[1067] Phassārammaṇe ñāṇaṁ na vattabbaṁ cetopariyāye
ñāṇanti. Āmantā. Phassapariyāye ñāṇanti. Na hevaṁ
vattabbe .pe. Vedanārammaṇe ñāṇaṁ .pe. Saññārammaṇe
ñāṇaṁ .pe. Anottappārammaṇe ñāṇaṁ na vattabbaṁ cetopariyāye
ñāṇanti. Āmantā. Anottappapariyāye ñāṇanti. Na hevaṁ
vattabbe .pe.

[1068] Na vattabbaṁ cetopariyāye ñāṇaṁ cittārammaṇaññeva
na aññārammaṇanti. Āmantā. Nanu cetopariyāye ñāṇanti.
Āmantā. Hañci cetopariyāye ñāṇaṁ tena vata re vattabbe
Cetopariyāye ñāṇaṁ cittārammaṇaññeva na aññārammaṇanti.
Cittārammaṇakathā.
------
Anāgatañāṇakathā

[1069] Anāgate ñāṇaṁ atthīti. Āmantā. Anāgataṁ
mūlato jānāti hetuto jānāti nidānato jānāti sambhavato
jānāti pabhavato jānāti samuṭṭhānato jānāti āhārato
jānāti ārammaṇato jānāti paccayato jānāti samudayato
jānātīti. Na hevaṁ vattabbe .pe.

[1070] Anāgate ñāṇaṁ atthīti. Āmantā. Anāgataṁ
hetupaccayataṁ jānāti ārammaṇapaccayataṁ jānāti adhipatipaccayataṁ
jānāti anantarapaccayataṁ jānāti samanantarapaccayataṁ jānātīti.
Na hevaṁ vattabbe .pe.

[1071] Anāgate ñāṇaṁ atthīti. Āmantā. Gotrabhuno
puggalassa sotāpattimagge ñāṇaṁ atthīti. Na hevaṁ vattabbe .pe.
Sotāpattiphalasacchikiriyāya paṭipannassa puggalassa sotāpattiphale
ñāṇaṁ atthīti. Na hevaṁ vattabbe .pe. Sakadāgāmiphalasacchikiriyāya
.pe. Anāgāmiphalasacchikiriyāya .pe. Arahattasacchikiriyāya paṭipannassa
puggalassa arahatte ñāṇaṁ atthīti. Na hevaṁ vattabbe .pe.

[1072] Na vattabbaṁ anāgate ñāṇaṁ atthīti. Āmantā.
Nanu vuttaṁ bhagavatā pāṭaliputtassa kho ānanda tayo antarāyā
bhavissanti aggito vā udakato vā mithubhedā vāti 1 attheva
suttantoti. Āmantā. Tena hi anāgate ñāṇaṁ atthīti.
Anāgatañāṇakathā.
--------
Paccuppannañāṇakathā

[1073] Paccuppanne 2 ñāṇaṁ atthīti. Āmantā. Tena ñāṇena
taṁ ñāṇaṁ jānātīti. Na hevaṁ vattabbe .pe. Tena ñāṇena taṁ
ñāṇaṁ jānātīti. Āmantā. Tena ñāṇena taṁ ñāṇaṁ ñāṇanti
jānātīti. Na hevaṁ vattabbe .pe. Tena ñāṇena taṁ ñāṇaṁ
ñāṇanti jānātīti. Āmantā. Taṁ ñāṇaṁ tassa ñāṇassa
ārammaṇanti. Na hevaṁ vattabbe .pe. Taṁ ñāṇaṁ tassa ñāṇassa
ārammaṇanti. Āmantā. Tena phassena taṁ phassaṁ phusati tāya
vedanāya taṁ vedanaṁ vedeti tāya saññāya taṁ saññaṁ sañjānāti
tāya cetanāya taṁ cetanaṁ ceteti tena cittena taṁ cittaṁ cinteti
tena vitakkena taṁ vitakkaṁ vitakketi tena vicārena taṁ vicāraṁ vicāreti
tāya pītiyā taṁ pītiṁ piyāyati tāya satiyā taṁ satiṁ sarati tāya
1 vi. Ma. 2. 84. 2. Ma. paṭuppanne. (sabbattha sadisameva.)
Paññāya taṁ paññaṁ pajānāti tena khaggena taṁ khaggaṁ chindati
tena pharasunā taṁ pharasuṁ tacchati tāya kudhāriyā taṁ kudhāriṁ tacchati
tāya vāsiyā taṁ vāsiṁ tacchati tāya sūciyā taṁ sūciṁ sibbeti
tena aṅgulaggena taṁ aṅgulaggaṁ parāmasati tena nāsikaggena taṁ
nāsikaggaṁ parāmasati tena matthakena taṁ matthakaṁ parāmasati tena
gūthena taṁ gūthaṁ dhovati tena muttena taṁ muttaṁ dhovati tena
kheḷena taṁ kheḷaṁ dhovati tena pubbena taṁ pubbaṁ dhovati tena
lohitena taṁ lohitaṁ dhovatīti. Na hevaṁ vattabbe .pe.

