[620] Katamantaṁ rūpaṁ ajjhattikaṁ napurisindriyaṁ cakkhāyatanaṁ
.pe. Kāyāyatanaṁ idantaṁ rūpaṁ ajjhattikaṁ napurisindriyaṁ. Katamantaṁ
rūpaṁ bāhiraṁ purisindriyaṁ yaṁ purisassa purisaliṅgaṁ purisanimittaṁ purisakuttaṁ
purisākappo purisattaṁ purisabhāvo idantaṁ rūpaṁ bāhiraṁ purisindriyaṁ.
Katamantaṁ rūpaṁ bāhiraṁ napurisindriyaṁ rūpāyatanaṁ .pe. Kabaḷiṁkāro
āhāro idantaṁ rūpaṁ bāhiraṁ napurisindriyaṁ.

[621] Katamantaṁ rūpaṁ ajjhattikaṁ najīvitindriyaṁ cakkhāyatanaṁ
.pe. Kāyāyatanaṁ idantaṁ rūpaṁ ajjhattikaṁ najīvitindriyaṁ. Katamantaṁ
rūpaṁ bāhiraṁ jīvitindriyaṁ yo tesaṁ rūpīnaṁ dhammānaṁ āyu ṭhiti yapanā
yāpanā iriyanā vattanā pālanā jīvitaṁ jīvitindriyaṁ idantaṁ rūpaṁ
bāhiraṁ jīvitindriyaṁ. Katamantaṁ rūpaṁ bāhiraṁ najīvitindriyaṁ rūpāyatanaṁ
.pe. Kabaḷiṁkāro āhāro idantaṁ rūpaṁ bāhiraṁ najīvitindriyaṁ.

[622] Katamantaṁ rūpaṁ ajjhattikaṁ nakāyaviññatti cakkhāyatanaṁ
.pe. Kāyāyatanaṁ idantaṁ rūpaṁ ajjhattikaṁ nakāyaviññatti.
Katamantaṁ rūpaṁ bāhiraṁ kāyaviññatti yā kusalacittassa vā akusalacittassa
vā abyākatacittassa vā abhikkamantassa vā paṭikkamantassa
vā ālokettassa vā vilokettassa vā sammiñjentassa vā
pasārentassa vā kāyassa thambhanā santhambhanā santhambhitattaṁ viññatti
viññāpanā viññāpitattaṁ idantaṁ rūpaṁ bāhiraṁ kāyaviññatti.
Katamantaṁ rūpaṁ bāhiraṁ nakāyaviññatti rūpāyatanaṁ .pe. Kabaḷiṁkāro
āhāro idantaṁ rūpaṁ bāhiraṁ nakāyaviññatti.

[623] Katamantaṁ rūpaṁ ajjhattikaṁ navacīviññatti cakkhāyatanaṁ
.pe. Kāyāyatanaṁ idantaṁ rūpaṁ ajjhattikaṁ navacīviññatti.
Katamantaṁ rūpaṁ bāhiraṁ vacīviññatti yā kusalacittassa vā akusalacittassa
vā abyākatacittassa vā vācā girā byappatho udīraṇaṁ
ghoso ghosakammaṁ vācā vacībhedo ayaṁ vuccati vācā yā tāya
vācāya viññatti viññāpanā viññāpitattaṁ idantaṁ rūpaṁ bāhiraṁ
Vacīviññatti. Katamantaṁ rūpaṁ bāhiraṁ navacīviññatti rūpāyatanaṁ
.pe. Kabaḷiṁkāro āhāro idantaṁ rūpaṁ bāhiraṁ navacīviññatti.

[624] Katamantaṁ rūpaṁ ajjhattikaṁ nāakāsadhātu cakkhāyatanaṁ
.pe. Kāyāyatanaṁ idantaṁ rūpaṁ ajjhattikaṁ nāakāsadhātu.
Katamantaṁ rūpaṁ bāhiraṁ ākāsadhātu yo ākāso ākāsagataṁ aghaṁ
aghagataṁ vivaro vivaragataṁ asamphuṭṭhaṁ catūhi mahābhūtehi idantaṁ rūpaṁ
bāhiraṁ ākāsadhātu. Katamantaṁ rūpaṁ bāhiraṁ nāakāsadhātu rūpāyatanaṁ
.pe. Kabaḷiṁkāro āhāro idantaṁ rūpaṁ bāhiraṁ nāakāsadhātu.

