[632] Byāpādapadosā cittaṁ parisodhetīti atthi byāpādo
atthi padoso. Tattha katamo byāpādo yo cittassa āghāto
paṭighāto paṭighaṁ paṭivirodho kopo pakopo sampakopo doso
padoso sampadoso cittassa byāpatti manopadoso kodho kujjhanā
kujjhitattaṁ doso dūsanā dūsitattaṁ byāpatti byāpajjanā byāpajjitattaṁ
virodho paṭivirodho caṇḍikkaṁ assuropo anattamanatā
cittassa ayaṁ vuccati byāpādo. Tattha katamo padoso yo
byāpādo so padoso yo padoso so byāpādo. Tattha
katamaṁ cittaṁ yaṁ cittaṁ mano mānasaṁ .pe. Tajjā manoviññāṇadhātu
Idaṁ vuccati cittaṁ. Idaṁ cittaṁ imamhā byāpādapadosā sodheti
visodheti parisodheti moceti vimoceti parimoceti tena vuccati
byāpādapadosā cittaṁ parisodhetīti.

[633] Thīnamiddhaṁ pahāyāti atthi thīnaṁ atthi middhaṁ. Tattha
katamaṁ thīnaṁ yā cittassa akalyatā akammaññatā olīyanā sallīyanā
līnaṁ līyanā līyitattaṁ thīnaṁ thīyanā thīyitattaṁ cittassa idaṁ vuccati
thīnaṁ. Tattha katamaṁ middhaṁ yā kāyassa akalyatā akammaññatā
onāho pariyonāho antosamorodho middhaṁ soppaṁ pacalāyikā
soppaṁ supanā supitattaṁ idaṁ vuccati middhaṁ. Iti idañca thīnaṁ
idañca middhaṁ santā honti samitā vūpasantā atthaṅgatā abbhatthaṅgatā
appitā byappitā sositā visositā byantīkatā tena
vuccati thīnamiddhaṁ pahāyāti.

[634] Vigatathīnamiddhoti tassa thīnamiddhassa cattattā vantattā
muttattā pahīnattā paṭinissaṭṭhattā pahīnapaṭinissaṭṭhattā tena
vuccati vigatathīnamiddhoti. Viharatīti .pe. Tena vuccati viharatīti.

[635] Ālokasaññīti tattha katamā saññā yā saññā
sañjānanā sañjānitattaṁ ayaṁ vuccati saññā ayaṁ saññā
ālokā hoti vivaṭā parisuddhā pariyodātā tena vuccati
ālokasaññīti.

[636] Sato sampajānoti tattha katamā sati yā sati
Anussati .pe. Sammāsati ayaṁ vuccati sati. Tattha katamaṁ
sampajaññaṁ yā paññā pajānanā .pe. Amoho dhammavicayo
sammādiṭṭhi idaṁ vuccati sampajaññaṁ. Iti imāya ca satiyā
iminā ca sampajaññena upeto hoti .pe. Samannāgato tena
vuccati sato sampajānoti.

[637] Thīnamiddhā cittaṁ parisodhetīti atthi thīnaṁ atthi middhaṁ.
Tattha katamaṁ thīnaṁ yā cittassa akalyatā .pe. Thīyitattaṁ cittassa
idaṁ vuccati thīnaṁ. Tattha katamaṁ middhaṁ yā kāyassa akalyatā
.pe. Supitattaṁ idaṁ vuccati middhaṁ. Tattha katamaṁ cittaṁ yaṁ
cittaṁ mano mānasaṁ .pe. Tajjā manoviññāṇadhātu idaṁ vuccati
cittaṁ. Idaṁ cittaṁ imamhā thīnamiddhā sodheti visodheti parisodheti
moceti vimoceti parimoceti tena vuccati thīnamiddhā cittaṁ
parisodhetīti.

[638] Uddhaccakukkuccaṁ pahāyāti atthi uddhaccaṁ atthi
kukkuccaṁ. Tattha katamaṁ uddhaccaṁ yaṁ cittassa uddhaccaṁ avūpasamo
cetaso vikkhepo bhantattaṁ cittassa idaṁ vuccati uddhaccaṁ.
Tattha katamaṁ kukkuccaṁ akappiye kappiyasaññitā kappiye akappiyasaññitā
avajje vajjasaññitā vajje avajjasaññitā yaṁ evarūpaṁ
kukkuccaṁ kukkuccāyanā kukkuccāyitattaṁ cetaso vippaṭisāro
manovilekho idaṁ vuccati kukkuccaṁ. Iti idañca uddhaccaṁ idañca
Kukkuccaṁ santā honti samitā vūpasantā atthaṅgatā abbhatthaṅgatā
appitā byappitā sositā visositā byantīkatā tena vuccati uddhaccakukkuccaṁ
pahāyāti.

[639] Anuddhatoti tassa uddhaccakukkuccassa cattattā vantattā
muttattā pahīnattā paṭinissaṭṭhattā pahīnapaṭinissaṭṭhattā tena
vuccati anuddhatoti.

[640] Viharatīti iriyati .pe. Viharati tena vuccati viharatīti.

[641] Ajjhattanti yaṁ ajjhattaṁ paccattaṁ. Vūpasantacittoti
tattha katamaṁ cittaṁ yaṁ cittaṁ mano mānasaṁ .pe. Tajjā
manoviññāṇadhātu idaṁ vuccati cittaṁ. Idaṁ cittaṁ ajjhattaṁ santaṁ
hoti samitaṁ vūpasantaṁ tena vuccati ajjhattaṁ vūpasantacittoti.