[772] Tattha katamaṁ adinnādānā veramaṇī sikkhāpadaṁ .pe.
Kāmesu micchācārā veramaṇī sikkhāpadaṁ .pe. Musāvādā veramaṇī
sikkhāpadaṁ .pe. Surāmerayamajjapamādaṭṭhānā veramaṇī sikkhāpadaṁ
yasmiṁ samaye kāmāvacaraṁ kusalaṁ cittaṁ uppannaṁ hoti somanassasahagataṁ
ñāṇasampayuttaṁ hīnaṁ majjhimaṁ paṇītaṁ chandādhipateyyaṁ viriyādhipateyyaṁ
cittādhipateyyaṁ vīmaṁsādhipateyyaṁ chandādhipateyyaṁ hīnaṁ majjhimaṁ paṇītaṁ
viriyādhipateyyaṁ hīnaṁ majjhimaṁ paṇītaṁ cittādhipateyyaṁ hīnaṁ majjhimaṁ
paṇītaṁ vīmaṁsādhipateyyaṁ hīnaṁ majjhimaṁ paṇītaṁ surāmerayamajjapamādaṭṭhānā
viramantassa yā tasmiṁ samaye surāmerayamajjapamādaṭṭhānā
ārati virati paṭivirati veramaṇī akiriyā akaraṇaṁ anajjhāpatti
velāanatikkamo setughāto idaṁ vuccati surāmerayamajjapamādaṭṭhānā
veramaṇī sikkhāpadaṁ avasesā dhammā veramaṇiyā sampayuttā .pe.
Avasesā dhammā cetanāya sampayuttā .pe. Phasso .pe.
Paggāho avikkhepo idaṁ vuccati surāmerayamajjapamādaṭṭhānā
veramaṇī sikkhāpadaṁ. Tattha katamaṁ surāmerayamajjapamādaṭṭhānā
veramaṇī sikkhāpadaṁ yasmiṁ samaye kāmāvacaraṁ kusalaṁ cittaṁ uppannaṁ
hoti somanassasahagataṁ ñāṇasampayuttaṁ sasaṅkhārena .pe. Somanassasahagataṁ
ñāṇasampayuttaṁ .pe. Somanassasahagataṁ ñāṇavippayuttaṁ
sasaṅkhārena .pe. Upekkhāsahagataṁ ñāṇasampayuttaṁ .pe. Upekkhāsahagataṁ
Ñāṇasampayuttaṁ sasaṅkhārena .pe. Upekkhāsahagataṁ ñāṇavippayuttaṁ
.pe. Upekkhāsahagataṁ ñāṇavippayuttaṁ sasaṅkhārena hīnaṁ
majjhimaṁ paṇītaṁ chandādhipateyyaṁ viriyādhipateyyaṁ cittādhipateyyaṁ
chandādhipateyyaṁ hīnaṁ majjhimaṁ paṇītaṁ viriyādhipateyyaṁ hīnaṁ majjhimaṁ
paṇītaṁ cittādhipateyyaṁ hīnaṁ majjhimaṁ paṇītaṁ surāmerayamajjapamādaṭṭhānā
viramantassa yā tasmiṁ samaye surāmerayamajjapamādaṭṭhānā
ārati virati paṭivirati veramaṇī akiriyā akaraṇaṁ anajjhāpatti
velāanatikkamo setughāto idaṁ vuccati surāmerayamajjapamādaṭṭhānā
veramaṇī sikkhāpadaṁ avasesā dhammā veramaṇiyā sampayuttā .pe.
Avasesā dhammā cetanāya sampayuttā .pe. Phasso .pe. Paggāho
avikkhepo idaṁ vuccati surāmerayamajjapamādaṭṭhānā veramaṇī
sikkhāpadaṁ.

