[252] Assosi kho āyasmā sārīputto te kira kosambikā
1 Ma. Yu. kosambakā upāsakā. 2 Ma. Yu. etadahosīti pāṭhadvayaṁ na dissati.
3 Ma. na bhajeyyāma. 4 Yu. piṇḍapātaṁ. 5 Po. na ghagatāpiṇḍikaṁ dadeyyāma.
6-8 Ma. abhajiyamānā. 7 Ma. na bhajesuṁ. 9 Yu. vūpasamemāti.
Bhikkhū bhaṇḍanakārakā kalahakārakā vivādakārakā bhassakārakā saṅghe
adhikaraṇakārakā sāvatthiṁ āgacchantīti. Athakho āyasmā sārīputto
yena bhagavā tenupasaṅkami upasaṅkamitvā bhagavantaṁ abhivādetvā
ekamantaṁ nisīdi. Ekamantaṁ nisinno kho āyasmā sārīputto
bhagavantaṁ etadavoca te kira bhante kosambikā bhikkhū bhaṇḍanakārakā
kalahakārakā vivādakārakā bhassakārakā saṅghe adhikaraṇakārakā
sāvatthiṁ āgacchanti kathāhaṁ bhante tesu bhikkhūsu paṭipajjāmīti.
Tenahi tvaṁ sārīputta yathā dhammo tathā patiṭṭhāhīti 1 . Kathāhaṁ
bhante jāneyyaṁ dhammaṁ vā adhammaṁ vāti. Aṭṭhārasahi kho sārīputta
vatthūhi adhammavādī jānitabbo idha sārīputta bhikkhu adhammaṁ
dhammoti dīpeti dhammaṁ adhammoti dīpeti avinayaṁ vinayoti dīpeti
vinayaṁ avinayoti dīpeti abhāsitaṁ alapitaṁ tathāgatena bhāsitaṁ
lapitaṁ tathāgatenāti dīpeti bhāsitaṁ lapitaṁ tathāgatena abhāsitaṁ
alapitaṁ tathāgatenāti dīpeti anāciṇṇaṁ tathāgatena āciṇṇaṁ
tathāgatenāti dīpeti āciṇṇaṁ tathāgatena anāciṇṇaṁ tathāgatenāti
dīpeti appaññattaṁ tathāgatena paññattaṁ tathāgatenāti
dīpeti paññattaṁ tathāgatena appaññattaṁ tathāgatenāti dīpeti
anāpattiṁ āpattīti dīpeti āpattiṁ anāpattīti anāpattīti dīpeti
lahukaṁ āpattiṁ garukā āpattīti dīpeti garukaṁ āpattiṁ lahukā
āpattīti dīpeti sāvasesaṁ āpattiṁ anavasesā āpattīti dīpeti
1 Ma. Yu. tiṭṭhāhīti.
Anavasesaṁ āpattiṁ sāvasesā āpattīti dīpeti duṭṭhullaṁ āpattiṁ
aduṭṭhullā āpattīti dīpeti aduṭṭhullaṁ āpattiṁ duṭṭhullā
āpattīti dīpeti imehi kho sārīputta aṭṭhārasahi vatthūhi adhammavādī
jānitabbo aṭṭhārasahi ca kho sārīputta vatthūhi dhammavādī
jānitabbo idha sārīputta bhikkhu adhammaṁ adhammoti dīpeti
dhammaṁ dhammoti dīpeti avinayaṁ avinayoti dīpeti vinayaṁ
vinayoti dīpeti abhāsitaṁ alapitaṁ tathāgatena abhāsitaṁ alapitaṁ
tathāgatenāti dīpeti bhāsitaṁ lapitaṁ tathāgatena bhāsitaṁ lapitaṁ
tathāgatenāti dīpeti anāciṇṇaṁ tathāgatena anāciṇṇaṁ
tathāgatenāti dīpeti āciṇṇaṁ tathāgatena āciṇṇaṁ tathāgatenāti
dīpeti appaññattaṁ tathāgatena appaññattaṁ tathāgatenāti dīpeti
paññattaṁ tathāgatena paññattaṁ tathāgatenāti dīpeti anāpattiṁ
anāpattīti dīpeti āpattiṁ āpattīti dīpeti lahukaṁ āpattiṁ
lahukā āpattīti dīpeti garukaṁ āpattiṁ garukā āpattīti dīpeti
sāvasesaṁ āpattiṁ sāvasesā āpattīti dīpeti anavasesaṁ āpattiṁ
anavasesā āpattīti dīpeti duṭṭhullaṁ āpattiṁ duṭṭhullā
āpattīti dīpeti aduṭṭhullaṁ āpattiṁ aduṭṭhullā āpattīti dīpeti
imehi kho sārīputta aṭṭhārasahi vatthūhi dhammavādī jānitabboti.

