[1017] Sakadāgāmiphalasacchikiriyāya paṭipannena puggalena sotāpattiphalaṁ
paṭiladdhaṁ tena ca aparihīnoti. Sakadāgāmiphalasacchikiriyāya
paṭipanno puggalo sotāpattiphalena samannāgatoti. Āmantā.
Sakadāgāmiphalasacchikiriyāya paṭipannena puggalena dve maggā paṭiladdhā
tehi ca aparihīnoti. Sakadāgāmiphalasacchikiriyāya paṭipanno puggalo
dvīhi maggehi samannāgatoti. Na hevaṁ vattabbe .pe.
Aparāpi samannāgatakathā.
------
Sabbasaññojanappahānakathā

[1018] Sabbasaññojanānaṁ pahānaṁ arahattanti. Āmantā.
Arahattamaggena sabbe saññojanā pahīyantīti. Na hevaṁ vattabbe .pe.

[1019] Arahattamaggena sabbe saññojanā pahīyantīti.
Āmantā. Arahattamaggena sakkāyadiṭṭhiṁ vicikicchaṁ sīlabbataparāmāsaṁ
pajahatīti. Na hevaṁ vattabbe .pe.

[1020] Arahattamaggena sakkāyadiṭṭhiṁ vicikicchaṁ sīlabbataparāmāsaṁ
pajahatīti. Āmantā. Nanu tiṇṇaṁ saññojanānaṁ pahānaṁ sotāpattiphalaṁ
vuttaṁ bhagavatāti. Āmantā. Hañci tiṇṇaṁ saññojanānaṁ
pahānaṁ sotāpattiphalaṁ vuttaṁ bhagavatā no vata re vattabbe
Arahattamaggena sabbe saññojanā pahīyantīti. Arahattamaggena
sabbe saññojanā pahīyantīti. Āmantā. Arahattamaggena
oḷārikaṁ kāmarāgaṁ oḷārikaṁ byāpādaṁ pajahatīti. Na hevaṁ
vattabbe .pe.

[1021] Arahattamaggena oḷārikaṁ kāmarāgaṁ oḷārikaṁ byāpādaṁ
pajahatīti. Āmantā. Nanu kāmarāgabyāpādānaṁ tanubhāvaṁ
sakadāgāmiphalaṁ vuttaṁ bhagavatāti. Āmantā. Hañci kāmarāgabyāpādānaṁ
tanubhāvaṁ sakadāgāmiphalaṁ vuttaṁ bhagavatā no vata re
vattabbe arahattamaggena sabbe saññojanā pahīyantīti.

[1022] Arahattamaggena sabbe saññojanā pahīyantīti.
Āmantā. Arahattamaggena aṇusahagataṁ kāmarāgaṁ aṇusahagataṁ byāpādaṁ
pajahatīti. Na hevaṁ vattabbe .pe.

[1023] Arahattamaggena aṇusahagataṁ kāmarāgaṁ aṇusahagataṁ
byāpādaṁ pajahatīti. Āmantā. Nanu kāmarāgabyāpādānaṁ
anavasesappahānaṁ anāgāmiphalaṁ vuttaṁ bhagavatāti. Āmantā.
Hañci kāmarāgabyāpādānaṁ anavasesappahānaṁ anāgāmiphalaṁ vuttaṁ
bhagavatā no vata re vattabbe arahattamaggena sabbe saññojanā
pahīyantīti.

[1024] Arahattamaggena sabbe saññojanā pahīyantīti.
Āmantā. Nanu rūparāgārūparāgamānauddhaccāvijjāya anavasesappahānaṁ
Pahānaṁ arahattaṁ vuttaṁ bhagavatāti. Āmantā. Hañci
rūparāgārūparāgamānauddhaccāvijjāya anavasesappahānaṁ arahattaṁ vuttaṁ
bhagavatā no vata re vattabbe arahattamaggena sabbe saññojanā
pahīyantīti.

[1025] Na vattabbaṁ sabbasaññojanānaṁ pahānaṁ arahattanti.
Āmantā. Nanu arahato sabbe saññojanā pahīnāti. Āmantā.
Hañci arahato sabbe saññojanā pahīnā tena vata re vattabbe
sabbasaññojanānaṁ pahānaṁ arahattanti.
Sabbasaññojanappahānakathā.
Catuttho vaggo.
Tassa uddānaṁ
gihissa arahā saha upapattiyā arahā
arahato sabbe dhammā anāsavā arahā
catūhi phalehi samannāgato evameva
chahi upekkhāhi bodhiyā buddho sahaṁ 1
lakkhaṇasamannāgato bodhisatto
okkantaniyāmo caritabrahmacariyo
paṭipannako phalena samannāgato
sabbasaññojanānaṁ pahānaṁ arahattanti.
----------
1. Ma. salakkhaṇasamannāgato.
Vimuttakathā

[1026] Vimuttiñāṇaṁ vimuttanti. Āmantā. Yaṁ kiñci
vimuttiñāṇaṁ sabbantaṁ vimuttanti. Na hevaṁ vattabbe .pe.
Vimuttiñāṇaṁ vimuttanti. Āmantā. Paccavekkhaṇañāṇaṁ vimuttanti.
Na hevaṁ vattabbe .pe. Vimuttiñāṇaṁ vimuttanti. Āmantā.
Gotrabhuno puggalassa vimuttiñāṇaṁ vimuttanti. Na hevaṁ vattabbe .pe.