[852] Cattāro āsavā cattāro ganthā cattāro oghā
cattāro yogā cattāri upādānāni cattāro taṇhuppādā
cattāri agatigamanāni cattāro vipariyesā cattāro anariyavohārā
Aparepi cattāro anariyavohārā cattāri duccaritāni aparānipi
cattāri duccaritāni cattāri bhayāni aparānipi cattāri bhayāni
aparānipi cattāri bhayāni aparānipi cattāri bhayāni catasso
diṭṭhiyo.

[853] Pañcorambhāgiyāni saññojanāni pañcuddhambhāgiyāni
saññojanāni pañca macchariyāni pañca saṅgā pañca sallā
pañca cetokhīlā pañca cetaso vinibandhā pañca nīvaraṇāni
pañca kammāni ānantarikāni pañca diṭṭhiyo pañca verā
pañca byasanā pañca akkhantiyā ādīnavā pañca bhayāni
pañca diṭṭhadhammanibbānavādā.

[854] Cha vivādamūlāni cha chandarāgā gehasitā dhammā cha
virodhavatthūni cha taṇhākāyā cha agāravā cha parihāniyā
dhammā aparepi cha parihāniyā dhammā cha somanassupavicārā cha
domanassupavicārā cha upekkhūpavicārā cha gehasitāni somanassāni
cha gehasitāni domanassāni cha gehasitā upekkhā cha diṭṭhiyo.

[855] Satta anusayā satta pariyuṭṭhānāni satta saññojanāni
satta asaddhammā satta duccaritāni satta mānā satta diṭṭhiyo.

[856] Aṭṭha kilesavatthūni aṭṭha kusītavatthūni aṭṭhasu lokadhammesu
cittassa paṭighāto aṭṭha anariyavohārā aṭṭha micchattā
aṭṭha purisadosā aṭṭha asaññivādā aṭṭha nevasaññināsaññivādā.

[857] Nava āghātavatthūni nava purisamalāni navavidhā mānā
nava taṇhāmūlakā dhammā nava iñjitāni nava maññitāni nava
phanditāni nava papañcitāni nava saṅkhatāni.

[858] Dasa kilesavatthūni dasa āghātavatthūni dasa akusalakammapathā
dasa saññojanāni dasa micchattā dasavatthukā micchādiṭṭhi
dasavatthukā antaggāhikā diṭṭhi.

[859] Aṭṭhārasa taṇhāvicaritāni ajjhattikassa upādāya
aṭṭhārasa taṇhāvicaritāni bāhirassa upādāya tadekajjhaṁ abhisaññūhitvā
abhisaṅkhipitvā chattiṁsa taṇhāvicaritāni honti iti
atītāni chattiṁsa taṇhāvicaritāni anāgatāni chattiṁsa taṇhāvicaritāni
paccuppannāni chattiṁsa taṇhāvicaritāni tadekajjhaṁ abhisaññūhitvā
abhisaṅkhipitvā aṭṭhasataṁ taṇhāvicaritaṁ hoti yāni ca dvāsaṭṭhidiṭṭhigatāni
brahmajāle veyyākaraṇe vuttāni bhagavatā.
Mātikā.

[860] Tattha katamo jātimado jātiṁ paṭicca mado majjanā
majjitattaṁ māno maññanā maññitattaṁ uṇṇati uṇṇāmo
dhajo sampaggāho ketukamyatā cittassa ayaṁ vuccati jātimado.

[861] Tattha katamo gottamado gottaṁ paṭicca .pe.
Ārogyaṁ paṭicca .pe. Yobbanaṁ paṭicca .pe. Jīvitaṁ paṭicca
.pe. Lābhaṁ paṭicca .pe. Sakkāraṁ paṭicca .pe. Garukāraṁ
paṭicca .pe. Purekkhāraṁ paṭicca .pe. Parivāraṁ paṭicca .pe.
Bhogaṁ paṭicca .pe. Vaṇṇaṁ paṭicca .pe. Sutaṁ paṭicca .pe.
Paṭibhāṇaṁ paṭicca .pe. Rattaññutaṁ paṭicca .pe. Piṇḍapātikattaṁ
paṭicca .pe. Anavaññattiṁ paṭicca .pe. Ariyāpathaṁ paṭicca .pe.
Iddhiṁ paṭicca .pe. Yasaṁ paṭicca .pe. Sīlaṁ paṭicca .pe.
Jhānaṁ paṭicca .pe. Sippaṁ paṭicca .pe. Ārohaṁ paṭicca .pe.
Pariṇāhaṁ paṭicca .pe. Saṇṭhānaṁ paṭicca .pe. Pāripūriṁ paṭicca
mado majjanā majjitattaṁ māno maññanā maññitattaṁ uṇṇati
uṇṇāmo dhajo sampaggāho ketukamyatā cittassa ayaṁ vuccati
pāripūrimado.