[912] Tattha katamā avijjā yaṁ aññāṇaṁ adassanaṁ .pe.
Avijjālaṅgī moho akusalamūlaṁ ayaṁ vuccati avijjā. Tattha
katamā bhavataṇhā yo bhavesu bhavacchando bhavarāgo bhavanandī bhavataṇhā
bhavasineho bhavapariḷāho bhavamucchā bhavajjhosānaṁ ayaṁ vuccati bhavataṇhā.

[913] Tattha katamā bhavadiṭṭhi bhavissati attā ca loko
cāti yā evarūpā diṭṭhi diṭṭhigataṁ .pe. Vipariyesaggāho ayaṁ
vuccati bhavadiṭṭhi. Tattha katamā vibhavadiṭṭhi na bhavissati attā
ca loko cāti yā evarūpā diṭṭhi diṭṭhigataṁ .pe. Vipariyesaggāho
ayaṁ vuccati vibhavadiṭṭhi.

[914] Tattha katamā sassatadiṭṭhi sassato attā ca loko
cāti yā evarūpā diṭṭhi diṭṭhigataṁ .pe. Vipariyesaggāho ayaṁ
vuccati sassatadiṭṭhi. Tattha katamā ucchedadiṭṭhi ucchijjissati
attā ca loko cāti yā evarūpā diṭṭhi diṭṭhigataṁ .pe.
Vipariyesaggāho ayaṁ vuccati ucchedadiṭṭhi.

[915] Tattha katamā antavā diṭṭhi antavā attā ca loko
cāti yā evarūpā diṭṭhi diṭṭhigataṁ .pe. Vipariyesaggāho ayaṁ
vuccati antavā diṭṭhi. Tattha katamā anantavā diṭṭhi anantavā
attā ca loko cāti yā evarūpā diṭṭhi diṭṭhigataṁ .pe.
Vipariye saggāho ayaṁ vuccati anantavā diṭṭhi.

[916] Tattha katamā pubbantānudiṭṭhi pubbantaṁ ārabbha yā
uppajjati diṭṭhi diṭṭhigataṁ .pe. Vipariyesaggāho ayaṁ vuccati
pubbantānudiṭṭhi. Tattha katamā aparantānudiṭṭhi aparantaṁ ārabbha
yā uppajjati diṭṭhi diṭṭhigataṁ .pe. Vipariyesaggāho ayaṁ vuccati
aparantānudiṭṭhi.

[917] Tattha katamaṁ ahirikaṁ yaṁ na hiriyati hiriyitabbena na hiriyati
pāpakānaṁ akusalānaṁ dhammānaṁ samāpattiyā idaṁ vuccati ahirikaṁ.
Tattha katamaṁ anottappaṁ yaṁ na ottappati ottappitabbena na
ottappati pāpakānaṁ akusalānaṁ dhammānaṁ samāpattiyā idaṁ vuccati
anottappaṁ.

[918] Tattha katamā dovacassatā sahadhammike vuccamāne
dovacassāyaṁ dovacassiyaṁ dovacassatā vippaṭikūlagāhitā vipaccanīkasātatā
anādariyaṁ anādaratā agāravatā appaṭissavatā ayaṁ
vuccati dovacassatā. Tattha katamā pāpamittatā ye te puggalā
assaddhā dussīlā appassutā maccharino duppaññā yā tesaṁ
sevanā nisevanā saṁsevanā bhajanā sambhajanā bhatti sambhatti
sampavaṅkatā ayaṁ vuccati pāpamittatā.

[919] Tattha katamo anājjavo yo anājjavo anājjavatā
jimhatā vaṅkatā kuṭilatā ayaṁ vuccati anājjavo. Tattha katamo
Amaddavo yā amudutā amaddavatā kakkhaḷiyaṁ phārusiyaṁ kakkhaḷatā
kathinatā ujucittatā amudutā ayaṁ vuccati amaddavo.

[920] Tattha katamā akkhanti yā akkhanti akkhamanatā anadhivāsanatā
caṇḍikkaṁ assuropo anattamanatā cittassa ayaṁ vuccati
akkhanti. Tattha katamaṁ asoraccaṁ kāyiko vītikkamo vācasiko
vītikkamo kāyikavācasiko vītikkamo idaṁ vuccati asoraccaṁ sabbampi
dussīlyaṁ asoraccaṁ.

[921] Tattha katamaṁ asākhalyaṁ yā sā vācā aṇḍakā
kakkasā parakaṭukā parābhisajjanī kodhasāmantā asamādhisaṁvattanikā
tathārūpiṁ vācaṁ bhāsitā hoti yā tattha asaṇhavācatā asakhilavācatā
pharusavācatā idaṁ vuccati asākhalyaṁ. Tattha katamo appaṭisanthāro
dve paṭisanthārā āmisapaṭisanthāro ca dhammapaṭisanthāro ca
idhekacco appaṭisanthārako hoti āmisapaṭisanthārena vā dhammapaṭisanthārena
vā ayaṁ vuccati appaṭisanthāro.