[1087] Avijjāpaccayā saṅkhārāti yā tattha dhammaṭṭhitatā
dhammaniyāmatā asaṅkhatā nibbānaṁ asaṅkhatanti. Āmantā. Dve
asaṅkhatānīti. Na hevaṁ vattabbe .pe. Dve asaṅkhatānīti. Āmantā.
Dve tāṇāni .pe. Antarikā vāti. Na hevaṁ vattabbe .pe.

[1088] Avijjāpaccayā saṅkhārāti yā tattha dhammaṭṭhitatā
dhammaniyāmatā asaṅkhatā saṅkhārapaccayā viññāṇanti yā tattha
dhammaṭṭhitatā dhammaniyāmatā asaṅkhatā nibbānaṁ asaṅkhatanti.
Āmantā. Tīṇi asaṅkhatānīti. Na hevaṁ vattabbe .pe. Tīṇi
asaṅkhatānīti. Āmantā. Tīṇi tāṇāni .pe. Antarikā vāti.
Na hevaṁ vattabbe .pe.

[1089] Avijjāpaccayā saṅkhārāti yā tattha dhammaṭṭhitatā
dhammaniyāmatā asaṅkhatā saṅkhārapaccayā viññāṇanti yā tattha
dhammaṭṭhitatā dhammaniyāmatā asaṅkhatā .pe. Jātipaccayā jarāmaraṇanti
1 saṁ. ni. 24.
Yā tattha dhammaṭṭhitatā dhammaniyāmatā asaṅkhatā nibbānaṁ asaṅkhatanti.
Āmantā. Dvādasa asaṅkhatānīti. Na hevaṁ vattabbe .pe.
Dvādasa asaṅkhatānīti. Āmantā. Dvādasa tāṇāni dvādasa
leṇāni .pe. Antarikā vāti. Na hevaṁ vattabbe .pe.
Paṭiccasamuppādakathā.
------
Saccakathā

[1090] Cattāri saccāni asaṅkhatānīti. Āmantā. Cattāri
tāṇāni cattāri leṇāni cattāri saraṇāni cattāri parāyanāni
cattāri accutāni cattāri amatāni cattāri nibbānānīti. Na hevaṁ
vattabbe .pe. Cattāri nibbānānīti. Āmantā. Atthi catunnaṁ
nibbānānaṁ uccanīcatā hīnappaṇītatā ukkaṁsāvakaṁso sīmā vā bhedo
vā rāji vā antarikā vāti. Na hevaṁ vattabbe .pe.

[1091] Dukkhasaccaṁ asaṅkhatanti. Āmantā. Dukkhaṁ asaṅkhatanti.
Na hevaṁ vattabbe .pe. Dukkhasaccaṁ asaṅkhatanti. Āmantā.
Kāyikaṁ dukkhaṁ cetasikaṁ dukkhaṁ sokaparidevadukkhadomanassupāyāsā
asaṅkhatāti. Na hevaṁ vattabbe .pe. Samudayasaccaṁ asaṅkhatanti.
Āmantā. Samudayo asaṅkhatoti. Na hevaṁ vattabbe .pe.
Samudayasaccaṁ asaṅkhatanti. Āmantā. Kāmataṇhā bhavataṇhā
Vibhavataṇhā asaṅkhatāti. Na hevaṁ vattabbe .pe. Maggasaccaṁ
asaṅkhatanti. Āmantā. Maggo asaṅkhatoti. Na hevaṁ vattabbe
.pe. Maggasaccaṁ asaṅkhatanti. Āmantā. Sammādiṭṭhi .pe.
Sammāsamādhi asaṅkhatoti. Na hevaṁ vattabbe .pe.

[1092] Dukkhaṁ saṅkhatanti. Āmantā. Dukkhasaccaṁ saṅkhatanti.
Na hevaṁ vattabbe .pe. Kāyikaṁ dukkhaṁ cetasikaṁ dukkhaṁ
sokaparidevadukkhadomanassupāyāsā saṅkhatāti. Āmantā. Dukkhasaccaṁ
saṅkhatanti. Na hevaṁ vattabbe .pe. Samudayo saṅkhatoti. Āmantā.
Samudayasaccaṁ saṅkhatanti. Na hevaṁ vattabbe .pe. Kāmataṇhā bhavataṇhā
vibhavataṇhā saṅkhatāti. Āmantā. Samudayasaccaṁ saṅkhatanti.
Na hevaṁ vattabbe .pe. Maggo saṅkhatoti. Āmantā. Maggasaccaṁ
saṅkhatanti. Na hevaṁ vattabbe .pe. Sammādiṭṭhi .pe. Sammā
samādhi saṅkhatoti. Āmantā. Maggasaccaṁ saṅkhatanti. Na hevaṁ
vattabbe .pe.

