[777] Aṭṭhamakassa puggalassa diṭṭhipariyuṭṭhānaṁ nuppajjissatīti
Katvā pahīnanti. Āmantā. Gotrabhuno puggalassa diṭṭhipariyuṭṭhānaṁ
nuppajjissatīti katvā pahīnanti. Na hevaṁ vattabbe .pe.

[778] Aṭṭhamakassa puggalassa vicikicchāpariyuṭṭhānaṁ nuppajjissatīti
katvā pahīnanti. Āmantā. Gotrabhuno puggalassa
vicikicchāpariyuṭṭhānaṁ nuppajjissatīti katvā pahīnanti. Na hevaṁ
vattabbe .pe.
Aṭṭhamakakathā.
----------
Aṭṭhamakassa indriyakathā

[779] Aṭṭhamakassa puggalassa natthi saddhindriyanti. Āmantā.
Aṭṭhamakassa puggalassa natthi saddhāti. Na hevaṁ vattabbe .pe.

[780] Aṭṭhamakassa puggalassa natthi viriyindriyaṁ .pe. Natthi
satindriyaṁ .pe. Natthi samādhindriyaṁ .pe. Natthi paññindriyanti.
Āmantā. Aṭṭhamakassa puggalassa natthi paññāti. Na hevaṁ
vattabbe .pe.

[781] Aṭṭhamakassa puggalassa atthi saddhāti. Āmantā.
Aṭṭhamakassa puggalassa atthi saddhindriyanti. Na hevaṁ vattabbe
.pe. Aṭṭhamakassa puggalassa atthi viriyaṁ .pe. Atthi sati
atthi samādhi .pe. Atthi paññāti. Āmantā. Aṭṭhamakassa
Puggalassa atthi paññindriyanti. Na hevaṁ vattabbe .pe.

[782] Aṭṭhamakassa puggalassa atthi mano atthi manindriyanti.
Āmantā. Aṭṭhamakassa puggalassa atthi saddhā atthi saddhindriyanti.
Na hevaṁ vattabbe .pe. Aṭṭhamakassa puggalassa
atthi mano atthi manindriyanti. Āmantā. Aṭṭhamakassa
puggalassa atthi paññā atthi paññindriyanti. Na hevaṁ
vattabbe .pe.

[783] Aṭṭhamakassa puggalassa atthi somanassaṁ atthi somanassindriyaṁ
.pe. Atthi jīvitaṁ atthi jīvitindriyanti. Āmantā.
Aṭṭhamakassa puggalassa atthi saddhā atthi saddhindriyanti. Na
hevaṁ vattabbe .pe. Aṭṭhamakassa puggalassa atthi jīvitaṁ atthi
jīvitindriyanti. Āmantā. Aṭṭhamakassa puggalassa atthi viriyaṁ .pe.
Atthi paññā atthi paññindriyanti. Na hevaṁ vattabbe .pe.

[784] Aṭṭhamakassa puggalassa atthi saddhā natthi saddhindriyanti.
Āmantā. Aṭṭhamakassa puggalassa atthi mano natthi
manindriyanti. Na hevaṁ vattabbe .pe.

[785] Aṭṭhamakassa puggalassa atthi saddhā natthi saddhindriyanti.
Āmantā. Aṭṭhamakassa puggalassa atthi somanassaṁ
natthi somanassindriyaṁ .pe. Atthi jīvitaṁ natthi jīvitindriyanti.
Na hevaṁ vattabbe .pe.

[786] Aṭṭhamakassa puggalassa atthi paññā natthi paññindriyanti.
Āmantā. Aṭṭhamakassa puggalassa atthi mano natthi
manindriyanti .pe. Atthi somanassaṁ natthi somanassindriyanti
.pe. Atthi jīvitaṁ natthi jīvitindriyanti. Na hevaṁ vattabbe .pe.