[162] Tena kho pana samayena aññatarassa bhikkhuno bahuṁ
cīvaraṁ uppannaṁ hoti. So ca taṁ cīvaraṁ mātāpitūnaṁ 1 dātukāmo
hoti. Bhagavato etamatthaṁ ārocesuṁ. Mātāpitaroti kho bhikkhave
dadamāne kiṁ vadeyyāmi 2 anujānāmi bhikkhave mātāpitūnaṁ dātuṁ
na ca bhikkhave saddhādeyyaṁ vinipātetabbaṁ yo vinipāteyya
āpatti dukkaṭassāti.
[163] Tena kho pana samayena aññataro bhikkhu andhavane
cīvaraṁ nikkhipitvā santaruttarena gāmaṁ piṇḍāya pāvisi. Corā
taṁ cīvaraṁ avahariṁsu. So bhikkhu duccolo hoti lūkhacīvaro.
Bhikkhū evamāhaṁsu kissa tvaṁ āvuso duccolo lūkhacīvaroti 3 .
Idhāhaṁ āvuso andhavane cīvaraṁ nikkhipitvā santaruttarena gāmaṁ
piṇḍāya pāvisiṁ corā taṁ cīvaraṁ avahariṁsu tenāhaṁ duccolo
lūkhacīvaroti. Bhagavato etamatthaṁ ārocesuṁ. Na bhikkhave santaruttarena
gāmo pavisitabbo yo paviseyya āpatti dukkaṭassāti.
Tena kho pana samayena āyasmā ānando asatiyā santaruttarena
gāmaṁ piṇḍāya pāvisi. Bhikkhū āyasmantaṁ ānandaṁ etadavocuṁ
1 Yu. mātāpitunnaṁ. 2 Ma. Yu. vadeyyāma. 3 Ma. lūkhacīvarosīti.
Nanu [1]- āvuso ānanda bhagavatā paññattaṁ na santaruttarena gāmo
pavisitabboti kissa tvaṁ āvuso [2]- santaruttarena gāmaṁ paviṭṭhoti.
Saccaṁ āvuso bhagavatā paññattaṁ na santaruttarena gāmo pavisitabboti
apicāhaṁ āvuso 3 asatiyā paviṭṭhoti. Bhagavato etamatthaṁ
ārocesuṁ. Athakho bhagavā etasmiṁ nidāne etasmiṁ pakaraṇe
dhammiṁ kathaṁ katvā bhikkhū āmantesi 4 pañcime bhikkhave paccayā
saṅghāṭiyā nikkhepāya gilāno vā hoti vassikasaṅketaṁ vā
hoti nadīpāraṁ gantuṁ vā hoti aggaḷaguttivihāro vā hoti
atthatakaṭhinaṁ vā hoti ime kho bhikkhave pañca paccayā
saṅghāṭiyā nikkhepāya. Pañcime bhikkhave paccayā uttarāsaṅgassa
nikkhepāya gilāno vā hoti vassikasaṅketaṁ vā hoti nadīpāraṁ
gantuṁ vā hoti aggaḷaguttivihāro vā hoti atthatakaṭhinaṁ vā
hoti ime kho bhikkhave pañca paccayā uttarāsaṅgassa
nikkhepāya. Pañcime bhikkhave paccayā antaravāsakassa nikkhepāya
gilāno vā hoti vassikasaṅketaṁ vā hoti nadīpāraṁ gantuṁ vā
hoti aggaḷaguttivihāro vā hoti atthatakaṭhinaṁ vā hoti
ime kho bhikkhave pañca paccayā antaravāsakassa nikkhepāya.
Pañcime bhikkhave paccayā vassikasāṭikāya nikkhepāya gilāno
vā hoti nissīmaṁ gantuṁ vā hoti nadīpāraṁ gantuṁ vā hoti
aggaḷaguttivihāro vā hoti vassikasāṭikā akatā vā hoti
1 Ma. Yu. kho. 2 Po. Ma. ānanda. 3 Ma. Yu. ayaṁ pāṭho natthi.
4 Ma. Yu. athakho bhagavā ... āmantesīti ime pāṭhā natthi.
Vippakatā vā ime kho bhikkhave pañca paccayā vassikasāṭikāya
nikkhepāyāti.
[164] Tena kho pana samayena aññataro bhikkhu eko vassaṁ
vasi. Tattha manussā saṅghassa demāti cīvarāni adaṁsu. Athakho
tassa bhikkhuno etadahosi bhagavatā paññattaṁ catuvaggo
pacchimo saṅghoti ahañcamhi ekako ime ca manussā
saṅghassa demāti cīvarāni adaṁsu yannūnāhaṁ imāni saṅghikāni
cīvarāni sāvatthiṁ hareyyanti. Athakho so bhikkhu tāni cīvarāni
ādāya sāvatthiṁ gantvā bhagavato etamatthaṁ ārocesi.
