[932] Tattha katamāni tīṇi saññojanāni sakkāyadiṭṭhi vicikicchā
sīlabbataparāmāso. Tattha katamā sakkāyadiṭṭhi idha assutavā
puthujjano ariyānaṁ adassāvī ariyadhammassa akovido ariyadhamme
avinīto sappurisānaṁ adassāvī sappurisadhammassa akovido sappurisadhamme
avinīto rūpaṁ attato samanupassati rūpavantaṁ vā attānaṁ
attani vā rūpaṁ rūpasmiṁ vā attānaṁ vedanaṁ .pe. Saññaṁ
.pe. Saṅkhāre .pe. Viññāṇaṁ attato samanupassati viññāṇavantaṁ
vā attānaṁ attani vā viññāṇaṁ viññāṇasmiṁ vā attānaṁ
yā evarūpā diṭṭhi diṭṭhigataṁ .pe. Vipariyesaggāho ayaṁ vuccati
sakkāyadiṭṭhi. Tattha katamā vicikicchā satthari kaṅkhati vicikicchati
dhamme kaṅkhati vicikicchati saṅghe kaṅkhati vicikicchati sikkhāya kaṅkhati vicikicchati
pubbante kaṅkhati vicikicchati aparante kaṅkhati vicikicchati pubbantāparante
kaṅkhati vicikicchati idappaccayatāpaṭiccasamuppannesu dhammesu
kaṅkhati vicikicchati yā evarūpā kaṅkhā kaṅkhāyanā kaṅkhāyitattaṁ .pe.
Thambhitattaṁ cittassa manovilekho ayaṁ vuccati vicikicchā. Tattha katamo
sīlabbataparāmāso ito bahiddhā samaṇabrāhmaṇānaṁ sīlena suddhi
vatena suddhi sīlabbatena suddhīti yā evarūpā diṭṭhi diṭṭhigataṁ
.pe. Vipariyesaggāho ayaṁ vuccati sīlabbataparāmāso. Imāni
Tīṇi saññojanāni.

[933] Tattha katamā tisso taṇhā kāmataṇhā bhavataṇhā
vibhavataṇhā. Tattha katamā bhavataṇhā bhavadiṭṭhisahagato rāgo sārāgo
.pe. Cittassa sārāgo ayaṁ vuccati bhavataṇhā. Tattha katamā
vibhavataṇhā ucchedadiṭṭhisahagato rāgo sārāgo .pe. Cittassa
sārāgo ayaṁ vuccati vibhavataṇhā. Avasesā taṇhā kāmataṇhā.
Tattha katamā kāmataṇhā kāmadhātupaṭisaṁyutto rāgo sārāgo
.pe. Cittassa sārāgo ayaṁ vuccati kāmataṇhā. Rūpadhātuarūpadhātupaṭisaṁyutto
rāgo sārāgo .pe. Cittassa sārāgo
ayaṁ vuccati bhavataṇhā. Ucchedadiṭṭhisahagato rāgo sārāgo
.pe. Cittassa sārāgo ayaṁ vuccati vibhavataṇhā. Imā
tisso taṇhā.

[934] Tattha katamā aparāpi tisso taṇhā kāmataṇhā
rūpataṇhā arūpataṇhā. Tattha katamā kāmataṇhā kāmadhātupaṭisaṁyutto
rāgo sārāgo .pe. Cittassa sārāgo ayaṁ vuccati
kāmataṇhā. Tattha katamā rūpataṇhā rūpadhātupaṭisaṁyutto rāgo
sārāgo .pe. Cittassa sārāgo ayaṁ vuccati rūpataṇhā.
Tattha katamā arūpataṇhā arūpadhātupaṭisaṁyutto rāgo sārāgo
.pe. Cittassa sārāgo ayaṁ vuccati arūpataṇhā. Imā
tisso taṇhā.

[935] Tattha katamā aparāpi tisso taṇhā rūpataṇhā
arūpataṇhā nirodhataṇhā. Tattha katamā rūpataṇhā rūpadhātupaṭisaṁyutto
rāgo sārāgo .pe. Cittassa sārāgo ayaṁ vuccati rūpataṇhā.
Tattha katamā arūpataṇhā arūpadhātupaṭisaṁyutto rāgo sārāgo
.pe. Cittassa sārāgo ayaṁ vuccati arūpataṇhā. Tattha
katamā nirodhataṇhā ucchedadiṭṭhisahagato rāgo sārāgo .pe.
Cittassa sārāgo ayaṁ vuccati nirodhataṇhā. Imā tisso taṇhā.

