[787] Aṭṭhamakassa puggalassa natthi saddhindriyanti. Āmantā.
Aṭṭhamako puggalo asaddhoti. Na hevaṁ vattabbe .pe. Aṭṭhamakassa
puggalassa natthi viriyindriyanti. Āmantā. Aṭṭhamako
puggalo kusīto hīnaviriyoti. Na hevaṁ vattabbe .pe. Aṭṭhamakassa
puggalassa natthi satindriyanti. Āmantā. Aṭṭhamako
puggalo muṭṭhassati asampajānoti. Na hevaṁ vattabbe .pe.
Aṭṭhamakassa puggalassa natthi samādhindriyanti. Āmantā. Aṭṭhamako
puggalo asamāhito vibbhantacittoti. Na hevaṁ vattabbe .pe.

[788] Aṭṭhamakassa puggalassa natthi paññindriyanti. Āmantā.
Aṭṭhamako puggalo duppañño eḷamūgoti. Na hevaṁ vattabbe .pe.

[789] Aṭṭhamakassa puggalassa atthi saddhā sā ca saddhā
niyyānikāti. Āmantā. Hañci aṭṭhamakassa puggalassa atthi
saddhā sā ca saddhā niyyānikā no vata re vattabbe aṭṭhamakassa
puggalassa natthi saddhindriyanti. Aṭṭhamakassa puggalassa
atthi viriyaṁ tañca viriyaṁ niyyānikaṁ .pe. Atthi sati sā ca
sati niyyānikā .pe. Atthi samādhi so ca samādhi niyyāniko
.pe. Atthi paññā sā ca paññā niyyānikāti. Āmantā.
Hañci aṭṭhamakassa puggalassa atthi paññā sā ca paññā
niyyānikā no vata re vattabbe aṭṭhamakassa puggalassa natthi
paññindriyanti.

[790] Sakadāgāmiphalasacchikiriyāya paṭipannassa puggalassa atthi
saddhā atthi saddhindriyanti. Āmantā. Aṭṭhamakassa puggalassa
atthi saddhā atthi saddhindriyanti. Na hevaṁ vattabbe .pe.
Sakadāgāmiphalasacchikiriyāya paṭipannassa puggalassa atthi paññā
atthi paññindriyanti. Āmantā. Aṭṭhamakassa puggalassa atthi
paññā atthi paññindriyanti. Na hevaṁ vattabbe .pe.

[791] Anāgāmiphalasacchikiriyāya paṭipannassa puggalassa .pe.
Arahattasacchikiriyāya paṭipannassa puggalassa atthi saddhā atthi
saddhindriyaṁ .pe. Atthi paññā atthi paññindriyanti.
Āmantā. Aṭṭhamakassa puggalassa atthi paññā atthi paññindriyanti.
Na hevaṁ vattabbe .pe.

[792] Aṭṭhamakassa puggalassa atthi saddhā natthi saddhindriyanti.
Āmantā. Sakadāgāmiphalasacchikiriyāya paṭipannassa
puggalassa atthi saddhā natthi saddhindriyanti. Na hevaṁ vattabbe
.pe. Aṭṭhamakassa puggalassa atthi paññā natthi paññindriyanti.
Āmantā. Sakadāgāmiphalasacchikiriyāya paṭipannassa
Puggalassa atthi paññā natthi paññindriyanti. Na hevaṁ
vattabbe .pe.

[793] Aṭṭhamakassa puggalassa atthi saddhā natthi saddhindriyaṁ
.pe. Atthi paññā natthi paññindriyanti. Āmantā.
Anāgāmiphalasacchikiriyāya paṭipannassa puggalassa .pe. Arahattasacchikiriyāya
paṭipannassa puggalassa atthi paññā natthi paññindriyanti.
Na hevaṁ vattabbe .pe.

[794] Aṭṭhamakassa puggalassa natthi pañcindriyānīti. Āmantā.
Nanu vuttaṁ bhagavatā pañcimāni bhikkhave indriyāni. Katamāni
pañca. Saddhindriyaṁ viriyindriyaṁ satindriyaṁ samādhindriyaṁ paññindriyaṁ
imāni kho bhikkhave pañcindriyāni imesaṁ kho bhikkhave pañcannaṁ
indriyānaṁ samattā paripūrattā arahā hoti tato mudutarehi
arahattasacchikiriyāya paṭipanno hoti tato mudutarehi anāgāmī hoti tato
mudutarehi anāgāmiphalasacchikiriyāya paṭipanno hoti tato mudutarehi
sakadāgāmī hoti tato mudutarehi sakadāgāmiphalasacchikiriyāya paṭipanno
hoti tato mudutarehi sotāpanno hoti tato mudutarehi
sotāpattiphalasacchikiriyāya paṭipanno hoti yassa kho bhikkhave imāni
pañcindriyāni sabbena sabbaṁ sabbathā sabbaṁ natthi tamahaṁ bāhiro
puthujjanapakkhe ṭhitoti vadāmīti 1 attheva suttantoti. Āmantā.
1 saṁ. mahāvāra. 212.
Aṭṭhamako puggalo bāhiro puthujjanapakkhe ṭhitoti. Na hevaṁ vattabbe
.pe. Tena hi aṭṭhamakassa puggalassa atthi pañcindriyānīti.
Aṭṭhamakassa indriyakathā.
---------
Dibbacakkhukathā

[795] Maṁsacakkhuṁ dhammūpatthaddhaṁ dibbacakkhuṁ hotīti. Āmantā.
Maṁsacakkhuṁ dibbacakkhuṁ dibbacakkhuṁ maṁsacakkhunti. Na hevaṁ vattabbe .pe.

[796] Maṁsacakkhuṁ dhammūpatthaddhaṁ dibbacakkhuṁ hotīti. Āmantā.
Yādisaṁ maṁsacakkhuṁ tādisaṁ dibbacakkhuṁ yādisaṁ dibbacakkhuṁ tādisaṁ
maṁsacakkhunti. Na hevaṁ vattabbe .pe.