[1077] Niyāmo asaṅkhatoti. Āmantā. Nibbānaṁ tāṇaṁ
leṇaṁ saraṇaṁ parāyanaṁ accutaṁ amatanti. Na hevaṁ vattabbe .pe.

[1078] Niyāmo asaṅkhato nibbānaṁ asaṅkhatanti. Āmantā.
Dve asaṅkhatānīti. Na hevaṁ vattabbe .pe. Dve asaṅkhatānīti.
Āmantā. Dve tāṇāni dve leṇāni dve saraṇāni dve
parāyanāni dve accutāni dve amatāni dve nibbānānīti.
Na hevaṁ vattabbe .pe. Dve nibbānānīti. Āmantā. Atthi
dvinnaṁ nibbānānaṁ uccanīcatā hīnappaṇītatā ukkaṁsāvakaṁso sīmā vā
bhedo vā rāji vā antarikā vāti. Na hevaṁ vattabbe .pe.

[1079] Niyāmo asaṅkhatoti. Āmantā. Atthi keci
niyāmaṁ okkamanti paṭilabhanti uppādenti samuppādenti uṭṭhāpenti
samuṭṭhāpenti nibbattenti abhinibbattenti janenti sañjanentīti.
Āmantā. Atthi keci asaṅkhataṁ okkamanti paṭilabhanti uppādenti
samuppādenti uṭṭhāpenti samuṭṭhāpenti nibbattenti abhinibbattenti
Janenti sañjanentīti. Na hevaṁ vattabbe .pe.

[1080] Niyāmo asaṅkhatoti. Āmantā. Maggo asaṅkhatoti.
Na hevaṁ vattabbe .pe. Maggo saṅkhatoti. Āmantā. Niyāmo
saṅkhatoti. Na hevaṁ vattabbe .pe. Sotāpattiniyāmo asaṅkhatoti.
Āmantā. Sotāpattimaggo asaṅkhatoti. Na hevaṁ vattabbe
.pe. Sotāpattimaggo saṅkhatoti. Āmantā. Sotāpattiniyāmo
saṅkhatoti. Na hevaṁ vattabbe .pe. Sakadāgāminiyāmo .pe.
Anāgāminiyāmo .pe. Arahattaniyāmo asaṅkhatoti. Āmantā.
Arahattamaggo asaṅkhatoti. Na hevaṁ vattabbe .pe. Arahattamaggo
saṅkhatoti. Āmantā. Arahattaniyāmo saṅkhatoti. Na hevaṁ
vattabbe .pe.

[1081] Sotāpattiniyāmo asaṅkhato .pe. Arahattaniyāmo
asaṅkhato nibbānaṁ asaṅkhatanti. Āmantā. Pañca asaṅkhatānīti.
Na hevaṁ vattabbe .pe. Pañca asaṅkhatānīti. Āmantā. Pañca
tāṇāni .pe. Antarikā vāti. Na hevaṁ vattabbe .pe.

[1082] Niyāmo asaṅkhatoti. Āmantā. Micchattaniyāmo
asaṅkhatoti. Na hevaṁ vattabbe .pe. Micchattaniyāmo saṅkhatoti.
Āmantā. Sammattaniyāmo saṅkhatoti. Na hevaṁ vattabbe .pe.

[1083] Na vattabbaṁ niyāmo asaṅkhatoti. Āmantā. Niyāme
uppajja niruddhe aniyato hotīti. Na hevaṁ vattabbe .pe.
Tena hi niyāmo asaṅkhatoti. Micchattaniyāme uppajja niruddhe
aniyato hotīti. Na hevaṁ vattabbe .pe. Tena hi micchattaniyāmo
asaṅkhatoti.
Niyāmakathā.
---------
Paṭiccasamuppādakathā