[936] Tattha katamā tisso esanā kāmesanā bhavesanā
brahmacariyesanā. Tattha katamā kāmesanā yo kāmesu kāmacchando
.pe. Kāmajjhosānaṁ ayaṁ vuccati kāmesanā. Tattha katamā
bhavesanā yo bhavesu bhavacchando .pe. Bhavajjhosānaṁ ayaṁ vuccati
bhavesanā. Tattha katamā brahmacariyesanā sassato lokoti vā
asassato lokoti vā .pe. Neva hoti na na hoti tathāgato
parammaraṇāti vā yā evarūpā diṭṭhi diṭṭhigataṁ .pe. Vipariyesaggāho
ayaṁ vuccati brahmacariyesanā. Tattha katamā kāmesanā kāmarāgo
tadekaṭṭhaṁ akusalaṁ kāyakammaṁ vacīkammaṁ manokammaṁ ayaṁ vuccati
kāmesanā. Tattha katamā bhavesanā bhavarāgo tadekaṭṭhaṁ akusalaṁ
kāyakammaṁ vacīkammaṁ manokammaṁ ayaṁ vuccati bhavesanā. Antaggāhikā
diṭṭhi tadekaṭṭhaṁ akusalaṁ kāyakammaṁ vacīkammaṁ manokammaṁ ayaṁ vuccati
brahmacariyesanā. Imā tisso esanā.

[937] Tattha katamā tisso vidhā seyyohamasmīti vidhā
sadisohamasmīti vidhā hīnohamasmīti vidhā imā tisso vidhā.

[938] Tattha katamāni tīṇi bhayāni jātibhayaṁ jarābhayaṁ maraṇabhayaṁ.
Tattha katamaṁ jātibhayaṁ jātiṁ paṭicca bhayaṁ bhayānakaṁ chambhitattaṁ lomahaṁso
cetaso utrāso idaṁ vuccati jātibhayaṁ. Tattha katamaṁ jarābhayaṁ
jaraṁ paṭicca bhayaṁ bhayānakaṁ chambhitattaṁ lomahaṁso cetaso utrāso
idaṁ vuccati jarābhayaṁ. Tattha katamaṁ maraṇabhayaṁ maraṇaṁ paṭicca bhayaṁ
bhayānakaṁ chambhitattaṁ lomahaṁso cetaso utrāso idaṁ vuccati
maraṇabhayaṁ. Imāni tīṇi bhayāni.

[939] Tattha katamāni tīṇi tamāni atītaṁ addhānaṁ ārabbha
kaṅkhati vicikicchati nādhimuccati na sampasīdati anāgataṁ addhānaṁ
ārabbha kaṅkhati vicikicchati nādhimuccati na sampasīdati paccuppannaṁ
addhānaṁ ārabbha kaṅkhati vicikicchati nādhimuccati na sampasīdati imāni
tīṇi tamāni.

[940] Tattha katamāni tīṇi titthāyatanāni idhekacco samaṇo
vā brāhmaṇo vā evaṁvādī hoti evaṁdiṭṭhi yaṅkiñcāyaṁ purisapuggalo
paṭisaṁvedeti sukhaṁ vā dukkhaṁ vā adukkhamasukhaṁ vā sabbantaṁ pubbe
katahetūti idha panekacco samaṇo vā brāhmaṇo vā evaṁvādī
hoti evaṁdiṭṭhi yaṅkiñcāyaṁ purisapuggalo paṭisaṁvedeti sukhaṁ vā dukkhaṁ
vā adukkhamasukhaṁ vā sabbantaṁ issaranimmānahetūti idha panekacco
Samaṇo vā brāhmaṇo vā evaṁvādī hoti evaṁdiṭṭhi yaṅkiñcāyaṁ
purisapuggalo paṭisaṁvedeti sukhaṁ vā dukkhaṁ vā adukkhamasukhaṁ vā sabbantaṁ
ahetuappaccayāti imāni tīṇi titthāyatanāni.

[941] Tattha katame tayo kiñcanā rāgo kiñcanaṁ doso
kiñcanaṁ moho kiñcanaṁ ime tayo kiñcanā.