[902] Tattha katamo ñātivitakko ñātake ārabbha gehasito
takko vitakko .pe. Micchāsaṅkappo ayaṁ vuccati ñātivitakko.

[903] Tattha katamo janapadavitakko janapadaṁ ārabbha gehasito
takko vitakko .pe. Micchāsaṅkappo ayaṁ vuccati janapadavitakko.

[904] Tattha katamo amaravitakko dukkarakārikāpaṭisaṁyutto
vā diṭṭhigatapaṭisaṁyutto vā gehasito takko vitakko .pe.
Micchāsaṅkappo ayaṁ vuccati amaravitakko.

[905] Tattha katamo parānudayatāpaṭisaṁyutto vitakko idhekacco
Gihisaṁsaṭṭho viharati sahanandī sahasokī sukhitesu sukhito dukkhitesu
dukkhito uppannesu kiccakaraṇīyesu attanāva yogaṁ āpajjati yo
tattha gehasito takko vitakko .pe. Micchāsaṅkappo ayaṁ vuccati
parānudayatāpaṭisaṁyutto vitakko.

[906] Tattha katamo lābhasakkārasilokapaṭisaṁyutto vitakko
lābhasakkārasilokaṁ ārabbha gehasito takko vitakko .pe. Micchāsaṅkappo
ayaṁ vuccati lābhasakkārasilokapaṭisaṁyutto vitakko.

[907] Tattha katamo anavaññattipaṭisaṁyutto vitakko idhekacco
jātiyā vā gottena vā kolaputtiyena vā vaṇṇapokkharatāya vā
dhanena vā ajjhenena vā kammāyatanena vā sippāyatanena vā
vijjaṭṭhānena vā sutena vā paṭibhāṇena vā aññataraññatarena
vatthunā mā maṁ pare avajāniṁsūti yo tattha gehasito takko
vitakko .pe. Micchāsaṅkappo ayaṁ vuccati anavaññattipaṭisaṁyutto
vitakko.
Ekakaṁ.

[908] Tattha katamo kodho yo kodho kujjhanā kujjhitattaṁ
doso dūsanā dūsitattaṁ byāpatti byāpajjanā byāpajjitattaṁ
virodho paṭivirodho caṇḍikkaṁ assuropo anattamanatā cittassa ayaṁ
vuccati kodho. Tattha katamo upanāho pubbakālaṁ kodho aparakālaṁ
upanāho yo evarūpo upanāho upanahanā upanāhitattaṁ aṭṭhapanā
Ṭhapanā saṇṭhapanā anusaṁsandanā anuppabandhanā daḷhīkammaṁ kodhassa
ayaṁ vuccati upanāho.

[909] Tattha katamo makkho yo makkho makkhiyanā makkhiyitattaṁ
niṭṭhuriyaṁ niṭṭhuriyakammaṁ ayaṁ vuccati makkho. Tattha katamo palāso
yo palāso palāsāyanā palāsāyitattaṁ palāsāhāro vivādaṭṭhānaṁ
yugaggāho appaṭinissaggo ayaṁ vuccati palāso.

[910] Tattha katamā issā yā paralābhasakkāragarukāra-
mānanavandanapūjanāsu issā issāyanā issāyitattaṁ usūyā usūyanā
usūyitattaṁ ayaṁ vuccati issā. Tattha katamaṁ macchariyaṁ pañca
macchariyāni āvāsamacchariyaṁ kulamacchariyaṁ lābhamacchariyaṁ vaṇṇamacchariyaṁ
dhammamacchariyaṁ yaṁ evarūpaṁ maccheraṁ maccharāyanā maccharāyitattaṁ vevicchaṁ
kadariyaṁ kaṭukañcukatā aggahitattaṁ cittassa idaṁ vuccati macchariyaṁ.

[911] Tattha katamā māyā idhekacco kāyena duccaritaṁ
caritvā vācāya duccaritaṁ caritvā manasā duccaritaṁ caritvā tassa
paṭicchādanahetu pāpikaṁ icchaṁ paṇidahati mā maṁ jaññāti icchati
mā maṁ jaññāti saṅkappati mā maṁ jaññāti vācaṁ bhāsati mā maṁ
jaññāti kāyena parakkamati yā evarūpā māyā māyāvitā
accāsarā vañcanā nikati vikīraṇā pariharaṇā guhanā pariguhanā
chādanā paricchādanā anuttānīkammaṁ anāvikammaṁ vocchādanā
pāpakiriyā ayaṁ vuccati māyā. Tattha katamaṁ sātheyyaṁ idhekacco
Satho hoti parisatho yaṁ tattha sathaṁ sathatā sātheyyaṁ kakkhaḷatā
kakkhaḷiyaṁ parikkhatatā pārikkhatiyaṁ idaṁ vuccati sātheyyaṁ.