[253] Assosi kho āyasmā mahāmoggallāno .pe.
Assosi kho āyasmā mahākassapo assosi kho āyasmā
Mahākaccāno assosi kho āyasmā mahākoṭṭhito assosi kho
āyasmā mahākappino assosi kho āyasmā mahācundo
assosi kho āyasmā anuruddho assosi kho āyasmā revato
assosi kho āyasmā upāli assosi kho āyasmā ānando
assosi kho āyasmā rāhulo te kira kosambikā bhikkhū
bhaṇḍanakārakā kalahakārakā vivādakārakā bhassakārakā saṅghe
adhikaraṇakārakā sāvatthiṁ āgacchantīti. Athakho āyasmā rāhulo
yena bhagavā tenupasaṅkami upasaṅkamitvā bhagavantaṁ abhivādetvā
ekamantaṁ nisīdi. Ekamantaṁ nisinno kho āyasmā rāhulo
bhagavantaṁ etadavoca te kira bhante kosambikā bhikkhū bhaṇḍanakārakā
kalahakārakā vivādakārakā bhassakārakā saṅghe adhikaraṇakārakā
sāvatthiṁ āgacchanti kathāhaṁ bhante tesu bhikkhūsu paṭipajjāmīti.
Tenahi tvaṁ rāhula yathā dhammo tathā patiṭṭhāhīti 1 . Kathāhaṁ
bhante jāneyyaṁ dhammaṁ vā adhammaṁ vāti. Aṭṭhārasahi kho rāhula
vatthūhi adhammavādī jānitabbo .pe. Imehi kho rāhula aṭṭhārasahi
vatthūhi adhammavādī jānitabbo aṭṭhārasahi ca kho rāhula
vatthūhi dhammavādī jānitabbo .pe. Imehi kho rāhula aṭṭhārasahi
vatthūhi dhammavādī jānitabboti.

[254] Assosi kho mahāpajāpatī gotamī te kira kosambikā
bhikkhū bhaṇḍanakārakā kalahakārakā vivādakārakā bhassakārakā saṅghe
1 Ma. Yu. tiṭṭhāhīti.
Adhikaraṇakārakā sāvatthiṁ āgacchantīti. Athakho mahāpajāpatī gotamī
yena bhagavā tenupasaṅkami upasaṅkamitvā bhagavantaṁ abhivādetvā
ekamantaṁ aṭṭhāsi. Ekamantaṁ ṭhitā kho mahāpajāpatī gotamī
bhagavantaṁ etadavoca te kira bhante kosambikā bhikkhū bhaṇḍanakārakā
kalahakārakā vivādakārakā bhassakārakā saṅghe adhikaraṇakārakā sāvatthiṁ
āgacchanti kathāhaṁ bhante tesu bhikkhūsu paṭipajjāmīti. Tenahi tvaṁ
gotami ubhayattha dhammaṁ suṇa ubhayattha dhammaṁ sutvā ye tattha
bhikkhū dhammavādino tesaṁ diṭṭhiñca khantiñca ruciñca ādāyañca
rocehi yaṁ ca kiñci bhikkhunīsaṅghena bhikkhusaṅghato paccāsiṁsitabbaṁ 1
sabbantaṁ dhammavādito va paccāsiṁsitabbanti.

[255] Assosi kho anāthapiṇḍiko gahapati te kira kosambikā
bhikkhū bhaṇḍanakārakā kalahakārakā vivādakārakā bhassakārakā saṅghe
adhikaraṇakārakā sāvatthiṁ āgacchantīti. Athakho anāthapiṇḍiko
gahapati yena bhagavā tenupasaṅkami upasaṅkamitvā bhagavantaṁ
abhivādetvā ekamantaṁ nisīdi. Ekamantaṁ nisinno kho anāthapiṇḍiko
gahapati bhagavantaṁ etadavoca te kira bhante kosambikā bhikkhū
bhaṇḍanakārakā kalahakārakā vivādakārakā bhassakārakā saṅghe
adhikaraṇakārakā sāvatthiṁ āgacchanti kathāhaṁ bhante tesu bhikkhūsu
paṭipajjāmīti. Tenahi tvaṁ gahapati ubhayattha dānaṁ dehi ubhayattha
dānaṁ datvā ubhayattha dhammaṁ suṇa ubhayattha dhammaṁ sutvā ye
1 Po. Ma. paccāsīsitabbaṁ.
Tattha bhikkhū dhammavādino tesaṁ diṭṭhiñca khantiñca ruciñca
ādāyañca rocehīti.

