[1137] Phasso cittena sahajātoti. Āmantā. Hañci
phasso cittena sahajāto tena vata re vattabbe phasso cetasikoti.
Vedanā .pe. Saññā cetanā .pe. Saddhā viriyaṁ sati samādhi
paññā rāgo doso moho .pe. Anottappaṁ cittena sahajātanti.
Āmantā. Hañci anottappaṁ cittena sahajātaṁ tena vata re
vattabbe anottappaṁ cetasikanti. Cittena sahajātāti katvā
cetasikāti. Āmantā. Phassena sahajātāti katvā phassasikāti.
Āmantā. Cittena sahajātāti katvā cetasikāti. Āmantā.
Vedanāya .pe. Saññāya cetanāya saddhāya viriyena satiyā samādhinā
paññāya rāgena dosena mohena .pe. Anottappena sahajātāti
katvā anottappasikāti. Āmantā. Natthi cetasiko dhammoti.
Āmantā. Nanu vuttaṁ bhagavatā
cittamidaṁ cetasikā ca dhammā
anattato saṁviditassa honti
hīnappaṇītaṁ tadubhaye viditvā
sammaddaso vedi palokadhammanti
attheva suttantoti. Āmantā. Tena hi atthi cetasiko dhammoti.

[1138] Natthi cetasiko dhammoti. Āmantā. Nanu vuttaṁ
Bhagavatā idha kevaṭṭa bhikkhu parasattānaṁ parapuggalānaṁ cittampi
ādisati cetasikampi ādisati vitakkitampi ādisati vicāritampi
ādisati evampi te mano itthampi te mano itipi te cittanti 1
attheva suttantoti. Āmantā. Tena hi atthi cetasiko dhammoti.
Cetasikakathā.
------
Dānakathā

[1139] Cetasiko dhammo dānanti. Āmantā. Labbhā
cetasiko dhammo paresaṁ dātunti. Na hevaṁ vattabbe .pe. Labbhā
cetasiko dhammo paresaṁ dātunti. Āmantā. Labbhā phasso
paresaṁ dātunti. Na hevaṁ vattabbe .pe. Labbhā vedanā .pe.
Saññā cetanā saddhā viriyaṁ sati samādhi .pe. Paññā paresaṁ
dātunti. Na hevaṁ vattabbe .pe.

[1140] Na vattabbaṁ cetasiko dhammo dānanti. Āmantā.
Dānaṁ aniṭṭhaphalaṁ akantaphalaṁ amanuññaphalaṁ secanakaphalaṁ dukkhudrayaṁ
dukkhavipākanti. Na hevaṁ vattabbe .pe. Nanu dānaṁ iṭṭhaphalaṁ
kantaphalaṁ manuññaphalaṁ asecanakaphalaṁ sukhudrayaṁ sukhavipākanti. Āmantā.
Hañci dānaṁ iṭṭhaphalaṁ kantaphalaṁ manuññaphalaṁ asecanakaphalaṁ sukhudrayaṁ
1 dī. Sī. 277.
Sukhavipākaṁ tena vata re vattabbe cetasiko dhammo dānanti.
Dānaṁ iṭṭhaphalaṁ vuttaṁ bhagavatā cīvaraṁ dānanti. Āmantā.
Cīvaraṁ iṭṭhaphalaṁ kantaphalaṁ manuññaphalaṁ asecanakaphalaṁ sukhudrayaṁ sukhavipākanti.
Na hevaṁ vattabbe .pe. Dānaṁ iṭṭhaphalaṁ vuttaṁ bhagavatā
piṇḍapāto senāsanaṁ gilānapaccayabhesajjaparikkhāro dānanti.
Āmantā. Gilānapaccayabhesajjaparikkhāro iṭṭhaphalo kantaphalo
manuññaphalo asecanakaphalo sukhudrayo sukhavipākoti. Na hevaṁ
vattabbe .pe.

[1141] Na vattabbaṁ cetasiko dhammo dānanti. Āmantā.
Nanu vuttaṁ bhagavatā
saddhā hiriyaṁ kusalañca dānaṁ
dhammā ete sappurisānuyātā
etaṁ hi maggaṁ diviyaṁ vadanti
etena hi gacchati devalokanti 1
attheva suttantoti. Āmantā. Tena hi cetasiko dhammo dānanti.

