[827] Atthāyasmato sārīputtassa dibbacakkhunti. Āmantā.
Nanu āyasmā sārīputto etadavoca
Neva pubbe nivāsāya napi dibbassa cakkhuno
cetopariyāya iddhiyā sotadhātuvisuddhiyā
cutiyā upapattiyā paṇidhi me na vijjatīti
attheva suttantoti. Āmantā. Tena hi na vattabbaṁ yathākammūpagatañāṇaṁ
dibbacakkhunti.
Yathākammūpagatañāṇakathā.
------
Saṁvarakathā

[828] Atthi devesu saṁvaroti. Āmantā. Atthi devesu
asaṁvaroti. Na hevaṁ vattabbe .pe.

[829] Natthi devesu asaṁvaroti. Āmantā. Natthi devesu
saṁvaroti. Na hevaṁ vattabbe .pe.

[830] Nanu asaṁvarā saṁvaro sīlaṁ atthi devesu saṁvaroti.
Āmantā. Atthi devesu asaṁvaro yamhā asaṁvarā saṁvaro sīlanti.
Na hevaṁ vattabbe. Ājānāhi niggahaṁ hañci asaṁvarā saṁvaro
sīlaṁ atthi devesu saṁvaro tena vata re vattabbe atthi devesu
asaṁvaro yamhā asaṁvarā saṁvaro sīlanti yaṁ tattha vadesi vattabbe
kho asaṁvarā saṁvaro sīlaṁ atthi devesu saṁvaro no ca vattabbe
atthi devesu asaṁvaro yamhā asaṁvarā saṁvaro sīlanti micchā
No ce pana vattabbe atthi devesu asaṁvaro yamhā asaṁvarā saṁvaro
sīlanti no vata re vattabbe asaṁvarā saṁvaro sīlaṁ atthi devesu
saṁvaroti yaṁ tattha vadesi vattabbe kho asaṁvarā saṁvaro sīlaṁ
atthi devesu saṁvaro no ca vattabbe atthi devesu asaṁvaro
yamhā asaṁvarā saṁvaro sīlanti micchā.

[831] Atthi manussesu saṁvaro atthi tattha asaṁvaroti.
Āmantā. Atthi devesu saṁvaro atthi tattha asaṁvaroti. Na
hevaṁ vattabbe .pe.

[832] Atthi devesu saṁvaro natthi tattha asaṁvaroti.
Āmantā. Atthi manussesu saṁvaro natthi tattha asaṁvaroti.
Na hevaṁ vattabbe .pe.

[833] Atthi devesu pāṇātipātā veramaṇīti. Āmantā.
Atthi devesu pāṇātipātoti. Na hevaṁ vattabbe .pe. Atthi
devesu surāmerayamajjapamādaṭṭhānā veramaṇīti. Āmantā. Atthi
devesu surāmerayamajjapamādaṭṭhānanti. Na hevaṁ vattabbe .pe.

[834] Natthi devesu pāṇātipātoti. Āmantā. Natthi devesu
pāṇātipātā veramaṇīti. Na hevaṁ vattabbe .pe. Natthi devesu
surāmerayamajjapamādaṭṭhānanti. Āmantā. Natthi devesu
surāmerayamajjapamādaṭṭhānā veramaṇīti. Na hevaṁ vattabbe .pe.

[835] Atthi manussesu pāṇātipātā veramaṇī atthi tattha
Pāṇātipātoti. Āmantā. Atthi devesu pāṇātipātā veramaṇī
atthi tattha pāṇātipātoti. Na hevaṁ vattabbe .pe. Atthi
manussesu surāmerayamajjapamādaṭṭhānā veramaṇī atthi tattha
surāmerayamajjapamādaṭṭhānanti. Āmantā. Atthi devesu
surāmerayamajjapamādaṭṭhānā veramaṇī atthi tattha
surāmerayamajjapamādaṭṭhānanti. Na hevaṁ vattabbe .pe.

[836] Atthi devesu pāṇātipātā veramaṇī natthi tattha
pāṇātipātoti. Āmantā. Atthi manussesu pāṇātipātā
veramaṇī natthi tattha pāṇātipātoti. Na hevaṁ vattabbe .pe.
Atthi devesu surāmerayamajjapamādaṭṭhānā veramaṇī natthi tattha
surāmerayamajjapamādaṭṭhānanti. Āmantā. Atthi manussesu
surāmerayamajjapamādaṭṭhānā veramaṇī natthi tattha
surāmerayamajjapamādaṭṭhānanti. Na hevaṁ vattabbe .pe.