[1027] Sotāpattiphalasacchikiriyāya paṭipannassa puggalassa vimuttiñāṇaṁ
vimuttanti. Āmantā. Sotāpannassa ñāṇaṁ sotāpattiphalaṁ
pattassa paṭiladdhassa adhigatassa sacchikatassa ñāṇanti.
Na hevaṁ vattabbe .pe. Sakadāgāmiphalasacchikiriyāya paṭipannassa
puggalassa vimuttiñāṇaṁ vimuttanti. Āmantā. Sakadāgāmissa
ñāṇaṁ sakadāgāmiphalaṁ pattassa paṭiladdhassa adhigatassa sacchikatassa
ñāṇanti. Na hevaṁ vattabbe .pe. Anāgāmiphalasacchikiriyāya
paṭipannassa puggalassa vimuttiñāṇaṁ vimuttanti. Āmantā.
Anāgāmissa ñāṇaṁ anāgāmiphalaṁ pattassa paṭiladdhassa adhigatassa
sacchikatassa ñāṇanti. Na hevaṁ vattabbe .pe. Arahattasacchikiriyāya
paṭipannassa puggalassa vimuttiñāṇaṁ vimuttanti. Āmantā.
Arahato ñāṇaṁ arahattaṁ pattassa paṭiladdhassa adhigatassa sacchikatassa
ñāṇanti. Na hevaṁ vattabbe .pe.

[1028] Sotāpattiphalasamaṅgissa puggalassa vimuttiñāṇaṁ vimuttanti.
Āmantā. Sotāpattiphalasacchikiriyāya paṭipannassa puggalassa
vimuttiñāṇaṁ vimuttanti. Na hevaṁ vattabbe .pe. Sakadāgāmiphalasamaṅgissa
puggalassa vimuttiñāṇaṁ vimuttanti. Āmantā.
Sakadāgāmiphalasacchikiriyāya paṭipannassa puggalassa vimuttiñāṇaṁ
vimuttanti. Na hevaṁ vattabbe .pe. Anāgāmiphalasamaṅgissa puggalassa
vimuttiñāṇaṁ vimuttanti. Āmantā. Anāgāmiphalasacchikiriyāya
paṭipannassa puggalassa vimuttiñāṇaṁ vimuttanti. Na hevaṁ vattabbe
.pe. Arahattaphalasamaṅgissa puggalassa vimuttiñāṇaṁ vimuttanti.
Āmantā. Arahattasacchikiriyāya paṭipannassa puggalassa vimuttiñāṇaṁ
vimuttanti. Na hevaṁ vattabbe .pe.

[1029] Sotāpattiphalasamaṅgissa puggalassa vimuttiñāṇaṁ vimuttaṁ
tañca phalaṁ pattassa ñāṇanti. Āmantā. Sotāpattiphalasacchikiriyāya
paṭipannassa puggalassa vimuttiñāṇaṁ vimuttaṁ tañca phalaṁ
pattassa ñāṇanti. Na hevaṁ vattabbe .pe. Sakadāgāmiphalasamaṅgissa
puggalassa vimuttiñāṇaṁ vimuttaṁ tañca phalaṁ pattassa ñāṇanti.
Āmantā. Sakadāgāmiphalasacchikiriyāya paṭipannassa puggalassa vimuttiñāṇaṁ
vimuttaṁ tañca phalaṁ pattassa ñāṇanti. Na hevaṁ vattabbe
.pe. Anāgāmiphalasamaṅgissa puggalassa vimuttiñāṇaṁ vimuttaṁ tañca
phalaṁ pattassa ñāṇanti. Āmantā. Anāgāmiphalasacchikiriyāya
Paṭipannassa puggalassa vimuttiñāṇaṁ vimuttaṁ tañca phalaṁ pattassa
ñāṇanti. Na hevaṁ vattabbe .pe. Arahattaphalasamaṅgissa puggalassa
vimuttiñāṇaṁ vimuttaṁ tañca phalaṁ pattassa ñāṇanti. Āmantā.
Arahattasacchikiriyāya paṭipannassa puggalassa vimuttiñāṇaṁ vimuttaṁ
tañca phalaṁ pattassa ñāṇanti. Na hevaṁ vattabbe .pe.
Vimuttakathā.
---------
Asekkhañāṇakathā