[256] Assosi kho visākhā migāramātā te kira kosambikā
bhikkhū bhaṇḍanakārakā kalahakārakā vivādākārakā bhassakārakā saṅghe
adhikaraṇakārakā sāvatthiṁ āgacchantīti. Athakho visākhā migāramātā
yena bhagavā tenupasaṅkami upasaṅkamitvā bhagavantaṁ abhivādetvā
ekamantaṁ nisīdi. Ekamantaṁ nisinnā kho visākhā migāramātā bhagavantaṁ
etadavoca te kira bhante kosambikā bhikkhū bhaṇḍanakārakā
kalahakārakā vivādakārakā bhassakārakā saṅghe adhikaraṇakārakā sāvatthiṁ
āgacchanti kathāhaṁ bhante tesu bhikkhūsu paṭipajjāmīti. Tenahi
tvaṁ visākhe ubhayattha dānaṁ dehi ubhayattha dānaṁ datvā ubhayattha
dhammaṁ suṇa ubhayattha dhammaṁ sutvā ye tattha bhikkhū dhammavādino
tesaṁ diṭṭhiñca khantiñca ruciñca ādāyañca rocehīti.

[257] Athakho kosambikā bhikkhū anupubbena yena sāvatthī
tadavasariṁsu 1 . Athakho āyasmā sārīputto yena bhagavā
tenupasaṅkami upasaṅkamitvā bhagavantaṁ abhivādetvā ekamantaṁ nisīdi.
Ekamantaṁ nisinno kho āyasmā sārīputto bhagavantaṁ etadavoca
te kira bhante kosambikā bhikkhū bhaṇḍanakārakā kalahakārakā
vivādakārakā bhassakārakā saṅghe adhikaraṇakārakā sāvatthiṁ anuppattā
1 Sī. Ma. Yu. tadavasaruṁ.
Kathaṁ nu kho bhante tesu bhikkhūsu senāsanaṁ 1 paṭipajjitabbanti. Tenahi
tayā 2 sārīputta vivittaṁ senāsanaṁ dātabbanti. Sace pana bhante
vivittaṁ na hoti kathaṁ paṭipajjitabbanti. Tenahi sārīputta vivittaṁ
katvāpi dātabbaṁ na tvevāhaṁ sārīputta kenaci pariyāyena vuḍḍhatarassa
bhikkhuno senāsanaṁ paṭibāhitabbanti vadāmi yo paṭibāheyya
āpatti dukkaṭassāti. Āmise pana bhante kathaṁ paṭipajjitabbanti.
Āmisaṁ kho sārīputta sabbesaṁ samakaṁ bhājetabbanti.

[258] Athakho tassa ukkhittakassa bhikkhuno dhammañca vinayañca
paccavekkhantassa etadahosi āpatti esā nesā anāpatti
āpannomhi namhi anāpanno ukkhittomhi namhi anukkhitto
dhammikenamhi kammena ukkhitto akuppena ṭhānārahenāti. Athakho
so ukkhittako bhikkhu yena ukkhittānuvattakā bhikkhū tenupasaṅkami
upasaṅkamitvā ukkhittānuvattake bhikkhū etadavoca āpatti esā
āvuso nesā anāpatti āpannomhi namhi anāpanno
ukkhittomhi namhi anukkhitto dhammikenamhi kammena ukkhitto
akuppena ṭhānārahena etha maṁ āyasmanto osārethāti.