Tuyheva bhikkhu tāni cīvarāni yāva kaṭhinassa ubbhārāyāti. Idha
pana bhikkhave bhikkhu eko vassaṁ vasati. Tattha manussā saṅghassa
demāti cīvarāni denti. Anujānāmi bhikkhave tasseva tāni
cīvarāni yāva kaṭhinassa ubbhārāyāti. Tena kho pana samayena
aññataro bhikkhu utukālaṁ eko vasi. Tattha manussā saṅghassa
demāti cīvarāni adaṁsu. Athakho tassa bhikkhuno etadahosi
bhagavatā paññattaṁ catuvaggo pacchimo saṅghoti ahañcamhi
ekako ime ca manussā saṅghassa demāti cīvarāni adaṁsu
yannūnāhaṁ imāni saṅghikāni cīvarāni sāvatthiṁ hareyyanti. Athakho
so bhikkhu tāni cīvarāni ādāya sāvatthiṁ gantvā bhikkhūnaṁ etamatthaṁ
ārocesi. Bhikkhū bhagavato etamatthaṁ ārocesuṁ. Anujānāmi
Bhikkhave sammukhībhūtena saṅghena bhājetuṁ. Idha pana bhikkhave
bhikkhu utukālaṁ eko vasati. Tattha manussā saṅghassa demāti
cīvarāni denti. Anujānāmi bhikkhave tena bhikkhunā tāni cīvarāni
adhiṭṭhātuṁ mayhimāni cīvarānīti. Tassa ce bhikkhave bhikkhuno taṁ
cīvaraṁ anadhiṭṭhite añño bhikkhu āgacchati samako dātabbo
bhāgo tehi ce bhikkhave bhikkhūhi taṁ cīvaraṁ bhājiyamāne apātite
kuse añño bhikkhu āgacchati samako dātabbo bhāgo tehi
ce bhikkhave bhikkhūhi taṁ cīvaraṁ bhājiyamāne pātite kuse añño
bhikkhu āgacchati nākāmā dātabbo bhāgoti. Tena kho pana
samayena dve bhātukā 1 therā āyasmā ca isidāso āyasmā ca
isibhatto sāvatthiyaṁ vassaṁ vutthā aññataraṁ gāmakāvāsaṁ agamaṁsu.
Manussā cirassāpi therā āgatāti sacīvarāni bhattāni adaṁsu.
Āvāsikā bhikkhū there pucchiṁsu imāni bhante saṅghikāni cīvarāni
there āgamma uppannāni sādiyissanti therā bhāganti. Therā
evamāhaṁsu yathā kho mayaṁ āvuso bhagavatā dhammaṁ desitaṁ
ājānāma tumhākaṁyeva tāni cīvarāni yāva kaṭhinassa ubbhārāyāti.
Tena kho pana samayena tayo bhikkhū rājagahe vassaṁ vasanti.
Tattha manussā saṅghassa demāti cīvarāni denti. Athakho tesaṁ
bhikkhūnaṁ etadahosi bhagavā paññattaṁ catuvaggo pacchimo saṅghoti
mayañcamha 2 tayo janā ime ca manussā saṅghassa demāti
1 Ma. bhātikā. 2 Po. Ma. Yu. mayañcamhā.
Cīvarāni denti kathaṁ nu kho amhehi paṭipajjitabbanti. Tena
kho pana samayena sambahulā therā āyasmā ca nīlavāsī 1 āyasmā
ca sāṇavāsī āyasmā ca gopako āyasmā ca bhagu āyasmā
ca phalikasandāno pātaliputte viharanti kukkuṭārāme. Athakho
te bhikkhū pātaliputtaṁ gantvā there pucchiṁsu. Therā evamāhaṁsu
yathā kho mayaṁ āvuso bhagavatā dhammaṁ desitaṁ ājānāma tumhākaṁyeva
tāni cīvarāni yāva kaṭhinassa ubbhārāyāti.
[165] Tena kho pana samayena āyasmā upanando sakyaputto
sāvatthiyaṁ vassaṁ vuttho aññataraṁ gāmakāvāsaṁ agamāsi. Tattha [2]-
bhikkhū cīvaraṁ bhājetukāmā sannipatiṁsu. Te evamāhaṁsu imāni
kho āvuso saṅghikāni cīvarāni bhājiyissanti sādiyissasi bhāganti.
