaṁ vattabbe .pe.
Katamassa kammassa hetūti. Handa hi arahantānaṁ abbhācikkhatīti.
Arahantānaṁ abbhācikkhanakammassa hetu arahā arahattā parihāyatīti.
Āmantā. Ye keci arahantānaṁ abbhācikkhanti sabbe te
arahattaṁ sacchikarontīti. Na hevaṁ vattabbe .p.
Kammahetukathā.
Aṭṭhamo vaggo.
Tassa uddānaṁ.
Cha gatiyo antarābhavo pañceva kāmaguṇā
kāmadhātu pañceva āyatanā kāmā
rūpino dhammā rūpadhātu arūpino dhammā
arūpadhātu saḷāyataniko attabhāvo
rūpadhātuyā atthi rūpaṁ arūpesu rūpaṁ kammaṁ
rūpajīvitindriyaṁ kammahetu parihāyatīti.
-----------
1 Ma. mātughātikammassa. 2. Ma. pitughātikammassa. 3. Ma. arahantaghātikammassa.
Ānisaṁsakathā

[1306] Ānisaṁsadassāvissa saññojanānaṁ pahānanti. Āmantā.
Nanu saṅkhāre aniccato manasikaroto saññojanā pahīyantīti.
Āmantā. Hañci saṅkhāre aniccato manasikaroto saññojanā
pahīyanti no vata re vattabbe ānisaṁsadassāvissa saññojanānaṁ
pahānanti .pe. Nanu saṅkhāre dukkhato .pe. Rogato gaṇḍato
sallato aghato ābādhato parato palokato ītito upaddavato
bhayato upasaggato calato pabhaṅguto adhuvato atāṇato aleṇato
asaraṇato asaraṇībhūtato rittato tucchato suññato anattato
ādīnavato .pe. Vipariṇāmadhammato manasikaroto saññojanā pahīyantīti.
Āmantā. Hañci saṅkhāre vipariṇāmadhammato manasikaroto
saññojanā pahīyanti no vata re vattabbe ānisaṁsadassāvissa
saññojanānaṁ pahānanti. Saṅkhāre ca aniccato manasi karoti
nibbāne ca ānisaṁsadassāvī hotīti. Na hevaṁ vattabbe .pe.
Saṅkhāre ca aniccato manasi karoti nibbāne ca ānisaṁsadassāvī
hotīti. Āmantā. Dvinnaṁ phassānaṁ .pe. Dvinnaṁ cittānaṁ
samodhānaṁ hotīti. Na hevaṁ vattabbe .pe. Saṅkhāre ca dukkhato
.pe. Rogato .pe. Vipariṇāmadhammato manasi karoti nibbāne
ca ānisaṁsadassāvī hotīti. Na hevaṁ vattabbe .pe. Saṅkhāre
Ca vipariṇāmadhammato manasi karoti nibbāne ca ānisaṁsadassāvī
hotīti. Āmantā. Dvinnaṁ phassānaṁ .pe. Dvinnaṁ cittānaṁ
samodhānaṁ hotīti. Na hevaṁ vattabbe .pe.