Athakho te ukkhittānuvattakā bhikkhū taṁ ukkhittakaṁ bhikkhuṁ ādāya
yena bhagavā tenupasaṅkamiṁsu upasaṅkamitvā bhagavantaṁ abhivādetvā
ekamantaṁ nisīdiṁsu. Ekamantaṁ nisinnā kho te bhikkhū bhagavantaṁ
etadavocuṁ ayaṁ bhante ukkhittako bhikkhu evamāha āpatti
1 Ma. senāsane. 2 Ma. ayaṁ pāṭho natthi.
Esā āvuso nesā anāpatti āpannomhi namhi anāpanno
ukkhittomhi namhi anukkhitto dhammikenamhi kammena ukkhitto
akuppena ṭhānārahena etha maṁ āyasmanto osārethāti kathaṁ
nu kho bhante paṭipajjitabbanti. Āpatti esā bhikkhave nesā
anāpatti āpanno eso bhikkhu neso bhikkhu anāpanno
ukkhitto eso bhikkhu neso bhikkhu anukkhitto dhammikena kammena
ukkhitto akuppena ṭhānārahena yato ca kho so bhikkhave bhikkhu
āpanno ca ukkhitto ca passati ca tenahi bhikkhave taṁ bhikkhuṁ
osārethāti. Athakho te ukkhittānuvattakā bhikkhū taṁ ukkhittakaṁ
bhikkhuṁ osāretvā yena ukkhepakā bhikkhū tenupasaṅkamiṁsu
upasaṅkamitvā ukkhepake bhikkhū etadavocuṁ yasmiṁ āvuso vatthusmiṁ
ahosi saṅghassa bhaṇḍanaṁ kalaho viggaho vivādo saṅghabhedo saṅgharāji
saṅghavavatthānaṁ saṅghanānākaraṇaṁ so eso bhikkhu āpanno ca
ukkhitto ca passi ca osārito ca handa mayaṁ āvuso tassa
vatthussa vūpasamāya saṅghasāmaggiṁ karomāti. Athakho te ukkhepakā
bhikkhū yena bhagavā tenupasaṅkamiṁsu upasaṅkamitvā bhagavantaṁ
abhivādetvā ekamantaṁ nisīdiṁsu. Ekamantaṁ nisinnā kho te
ukkhepakā 1 bhikkhū bhagavantaṁ etadavocuṁ te bhante ukkhittānuvattakā
bhikkhū evamāhaṁsu yasmiṁ āvuso vatthusmiṁ ahosi saṅghassa bhaṇḍanaṁ
kalaho viggaho vivādo saṅghabhedo saṅgharāji saṅghavavatthānaṁ
1 Ma. ayaṁ pāṭho natthi.
Saṅghanānākaraṇaṁ so eso bhikkhu āpanno ca ukkhitto ca passi ca
osārito ca handa mayaṁ āvuso tassa vatthussa vūpasamāya
saṅghasāmaggiṁ karomāti kathaṁ nu kho bhante paṭipajjitabbanti.
Yato ca kho so bhikkhave bhikkhu āpanno ca ukkhitto ca passi ca
osārito ca tenahi bhikkhave saṅgho tassa vatthussa vūpasamāya
saṅghasāmaggiṁ karotu. Evañca pana bhikkhave kātabbā. Sabbeheva
ekajjhaṁ sannipatitabbaṁ gilānehi ca agilānehi ca na kehici chando
dātabbo. Sannipatitvā byattena bhikkhunā paṭibalena saṅgho
ñāpetabbo suṇātu me bhante saṅgho yasmiṁ vatthusmiṁ ahosi
saṅghassa bhaṇḍanaṁ kalaho viggaho vivādo saṅghabhedo saṅgharāji
saṅghavavatthānaṁ saṅghanānākaraṇaṁ so eso bhikkhu āpanno ca
ukkhitto ca passi ca osārito ca. Yadi saṅghassa pattakallaṁ
saṅgho tassa vatthussa vūpasamāya saṅghasāmaggiṁ kareyya. Esā
ñatti. Suṇātu me bhante saṅgho yasmiṁ vatthusmiṁ ahosi
saṅghassa bhaṇḍanaṁ kalaho viggaho vivādo saṅghabhedo saṅgharāji
saṅghavavatthānaṁ saṅghanānākaraṇaṁ so eso bhikkhu āpanno ca
ukkhitto ca passi ca osārito ca. Saṅgho tassa vatthussa
vūpasamāya saṅghasāmaggiṁ karoti. Yassāyasmato khamati tassa vatthussa
vūpasamāya saṅghasāmaggiyā karaṇaṁ so tuṇhassa yassa nakkhamati
so bhāseyya. Katā saṅghena tassa vatthussa vūpasamāya saṅghasāmaggī
Nīhato saṅghabhedo nīhatā saṅgharāji nīhataṁ saṅghavavatthānaṁ nīhataṁ
saṅghanānākaraṇaṁ 1 . Khamati saṅghassa tasmā tuṇhī. Evametaṁ
dhārayāmīti. Tāvadeva uposatho kātabbo pātimokkhaṁ
uddisitabbanti.