Āmāvuso sādiyissāmīti tato cīvarabhāgaṁ gahetvā aññaṁ āvāsaṁ
agamāsi. Tatthapi bhikkhū cīvaraṁ bhājetukāmā sannipatiṁsu. Tepi
evamāhaṁsu imāni kho āvuso saṅghikāni cīvarāni bhājiyissanti
sādiyissasi bhāganti. Āmāvuso sādiyissāmīti tatopi cīvarabhāgaṁ
gahetvā aññaṁ āvāsaṁ agamāsi. Tatthapi bhikkhū cīvaraṁ
bhājetukāmā sannipatiṁsu. Tepi evamāhaṁsu imāni kho āvuso
saṅghikāni cīvarāni bhājiyissanti sādiyissasi bhāganti. Āmāvuso
sādiyissāmīti tatopi cīvarabhāgaṁ gahetvā mahantaṁ cīvarabhaṇḍikaṁ ādāya
punadeva sāvatthiṁ paccāgacchi. Bhikkhū evamāhaṁsu mahāpuññosi
1 Po. Ma. Yu. nilavāsī. 2 Ma. ca.
Tvaṁ āvuso upananda bahuṁ te cīvaraṁ uppannanti. Kuto me
āvuso puññaṁ idhāhaṁ [1]- sāvatthiyaṁ vassaṁ vuttho aññataraṁ
gāmakāvāsaṁ agamāsiṁ tattha bhikkhū cīvaraṁ bhājetukāmā sannipatiṁsu
te maṁ evamāhaṁsu imāni kho āvuso saṅghikāni cīvarāni
bhājiyissanti sādiyissasi bhāganti āmāvuso sādiyissāmīti tato
cīvarabhāgaṁ gahetvā aññaṁ āvāsaṁ agamāsiṁ tatthapi bhikkhū cīvaraṁ
bhājetukāmā sannipatiṁsu tepi maṁ evamāhaṁsu imāni kho āvuso
saṅghikāni cīvarāni bhājiyissanti sādiyissasi bhāganti āmāvuso
sādiyissāmīti tatopi cīvarabhāgaṁ gahetvā aññaṁ āvāsaṁ agamāsiṁ
tatthapi bhikkhū cīvaraṁ bhājetukāmā sannipatiṁsu tepi maṁ evamāhaṁsu
imāni kho āvuso saṅghikāni cīvarāni bhājiyissanti sādiyissasi
bhāganti āmāvuso sādiyissāmīti tatopi cīvarabhāgaṁ aggahesiṁ
evaṁ me bahuṁ cīvaraṁ uppannanti. Kiṁ pana tvaṁ āvuso upananda
aññatra vassaṁ vuttho aññatra cīvarabhāgaṁ sādiyīti 2 . Evamāvusoti.
Ye te bhikkhū appicchā .pe. Te ujjhāyanti khīyanti
vipācenti kathaṁ hi nāma āyasmā upanando sakyaputto aññatra
vassaṁ vuttho aññatra cīvarabhāgaṁ sādiyissatīti. Bhagavato
etamatthaṁ ārocesuṁ. Saccaṁ kira tvaṁ upananda aññatra vassaṁ vuttho
aññatra cīvarabhāgaṁ sādiyīti. Saccaṁ bhagavāti. Vigarahi buddho
bhagavā kathaṁ hi nāma tvaṁ moghapurisa aññatra vassaṁ vuttho
1 Ma. Yu. āvuso. 2 Yu. sādiyissasīti.
Aññatra cīvarabhāgaṁ sādiyissasi netaṁ moghapurisa appasannānaṁ vā
pasādāya .pe. Vigarahitvā dhammiṁ kathaṁ katvā bhikkhū āmantesi
na bhikkhave aññatra vassaṁ vutthena aññatra cīvarabhāgo sāditabbo
yo sādiyeyya āpatti dukkaṭassāti. Tena kho pana samayena
āyasmā upanando sakyaputto eko dvīsu āvāsesu vassaṁ vasi
evaṁ me bahuṁ cīvaraṁ uppajjissatīti. Athakho tesaṁ bhikkhūnaṁ etadahosi
kathaṁ nu kho āyasmato upanandassa sakyaputtassa cīvarapaṭiviso
dātabboti. Bhagavato etamatthaṁ ārocesuṁ. Detha bhikkhave
moghapurisassa ekādhippāyaṁ. Idha pana bhikkhave bhikkhu eko dvīsu
āvāsesu vassaṁ vasati evaṁ me bahuṁ cīvaraṁ uppajjissatīti.
Sace amutra upaḍḍhaṁ amutra upaḍḍhaṁ vasati amutra upaḍḍho
amutra upaḍḍho cīvarapaṭiviso dātabbo yattha vā pana bahutaraṁ
vasati tato cīvarapaṭiviso dātabboti.
[166] Tena kho pana samayena aññatarassa bhikkhuno
kucchivikārābādho hoti. So sake muttakarīse palipanno seti.
Athakho bhagavā āyasmatā ānandena pacchāsamaṇena senāsanacārikaṁ
āhiṇḍanto yena tassa bhikkhuno vihāro tenupasaṅkami.
Addasā kho bhagavā taṁ bhikkhuṁ sake muttakarīse palipannaṁ sayamānaṁ
disvāna yena so bhikkhu tenupasaṅkami upasaṅkamitvā taṁ bhikkhuṁ
etadavoca kinte bhikkhu ābādhoti. Kucchivikāro me bhagavāti.
Atthi pana te bhikkhu upaṭṭhākoti. Natthi bhagavāti. Kissa taṁ
bhikkhū na upaṭṭhentīti 1 . Ahaṁ kho bhante bhikkhūnaṁ akārako tena
maṁ bhikkhū na upaṭṭhentīti. Athakho bhagavā āyasmantaṁ ānandaṁ
āmantesi gacchānanda udakaṁ āhara imaṁ bhikkhuṁ nahāpessāmāti.
Evaṁ bhanteti kho āyasmā ānando bhagavato paṭissuṇitvā udakaṁ
āhari. Bhagavā udakaṁ āsiñci āyasmā ānando paridhovi
bhagavā sīsato aggahesi āyasmā ānando pādato uccāretvā
mañcake nipātesuṁ. Athakho bhagavā etasmiṁ nidāne etasmiṁ
pakaraṇe bhikkhusaṅghaṁ sannipātāpetvā bhikkhū paṭipucchi atthi bhikkhave
amukasmiṁ vihāre bhikkhu gilānoti. Atthi bhagavāti. Kintassa
bhikkhave bhikkhuno ābādhoti. Tassa bhante āyasmato
kucchivikārābādhoti. Atthi pana bhikkhave tassa bhikkhuno upaṭṭhākoti.
