[807] Dveva cakkhūnīti. Āmantā. Nanu tīṇi cakkhūni vuttāni
bhagavatā maṁsacakkhuṁ dibbacakkhuṁ paññācakkhunti. Āmantā. Hañci
tīṇi cakkhūni vuttāni bhagavatā maṁsacakkhuṁ dibbacakkhuṁ paññācakkhuṁ
no vata re vattabbe dveva cakkhūnīti.

[808] Dveva cakkhūnīti. Āmantā. Nanu vuttaṁ bhagavatā
tīṇimāni bhikkhave cakkhūni. Katamāni tīṇi. Maṁsacakkhuṁ dibbacakkhuṁ
paññācakkhuṁ imāni kho bhikkhave tīṇi cakkhūnīti
Maṁsacakkhuṁ dibbacakkhuṁ paññācakkhuṁ anuttaraṁ
etāni tīṇi cakkhūni akkhāsi purisuttamo
maṁsacakkhussa uppādo maggo dibbassa cakkhuno
yadā ca ñāṇaṁ udapādi paññācakkhuṁ anuttaraṁ
tassa cakkhūssa paṭilābhā sabbadukkhā pamuccatīti 1
attheva suttantoti. Āmantā. Tena hi na vattabbaṁ dveva
cakkhūnīti.
Dibbacakkhukathā.
---------
Dibbasotakathā

[809] Maṁsasotaṁ dhammūpatthaddhaṁ dibbasotaṁ hotīti. Āmantā.
Maṁsasotaṁ dibbasotaṁ dibbasotaṁ maṁsasotanti. Na hevaṁ vattabbe .pe.

[810] Maṁsasotaṁ dhammūpatthaddhaṁ dibbasotaṁ hotīti. Āmantā.
Yādisaṁ maṁsasotaṁ tādisaṁ dibbasotaṁ yādisaṁ dibbasotaṁ tādisaṁ
maṁsasotanti. Na hevaṁ vattabbe .pe.

[811] Maṁsasotaṁ dhammūpatthaddhaṁ dibbasotaṁ hotīti. Āmantā.
Taññeva maṁsasotaṁ taṁ dibbasotaṁ taṁ dibbasotaṁ taṁ maṁsasotanti.
Na hevaṁ vattabbe .pe.
1 khu. itivuttaka. 218.

[812] Maṁsasotaṁ dhammūpatthaddhaṁ dibbasotaṁ hotīti. Āmantā.
Yādiso maṁsasotassa visayo ānubhāvo gocaro tādiso dibbasotassa
visayo ānubhāvo gocaroti. Na hevaṁ vattabbe .pe.

[813] Maṁsasotaṁ dhammūpatthaddhaṁ dibbasotaṁ hotīti. Āmantā.
Upādinnaṁ hutvā anupādinnaṁ hotīti. Na hevaṁ vattabbe .pe.

[814] Upādinnaṁ hutvā anupādinnaṁ hotīti. Āmantā.
Kāmāvacaraṁ hutvā rūpāvacaraṁ hotīti. Na hevaṁ vattabbe .pe.

[815] Kāmāvacaraṁ hutvā rūpāvacaraṁ hotīti. Āmantā.
Rūpāvacaraṁ hutvā arūpāvacaraṁ hotīti. Na hevaṁ vattabbe .pe.

[816] Rūpāvacaraṁ hutvā arūpāvacaraṁ hotīti. Āmantā.
Pariyāpannaṁ hutvā apariyāpannaṁ hotīti. Na hevaṁ vattabbe .pe.