[872] Tattha katamā asabhāgavutti mātari vā pitari vā
jeṭṭhe vā bhātari vā ācariyesu vā upajjhāye vā buddhe vā
sāvakesu vā aññataraññataresu garuṭṭhānikesu vippaṭikūlagāhitā
vipaccanīkasātatā anādariyaṁ anādaratā agāravatā appaṭissavatā
ayaṁ vuccati asabhāgavutti.

[873] Tattha katamā arati pantesu vā senāsanesu aññataraññataresu
vā adhikusalesu dhammesu arati aratikā anabhirati anabhiramanā
Ukkaṇṭhitā paritasitā ayaṁ vuccati arati.

[874] Tattha katamā tandi yā tandi tandiyanā tandimanakatā
ālasyaṁ ālasāyanā ālasāyitattaṁ ayaṁ vuccati tandi.

[875] Tattha katamā vijambhikā yā kāyassa jambhanā vijambhanā
ānamanā vinamanā sannamanā paṇamanā byādhiyakaṁ ayaṁ vuccati
vijambhikā.

[876] Tattha katamo bhattasammado yā bhuttāvissa bhattamucchā
bhattakilamatho bhattapariḷāho kāyaduṭṭhullaṁ ayaṁ vuccati bhattasammado.

[877] Tattha katamaṁ cetaso līnattaṁ yā cittassa akalyatā
akammaññatā olīyanā sallīyanā līnaṁ līyanā līyitattaṁ thīnaṁ
thīyanā thīyitattaṁ cittassa idaṁ vuccati cetaso līnattaṁ.

[878] Tattha katamā kuhanā lābhasakkārasilokasannissitassa
pāpicchassa icchāpakatassa paccayapaṭisevanasaṅkhātena vā sāmantajappitena
vā iriyāpathassa vā aṭṭhapanā ṭhapanā saṇṭhapanā bhākuṭikā
bhākuṭiyaṁ kuhanā kuhāyanā kuhitattaṁ ayaṁ vuccati kuhanā.

[879] Tattha katamā lapanā lābhasakkārasilokasannissitassa
pāpicchassa icchāpakatassa yā paresaṁ ālapanā lapanā sallapanā
ullapanā samullapanā unnahanā samunnahanā ukkāpanā samukkāpanā
anuppiyabhāṇitā pātukamyatā muggasūpatā pāribhaṭyatā ayaṁ
vuccati lapanā.

[880] Tattha katamā nemittikatā lābhasakkārasilokasannissitassa
pāpicchassa icchāpakatassa yaṁ paresaṁ nimittaṁ nimittakammaṁ
obhāso obhāsakammaṁ sāmantajappā parikathā ayaṁ vuccati
nemittikatā.

[881] Tattha katamā nippesikatā lābhasakkārasilokasannissitassa
pāpicchassa icchāpakatassa yā paresaṁ akkosanā vambhanā
garahaṇā ukkhepanā samukkhepanā khipanā saṅkhipanā pāpanā sampāpanā
avaṇṇahārikā paripiṭṭhimaṁsikatā ayaṁ vuccati nippesikatā.