Natthi bhagavāti. Kissa taṁ bhikkhū na upaṭṭhentīti. Eso bhante
bhikkhu bhikkhūnaṁ akārako tena taṁ bhikkhū na upaṭṭhentīti. Natthi
vo 2 bhikkhave mātā natthi pitā ye vo 3 upaṭṭhaheyyuṁ tumhe ce
bhikkhave aññamaññaṁ na upaṭṭhahissatha atha kocarahi upaṭṭhahissati
yo bhikkhave maṁ upaṭṭhaheyya so gilānaṁ upaṭṭhaheyya. Sace
upajjhāyo hoti upajjhāyena yāvajīvaṁ upaṭṭhātabbo vuṭṭhānassa 4
āgametabbaṁ. Sace ācariyo hoti ācariyena yāvajīvaṁ
upaṭṭhātabbo vuṭṭhānassa āgametabbaṁ. Sace saddhivihāriko
1 Ma. upaṭṭhahantīti. 2-3 Yu. te. 4 Po. vuṭṭhāpanassa. Ma. vuṭṭhānamassa.
Hoti saddhivihārikena yāvajīvaṁ upaṭṭhātabbo vuṭṭhānassa āgametabbaṁ.
Sace antevāsiko hoti antevāsikena yāvajīvaṁ upaṭṭhātabbo
vuṭṭhānassa āgametabbaṁ. Sace samānupajjhāyako hoti
samānupajjhāyakena yāvajīvaṁ upaṭṭhātabbo vuṭṭhānassa āgametabbaṁ.
Sace samānācariyako hoti samānācariyakena yāvajīvaṁ upaṭṭhātabbo
vuṭṭhānassa āgametabbaṁ. Sace na hoti upajjhāyo vā ācariyo
vā saddhivihāriko vā antevāsiko vā samānupajjhāyako vā
samānācariyako vā saṅghena upaṭṭhātabbo. No ce upaṭṭhaheyya
āpatti dukkaṭassa. Pañcahi bhikkhave aṅgehi samannāgato gilāno
dūpaṭṭhāko 1 hoti asappāyakārī hoti sappāye mattaṁ na
jānāti bhesajjaṁ na paṭisevitā hoti atthakāmassa gilānupaṭṭhākassa
yathābhūtaṁ ābādhaṁ nāvikattā hoti abhikkamantaṁ vā
abhikkamatīti paṭikkamantaṁ vā paṭikkamatīti ṭhitaṁ vā ṭhitoti
uppannānaṁ sārīrikānaṁ vedanānaṁ dukkhānaṁ tibbānaṁ kharānaṁ kaṭukānaṁ
asātānaṁ amanāpānaṁ pāṇaharānaṁ anadhivāsakajātiko hoti imehi
kho bhikkhave pañcahaṅgehi samannāgato gilāno dūpaṭṭhāko 1 hoti.
Pañcahi bhikkhave aṅgehi samannāgato gilāno sūpaṭṭhāko hoti
sappāyakārī hoti sappāye mattaṁ jānāti bhesajjaṁ paṭisevitā hoti
atthakāmassa gilānupaṭṭhākassa yathābhūtaṁ ābādhaṁ āvikattā hoti
abhikkamantaṁ vā abhikkamatīti paṭikkamantaṁ vā paṭikkamatīti
1 Ma. dūpaṭaṭho.
Ṭhitaṁ vā ṭhitoti uppannānaṁ sārīrikānaṁ vedanānaṁ dukkhānaṁ tibbānaṁ
kharānaṁ kaṭukānaṁ asātānaṁ amanāpānaṁ pāṇaharānaṁ adhivāsakajātiko hoti
imehi kho bhikkhave pañcahaṅgehi samannāgato gilāno sūpaṭṭhāko
hoti. Pañcahi bhikkhave aṅgehi samannāgato gilānupaṭṭhāko nālaṁ
gilānaṁ upaṭṭhātuṁ na paṭibalo hoti bhesajjaṁ saṁvidhātuṁ sappāyāsappāyaṁ
na jānāti asappāyaṁ upanāmeti sappāyaṁ apanāmeti
āmisantaro gilānaṁ upaṭṭheti no mettacitto jegucchī hoti uccāraṁ
vā passāvaṁ vā kheḷaṁ vā vantaṁ vā nīhātuṁ na paṭibalo hoti
gilānaṁ kālena kālaṁ dhammiyā kathāya sandassetuṁ samādapetuṁ samuttejetuṁ
sampahaṁsetuṁ imehi kho bhikkhave pañcahaṅgehi samannāgato
gilānupaṭṭhāko nālaṁ gilānaṁ upaṭṭhātuṁ. Pañcahi bhikkhave aṅgehi
samannāgato gilānupaṭṭhāko alaṁ gilānaṁ upaṭṭhātuṁ paṭibalo hoti
bhesajjaṁ saṁvidhātuṁ sappāyāsappāyaṁ jānāti asappāyaṁ apanāmeti
sappāyaṁ upanāmeti mettacitto gilānaṁ upaṭṭheti no āmisantaro
ajegucchī hoti uccāraṁ vā passāvaṁ vā kheḷaṁ vā vantaṁ vā nīhātuṁ
paṭibalo hoti gilānaṁ kālena kālaṁ dhammiyā kathāya sandassetuṁ
samādapetuṁ samuttejetuṁ sampahaṁsetuṁ imehi kho bhikkhave
pañcahaṅgehi samannāgato gilānupaṭṭhāko alaṁ gilānaṁ upaṭṭhātunti.
[167] Tena kho pana samayena dve bhikkhū kosalesu janapadesu
addhānamaggapaṭipannā honti. Te aññataraṁ āvāsaṁ upagacchiṁsu.