[1074] Na vattabbaṁ paccuppanne ñāṇaṁ atthīti. Āmantā.
Nanu sabbasaṅkhāre aniccato diṭṭhe tampi ñāṇaṁ aniccato diṭṭhaṁ
hotīti. Āmantā. Hañci sabbasaṅkhāre aniccato diṭṭhe tampi
ñāṇaṁ aniccato diṭṭhaṁ hoti tena vata re vattabbe paccuppanne
ñāṇaṁ atthīti.
Paccuppannañāṇakathā.
-------
Phalañāṇakathā

[1075] Sāvakassa phale ñāṇaṁ atthīti. Āmantā. Sāvako
phalassakataṁ paññāpetīti. Na hevaṁ vattabbe .pe. Sāvakassa phale
ñāṇaṁ atthīti. Āmantā. Atthi sāvakassa phalaparopariyattaṁ 1
1 Ma. phalaparopariyatti. (īdisoyeva parato padesu ikārantāgamo.)
Indriyaparopariyattaṁ puggalaparopariyattanti. Na hevaṁ vattabbe
.pe. Sāvakassa phale ñāṇaṁ atthīti. Āmantā. Atthi
sāvakassa khandhapaññatti āyatanapaññatti dhātupaññatti saccapaññatti
indriyapaññatti puggalapaññattīti. Na hevaṁ vattabbe .pe.
Sāvakassa phale ñāṇaṁ atthīti. Āmantā. Sāvako jino satthā
sammāsambuddho sabbaññū sabbadassāvī dhammasāmī dhammapaṭisaraṇoti.
Na hevaṁ vattabbe .pe. Sāvakassa phale ñāṇaṁ atthīti.
Āmantā. Sāvako anuppannassa maggassa uppādetā asañjātassa
maggassa sañjanetā anakkhātassa maggassa akkhātā maggaññū
maggavidū maggakovidoti. Na hevaṁ vattabbe .pe.

[1076] Na vattabbaṁ sāvakassa phale ñāṇaṁ atthīti. Āmantā.
Sāvako aññāṇīti. Na hevaṁ vattabbe .pe. Tena hi sāvakassa
phale ñāṇaṁ atthīti.
Phalañāṇakathā.
Pañcamo vaggo.
Tassa uddānaṁ
vimuttiñāṇaṁ vimuttaṁ sekkhassa asekkhaṁ ñāṇaṁ
viparīteñāṇaṁ aniyatassa niyāmagamanāya atthi ñāṇaṁ
sabbaṁ ñāṇaṁ paṭisambhidāti sammatiñāṇaṁ
cetopariyāye ñāṇaṁ anāgate ñāṇaṁ
Paccuppanne ñāṇaṁ sāvakassa phale ñāṇanti.
Mahāpaṇṇāsako.
Sattūpaladdhi upahāro balaṁ gihissa arahā ca vimuttipañcamaṁ.
---------
Niyāmakathā