[1277] Mano arūpaṁ manokammaṁ arūpanti. Āmantā.
Kāyo arūpaṁ kāyakammaṁ arūpanti. Na hevaṁ vattabbe .pe.

[1278] Kāyo rūpaṁ kāyakammaṁ arūpanti. Āmantā.
Mano rūpaṁ manokammaṁ arūpanti. Na hevaṁ vattabbe .pe.

[1279] Mano arūpaṁ manokammaṁ arūpanti. Āmantā.
Kāyo arūpaṁ kāyakammaṁ arūpanti. Na hevaṁ vattabbe .pe.

[1280] Kāyo rūpanti. Kāyakammaṁ rūpanti. Āmantā.
Cakkhāyatanaṁ rūpanti. Cakkhuviññāṇaṁ rūpanti. Na hevaṁ vattabbe
.pe. Kāyo rūpanti. Kāyakammaṁ rūpanti. Āmantā. Sotāyatanaṁ
rūpanti. Sotaviññāṇaṁ rūpanti. Na hevaṁ vattabbe .pe. Kāyo
rūpanti. Kāyakammaṁ rūpanti. Āmantā. Ghānāyatanaṁ rūpanti.
Ghānaviññāṇaṁ rūpanti. Na hevaṁ vattabbe .pe. Kāyo rūpanti.
Kāyakammaṁ rūpanti. Āmantā. Jivhāyatanaṁ rūpanti. Jivhāviññāṇaṁ
Rūpanti. Na hevaṁ vattabbe .pe. Kāyo rūpanti. Kāyakammaṁ
rūpanti. Āmantā. Kāyāyatanaṁ rūpanti. Kāyaviññāṇaṁ rūpanti.
Na hevaṁ vattabbe .pe.

[1281] Rūpaṁ kammanti. Āmantā. Nanu vuttaṁ bhagavatā
cetanāhaṁ bhikkhave kammaṁ vadāmi cetayitvā kammaṁ karoti kāyena
vācāya manasāti 1 attheva suttantoti. Āmantā. Tena hi
na vattabbaṁ rūpaṁ kammanti.

[1282] Rūpaṁ kammanti. Āmantā. Nanu vuttaṁ bhagavatā
kāye vā ānanda sati kāyasañcetanāhetu uppajjati ajjhattaṁ
sukhadukkhaṁ vācāya vā ānanda sati vacīsañcetanāhetu uppajjati
ajjhattaṁ sukhadukkhaṁ mane vā ānanda sati manosañcetanāhetu
uppajjati ajjhattaṁ sukhadukkhanti 2 attheva suttantoti. Āmantā.
Tena hi na vattabbaṁ rūpaṁ kammanti.

[1283] Rūpaṁ kammanti. Āmantā. Nanu vuttaṁ bhagavatā
tividhā bhikkhave kāyasañcetanā akusalaṁ kāyakammaṁ dukkhudrayaṁ dukkhavipākaṁ
catubbidhā bhikkhave vacīsañcetanā akusalaṁ vacīkammaṁ dukkhudrayaṁ dukkhavipākaṁ
tividhā bhikkhave manosañcetanā akusalaṁ manokammaṁ dukkhudrayaṁ dukkhavipākaṁ
tividhā bhikkhave kāyasañcetanā kusalaṁ kāyakammaṁ sukhudrayaṁ sukhavipākaṁ
catubbidhā bhikkhave vacīsañcetanā kusalaṁ vacīkammaṁ sukhudrayaṁ sukhavipākaṁ
1 aṁ. chakka. 128. 2 saṁ. ni. 37.
Tividhā bhikkhave manosañcetanā kusalaṁ manokammaṁ sukhudrayaṁ sukhavipākanti
attheva suttantoti. Āmantā. Tena hi na vattabbaṁ rūpaṁ kammanti.

[1284] Rūpaṁ kammanti. Āmantā. Nanu vuttaṁ bhagavatā
sacāyaṁ ānanda samiddhi moghapuriso pātaliputtassa paribbājakassa
evaṁ puṭṭho evaṁ byākareyya sañcetaniyaṁ āvuso pātaliputta
kammaṁ katvā kāyena vācāya manasā sukhavedaniyaṁ sukhaṁ so vedayati
sañcetaniyaṁ āvuso pātaliputta kammaṁ katvā kāyena vācāya manasā
dukkhavedaniyaṁ dukkhaṁ so vedayati sañcetaniyaṁ āvuso pātaliputta
kammaṁ katvā kāyena vācāya manasā adukkhamasukhavedaniyaṁ adukkhamasukhaṁ
so vedayatīti evaṁ byākaramāno kho ānanda samiddhi moghapuriso
pātaliputtassa paribbājakassa sammā byākaramāno byākareyyāti 1
attheva suttantoti. Āmantā. Tena hi na vattabbaṁ rūpaṁ kammanti.
Rūpaṁ kammantikathā.
---------
Jīvitindriyakathā

[1285] Natthi rūpajīvitindriyanti. Āmantā. Natthi rūpīnaṁ
dhammānaṁ āyu ṭhiti 2 yapanā yāpanā iriyanā vattanā pālanāti.
Na hevaṁ vattabbe .pe. Atthi rūpīnaṁ dhammānaṁ āyu ṭhiti yapanā
1 Ma. u. 357. 2. Ma. Yu. āyuṭṭhiti. aññattha idisameva.
Yāpanā iriyanā vattanā pālanāti. Āmantā. Hañci atthi
rūpīnaṁ dhammānaṁ āyu ṭhiti yapanā yāpanā iriyanā vattanā pālanā
no vata re vattabbe natthi rūpajīvitindriyanti.

[1286] Atthi arūpīnaṁ dhammānaṁ āyu ṭhiti yapanā yāpanā
iriyanā vattanā pālanā atthi arūpajīvitindriyanti. Āmantā.
Atthi rūpīnaṁ dhammānaṁ āyu ṭhiti yapanā yāpanā iriyanā vattanā
pālanā atthi rūpajīvitindriyanti. Na hevaṁ vattabbe .pe.