Tattha aññataro bhikkhu gilāno hoti. Athakho tesaṁ bhikkhūnaṁ
etadahosi bhagavatā kho āvuso gilānupaṭṭhānaṁ vaṇṇitaṁ handa
mayaṁ āvuso imaṁ bhikkhuṁ upaṭṭhemāti. Te taṁ upaṭṭhahiṁsu. So
tehi upaṭṭhiyamāno kālamakāsi. Athakho te bhikkhū tassa bhikkhuno
pattacīvaramādāya sāvatthiṁ gantvā bhagavato etamatthaṁ ārocesuṁ.
Bhikkhussa bhikkhave kālakate saṅgho sāmī pattacīvare apica
gilānupaṭṭhākā bahūpakārā. Anujānāmi bhikkhave saṅghena ticīvarañca
pattañca gilānupaṭṭhākānaṁ dātuṁ. Evañca pana bhikkhave dātabbaṁ.
Tena gilānupaṭṭhākena bhikkhunā saṅghaṁ upasaṅkamitvā evamassa vacanīyo
itthannāmo bhante bhikkhu kālakato idaṁ tassa ticīvarañca
patto cāti. Byattena bhikkhunā paṭibalena saṅgho ñāpetabbo
suṇātu me bhante saṅgho itthannāmo bhikkhu kālakato idaṁ
tassa ticīvarañca patto ca. Yadi saṅghassa pattakallaṁ saṅgho
imaṁ ticīvarañca pattañca gilānupaṭṭhākānaṁ dadeyya. Esā ñatti.
Suṇātu me bhante saṅgho itthannāmo bhikkhu kālakato idaṁ
tassa ticīvarañca patto ca. Saṅgho imaṁ ticīvarañca pattañca
gilānupaṭṭhākānaṁ deti. Yassāyasmato khamati imassa ticīvarassa
ca pattassa ca gilānupaṭṭhākānaṁ dānaṁ so tuṇhassa yassa
nakkhamati so bhāseyya. Dinnaṁ idaṁ saṅghena ticīvarañca patto
ca gilānupaṭṭhākānaṁ. Khamati saṅghassa tasmā tuṇhī. Evametaṁ
Dhārayāmīti. Tena kho pana samayena aññataro sāmaṇero
kālakato hoti. Bhagavato etamatthaṁ ārocesuṁ. Sāmaṇerassa
bhikkhave kālakate saṅgho sāmī pattacīvare apica gilānupaṭṭhākā
bahūpakārā. Anujānāmi bhikkhave saṅghena cīvarañca pattañca
gilānupaṭṭhākānaṁ dātuṁ. Evañca pana bhikkhave dātabbaṁ. Tena
gilānupaṭṭhākena bhikkhunā saṅghaṁ upasaṅkamitvā evamassa vacanīyo
itthannāmo bhante sāmaṇero kālakato idaṁ tassa cīvarañca
patto cāti. Byattena bhikkhunā paṭibalena saṅgho ñāpetabbo
suṇātu me bhante saṅgho itthannāmo sāmaṇero kālakato
idaṁ tassa cīvarañca patto ca. Yadi saṅghassa pattakallaṁ saṅgho
imaṁ cīvarañca pattañca gilānupaṭṭhākānaṁ dadeyya. Esā ñatti.
Suṇātu me bhante saṅgho itthannāmo sāmaṇero kālakato
idaṁ tassa cīvarañca patto ca. Saṅgho imaṁ cīvarañca pattañca
gilānupaṭṭhākānaṁ deti. Yassāyasmato khamati imassa cīvarassa
ca pattassa ca gilānupaṭṭhākānaṁ dānaṁ so tuṇhassa yassa
nakkhamati so bhāseyya. Dinnaṁ idaṁ saṅghena cīvarañca patto
ca gilānupaṭṭhākānaṁ. Khamati saṅghassa tasmā tuṇhī. Evametaṁ
dhārayāmīti. Tena kho pana samayena aññataro bhikkhu ca sāmaṇero
ca gilānaṁ upaṭṭhahiṁsu. So tehi upaṭṭhahiyamāno kālamakāsi.
Athakho tassa gilānupaṭṭhākassa bhikkhuno etadahosi kathaṁ nu kho
Gilānupaṭṭhākassa sāmaṇerassa cīvarapaṭiviso dātabboti. Bhagavato
etamatthaṁ ārocesuṁ. Anujānāmi bhikkhave gilānupaṭṭhākassa sāmaṇerassa
samakaṁ paṭivisaṁ dātunti. Tena kho pana samayena aññataro
bhikkhu bahubhaṇḍo bahuparikkhāro kālakato hoti. Bhagavato
etamatthaṁ ārocesuṁ. Bhikkhussa bhikkhave kālakate saṅgho sāmī
pattacīvare apica gilānupaṭṭhākā bahūpakārā. Anujānāmi bhikkhave
saṅghena ticīvarañca pattañca gilānupaṭṭhākānaṁ dātuṁ yaṁ tattha
lahubhaṇḍaṁ lahuparikkhāraṁ taṁ sammukhībhūtena saṅghena bhājetuṁ yaṁ tattha
garubhaṇḍaṁ garuparikkhāraṁ taṁ āgatānāgatassa cātuddisassa saṅghassa
avissajjikaṁ avebhaṅgikanti.