[259] Athakho āyasmā upāli yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ nisīdi. Ekamantaṁ
nisinno kho āyasmā upāli bhagavantaṁ etadavoca yasmiṁ bhante
vatthusmiṁ hoti saṅghassa bhaṇḍanaṁ kalaho viggaho vivādo saṅghabhedo
saṅgharāji saṅghavavatthānaṁ saṅghanānākaraṇaṁ saṅgho taṁ vatthuṁ
avinicchinitvā amūlā mūlaṁ gantvā saṅghasāmaggiṁ karoti dhammikā nu
kho sā bhante saṅghasāmaggīti. Yasmiṁ upāli vatthusmiṁ hoti
saṅghassa bhaṇḍanaṁ kalaho viggaho vivādo saṅghabhedo saṅgharāji
saṅghavavatthānaṁ saṅghanānākaraṇaṁ saṅgho taṁ vatthuṁ avinicchinitvā
amūlā mūlaṁ gantvā saṅghasāmaggiṁ karoti adhammikā sā upāli
saṅghasāmaggīti. Yasmiṁ pana bhante vatthusmiṁ hoti saṅghassa bhaṇḍanaṁ
kalaho viggaho vivādo saṅghabhedo saṅgharāji saṅghavavatthānaṁ
saṅghanānākaraṇaṁ saṅgho taṁ vatthuṁ vinicchinitvā mūlā mūlaṁ gantvā
saṅghasāmaggiṁ karoti dhammikā nu kho sā bhante saṅghasāmaggīti.
1 Sī. Yu. katā saṅghena tassa vatthussa vūpasamāya saṅghasāmaggī nīhatā saṅgharāji
nīhato saṅghabhedo.
Yasmiṁ upāli vatthusmiṁ hoti saṅghassa bhaṇḍanaṁ kalaho viggaho
vivādo saṅghabhedo saṅgharāji saṅghavavatthānaṁ saṅghanānākaraṇaṁ saṅgho
taṁ vatthuṁ vinicchinitvā mūlā mūlaṁ gantvā saṅghasāmaggiṁ karoti
dhammikā sā upāli saṅghasāmaggīti. Kati nu kho bhante saṅghasāmaggiyoti.
Dve 1 upāli saṅghasāmaggiyo atthi upāli saṅghasāmaggī
atthāpetā byañjanupetā atthi upāli saṅghasāmaggī
atthupetā ca byañjanupetā ca. Katamā ca upāli saṅghasāmaggī
atthāpetā byañjanupetā. Yasmiṁ upāli vatthusmiṁ hoti saṅghassa
bhaṇḍanaṁ kalaho viggaho vivādo saṅghabhedo saṅgharāji saṅghavavatthānaṁ
saṅghanānākaraṇaṁ saṅgho taṁ vatthuṁ avinicchinitvā amūlā
mūlaṁ gantvā saṅghasāmaggiṁ karoti ayaṁ vuccati upāli saṅghasāmaggī
atthāpetā byañjanupetā. Katamā ca upāli saṅghasāmaggī
atthupetā ca byañjanupetā ca. Yasmiṁ upāli vatthusmiṁ hoti
saṅghassa bhaṇḍanaṁ kalaho viggaho vivādo saṅghabhedo saṅgharāji
saṅghavavatthānaṁ saṅghanānākaraṇaṁ saṅgho taṁ vatthuṁ vinicchinitvā mūlā
mūlaṁ gantvā saṅghasāmaggiṁ karoti ayaṁ vuccati upāli saṅghasāmaggī
atthupetā ca byañjanupetā ca. Imā kho upāli dve saṅghasāmaggiyoti.
Athakho āyasmā upāli uṭṭhāyāsanā ekaṁsaṁ
uttarāsaṅgaṁ karitvā yena bhagavā tenañjalimpaṇāmetvā bhagavantaṁ
gāthāya ajjhabhāsi
1 Ma. dvemā.

[260] Saṅghassa kiccesu ca mantanāsu ca
atthesu jātesu vinicchayesu ca
kathampakārodha naro mahatthiko
bhikkhu kathaṁ hotidha paggahārahoti.
