[580] Katamantaṁ rūpaṁ rūpassa lahutā yā rūpassa lahutā
lahupariṇāmatā adandhanatā avitthanatā idantaṁ rūpaṁ rūpassa
Lahutā. Katamantaṁ rūpaṁ rūpassa nalahutā cakkhāyatanaṁ .pe.
Kabaḷiṁkāro āhāro idantaṁ rūpaṁ rūpassa nalahutā.

[581] Katamantaṁ rūpaṁ rūpassa mudutā yā rūpassa mudutā
maddavatā akakkhaḷatā akathinatā idantaṁ rūpaṁ rūpassa mudutā.
Katamantaṁ rūpaṁ rūpassa namudutā cakkhāyatanaṁ .pe. Kabaḷiṁkāro
āhāro idantaṁ rūpaṁ rūpassa namudutā.

[582] Katamantaṁ rūpaṁ rūpassa kammaññatā yā rūpassa
kammaññatā kammaññattaṁ kammaññabhāvo idantaṁ rūpaṁ rūpassa
kammaññatā. Katamantaṁ rūpaṁ rūpassa nakammaññatā cakkhāyatanaṁ
.pe. Kabaḷiṁkāro āhāro idantaṁ rūpaṁ rūpassa nakammaññatā.

[583] Katamantaṁ rūpaṁ rūpassa upacayo yo āyatanānaṁ ācayo
so rūpassa upacayo idantaṁ rūpaṁ rūpassa upacayo. Katamantaṁ
rūpaṁ rūpassa naupacayo cakkhāyatanaṁ .pe. Kabaḷiṁkāro āhāro
idantaṁ rūpaṁ rūpassa naupacayo.

[584] Katamantaṁ rūpaṁ rūpassa santati yo rūpassa upacayo
sā rūpassa santati idantaṁ rūpaṁ rūpassa santati. Katamantaṁ rūpaṁ
rūpassa nasantati cakkhāyatanaṁ .pe. Kabaḷiṁkāro āhāro idantaṁ
rūpaṁ rūpassa nasantati.

[585] Katamantaṁ rūpaṁ rūpassa jaratā yā rūpassa jarā
jīraṇatā khaṇḍiccaṁ pāliccaṁ valittacatā āyuno saṁhāni indriyānaṁ
Paripāko idantaṁ rūpaṁ rūpassa jaratā. Katamantaṁ rūpaṁ rūpassa
najaratā cakkhāyatanaṁ .pe. Kabaḷiṁkāro āhāro idantaṁ
rūpaṁ rūpassa najaratā.

[586] Katamantaṁ rūpaṁ rūpassa aniccatā yo rūpassa khayo
vayo bhedo paribhedo aniccatā antaradhānaṁ idantaṁ rūpaṁ rūpassa
aniccatā. Katamantaṁ rūpaṁ rūpassa nāniccatā cakkhāyatanaṁ .pe.
Kabaḷiṁkāro āhāro idantaṁ rūpaṁ rūpassa nāniccatā.

[587] Katamantaṁ rūpaṁ kabaḷiṁkāro āhāro odano kummāso
sattu maccho maṁsaṁ khīraṁ dadhi sappi navanītaṁ telaṁ madhu phāṇitaṁ
yaṁ vā panaññampi atthi rūpaṁ yamhi yamhi janapade tesaṁ tesaṁ
sattānaṁ mukhāsiyaṁ dantavikhādanaṁ galajjhoharaṇīyaṁ kucchivitthambhanaṁ yāya
ojāya sattā yāpenti idantaṁ rūpaṁ kabaḷiṁkāro āhāro.
Katamantaṁ rūpaṁ na kabaḷiṁkāro āhāro cakkhāyatanaṁ .pe. Rūpassa
aniccatā idantaṁ rūpaṁ na kabaḷiṁkāro āhāro.
Evaṁ duvidhena rūpasaṅgaho.
Dukaniddeso niṭṭhito.

[588] Katamantaṁ rūpaṁ ajjhattikaṁ upādā cakkhāyatanaṁ .pe.
Kāyāyatanaṁ idantaṁ rūpaṁ ajjhattikaṁ upādā. Katamantaṁ rūpaṁ
bāhiraṁ upādā rūpāyatanaṁ .pe. Kabaḷiṁkāro āhāro idantaṁ
rūpaṁ bāhiraṁ upādā. Katamantaṁ rūpaṁ bāhiraṁ noupādā phoṭṭhabbāyatanaṁ
Āpodhātu idantaṁ rūpaṁ bāhiraṁ noupādā.

[589] Katamantaṁ rūpaṁ ajjhattikaṁ upādinnaṁ cakkhāyatanaṁ .pe.
Kāyāyatanaṁ idantaṁ rūpaṁ ajjhattikaṁ upādinnaṁ. Katamantaṁ rūpaṁ
bāhiraṁ upādinnaṁ itthindriyaṁ purisindriyaṁ jīvitindriyaṁ yaṁ vā
panaññampi atthi rūpaṁ kammassa katattā rūpāyatanaṁ gandhāyatanaṁ
rasāyatanaṁ phoṭṭhabbāyatanaṁ ākāsadhātu āpodhātu rūpassa upacayo
rūpassa santati kabaḷiṁkāro āhāro idantaṁ rūpaṁ bāhiraṁ upādinnaṁ.
Katamantaṁ rūpaṁ bāhiraṁ anupādinnaṁ saddāyatanaṁ kāyaviññatti
vacīviññatti rūpassa lahutā rūpassa mudutā rūpassa
kammaññatā rūpassa jaratā rūpassa aniccatā yaṁ vā panaññampi
atthi rūpaṁ na kammassa katattā rūpāyatanaṁ saddāyatanaṁ gandhāyatanaṁ
rasāyatanaṁ phoṭṭhabbāyatanaṁ ākāsadhātu āpodhātu rūpassa upacayo
rūpassa santati kabaḷiṁkāro āhāro idantaṁ rūpaṁ bāhiraṁ anupādinnaṁ.