[1057] Sotāpattiphalasacchikiriyāya paṭipannassa puggalassa sotāpattiphale
ñāṇaṁ atthīti. Na hevaṁ vattabbe .pe. Sakadāgāmiphalasacchikiriyāya
.pe. Anāgāmiphalasacchikiriyāya .pe. Arahattasacchikiriyāya
paṭipannassa puggalassa arahatte ñāṇaṁ atthīti. Na
hevaṁ vattabbe .pe.

[1058] Na vattabbaṁ aniyatassa niyāmagamanāya atthi ñāṇanti.
Āmantā. Nanu bhagavā jānāti ayaṁ puggalo sammattaniyāmaṁ
okkamissati bhabbo ayaṁ puggalo dhammaṁ abhisametunti. Āmantā.
Hañci bhagavā jānāti ayaṁ puggalo sammattaniyāmaṁ okkamissati
bhabbo ayaṁ puggalo dhammaṁ abhismetuṁ tena vata re vattabbe
aniyatassa niyāmagamanāya atthi ñāṇanti.
Niyāmakathā.
-------
Paṭisambhidākathā

[1059] Sabbaṁ ñāṇaṁ paṭisambhidāti. Āmantā. Sammatiñāṇaṁ
Paṭisambhidāti. Na hevaṁ vattabbe .pe. Sammatiñāṇaṁ paṭisambhidāti.
Āmantā. Ye keci sammatiṁ jānanti sabbe te
paṭisambhidappattāti. Na hevaṁ vattabbe .pe. Sabbaṁ ñāṇaṁ
paṭisambhidāti. Āmantā. Cetopariyāye ñāṇaṁ paṭisambhidāti. Na
hevaṁ vattabbe .pe. Cetopariyāye ñāṇaṁ paṭisambhidāti.
Āmantā. Ye keci paracittaṁ jānanti sabbe te paṭisambhidappattāti.
Na hevaṁ vattabbe .pe.

[1060] Sabbaṁ ñāṇaṁ paṭisambhidāti. Āmantā. Sabbā
paññā paṭisambhidāti. Na hevaṁ vattabbe .pe. Sabbā paññā
paṭisambhidāti. Āmantā. Paṭhavīkasiṇaṁ samāpattiṁ samāpannassa
atthi paññā sā paññā paṭisambhidāti. Na hevaṁ vattabbe
.pe. Āpokasiṇaṁ .pe. Tejokasiṇaṁ .pe. Vāyokasiṇaṁ .pe.
Nīlakasiṇaṁ .pe. Pītakasiṇaṁ .pe. Lohitakasiṇaṁ .pe. Odātakasiṇaṁ
.pe. Ākāsānañcāyatanaṁ .pe. Viññāṇañcāyatanaṁ .pe.
Ākiñcaññāyatanaṁ .pe. Nevasaññānāsaññāyatanaṁ samāpannassa
.pe. Dānaṁ dadantassa .pe. Cīvaraṁ dadantassa .pe. Piṇḍapātaṁ
dadantassa .pe. Senāsanaṁ dadantassa .pe. Gilānapaccayabhesajjaparikkhāraṁ
dadantassa atthi paññā sā paññā paṭisambhidāti.
Na hevaṁ vattabbe .pe.

[1061] Na vattabbaṁ sabbaṁ ñāṇaṁ paṭisambhidāti. Āmantā.
Atthi lokuttarā paññā sā paññā na paṭisambhidāti. Na
hevaṁ vattabbe .pe. Tena hi sabbaṁ ñāṇaṁ paṭisambhidāti.
Paṭisambhidākathā
----------
sammatiñāṇakathā

[1062] Na vattabbaṁ sammatiñāṇaṁ saccārammaṇaññeva na
aññārammaṇanti. Āmantā. Nanu paṭhavīkasiṇaṁ samāpattiṁ
samāpannassa atthi ñāṇaṁ paṭhavīkasiṇañca sammatisaccamhīti.
Āmantā. Hañci paṭhavīkasiṇaṁ samāpattiṁ samāpannassa atthi
ñāṇaṁ paṭhavīkasiṇañca sammatisaccamhi tena vata re vattabbe
sammatiñāṇaṁ saccārammaṇaññeva na aññārammaṇanti.