[168] Tena kho pana samayena aññataro bhikkhu naggo hutvā
yena [1]- bhagavā tenupasaṅkami upasaṅkamitvā bhagavantaṁ etadavoca
bhagavā bhante anekapariyāyena appicchassa santuṭṭhassa sallekhassa
dhūtassa pāsādikassa apacayassa viriyārambhassa vaṇṇavādī idaṁ
bhante naggiyaṁ anekapariyāyena appicchatāya santuṭṭhatāya 2 sallekhāya
dhūtattāya pāsādikatāya apacayāya viriyārambhāya saṁvattati sādhu
bhante bhagavā bhikkhūnaṁ naggiyaṁ anujānātūti. Vigarahi buddho bhagavā
ananucchavikaṁ moghapurisa .pe. Kathaṁ hi nāma tvaṁ moghapurisa naggiyaṁ titthiyasamādānaṁ
samādiyissasi netaṁ moghapurisa appasannānaṁ vā pasādāya
.pe. Vigarahitvā dhammiṁ kathaṁ katvā bhikkhū āmantesi na bhikkhave
1 Yu. hi. 2 Yu. santuṭṭhiyā.
Naggiyaṁ titthiyasamādānaṁ samādiyitabbaṁ yo samādiyeyya āpatti
thullaccayassāti. Tena kho pana samayena aññataro bhikkhu kusacīraṁ
nivāsetvā .pe. Vākacīraṁ nivāsetvā .pe. Phalakacīraṁ nivāsetvā
.pe. Kesakambalaṁ nivāsetvā .pe. Vālakambalaṁ nivāsetvā .pe.
Ulūkapakkhaṁ nivāsetvā .pe. Ajinakkhipaṁ nivāsetvā yena bhagavā
tenupasaṅkami upasaṅkamitvā bhagavantaṁ etadavoca bhagavā bhante
anekapariyāyena appicchassa santuṭṭhassa sallekhassa dhūtassa pāsādikassa
apacayassa viriyārambhassa vaṇṇavādī idaṁ bhante ajinakkhipaṁ
anekapariyāyena appicchatāya santuṭṭhatāya sallekhāya dhūtattāya
pāsādikatāya apacayāya viriyārambhāya saṁvattati sādhu bhante
bhagavā bhikkhūnaṁ ajinakkhipaṁ anujānātūti. Vigarahi buddho bhagavā
ananucchavikaṁ moghapurisa .pe. Kathaṁ hi nāma tvaṁ moghapurisa ajinakkhipaṁ
titthiyaddhajaṁ dhāressasi netaṁ moghapurisa appasannānaṁ vā pasādāya
.pe. Vigarahitvā dhammiṁ kathaṁ katvā bhikkhū āmantesi na bhikkhave
ajinakkhipaṁ titthiyaddhajaṁ dhāretabbaṁ yo dhāreyya āpatti thullaccayassāti.
Tena kho pana samayena aññataro bhikkhu akkanālaṁ
nivāsetvā .pe. Potthakaṁ nivāsetvā yena bhagavā tenupasaṅkami
upasaṅkamitvā bhagavantaṁ etadavoca bhagavā bhante anekapariyāyena
appicchassa santuṭṭhassa sallekhassa dhūtassa pāsādikassa apacayassa
viriyārambhassa vaṇṇavādī ayaṁ bhante potthako anekapariyāyena
Appicchatāya santuṭṭhatāya sallekhāya dhūtattāya pāsādikatāya
apacayāya viriyārambhāya saṁvattati sādhu bhante bhagavā bhikkhūnaṁ potthakaṁ
anujānātūti. Vigarahi buddho bhagavā ananucchavikaṁ moghapurisa
.pe. Kathaṁ hi nāma tvaṁ moghapurisa potthakaṁ nivāsessasi netaṁ
moghapurisa appasannānaṁ vā pasādāya .pe. Vigarahitvā dhammiṁ
kathaṁ katvā bhikkhū āmantesi na bhikkhave potthako nivāsetabbo
yo nivāseyya āpatti dukkaṭassāti.
[169] Tena kho pana samayena chabbaggiyā bhikkhū sabbanīlakāni
cīvarāni dhārenti sabbapītakāni cīvarāni dhārenti sabbalohitakāni
cīvarāni dhārenti sabbamañjeṭṭhakāni cīvarāni dhārenti
sabbakaṇhāni cīvarāni dhārenti sabbamahāraṅgarattāni cīvarāni dhārenti
sabbamahānāmarattāni cīvarāni dhārenti acchinnadasāni cīvarāni
dhārenti dīghadasāni cīvarāni dhārenti pupphadasāni cīvarāni dhārenti
phaṇadasāni cīvarāni dhārenti kañcukaṁ dhārenti tirīṭakaṁ dhārenti
veṭhanaṁ dhārenti. Manussā ujjhāyanti khīyanti vipācenti [1]- seyyathāpi
gihī kāmabhoginoti. Bhagavato etamatthaṁ ārocesuṁ. Na bhikkhave
sabbanīlakāni cīvarāni dhāretabbāni na sabbapītakāni cīvarāni
dhāretabbāni na sabbalohitakāni cīvarāni dhāretabbāni na
sabbamañjeṭṭhakāni cīvarāni dhāretabbāni na sabbakaṇhāni cīvarāni
dhāretabbāni na sabbamahāraṅgarattāni cīvarāni dhāretabbāni
1 Ma. kathaṁ hi nāma samaṇā sakyaputtiyā veṭhanaṁ dhāressanti.
Na sabbamahānāmarattāni cīvarāni dhāretabbāni na acchinnadasāni
cīvarāni dhāretabbāni na dīghadasāni cīvarāni dhāretabbāni na
pupphadasāni cīvarāni dhāretabbāni na phaṇadasāni cīvarāni dhāretabbāni
na kañcukaṁ dhāretabbaṁ na tirīṭakaṁ dhāretabbaṁ na veṭhanaṁ dhāretabbaṁ
yo dhāreyya āpatti dukkaṭassāti.