[773] Katame dhammā sikkhā yasmiṁ samaye kāmāvacaraṁ kusalaṁ
cittaṁ uppannaṁ hoti somanassasahagataṁ ñāṇasampayuttaṁ rūpārammaṇaṁ
vā .pe. Dhammārammaṇaṁ vā yaṁ yaṁ vā panārabbha tasmiṁ samaye
phasso hoti .pe. Avikkhepo hoti ime dhammā sikkhā.
Katame dhammā sikkhā yasmiṁ samaye kāmāvacaraṁ kusalaṁ cittaṁ uppannaṁ
hoti somanassasahagataṁ ñāṇasampayuttaṁ sasaṅkhārena .pe. Somanassasahagataṁ
ñāṇavippayuttaṁ .pe. Somanassasahagataṁ ñāṇavippayuttaṁ
sasaṅkhārena .pe. Upekkhāsahagataṁ ñāṇasampayuttaṁ .pe. Upekkhāsahagataṁ
Ñāṇasampayuttaṁ sasaṅkhārena .pe. Upekkhāsahagataṁ
ñāṇavippayuttaṁ .pe. Upekkhāsahagataṁ ñāṇavippayuttaṁ sasaṅkhārena
rūpārammaṇaṁ vā .pe. Dhammārammaṇaṁ vā yaṁ yaṁ vā panārabbha
tasmiṁ samaye phasso hoti .pe. Avikkhepo hoti ime dhammā
sikkhā. Katame dhammā sikkhā yasmiṁ samaye rūpūpapattiyā maggaṁ
bhāveti .pe. Arūpūpapattiyā maggaṁ bhāveti .pe. Lokuttaraṁ
jhānaṁ bhāveti niyyānikaṁ apacayagāmiṁ diṭṭhigatānaṁ pahānāya paṭhamāya
bhūmiyā pattiyā vivicceva kāmehi .pe. Paṭhamaṁ jhānaṁ upasampajja
viharati dukkhāpaṭipadaṁ dandhābhiññaṁ tasmiṁ samaye phasso hoti .pe.
Avikkhepo hoti ime dhammā sikkhā.
Abhidhammabhājanīyaṁ.

[774] Pañca sikkhāpadāni pāṇātipātā veramaṇī sikkhāpadaṁ
adinnādānā veramaṇī sikkhāpadaṁ kāmesu micchācārā veramaṇī
sikkhāpadaṁ musāvādā veramaṇī sikkhāpadaṁ surāmerayamajjapamādaṭṭhānā
veramaṇī sikkhāpadaṁ. Pañcannaṁ sikkhāpadānaṁ kati kusalā kati
akusalā kati abyākatā .pe. Kati saraṇā kati araṇā.

[775] Kusalāyeva siyā sukhāya vedanāya sampayuttā siyā
adukkhamasukhāya vedanāya sampayuttā vipākadhammadhammā
anupādinnupādāniyā asaṅkiliṭṭhasaṅkilesikā savitakkasavicārā siyā
pītisahagatā siyā sukhasahagatā siyā upekkhāsahagatā
Nevadassanenanabhāvanāyapahātabbā nevadassanenanabhāvanāyapahātabbahetukā
ācayagāmino nevasekkhānāsekkhā parittā parittārammaṇā majjhimā
aniyatā na vattabbā maggārammaṇātipi maggahetukātipi maggādhipatinotipi
siyā uppannā siyā anuppannā na vattabbā
uppādinoti siyā atītā siyā anāgatā siyā paccuppannā
paccuppannārammaṇā siyā ajjhattā siyā bahiddhā siyā
ajjhattabahiddhā bahiddhārammaṇā anidassanāppaṭighā.

