[1157] Na vattabbaṁ ito dinnena tattha yāpentīti. Āmantā.
Nanu vuttaṁ bhagavatā pañcimāni bhikkhave ṭhānāni sampassantā
mātāpitaro puttaṁ icchanti kule jāyamānaṁ. Katamāni pañca. Bhaṭo
vā no bharissati kiccaṁ vā no karissati kulavaṁso ciraṁ ṭhassati
dāyajjaṁ paṭipajjati 1 atha vā pana petānaṁ kālakatānaṁ dakkhiṇaṁ anuppadassati
imāni kho bhikkhave pañca ṭhānāni sampassantā mātāpitaro
puttaṁ icchanti kule jāyamānanti
pañca ṭhānāni sampassaṁ puttaṁ icchanti paṇḍitā
bhaṭo vā no bharissati kiccaṁ vā no karissati
kulavaṁso ciraṁ tiṭṭhe dāyajjaṁ paṭipajjati 2
atha vā pana petānaṁ dakkhiṇaṁ anuppadassati
ṭhānānetāni sampassaṁ puttaṁ icchanti paṇḍitā
tasmā santo sappurisā kataññū katavedino
bharanti mātāpitaro pubbe katamanussaraṁ
karonti tesaṁ kiccāni yathā taṁ pubbakārinaṁ
ovādakārī bhaṭaposī kulavaṁsaṁ ahāpayaṁ
saddho sīlena sampanno putto hoti pasaṁsiyoti 3
attheva suttantoti. Āmantā. Tena hi ito dinnena tattha
yāpentīti.
Itodinnakathā.
1 Ma. dāyajjaṁ me paṭipajjissati. 2. Ma. paṭipajjissati. 3 aṁ. pañcaka. 47.
Paṭhavīkammavipākotikathā

[1158] Paṭhavī kammavipākoti. Āmantā. Sukhavedaniyā
dukkhavedaniyā adukkhamasukhavedaniyā sukhāya vedanāya sampayuttā
dukkhāya vedanāya sampayuttā adukkhamasukhāya vedanāya sampayuttā
phassena sampayuttā vedanāya sampayuttā saññāya sampayuttā
cetanāya sampayuttā cittena sampayuttā sārammaṇā atthi
tāya āvajjanā ābhogo samannāhāro manasikāro cetanā patthanā
paṇidhīti. Na hevaṁ vattabbe .pe. Nanu na sukhavedaniyā na dukkhavedaniyā
na adukkhamasukhavedaniyā na sukhāya vedanāya sampayuttā
na dukkhāya vedanāya sampayuttā na adukkhamasukhāya vedanāya sampayuttā
na phassena sampayuttā na vedanāya sampayuttā na saññāya
sampayuttā na cetanāya sampayuttā na cittena sampayuttā
anārammaṇā natthi tāya āvajjanā ābhogo samannāhāro manasikāro
cetanā patthanā paṇidhīti. Āmantā. Hañci na sukhavedaniyā
na dukkhavedaniyā .pe. Anārammaṇā natthi tāya āvajjanā
.pe. Paṇidhi no vata re vattabbe paṭhavī kammavipākoti.

[1159] Phasso kammavipāko phasso sukhavedaniyo dukkhavedaniyo
adukkhamasukhavedaniyo sukhāya vedanāya sampayutto dukkhāya .pe.
Adukkhamasukhāya vedanāya sampayutto phassena sampayutto vedanāya
Sampayutto saññāya sampayutto cetanāya sampayutto cittena
sampayutto sārammaṇā atthi tassa āvajjanā .pe. Paṇidhīti.
Āmantā. Paṭhavī kammavipāko paṭhavī sukhavedaniyā dukkhavedaniyā
adukkhamasukhavedaniyā sukhāya vedanāya sampayuttā dukkhāya vedanāya
sampayuttā adukkhamasukhāya vedanāya sampayuttā phassena sampayuttā
vedanāya sampayuttā saññāya sampayuttā cetanāya sampayuttā
cittena sampayuttā sārammaṇā atthi tāya āvajjanā ābhogo
samannāhāro manasikāro cetanā patthanā paṇidhīti. Na hevaṁ
vattabbe .pe.

[1160] Paṭhavī kammavipāko paṭhavī na sukhavedaniyā na
dukkhavedaniyā .pe. Anārammaṇā natthi tāya āvajjanā .pe.
Paṇidhīti. Āmantā. Phasso kammavipāko phasso na sukhavedaniyo
na dukkhavedaniyo .pe. Anārammaṇo natthi tassa āvajjanā
.pe. Paṇidhīti. Na hevaṁ vattabbe .pe.

[1161] Paṭhavī kammavipākoti. Āmantā. Paṭhavī paggahaniggahūpagā
chedanabhedanūpagāti. Āmantā. Kammavipāko paggahaniggahūpago
chedanabhedanūpagoti. Na hevaṁ vattabbe .pe.

[1162] Labbhā paṭhavī ketuṁ viketuṁ āṭhapetuṁ ocinituṁ vicinitunti.
Āmantā. Labbhā kammavipāko ketuṁ viketuṁ āṭhapetuṁ ocinituṁ
vicinitunti. Na hevaṁ vattabbe .pe.

[1163] Paṭhavī paresaṁ sādhāraṇāti. Āmantā. Kammavipāko
paresaṁ sādhāraṇoti. Na hevaṁ vattabbe .pe.

[1164] Kammavipāko paresaṁ sādhāraṇoti. Āmantā. Nanu
vuttaṁ bhagavatā
asādhāraṇamaññesaṁ acorāharaṇo nidhi
kayirātha macco puññāni sa ve sucaritaṁ careti
attheva suttantoti. Āmantā. Tena hi na vattabbaṁ kammavipāko
paresaṁ sādhāraṇoti.

[1165] Paṭhavī kammavipākoti. Āmantā. Paṭhamaṁ paṭhavī saṇṭhāti
pacchā sattā uppajjantīti. Āmantā. Paṭhamaṁ vipāko uppajjati
pacchā vipākapaṭilābhāya kammaṁ karontīti. Na hevaṁ vattabbe .pe.

[1166] Paṭhavī sabbasattānaṁ kammavipākoti. Āmantā.
Sabbe sattā paṭhaviṁ paribhuñjantīti. Na hevaṁ vattabbe .pe. Sabbe
sattā paṭhaviṁ paribhuñjantīti. Āmantā. Atthi keci paṭhaviṁ paribhuñjitvā
parinibbāyantīti. Āmantā. Atthi keci kammavipākaṁ
akhepetvā parinibbāyantīti. Na hevaṁ vattabbe .pe.