Anānuvajjo paṭhamena sīlato
avekkhitācārasusaṁvutindriyo
paccatthikā nopavadanti dhammato
na hissa taṁ hoti vadeyyu yena naṁ 1 .
So tādiso sīlavisuddhiyā ṭhito
visārado hoti visayha bhāsati
nacchambhati parisagato na vedhati
atthaṁ na hāpeti anuyyutaṁ bhaṇaṁ
tatheva pañhaṁ parisāsu pucchito
na cāpi 2 pajjhāyati na maṅku hoti.
So kālāgataṁ byākaraṇārahaṁ vaco
rañjeti viññūparisaṁ vicakkhaṇo
sagāravo vuḍḍhataresu bhikkhusu
ācerakamhi 3 ca sake visārado
alaṁ pametuṁ paguṇo kathetave
paccatthikānañca viraddhikovido 4
1 Po. taṁ. 2 Ma. Yu. ceva. 3 Po. ācārakamhi. 4 Po. visaṇdhikovido.
Paccatthikā yena vajanti niggahaṁ
mahājano paññāpanañca 1 gacchati
sakañca ādāyamayaṁ na riñcati
veyyākaraṁ 2 pañhamanūpaghātikaṁ
dūteyyakammesu alaṁ samuggaho
saṅghassa kiccesu ca āhunaṁ yathā
karaṁvaco bhikkhugaṇena pesito
ahaṁ karomīti na tena maññati
āpajjati yāvatakesu vatthusu
āpattiyā hoti yathā ca vuṭṭhiti 3
ete vibhaṅgā ubhayassa sāgatā 4
āpattivuṭṭhānapadassa kovido
nissāraṇaṁ gacchati yāni cācaraṁ
nissārito hoti yathā ca vatthunā 5
osāraṇaṁ taṁvusitassa jantuno
etaṁpi jānāti vibhaṅgakovido
sagāravo vuḍḍhataresu bhikkhusu
navesu theresu ca majjhimesu ca
mahājanassatthacarodha paṇḍito
so tādiso bhikkhu idha paggahārahoti.
1 Ma. saññapanañca. 2 Po. veyyānaṁ karaṁ. 2 Ma. viyākaraṁ. Sī. so byākaraṁ.
Yu. vayākaraṇaṁ. 3 Yu. vuṭṭhāti. 4 Ma. svāgatā. 5 Po. Ma. vattanā.
Kosambikkhandhakaṁ dasamaṁ 1 .
---------
Tassuddānaṁ

[261] Kosambiyaṁ jinavaro vivādāpattidassane
ukkhipeyya yasmiṁ tasmiṁ tassa 2 yāpatti desaye.
Antosīmāya tattheva bālakañceva vaṁsadā 3
pārileyyā ca sāvatthī sārīputto ca kolito
mahākassapakaccāno koṭṭhito kappinena 4 ca
mahācundo ca 5 anuruddho revato upālivhayo 6
ānando rāhulo ceva gotamīnāthapiṇḍiko 7
visākhā migāramātā ca 8
senāsanaṁ vivittañca āmisaṁ samakaṁpi ca
na kehi 9 chando dātabbo upāli paripucchito
anupavajjo sīlena 10 sāmaggī jinasāsaneti 11 .
Mahāvaggo samatto 12 .
---------
1 Po. kosambikā niṭṭhitā. Ma. kosambakakkhandhako sadaso. Yu. kosambakkhandhako
dasamo. 2 Ma. saddhā. 3 Po. kosambiyaṁ jinavaro .pe. bālakañceva vaṁsadāti
divaḍḍhagāthā na dissati "suttantiko vinayadharo ukkhittā ceva pakkhikāti aḍḍhagāthā
pana dissati. 4 Po. kappinopi ca. 5 Po. Ma. Yu. casaddo natthi.
6 Po. revatopālisambiyo. Ma. upāli cubho. 7 Po. gotamīsudatena ca.
8 Po. Ma. visākhā migāramātācāti ime pāṭhā na dissanti. 9 Po. na kehipi.
Yu. na kena. 10 Po. anuvajjo ca vimalo. Ma. anānuvajjo sīlena. Yu. anupavajji
visīlena. 11 Po. jinasāsananti. 12 Po. mahāvaggapāṭho niṭṭhito. Ma. mahāvaggapāli
niṭaṭhitā. Yu. mahāvaggaṁ samattaṁ.