[776] Na hetū sahetukā hetusampayuttā na vattabbā hetū
ceva sahetukā cāti sahetukā ceva na ca hetū na vattabbā hetū
ceva hetusampayuttā cāti hetusampayuttā ceva na ca hetū na
hetū sahetukā. Sappaccayā saṅkhatā anidassanā appaṭighā
arūpā lokiyā kenaci viññeyyā kenaci na viññeyyā. No
āsavā sāsavā āsavavippayuttā na vattabbā āsavā ceva
sāsavā cāti sāsavā ceva no ca āsavā na vattabbā āsavā
ceva āsavasampayuttā cātipi āsavasampayuttā ceva no ca āsavātipi
āsavavippayuttasāsavā. No saññojanā .pe. No ganthā .pe.
No oghā .pe. No yogā .pe. No nīvaraṇā .pe. No parāmāsā
.pe. Sārammaṇā no cittā cetasikā cittasampayuttā
cittasaṁsaṭṭhā cittasamuṭṭhānā cittasahabhuno cittānuparivattino
cittasaṁsaṭṭhasamuṭṭhānā cittasaṁsaṭṭhasamuṭṭhānasahabhuno
Cittasaṁsaṭṭhasamuṭṭhānānuparivattino bāhirā nupādā anupādinnā. Nupādānā
.pe. No kilesā .pe. Na dassanena pahātabbā nabhāvanāya
pahātabbā nadassanenapahātabbahetukā na bhāvanāya pahātabbahetukā
savitakkā savicārā siyā sappītikā siyā appītikā siyā
pītisahagatā siyā na pītisahagatā siyā sukhasahagatā siyā na sukhasahagatā
siyā upekkhāsahagatā siyā na upekkhāsahagatā kāmāvacarā na
rūpāvacarā na arūpāvacarā pariyāpannā aniyyānikā aniyatā
sauttarā araṇāti.
Pañhāpucchakaṁ.
Sikkhāpadavibhaṅgo samatto.
---------
Paṭisambhidāvibhaṅgo

[777] Catasso paṭisambhidā atthapaṭisambhidā dhammapaṭisambhidā
niruttipaṭisambhidā paṭibhāṇapaṭisambhidā. Atthe ñāṇaṁ atthapaṭisambhidā
dhamme ñāṇaṁ dhammapaṭisambhidā tatra dhammaniruttābhilāpe
ñāṇaṁ niruttipaṭisambhidā ñāṇesu ñāṇaṁ paṭibhāṇapaṭisambhidā.

[778] Catasso paṭisambhidā atthapaṭisambhidā dhammapaṭisambhidā
niruttipaṭisambhidā paṭibhāṇapaṭisambhidā. Dukkhe ñāṇaṁ atthapaṭisambhidā
dukkhasamudaye ñāṇaṁ dhammapaṭisambhidā dukkhanirodhe ñāṇaṁ
Atthapaṭisambhidā dukkhanirodhagāminiyā paṭipadāya ñāṇaṁ dhammapaṭisambhidā
tatra dhammaniruttābhilāpe ñāṇaṁ niruttipaṭisambhidā
ñāṇesu ñāṇaṁ paṭibhāṇapaṭisambhidā.

[779] Catasso paṭisambhidā atthapaṭisambhidā dhammapaṭisambhidā
niruttipaṭisambhidā paṭibhāṇapaṭisambhidā. Hetumhi ñāṇaṁ dhammapaṭisambhidā
hetuphale ñāṇaṁ atthapaṭisambhidā tatra dhammaniruttābhilāpe
ñāṇaṁ niruttipaṭisambhidā ñāṇesu ñāṇaṁ paṭibhāṇapaṭisambhidā.

[780] Catasso paṭisambhidā atthapaṭisambhidā dhammapaṭisambhidā
niruttipaṭisambhidā paṭibhāṇapaṭisambhidā. Ye dhammā jātā bhūtā
sañjātā nibbattā abhinibbattā pātubhūtā imesu dhammesu ñāṇaṁ
atthapaṭisambhidā yehi dhammehi te dhammā jātā bhūtā sañjātā
nibbattā abhinibbattā pātubhūtā tesu dhammesu ñāṇaṁ dhammapaṭisambhidā
tatra dhammaniruttābhilāpe ñāṇaṁ niruttipaṭisambhidā
ñāṇesu ñāṇaṁ paṭibhāṇapaṭisambhidā.

[781] Catasso paṭisambhidā atthapaṭisambhidā dhammapaṭisambhidā
niruttipaṭisambhidā paṭibhāṇapaṭisambhidā. Jarāmaraṇe ñāṇaṁ atthapaṭisambhidā
jarāmaraṇasamudaye ñāṇaṁ dhammapaṭisambhidā jarāmaraṇanirodhe
ñāṇaṁ atthapaṭisambhidā jarāmaraṇanirodhagāminiyā paṭipadāya
ñāṇaṁ dhammapaṭisambhidā tatra dhammaniruttābhilāpe ñāṇaṁ niruttipaṭisambhidā
ñāṇesu ñāṇaṁ paṭibhāṇapaṭisambhidā.