[1093] Nirodhasaccaṁ asaṅkhataṁ nirodho asaṅkhatoti. Āmantā.
Dukkhasaccaṁ asaṅkhataṁ dukkhaṁ asaṅkhatanti. Na hevaṁ vattabbe .pe.
Nirodhasaccaṁ asaṅkhataṁ nirodho asaṅkhatoti. Āmantā. Samudayasaccaṁ
asaṅkhataṁ samudayo asaṅkhatoti. Na hevaṁ vattabbe .pe. Nirodhasaccaṁ
asaṅkhataṁ nirodho asaṅkhatoti. Āmantā. Maggasaccaṁ asaṅkhataṁ
maggo asaṅkhatoti. Na hevaṁ vattabbe .pe.

[1094] Dukkhasaccaṁ asaṅkhataṁ dukkhaṁ saṅkhatanti. Āmantā.
Nirodhasaccaṁ asaṅkhataṁ nirodho saṅkhatoti. Na hevaṁ vattabbe .pe.
Samudayasaccaṁ asaṅkhataṁ samudayo saṅkhatoti. Āmantā. Nirodhasaccaṁ
asaṅkhataṁ nirodho saṅkhatoti. Na hevaṁ vattabbe .pe. Maggasaccaṁ
asaṅkhataṁ maggo saṅkhatoti. Āmantā. Nirodhasaccaṁ asaṅkhataṁ
nirodho saṅkhatoti. Na hevaṁ vattabbe .pe.

[1095] Na vattabbaṁ cattāri saccāni asaṅkhatānīti. Āmantā.
Nanu vuttaṁ bhagavatā cattārimāni bhikkhave tathāni avitathāni anaññathāni.
Katamāni cattāri. Idaṁ dukkhanti bhikkhave tathametaṁ avitathametaṁ
anaññathametaṁ .pe. Ayaṁ dukkhasamudayoti .pe. Ayaṁ dukkhanirodhoti
.pe. Ayaṁ dukkhanirodhagāminī paṭipadāti tathametaṁ avitathametaṁ anaññathametaṁ
imāni kho bhikkhave cattāri tathāni avitathāni anaññathānīti 1
attheva suttantoti. Āmantā. Tena hi cattāri saccāni
asaṅkhatānīti.
Saccakathā.
--------
Āruppakathā

[1096] Ākāsānañcāyatanaṁ asaṅkhatanti. Āmantā. Nibbānaṁ
1 khu. pa. 351.
Tāṇaṁ leṇaṁ saraṇaṁ parāyanaṁ accutaṁ amatanti. Na hevaṁ vattabbe
.pe. Ākāsānañcāyatanaṁ asaṅkhataṁ nibbānaṁ asaṅkhatanti.
Āmantā. Dve asaṅkhatānīti. Na hevaṁ vattabbe .pe. Dve
asaṅkhatānīti. Āmantā. Dve tāṇāni .pe. Antarikā vāti.
Na hevaṁ vattabbe .pe. Ākāsānañcāyatanaṁ asaṅkhatanti. Āmantā.
Ākāsānañcāyatanaṁ bhavo gati sattāvāso saṁsāro yoni viññāṇaṭṭhiti
attabhāvapaṭilābhoti. Āmantā. Asaṅkhataṁ bhavo gati
sattāvāso saṁsāro yoni viññāṇaṭṭhiti attabhāvapaṭilābhoti.
Na hevaṁ vattabbe .pe. Atthi ākāsānañcāyanūpagaṁ kammanti.
Āmantā. Atthi asaṅkhatūpagaṁ kammanti. Na hevaṁ vattabbe .pe.
Atthi ākāsānañcāyatanūpagā sattāti. Āmantā. Atthi
asaṅkhatūpagā sattāti. Na hevaṁ vattabbe .pe.