[1117] Paṭhavīdhātu sanidassanāti. Āmantā. Rūpaṁ rūpāyatanaṁ
rūpadhātu nīlaṁ pītakaṁ lohitakaṁ odātaṁ cakkhuviññeyyaṁ cakkhusmiṁ paṭihaññati
1 Ma. u. 461. saṁ. ni. 68.
Cakkhussa āpāthaṁ āgacchatīti. Na hevaṁ vattabbe .pe.

[1118] Paṭhavīdhātu sanidassanāti. Āmantā. Cakkhuñca
paṭicca paṭhavīdhātuñca uppajjati cakkhuviññāṇanti. Na hevaṁ
vattabbe .pe.

[1119] Cakkhuñca paṭicca paṭhavīdhātuñca uppajjati
cakkhuviññāṇanti. Āmantā. Cakkhuñca paṭicca paṭhavīdhātuñca
uppajjati cakkhuviññāṇanti attheva suttantoti. Natthi. Cakkhuñca
paṭicca rūpe ca uppajjati cakkhuviññāṇanti attheva suttantoti.
Āmantā. Hañci cakkhuñca paṭicca rūpe ca uppajjati cakkhuviññāṇanti
attheva suttanto no vata re vattabbe cakkhuñca
paṭicca paṭhavīdhātuñca uppajjati cakkhuviññāṇanti.

[1120] Na vattabbaṁ paṭhavīdhātu sanidassanāti. Āmantā.
Nanu passasi bhūmiṁ pāsāṇaṁ pabbatanti. Āmantā. Hañci
passasi bhūmiṁ pāsāṇaṁ pabbataṁ tena vata re vattabbe paṭhavīdhātu
sanidassanāti .pe. Na vattabbaṁ āpodhātu sanidassanāti. Āmantā.
Nanu passasi udakanti. Āmantā. Hañci passasi udakaṁ tena
vata re vattabbe āpodhātu sanidassanāti .pe. Na vattabbaṁ
tejodhātu sanidassanāti. Āmantā. Nanu passasi aggiṁ
jalantanti. Āmantā. Hañci passasi aggiṁ jalantaṁ tena
vata re vattabbe tejodhātu sanidassanāti .pe. Na vattabbaṁ
Vāyodhātu sanidassanāti. Āmantā. Nanu passasi vātena rukkhe
sañcāliyamāneti. Āmantā. Hañci passasi vātena rukkhe
sañcāliyamāne tena vata re vattabbe vāyodhātu sanidassanāti .pe.
Paṭhavīdhātu sanidassanātyādikathā.
--------
Cakkhundriyaṁ sanidassanantiādikathā

[1121] Cakkhundriyaṁ sanidassananti. Āmantā. Rūpaṁ
rūpāyatanaṁ rūpadhātu .pe. Cakkhussa āpāthaṁ āgacchatīti. Na
hevaṁ vattabbe .pe.

[1122] Cakkhundriyaṁ sanidassananti. Āmantā. Cakkhuñca
paṭicca cakkhundriyañca uppajjati cakkhuviññāṇanti. Na hevaṁ
vattabbe .pe.

[1123] Cakkhuñca paṭicca cakkhundriyañca uppajjati
cakkhuviññāṇanti. Āmantā. Cakkhuñca paṭicca cakkhundriyañca
uppajjati cakkhuviññāṇanti attheva suttantoti. Natthi. Cakkhuñca
paṭicca rūpe ca uppajjati cakkhuviññāṇanti attheva suttantoti.
Āmantā. Hañci cakkhuñca paṭicca rūpe ca uppajjati cakkhuviññāṇanti
attheva suttanto no vata re vattabbe cakkhuñca
paṭicca cakkhundriyañca uppajjati cakkhuviññāṇanti.

[1124] Na vattabbaṁ pañcindriyāni sanidassanānīti. Āmantā.
Nanu passasi cakkhuṁ sotaṁ ghānaṁ jivhaṁ kāyanti. Āmantā.
Hañci passasi cakkhuṁ sotaṁ ghānaṁ jivhaṁ kāyaṁ tena vata re
vattabbe pañcindriyāni sanidassanānīti .pe.
Cakkhundriyaṁ sanidassanantiādikathā.
--------
Kāyakammaṁ sanidassanantikathā

[1125] Kāyakammaṁ sanidassananti. Āmantā. Rūpaṁ rūpāyatanaṁ
rūpadhātu nīlaṁ pītakaṁ lohitakaṁ odātaṁ cakkhuviññeyyaṁ cakkhusmiṁ
paṭihaññati cakkhussa āpāthaṁ āgacchatīti. Na hevaṁ vattabbe
.pe. Kāyakammaṁ sanidassananti. Āmantā. Cakkhuñca paṭicca
kāyakammañca uppajjati cakkhuviññāṇanti. Na hevaṁ vattabbe
.pe. Cakkhuñca paṭicca kāyakammañca uppajjati cakkhuviññāṇanti.
Āmantā. Cakkhuñca paṭicca kāyakammañca uppajjati cakkhuviññāṇanti
attheva suttantoti. Natthi. Cakkhuñca paṭicca
rūpe ca uppajjati cakkhuviññāṇanti attheva suttantoti.
Āmantā. Hañci cakkhuñca paṭicca rūpe ca uppajjati cakkhu
viññāṇanti attheva suttanto no vata re vattabbe cakkhuñca
paṭicca kāyakammañca uppajjati cakkhuviññāṇanti.

[1126] Na vattabbaṁ kāyakammaṁ sanidassananti. Āmantā.
Nanu passasi abhikkamantaṁ paṭikkamantaṁ ālokentaṁ vilokentaṁ
sammiñjentaṁ pasārentanti. Āmantā. Hañci passasi abhikkamantaṁ
paṭikkamantaṁ ālokentaṁ vilokentaṁ sammiñjentaṁ pasārentaṁ tena
vata re vattabbe kāyakammaṁ sanidassananti.
Kāyakammaṁ sanidassanantikathā.
Paṭhavīdhātu sanidassanātiādiṁ katvā
kāyakammaṁ sanidassananti pariyosānakathā.
Chaṭṭho vaggo.
Tassa uddānaṁ
niyāmo asaṅkhato paṭiccasamuppādo
asaṅkhato cattāri saccāni asaṅkhatāni
cattāro āruppā asaṅkhatā nirodhasamāpatti
asaṅkhatā ākāso asaṅkhato
ākāso sanidassano cattāro mahābhūtā
pañcindriyāni tatheva kāyakammanti.
---------
Saṅgahitakathā