[642] Uddhaccakukkuccā cittaṁ parisodhetīti atthi uddhaccaṁ
atthi kukkuccaṁ. Tattha katamaṁ uddhaccaṁ yaṁ cittassa uddhaccaṁ
avūpasamo cetaso vikkhepo bhantattaṁ cittassa idaṁ vuccati uddhaccaṁ.
Tattha katamaṁ kukkuccaṁ akappiye kappiyasaññitā .pe. Manovilekho
idaṁ vuccati kukkuccaṁ. Tattha katamaṁ cittaṁ yaṁ cittaṁ mano mānasaṁ
.pe. Tajjā manoviññāṇadhātu idaṁ vuccati cittaṁ. Idaṁ cittaṁ
imamhā uddhaccakukkuccā sodheti visodheti parisodheti moceti
vimoceti parimoceti tena vuccati uddhaccakukkuccā cittaṁ parisodhetīti.

[643] Vicikicchaṁ pahāyāti tattha katamā vicikicchā yā kaṅkhā
Kaṅkhāyanā kaṅkhāyitattaṁ vimati vicikicchā dveḷhakaṁ dvedhāpatho
saṁsayo anekaṁsagāho āsappanā parisappanā apariyogāhanā
thambhitattaṁ cittassa manovilekho ayaṁ vuccati vicikicchā ayaṁ vicikicchā
santā hoti samitā vūpasantā atthaṅgatā abbhatthaṅgatā appitā
byappitā sositā visositā byantīkatā tena vuccati vicikicchaṁ
pahāyāti.

[644] Tiṇṇavicikicchoti imaṁ vicikicchaṁ tiṇṇo hoti uttiṇṇo
nittiṇṇo pāragato pāramanuppatto tena vuccati
tiṇṇavicikicchoti.

[645] Viharatīti iriyati .pe. Viharati tena vuccati viharatīti.

[646] Akathaṅkathī kusalesu dhammesūti imāya vicikicchāya kusalesu
dhammesu na kaṅkhati na vicikicchati akathaṅkathī hoti nikkathaṅkatho
vigatakathaṅkatho tena vuccati akathaṅkathī kusalesu dhammesūti.

[647] Vicikicchāya cittaṁ parisodhetīti tattha katamā vicikicchā
yā kaṅkhā kaṅkhāyanā kaṅkhāyitattaṁ .pe. Thambhitattaṁ cittassa
manovilekho ayaṁ vuccati vicikicchā. Tattha katamaṁ cittaṁ yaṁ
cittaṁ mano mānasaṁ .pe. Tajjā manoviññāṇadhātu idaṁ vuccati
cittaṁ. Idaṁ cittaṁ imāya vicikicchāya sodheti visodheti parisodheti
moceti vimoceti parimoceti tena vuccati vicikicchāya cittaṁ
parisodhetīti.

[648] Ime pañca nīvaraṇe pahāyāti ime pañca nīvaraṇā
santā honti samitā vūpasantā atthaṅgatā abbhatthaṅgatā appitā
byappitā sositā visositā byantīkatā tena vuccati ime pañca
nīvaraṇe pahāyāti.

[649] Cetaso upakkileseti ime pañca nīvaraṇā cittassa
upakkilesā.

[650] Paññāya dubbalīkaraṇeti imehi pañcahi nīvaraṇehi
anuppannā ceva paññā na uppajjati uppannā ca paññā
nirujjhati tena vuccati paññāya dubbalīkaraṇeti.

[651] Vivicceva kāmehi vivicca akusalehi dhammehīti tattha
katame kāmā chando kāmo rāgo kāmo chandarāgo kāmo
saṅkappo kāmo rāgo kāmo saṅkapparāgo kāmo ime vuccanti
kāmā. Tattha katame akusalā dhammā kāmacchando byāpādo
thīnamiddhaṁ uddhaccakukkuccaṁ vicikicchā ime vuccanti akusalā dhammā.
Iti imehi ca kāmehi imehi ca akusalehi dhammehi vivitto hoti
tena vuccati vivicceva kāmehi vivicca akusalehi dhammehīti.