[1030] Sekkhassa asekkhaṁ ñāṇaṁ atthīti. Āmantā.
Sekkho asekkhaṁ dhammaṁ jānāti passati diṭṭhaṁ viditaṁ sacchikataṁ
upasampajja viharati kāyena phusitvā viharatīti. Na hevaṁ vattabbe
.pe. Nanu sekkho asekkhaṁ dhammaṁ na jānāti na passati adiṭṭhaṁ
aviditaṁ asacchikataṁ na upasampajja viharati na kāyena phusitvā
viharatīti. Āmantā. Hañci sekkho asekkhaṁ dhammaṁ na jānāti na
passati adiṭṭhaṁ aviditaṁ asacchikataṁ na upasampajja viharati na kāyena
phusitvā viharati no vata re vattabbe sekkhassa asekkhaṁ ñāṇaṁ atthīti.

[1031] Asekkhassa asekkhaṁ ñāṇaṁ atthi asekkho asekkhaṁ
dhammaṁ jānāti passati diṭṭhaṁ viditaṁ sacchikataṁ upasampajja viharati
kāyena phusitvā viharatīti. Āmantā. Sekkhassa asekkhaṁ ñāṇaṁ
Atthi sekkho asekkhaṁ dhammaṁ jānāti passati diṭṭhaṁ viditaṁ
sacchikataṁ upasampajja viharati kāyena phusitvā viharatīti. Na hevaṁ
vattabbe .pe.

[1032] Sekkhassa asekkhaṁ ñāṇaṁ atthi sekkho asekkhaṁ dhammaṁ
na jānāti na passati adiṭṭhaṁ aviditaṁ asacchikataṁ na upasampajja
viharati na kāyena phusitvā viharatīti. Āmantā. Asekkhassa
asekkhaṁ ñāṇaṁ atthi asekkho asekkhaṁ dhammaṁ na jānāti na passati
adiṭṭhaṁ aviditaṁ asacchikataṁ na upasampajja viharati na kāyena
phusitvā viharatīti. Na hevaṁ vattabbe .pe.

[1033] Sekkhassa asekkhaṁ ñāṇaṁ atthīti. Āmantā.
Gotrabhuno puggalassa sotāpattimagge ñāṇaṁ atthīti. Na hevaṁ
vattabbe .pe. Sotāpattiphalasacchikiriyāya paṭipannassa puggalassa
sotāpattiphale ñāṇaṁ atthīti. Na hevaṁ vattabbe .pe.
Sakadāgāmiphalasacchikiriyāya .pe. Anāgāmiphalasacchikiriyāya .pe.
Arahattasacchikiriyāya paṭipannassa puggalassa arahatte ñāṇaṁ atthīti.
Na hevaṁ vattabbe .pe.

[1034] Na vattabbaṁ sekkhassa asekkhaṁ ñāṇaṁ atthīti.
Āmantā. Nanu āyasmā ānando sekkho bhagavā uḷāroti
jānāti sārīputto thero mahāmoggallāno thero uḷāroti
jānātīti. Āmantā. Hañci āyasmā ānando sekkho bhagavā
Uḷāroti jānāti sārīputto thero mahāmoggallāno thero uḷāroti
jānāti tena vata re vattabbe sekkhassa asekkhaṁ ñāṇaṁ atthīti.
Asekkhañāṇakathā.
-------
Viparītakathā

[1035] Paṭhavīkasiṇaṁ samāpattiṁ samāpannassa viparīte ñāṇanti.
Āmantā. Anicce niccanti vipariyesoti. Na hevaṁ vattabbe
.pe. Dukkhe sukhanti .pe. Anattani attāti .pe. Asubhe
subhanti vipariyesoti. Na hevaṁ vattabbe .pe.

[1036] Paṭhavīkasiṇaṁ samāpattiṁ samāpannassa viparīte ñāṇanti.
Āmantā. Akusalanti. Na hevaṁ vattabbe .pe. Nanu kusalanti.
Āmantā. Hañci kusalaṁ no vata re vattabbe paṭhavīkasiṇaṁ
samāpattiṁ samāpannassa viparīte ñāṇanti.