[625] Katamantaṁ rūpaṁ ajjhattikaṁ nāapodhātu cakkhāyatanaṁ
.pe. Kāyāyatanaṁ idantaṁ rūpaṁ ajjhattikaṁ nāapodhātu.
Katamantaṁ rūpaṁ bāhiraṁ āpodhātu yaṁ āpo āpogataṁ sineho
sinehagataṁ bandhanattaṁ rūpassa idantaṁ rūpaṁ bāhiraṁ āpodhātu.
Katamantaṁ rūpaṁ bāhiraṁ nāapodhātu rūpāyatanaṁ .pe. Kabaḷiṁkāro
āhāro idantaṁ rūpaṁ bāhiraṁ nāapodhātu.

[626] Katamantaṁ rūpaṁ ajjhattikaṁ rūpassa nalahutā cakkhāyatanaṁ
.pe. Kāyāyatanaṁ idantaṁ rūpaṁ ajjhattikaṁ rūpassa nalahutā.
Katamantaṁ rūpaṁ bāhiraṁ rūpassa lahutā yā rūpassa lahutā lahupariṇāmatā
adandhanatā avitthanatā idantaṁ rūpaṁ bāhiraṁ rūpassa lahutā. Katamantaṁ
rūpaṁ bāhiraṁ rūpassa nalahutā rūpāyatanaṁ .pe. Kabaḷiṁkāro āhāro
idantaṁ rūpaṁ bāhiraṁ rūpassa nalahutā.

[627] Katamantaṁ rūpaṁ ajjhattikaṁ rūpassa namudutā cakkhāyatanaṁ
.pe. Kāyāyatanaṁ idantaṁ rūpaṁ ajjhattikaṁ rūpassa namudutā.
Katamantaṁ rūpaṁ bāhiraṁ rūpassa mudutā yā rūpassa mudutā maddavatā
akakkhaḷatā akathinatā idantaṁ rūpaṁ bāhiraṁ rūpassa mudutā. Katamantaṁ
rūpaṁ bāhiraṁ rūpassa namudutā rūpāyatanaṁ .pe. Kabaḷiṁkāro āhāro
idantaṁ rūpaṁ bāhiraṁ rūpassa namudutā.

[628] Katamantaṁ rūpaṁ ajjhattikaṁ rūpassa nakammaññatā cakkhāyatanaṁ
.pe. Kāyāyatanaṁ idantaṁ rūpaṁ ajjhattikaṁ rūpassa nakammaññatā.
Katamantaṁ rūpaṁ bāhiraṁ rūpassa kammaññatā yā rūpassa kammaññatā
kammaññattaṁ kammaññabhāvo idantaṁ rūpaṁ bāhiraṁ rūpassa kammaññatā.
Katamantaṁ rūpaṁ bāhiraṁ rūpassa nakammaññatā rūpāyatanaṁ .pe. Kabaḷiṁkāro
āhāro idantaṁ rūpaṁ bāhiraṁ rūpassa nakammaññatā.

[629] Katamantaṁ rūpaṁ ajjhattikaṁ rūpassa naupacayo cakkhāyatanaṁ
.pe. Kāyāyatanaṁ idantaṁ rūpaṁ ajjhattikaṁ rūpassa naupacayo.
Katamantaṁ rūpaṁ bāhiraṁ rūpassa upacayo yo āyatanānaṁ ācayo so
rūpassa upacayo idantaṁ rūpaṁ bāhiraṁ rūpassa upacayo. Katamantaṁ
rūpaṁ bāhiraṁ rūpassa naupacayo rūpāyatanaṁ .pe. Kabaḷiṁkāro āhāro
idantaṁ rūpaṁ bāhiraṁ rūpassa naupacayo.