[612] Kathañca bhikkhu abhikkante paṭikkante sampajānakārī hoti
ālokite vilokite sampajānakārī hoti sammiñjite pasārite
sampajānakārī hoti saṅghāṭipattacīvaradhāraṇe sampajānakārī hoti
asite pīte khāyite sāyite sampajānakārī hoti uccārapassāvakamme
sampajānakārī hoti gate ṭhite nisinne sutte jāgarite bhāsite
tuṇhībhāve sampajānakārī hoti. Idha bhikkhu sato sampajāno abhikkamati
sato sampajāno paṭikkamati sato sampajāno āloketi
sato sampajāno viloketi sato sampajāno sammiñjeti sato
sampajāno pasāreti sato sampajānakārī hoti saṅghāṭipattacīvaradhāraṇe
Sato sampajānakārī hoti asite pīte khāyite sāyite sato
sampajānakārī hoti uccārapassāvakamme sato sampajānakārī hoti
gate ṭhite nisinne sutte jāgarite bhāsite tuṇhībhāve. Satoti
tattha katamā sati yā sati anussati paṭissati sati saraṇatā dhāraṇatā
apilāpanatā asammusanatā sati satindriyaṁ satibalaṁ sammāsati ayaṁ
vuccati sati. Sampajānoti tattha katamaṁ sampajaññaṁ yā paññā
pajānanā vicayo pavicayo dhammavicayo sallakkhaṇā upalakkhaṇā
paccupalakkhaṇā paṇḍiccaṁ kosallaṁ nepuññaṁ vebhabyā cintā upaparikkhā
bhūrī medhā pariṇāyikā vipassanā sampajaññaṁ patodo paññā
paññindriyaṁ paññābalaṁ paññāsatthaṁ paññāpāsādo paññāāloko
paññāobhāso paññāpajjoto paññāratanaṁ amoho
dhammavicayo sammādiṭṭhi idaṁ vuccati sampajaññaṁ. Iti imāya
ca satiyā iminā ca sampajaññena upeto hoti .pe. Samannāgato.
Evaṁ bhikkhu sato sampajāno abhikkamati sato sampajāno
paṭikkamati sato sampajāno āloketi sato sampajāno viloketi
sato sampajāno sammiñjeti sato sampajāno pasāreti sato
sampajānakārī hoti saṅghāṭipattacīvaradhāraṇe sato sampajānakārī
hoti asite pīte khāyite sāyite sato sampajānakārī hoti uccāra-
passāvakamme sato sampajānakārī hoti gate ṭhite nisinne sutte
jāgarite bhāsite tuṇhībhāve.

[613] Vivittanti santike cepi senāsanaṁ hoti tañca
anākiṇṇaṁ gahaṭṭhehi pabbajitehi tena taṁ vivittaṁ. Dūre cepi senāsanaṁ
hoti tañca anākiṇṇaṁ gahaṭṭhehi pabbajitehi tena taṁ vivittaṁ.

[614] Senāsananti mañcopi senāsanaṁ pīṭhaṁpi senāsanaṁ bhisipi
senāsanaṁ bimbohanaṁpi senāsanaṁ vihāropi senāsanaṁ aḍḍhayogopi
senāsanaṁ pāsādopi senāsanaṁ aṭṭopi senāsanaṁ mālopi senāsanaṁ
lenaṁpi senāsanaṁ guhāpi senāsanaṁ rukkhamūlaṁpi senāsanaṁ veḷugumbopi
senāsanaṁ yattha vā pana bhikkhū paṭikkamanti sabbametaṁ senāsanaṁ.

[615] Bhajatīti imaṁ vivittaṁ senāsanaṁ bhajati sambhajati sevati
nisevati saṁsevati tena vuccati bhajatīti.

[616] Araññanti nikkhamitvā bahiindakhīlā sabbametaṁ araññaṁ.

[617] Rukkhamūlanti rukkhamūlaṁyeva rukkhamūlaṁ. Pabbatoyeva
pabbato. Kandarāyeva kandarā. Giriguhāyeva giriguhā.
Susānaṁyeva susānaṁ. Abbhokāsoyeva abbhokāso. Palālapuñjoyeva
palālapuñjo.

[618] Vanapatthanti dūrānametaṁ senāsanānaṁ adhivacanaṁ. Vanapatthanti
vanasaṇḍānametaṁ senāsanānaṁ adhivacanaṁ. Vanapatthanti bhiṁsanakānametaṁ
senāsanānaṁ adhivacanaṁ. Vanapatthanti salomahaṁsānametaṁ senāsanānaṁ
adhivacanaṁ. Vanapatthanti pariyantānametaṁ senāsanānaṁ adhivacanaṁ.
Vanapatthanti na manussupacārānametaṁ senāsanānaṁ adhivacanaṁ. Vanapatthanti
Durabhisambhavānametaṁ senāsanānaṁ adhivacanaṁ.

[619] Appasaddanti santike cepi senāsanaṁ hoti tañca
anākiṇṇaṁ gahaṭṭhehi pabbajitehi tena taṁ appasaddaṁ. Dūre cepi
senāsanaṁ hoti tañca anākiṇṇaṁ gahaṭṭhehi pabbajitehi tena taṁ
appasaddaṁ.

[620] Appanigghosanti yadeva taṁ appasaddaṁ tadeva taṁ appanigghosaṁ
yadeva taṁ appanigghosaṁ tadeva taṁ vijanavātaṁ yadeva taṁ
vijanavātaṁ tadeva taṁ manussarāhaseyyakaṁ yadeva taṁ manussarāhaseyyakaṁ
tadeva taṁ paṭisallānasārūpaṁ.

[621] Araññagato vā rukkhamūlagato vā suññāgāragato vāti
araññagato vā hoti rukkhamūlagato vā suññāgāragato vā.