[170] Tena kho pana samayena vassaṁ vutthā bhikkhū anuppanne
cīvare pakkamantipi vibbhamantipi kālaṁpi karonti sāmaṇerāpi paṭijānanti
sikkhaṁ paccakkhātakāpi paṭijānanti antimavatthuṁ ajjhāpannakāpi
paṭijānanti ummattakāpi paṭijānanti khittacittāpi paṭijānanti
vedanaṭṭāpi 1 paṭijānanti āpattiyā adassane ukkhittakāpi
paṭijānanti āpattiyā appaṭikamme ukkhittakāpi paṭijānanti pāpikāya
diṭṭhiyā appaṭinissagge ukkhittakāpi paṭijānanti paṇḍakāpi
paṭijānanti theyyasaṁvāsakāpi paṭijānanti titthiyapakkantakāpi paṭijānanti
tiracchānagatāpi paṭijānanti mātughātakāpi paṭijānanti pitughātakāpi
paṭijānanti arahantaghātakāpi paṭijānanti bhikkhunīdūsakāpi paṭijānanti
saṅghabhedakāpi paṭijānanti lohituppādakāpi paṭijānanti ubhatobyañjanakāpi
paṭijānanti. Bhagavato etamatthaṁ ārocesuṁ. Idha pana bhikkhave
vassaṁ vuttho bhikkhu anuppanne cīvare pakkamati. Sante paṭirūpe
gāhake dātabbaṁ. Idha pana bhikkhave vassaṁ vuttho bhikkhu anuppanne
cīvare vibbhamati kālaṁ karoti sāmaṇero paṭijānāti sikkhaṁ paccakkhātako
1 Ma. vedanāṭṭāpi.
Paṭijānāti antimavatthuṁ ajjhāpannako paṭijānāti. Saṅgho sāmī.
Idha pana bhikkhave vassaṁ vuttho bhikkhu anuppanne cīvare ummattako
paṭijānāti khittacitto paṭijānāti vedanaṭṭo paṭijānāti āpattiyā
adassane ukkhittako paṭijānāti āpattiyā appaṭikamme ukkhittako
paṭijānāti pāpikāya diṭṭhiyā appaṭinissagge ukkhittako
paṭijānāti. Sante paṭirūpe gāhake dātabbaṁ. Idha pana bhikkhave
vassaṁ vuttho bhikkhu anuppanne cīvare paṇḍako paṭijānāti .pe.
Ubhatobyañjanako paṭijānāti. Saṅgho sāmī. Idha pana bhikkhave
vassaṁ vuttho bhikkhu uppanne cīvare abhājite pakkamati. Sante
paṭirūpe gāhake dātabbaṁ. Idha pana bhikkhave vassaṁ vuttho bhikkhu
uppanne cīvare abhājite vibbhamati kālaṁ karoti sāmaṇero
paṭijānāti sikkhaṁ paccakkhātako paṭijānāti antimavatthuṁ
ajjhāpannako paṭijānāti. Saṅgho sāmī. Idha pana bhikkhave vassaṁ
vuttho bhikkhu uppanne cīvare abhājite ummattako paṭijānāti
khittacitto paṭijānāti vedanaṭṭo paṭijānāti āpattiyā adassane
ukkhittako paṭijānāti āpattiyā appaṭikamme ukkhittako
paṭijānāti pāpikāya diṭṭhiyā appaṭinissagge ukkhittako paṭijānāti.
Sante paṭirūpe gāhake dātabbaṁ. Idha pana bhikkhave vassaṁ vuttho
bhikkhu uppanne cīvare abhājite paṇḍako paṭijānāti .pe.
Ubhatobyañjanako paṭijānāti. Saṅgho sāmī. Idha pana bhikkhave
Vassaṁ vutthānaṁ bhikkhūnaṁ anuppanne cīvare saṅgho bhijjati. Tattha
manussā ekasmiṁ pakkhe udakaṁ denti ekasmiṁ pakkhe cīvaraṁ denti
saṅghassa demāti. Saṅghassevetaṁ. Idha pana bhikkhave vassaṁ vutthānaṁ
bhikkhūnaṁ anuppanne cīvare saṅgho bhijjati. Tattha manussā ekasmiṁ
pakkhe udakaṁ denti tasmiṁyeva pakkhe cīvaraṁ denti saṅghassa
demāti. Saṅghassevetaṁ. Idha pana bhikkhave vassaṁ vutthānaṁ
bhikkhūnaṁ anuppanne cīvare saṅgho bhijjati. Tattha manussā ekasmiṁ
pakkhe udakaṁ denti ekasmiṁ pakkhe cīvaraṁ denti pakkhassa demāti.
Pakkhassevetaṁ. Idha pana bhikkhave vassaṁ vutthānaṁ bhikkhūnaṁ anuppanne
cīvare saṅgho bhijjati. Tattha manussā ekasmiṁ pakkhe udakaṁ denti
tasmiṁyeva pakkhe cīvaraṁ denti pakkhassa demāti. Pakkhassevetaṁ.