[1084] Paṭiccasamuppādo asaṅkhatoti. Āmantā. Nibbānaṁ
tāṇaṁ leṇaṁ saraṇaṁ parāyanaṁ accutaṁ amatanti. Na hevaṁ vattabbe
.pe. Paṭiccasamuppādo asaṅkhato nibbānaṁ asaṅkhatanti.
Āmantā. Dve asaṅkhatānīti. Na hevaṁ vattabbe .pe. Dve
asaṅkhatānīti. Āmantā. Dve tāṇāni dve leṇāni dve
saraṇāni dve parāyanāni dve accutāni dve amatāni dve
nibbānānīti. Na hevaṁ vattabbe .pe. Dve nibbānānīti.
Āmantā. Atthi dvinnaṁ nibbānānaṁ uccanīcatā hīnappaṇītatā
ukkaṁsāvakaṁso sīmā vā bhedo vā rāji vā antarikā vāti.
Na hevaṁ vattabbe .pe.

[1085] Paṭiccasamuppādo asaṅkhatoti. Āmantā. Avijjā
asaṅkhatāti. Na hevaṁ vattabbe .pe. Avijjā saṅkhatāti.
Āmantā. Paṭiccasamuppādo saṅkhatoti. Na hevaṁ vattabbe .pe.
Paṭiccasamuppādo asaṅkhatoti. Āmantā. Avijjāpaccayā saṅkhārā
asaṅkhatāti. Na hevaṁ vattabbe .pe. Avijjāpaccayā saṅkhārā
saṅkhatāti. Āmantā. Paṭiccasamuppādo saṅkhatoti. Na hevaṁ
vattabbe .pe. Paṭiccasamuppādo asaṅkhatoti. Āmantā.
Saṅkhārapaccayā viññāṇaṁ asaṅkhatanti. Na hevaṁ vattabbe .pe.
Saṅkhārapaccayā viññāṇaṁ saṅkhatanti. Āmantā. Paṭiccasamuppādo
saṅkhatoti. Na hevaṁ vattabbe .pe. Paṭiccasamuppādo asaṅkhatoti.
Āmantā. Viññāṇapaccayā nāmarūpaṁ asaṅkhatanti. Na hevaṁ
vattabbe .pe. Viññāṇapaccayā nāmarūpaṁ saṅkhatanti. Āmantā.
Paṭiccasamuppādo saṅkhatoti. Na hevaṁ vattabbe .pe. Paṭiccasamuppādo
asaṅkhatoti. Āmantā. Jātipaccayā jarāmaraṇaṁ
asaṅkhatanti. Na hevaṁ vattabbe .pe. Jātipaccayā jarāmaraṇaṁ
saṅkhatanti. Āmantā. Paṭiccasamuppādo saṅkhatoti. Na hevaṁ
vattabbe .pe.

[1086] Na vattabbaṁ paṭiccasamuppādo asaṅkhatoti. Āmantā.
Nanu vuttaṁ bhagavatā jātipaccayā bhikkhave jarāmaraṇaṁ uppādā
vā tathāgatānaṁ anuppādā vā tathāgatānaṁ ṭhitā va sā dhātu dhammaṭṭhitatā
dhammaniyāmatā idappaccayatā taṁ tathāgato abhisambujjhati abhisameti
abhisambujjhitvā abhisametvā ācikkhati deseti paññapeti paṭṭhapeti
vivarati vibhajati uttānīkaroti passathāti cāha jātipaccayā bhikkhave
Jarāmaraṇaṁ bhavapaccayā bhikkhave jāti .pe. Avijjāpaccayā bhikkhave
saṅkhārā uppādā vā tathāgatānaṁ anuppādā vā tathāgatānaṁ ṭhitā va
sā dhātu .pe. Passathāti cāha avijjāpaccayā bhikkhave saṅkhārā
iti kho bhikkhave yā tatra tathatā avitathatā anaññathatā idappaccayatā
ayaṁ vuccati bhikkhave paṭiccasamuppādoti 1 attheva suttantoti.
Āmantā. Tena hi paṭiccasamuppādo asaṅkhatoti.