[1142] Na vattabbaṁ cetasiko dhammo dānanti. Āmantā.
Nanu vuttaṁ bhagavatā pañcimāni bhikkhave dānāni mahādānāni
aggaññāni rattaññāni vaṁsaññāni porāṇāni asaṅkiṇṇāni
asaṅkiṇṇapubbāni na saṅkiyanti na saṅkiyissanti appaṭikkuṭṭhāni
1 aṁ. aṭṭhaka. 93.
Samaṇehi brāhmaṇehi viññūhi. Katamāni pañca. Idha bhikkhave
ariyasāvako pāṇātipātaṁ pahāya pāṇātipātā paṭivirato hoti
pāṇātipātā paṭivirato bhikkhave ariyasāvako aparimāṇānaṁ sattānaṁ
abhayaṁ deti averaṁ deti abyāpajjhaṁ deti aparimāṇānaṁ sattānaṁ
abhayaṁ datvā averaṁ datvā abyāpajjhaṁ datvā aparimāṇassa abhayassa
averassa abyāpajjhassa bhāgī hoti idaṁ bhikkhave paṭhamaṁ dānaṁ
mahādānaṁ aggaññaṁ rattaññaṁ vaṁsaññaṁ porāṇaṁ asaṅkiṇṇaṁ asaṅkiṇṇapubbaṁ
na saṅkiyati na saṅkiyissati appaṭikkuṭṭhaṁ samaṇehi
brāhmaṇehi viññūhi puna caparaṁ bhikkhave ariyasāvako adinnādānaṁ
pahāya .pe. Kāmesumicchācāraṁ pahāya .pe. Musāvādaṁ pahāya
.pe. Surāmerayamajjapamādaṭṭhānaṁ pahāya surāmerayamajjapamādaṭṭhānā
paṭivirato hoti surāmerayamajjapamādaṭṭhānā paṭivirato bhikkhave
ariyasāvako aparimāṇānaṁ sattānaṁ abhayaṁ deti averaṁ deti
abyāpajjhaṁ deti aparimāṇānaṁ sattānaṁ abhayaṁ datvā averaṁ
datvā abyāpajjhaṁ datvā aparimāṇassa abhayassa averassa
abyāpajjhassa bhāgī hoti idaṁ bhikkhave pañcamaṁ dānaṁ mahādānaṁ
aggaññaṁ rattaññaṁ vaṁsaññaṁ porāṇaṁ asaṅkiṇṇaṁ asaṅkiṇṇapubbaṁ
na saṅkiyati na saṅkiyissati appaṭikkuṭṭhaṁ samaṇehi brāhmaṇehi
viññūhi imāni kho bhikkhave pañca dānāni mahādānāni aggaññāni
rattaññāni vaṁsaññāni porāṇāni asaṅkiṇṇāni asaṅkiṇṇapubbāni
Na saṅkiyanti na saṅkiyissanti appaṭikkuṭṭhāni samaṇehi brāhmaṇehi
viññūhīti 1 attheva suttantoti. Āmantā. Tena hi cetasiko
dhammo dānanti.

[1143] Na vattabbaṁ deyyadhammo dānanti. Āmantā.
Nanu vuttaṁ bhagavatā idhekacco annaṁ deti pānaṁ deti
vatthaṁ deti yānaṁ deti mālaṁ deti gandhaṁ deti vilepanaṁ
deti seyyaṁ deti āvasathaṁ deti padīpeyyaṁ detīti attheva
suttantoti. Āmantā. Tena hi deyyadhammo dānanti.

[1144] Deyyadhammo dānanti. Āmantā. Deyyadhammo
iṭṭhaphalo kantaphalo manuññaphalo asecanakaphalo sukhudrayo sukhavipākoti.
Na hevaṁ vattabbe .pe. Dānaṁ iṭṭhaphalaṁ vuttaṁ bhagavatā
cīvaraṁ dānanti. Āmantā. Cīvaraṁ iṭṭhaphalaṁ kantaphalaṁ manuññaphalaṁ
asecanakaphalaṁ sukhudrayaṁ sukhavipākanti. Na hevaṁ vattabbe .pe.
Dānaṁ iṭṭhaphalaṁ vuttaṁ bhagavatā piṇḍapāto dānaṁ senāsanaṁ
dānaṁ gilānapaccayabhesajjaparikkhāro dānanti. Āmantā. Gilānapaccaya-
bhesajjaparikkhāro iṭṭhaphalo kantaphalo manuññaphalo asecanakaphalo
sukhudrayo sukhavipākoti. Na hevaṁ vattabbe .pe. Tena hi
na vattabbaṁ deyyadhammo dānanti.
Dānakathā.
1 aṁ. aṭṭhaka. 103 pariyāyena.
Paribhogamayapuññakathā

[1145] Paribhogamayaṁ puññaṁ vaḍḍhatīti. Āmantā.
Paribhogamayo phasso vaḍḍhati vedanā vaḍḍhati saññā vaḍḍhati
cetanā vaḍḍhati cittaṁ vaḍḍhati saddhā vaḍḍhati viriyaṁ vaḍḍhati
sati vaḍḍhati samādhi vaḍḍhati paññā vaḍḍhatīti. Na hevaṁ
vattabbe .pe.

[1146] Paribhogamayaṁ puññaṁ vaḍḍhatīti. Āmantā. Latā
viya vaḍḍhati māluvā viya vaḍḍhati rukkho viya vaḍḍhati tiṇaṁ
viya vaḍḍhati muñjapuñjo viya vaḍḍhatīti. Na hevaṁ vattabbe .pe.