Idha pana bhikkhave vassaṁ vutthānaṁ bhikkhūnaṁ uppanne cīvare abhājite
saṅgho bhijjati. Sabbesaṁ samakaṁ bhājetabbanti.
[171] Tena kho pana samayena āyasmā revato aññatarassa
bhikkhuno hatthe āyasmato sārīputtassa cīvaraṁ pāhesi imaṁ cīvaraṁ
therassa dehīti. Athakho so bhikkhu antarāmagge āyasmato
revatassa vissāsā taṁ cīvaraṁ aggahesi. Athakho āyasmā revato
āyasmatā sārīputtena samāgantvā pucchi ahaṁ bhante therassa
cīvaraṁ pāhesiṁ sampattaṁ taṁ cīvaranti. Nāhantaṁ āvuso cīvaraṁ
passāmīti. Athakho āyasmā revato taṁ bhikkhuṁ etadavoca ahaṁ
Āvuso āyasmato hatthe therassa cīvaraṁ pāhesiṁ kahantaṁ cīvaranti.
Ahaṁ bhante āyasmato vissāsā taṁ cīvaraṁ aggahesinti. Bhagavato
etamatthaṁ ārocesuṁ. Idha pana bhikkhave bhikkhu bhikkhussa hatthe
cīvaraṁ pahiṇati imaṁ cīvaraṁ itthannāmassa dehīti. So antarāmagge
yo pahiṇati tassa vissāsā gaṇhāti suggahitaṁ.
Yassa pahīyati tassa vissāsā gaṇhāti duggahitaṁ. Idha pana
bhikkhave bhikkhu bhikkhussa hatthe cīvaraṁ pahiṇati imaṁ cīvaraṁ itthannāmassa
dehīti. So antarāmagge yassa pahīyati tassa vissāsā
gaṇhāti duggahitaṁ. Yo pahiṇati tassa vissāsā gaṇhāti
suggahitaṁ. Idha pana bhikkhave bhikkhu bhikkhussa hatthe cīvaraṁ pahiṇati
imaṁ cīvaraṁ itthannāmassa dehīti. So antarāmagge suṇāti
yo pahiṇati so kālakatoti tassa matakacīvaraṁ adhiṭṭhāti
svadhiṭṭhitaṁ 1 . Yassa pahīyati tassa vissāsā gaṇhāti duggahitaṁ.
Idha pana bhikkhave bhikkhu bhikkhussa hatthe cīvaraṁ pahiṇati imaṁ
cīvaraṁ itthannāmassa dehīti. So antarāmagge suṇāti yassa
pahīyati so kālakatoti tassa matakacīvaraṁ adhiṭṭhāti dvadhiṭṭhitaṁ.
Yo pahiṇati tassa vissāsā gaṇhāti suggahitaṁ. Idha pana
bhikkhave bhikkhu bhikkhussa hatthe cīvaraṁ pahiṇati imaṁ cīvaraṁ itthannāmassa
dehīti. So antarāmagge suṇāti ubho kālakatāti
yo pahiṇati tassa matakacīvaraṁ adhiṭṭhāti svadhiṭṭhitaṁ 2 . Yassa
1-2 Po. Ma. Yu. svādhiṭṭhitaṁ.
Pahīyati tassa matakacīvaraṁ adhiṭṭhāti dvadhiṭṭhitaṁ. Idha pana
bhikkhave bhikkhu bhikkhussa hatthe cīvaraṁ pahiṇati imaṁ cīvaraṁ itthannāmassa
dammīti. So antarāmagge yo pahiṇati tassa vissāsā
gaṇhāti duggahitaṁ. Yassa pahīyati tassa vissāsā gaṇhāti
suggahitaṁ. Idha pana bhikkhave bhikkhu bhikkhussa hatthe cīvaraṁ pahiṇati
imaṁ cīvaraṁ itthannāmassa dammīti. So antarāmagge yassa
pahīyati tassa vissāsā gaṇhāti suggahitaṁ. Yo pahiṇati
tassa vissāsā gaṇhāti duggahitaṁ. Idha pana bhikkhave bhikkhu
bhikkhussa hatthe cīvaraṁ pahiṇati imaṁ cīvaraṁ itthannāmassa dammīti.
So antarāmagge suṇāti yo pahiṇati so kālakatoti tassa
matakacīvaraṁ adhiṭṭhāti dvadhiṭṭhitaṁ. Yassa pahīyati tassa vissāsā
gaṇhāti suggahitaṁ. Idha pana bhikkhave bhikkhu bhikkhussa hatthe
cīvaraṁ pahiṇati imaṁ cīvaraṁ itthannāmassa dammīti. So
antarāmagge suṇāti yassa pahīyati so kālakatoti tassa matakacīvaraṁ
adhiṭṭhāti svadhiṭṭhitaṁ. Yo pahiṇati tassa vissāsā gaṇhāti
duggahitaṁ. Idha pana bhikkhave bhikkhu bhikkhussa hatthe cīvaraṁ pahiṇati
imaṁ cīvaraṁ itthannāmassa dammīti. So antarāmagge suṇāti
ubho kālakatāti yo pahiṇati tassa matakacīvaraṁ adhiṭṭhāti
dvadhiṭṭhitaṁ. Yassa pahīyati tassa matakacīvaraṁ adhiṭṭhāti svadhiṭṭhitaṁ.