[1107] Atthi keci ākāsaṁ anākāsaṁ karontīti. Āmantā.
Atthi keci asaṅkhataṁ saṅkhataṁ karontīti. Na hevaṁ vattabbe .pe.

[1108] Ākāse pakkhino 1 gacchanti candimasuriyā gacchanti
tārakarūpāni gacchanti iddhiṁ vikubbanti bāhuṁ cālenti pāṇiṁ
cālenti leḍḍuṁ khipanti laguḷaṁ khipanti iddhiṁ khipanti usuṁ
khipantīti. Āmantā. Asaṅkhate pakkhino 1 gacchanti candimasuriyā
gacchanti tārakarūpāni gacchanti iddhiṁ vikubbanti bāhuṁ cālenti
pāṇiṁ cālenti leḍḍuṁ khipanti laguḷaṁ khipanti iddhiṁ khipanti
usuṁ khipantīti. Na hevaṁ vattabbe .pe.
1. Ma. pakkhiyo.

[1109] Ākāsaṁ parivāretvā gharāni karonti koṭṭhāni
karontīti. Āmantā. Asaṅkhataṁ parivāretvā gharāni karonti
koṭṭhāni karontīti. Na hevaṁ vattabbe .pe.

[1110] Udapāne khaññamāne anākāso ākāso hotīti.
Āmantā. Saṅkhataṁ asaṅkhataṁ hotīti. Na hevaṁ vattabbe .pe.

[1111] Tucchaudapāne pūriyamāne tucchakoṭṭhe pūriyamāne
tucchakumbhiyā pūriyamānāya ākāso antaradhāyatīti. Āmantā.
Asaṅkhataṁ antaradhāyatīti. Na hevaṁ vattabbe .pe.

[1112] Na vattabbaṁ ākāso asaṅkhatoti. Āmantā.
Ākāso saṅkhatoti. Na hevaṁ vattabbe .pe. Tena hi ākāso
asaṅkhatoti.
Ākāsakathā.
----------
Ākāso sanidassanotikathā

[1113] Ākāso sanidassanoti. Āmantā. Rūpaṁ rūpāyatanaṁ
rūpadhātu nīlaṁ pītakaṁ lohitakaṁ odātaṁ cakkhuviññeyyaṁ cakkhusmiṁ
paṭihaññati cakkhussa āpāthaṁ āgacchatīti. Na hevaṁ vattabbe .pe.

[1114] Ākāso sanidassanoti. Āmantā. Cakkhuñca
paṭicca ākāsañca uppajjati cakkhuviññāṇanti. Na hevaṁ
Vattabbe .pe.

[1115] Cakkhuñca paṭicca ākāsañca uppajjati cakkhuviññāṇanti.
Āmantā. Cakkhuñca paṭicca ākāsañca uppajjati
cakkhuviññāṇanti attheva suttantoti. Natthi. Cakkhuñca paṭicca
rūpe ca uppajjati cakkhuviññāṇanti 1 attheva suttantoti.
Āmantā. Hañci cakkhuñca paṭicca rūpe ca uppajjati cakkhuviññāṇanti
attheva suttanto no vata re vattabbe cakkhuñca
paṭicca ākāsañca uppajjati cakkhuviññāṇanti.

[1116] Na vattabbaṁ ākāso sanidassanoti. Āmantā.
Nanu passasi dvinnaṁ rukkhānaṁ antaraṁ dvinnaṁ thambhānaṁ antaraṁ
tāḷachiddaṁ vātapānachiddanti. Āmantā. Hañci passasi dvinnaṁ
rukkhānaṁ antaraṁ dvinnaṁ thambhānaṁ antaraṁ tāḷachiddaṁ vātapānachiddaṁ
tena vata re vattabbe ākāso sanidassanoti.
Ākāso sanidassanotikathā.
--------
Paṭhavīdhātu sanidassanātyādikathā