[1063] Na vattabbaṁ sammatiñāṇaṁ saccārammaṇaññeva na
aññārammaṇanti. Āmantā. Nanu āpokasiṇaṁ .pe. Tejokasiṇaṁ
.pe. Gilānapaccayabhesajjaparikkhāraṁ dadantassa atthi ñāṇaṁ
gilānapaccayabhesajjaparikkhāro ca sammatisaccamhīti. Āmantā. Hañci
gilānapaccayabhesajjaparikkhāraṁ dadantassa atthi ñāṇaṁ
gilānapaccayabhesajjaparikkhāro ca sammatisaccamhi tena vata re vattabbe
sammatiñāṇaṁ saccārammaṇaññeva na aññārammaṇanti.

[1064] Sammatiñāṇaṁ saccārammaṇaññeva na aññārammaṇanti.
Āmantā. Tena ñāṇena dukkhaṁ parijānāti samudayaṁ pajahati
nirodhaṁ sacchikaroti maggaṁ bhāvetīti. Na hevaṁ vattabbe .pe.
Sammatiñāṇakathā.
----------
Cittārammaṇakathā

[1065] Cetopariyāye ñāṇaṁ cittārammaṇaññeva na
aññārammaṇanti. Āmantā. Nanu atthi koci sarāgaṁ cittaṁ sarāgaṁ
cittanti pajānātīti. Āmantā. Hañci atthi koci sarāgaṁ
cittaṁ sarāgaṁ cittanti pajānāti no vata re vattabbe cetopariyāye
ñāṇaṁ cittārammaṇaññeva na aññārammaṇanti. Nanu atthi
koci vītarāgaṁ cittaṁ vītarāgaṁ cittanti .pe. Sadosaṁ cittaṁ
.pe. Vītadosaṁ cittaṁ samohaṁ cittaṁ vītamohaṁ cittaṁ saṅkhittaṁ cittaṁ
vikkhittaṁ cittaṁ mahaggataṁ cittaṁ amahaggataṁ cittaṁ sauttaraṁ cittaṁ
anuttaraṁ cittaṁ samāhitaṁ cittaṁ asamāhitaṁ cittaṁ vimuttaṁ cittaṁ
.pe. Avimuttaṁ cittaṁ avimuttaṁ cittanti pajānātīti. Āmantā.
Hañci atthi koci avimuttaṁ cittaṁ avimuttaṁ cittanti pajānāti
no vata re vattabbe cetopariyāye ñāṇaṁ cittārammaṇaññeva
naṁ aññārammaṇanti.

[1066] Phassārammaṇe ñāṇaṁ vattabbaṁ cetopariyāye ñāṇanti.
Āmantā. Hañci phassārammaṇe ñāṇaṁ vattabbaṁ cetopariyāye
ñāṇaṁ no vata re vattabbe cetopariyāye ñāṇaṁ cittārammaṇaññeva
na aññārammaṇanti. Vedanārammaṇe ñāṇaṁ .pe.
Saññārammaṇe ñāṇaṁ cetanārammaṇe ñāṇaṁ cittārammaṇe ñāṇaṁ
saddhārammaṇe ñāṇaṁ viriyārammaṇe ñāṇaṁ satārammaṇe ñāṇaṁ
samādhārammaṇe ñāṇaṁ paññārammaṇe ñāṇaṁ .pe. Rāgārammaṇe
ñāṇaṁ .pe. Dosārammaṇe ñāṇaṁ .pe. Anottappārammaṇe
ñāṇaṁ vattabbaṁ cetopariyāye ñāṇanti. Āmantā. Hañci
anottappārammaṇe ñāṇaṁ vattabbaṁ cetopariyāye ñāṇaṁ no
vata re vattabbe cetopariyāye ñāṇaṁ cittārammaṇaññeva na
aññārammaṇanti.