[396] Dīghaṁ assāsapassāsavasena cittassa ekaggataṁ
avikkhepaṁ pajānanto indriyāni samodhāneti gocarañca pajānāti
samatthañca paṭivijjhati .pe. Dhamme samodhāneti gocarañca
pajānāti samatthañca paṭivijjhati.
Indriyāni samodhānetīti kathaṁ indriyāni samodhāneti.
Adhimokkhaṭṭhena saddhindriyaṁ samodhāneti paggahaṭṭhena viriyindriyaṁ
samodhāneti upaṭṭhānaṭṭhena satindriyaṁ samodhāneti avikkhepaṭṭhena
samādhindriyaṁ samodhāneti dassanaṭṭhena paññindriyaṁ samodhāneti
ayaṁ puggalo imāni indriyāni imasmiṁ ārammaṇe samodhānetīti
tena vuccati indriyāni samodhāneti.
Gocarañca pajānātīti yantassa ārammaṇaṁ taṁ tassa gocaraṁ
yaṁ tassa gocaraṁ taṁ tassa ārammaṇaṁ pajānātīti puggalo
pajānanā paññā.
Samanti ārammaṇassa upaṭṭhānaṁ samaṁ cittassa avikkhepo
samaṁ cittassa adhiṭṭhānaṁ samaṁ cittassa vodānaṁ samaṁ.
Atthoti anavajjaṭṭho nikkilesaṭṭho vodānaṭṭho paramaṭṭho.
Paṭivijjhatīti ārammaṇassa upaṭṭhānaṭṭhaṁ paṭivijjhati cittassa
avikkhepaṭṭhaṁ paṭivijjhati cittassa adhiṭṭhānaṭṭhaṁ paṭivijjhati
cittassa vodānaṭṭhaṁ paṭivijjhati tena vuccati samatthañca
paṭivijjhati.

[397] Balāni samodhānetīti kathaṁ balāni samodhāneti.
Assaddhiye akappiyaṭṭhena saddhābalaṁ samodhāneti kosajje
akampiyaṭṭhena viriyabalaṁ samodhāneti pamāde akampiyaṭṭhena satibalaṁ
samodhāneti uddhacce akampiyaṭṭhena samādhibalaṁ samodhāneti
avijjāya akampiyaṭṭhena paññābalaṁ samodhāneti ayaṁ puggalo
imāni balāni imasmiṁ ārammaṇe samodhānetīti tena vuccati
balāni samodhāneti.
Gocarañca pajānātīti .pe. Tena vuccati samatthañca
paṭivijjhati.

[398] Bojjhaṅge samodhānetīti kathaṁ bojjhaṅge
samodhāneti. Upaṭṭhānaṭṭhena satisambojjhaṅgaṁ samodhāneti
pavicayaṭṭhena dhammavicayasambojjhaṅgaṁ samodhāneti paggahaṭṭhena viriyasambojjhaṅgaṁ
samodhāneti pharaṇaṭṭhena pītisambojjhaṅgaṁ samodhāneti
upasamaṭṭhena passaddhisambojjhaṅgaṁ samodhāneti avikkhepaṭṭhena
samādhisambojjhaṅgaṁ samodhāneti paṭisaṅkhānaṭṭhena upekkhāsambojjhaṅgaṁ
Samodhāneti ayaṁ puggalo ime bojjhaṅge imasmiṁ
ārammaṇe samodhānetīti tena vuccati bojjhaṅge samodhāneti.
Gocarañca pajānātīti .pe. Tena vuccati samatthañca
paṭivijjhati.

[399] Maggaṁ samodhānetīti kathaṁ maggaṁ samodhāneti.
Dassanaṭṭhena sammādiṭṭhiṁ samodhāneti abhiniropanaṭṭhena sammāsaṅkappaṁ
samodhāneti pariggahaṭṭhena sammāvācaṁ samodhāneti
samuṭṭhānaṭṭhena sammākammantaṁ samodhāneti vodānaṭṭhena sammāājīvaṁ
samodhāneti paggahaṭṭhena sammāvāyāmaṁ samodhāneti
upaṭṭhānaṭṭhena sammāsatiṁ samodhāneti avikkhepaṭṭhena sammāsamādhiṁ
samodhāneti ayaṁ puggalo imaṁ maggaṁ imasmiṁ ārammaṇe
samodhānetīti tena vuccati maggaṁ samodhāneti.
Gocarañca pajānātīti .pe. Tena vuccati samatthañca
paṭivijjhati.

[400] Dhamme samodhānetīti kathaṁ dhamme samodhāneti.
Ādhipateyyaṭṭhena indriyāni samodhāneti akampiyaṭṭhena balāni
samodhāneti niyyānaṭṭhena bojjhaṅge samodhāneti hetaṭṭhena maggaṁ
samodhāneti upaṭṭhānaṭṭhena satipaṭṭhānaṁ samodhāneti padahanaṭṭhena
sammappadhānaṁ samodhāneti ijjhanaṭṭhena iddhipādaṁ samodhāneti
tathaṭṭhena saccaṁ samodhāneti avikkhepaṭṭhena samathaṁ samodhāneti
Anupassanaṭṭhena vipassanaṁ samodhāneti ekarasaṭṭhena samathavipassanaṁ
samodhāneti anativattanaṭṭhena yuganaddhaṁ samodhāneti
saṁvaraṭṭhena sīlavisuddhiṁ samodhāneti avikkhepaṭṭhena cittavisuddhiṁ
samodhāneti dassanaṭṭhena diṭṭhivisuddhiṁ samodhāneti muttaṭṭhena
vimokkhaṁ samodhāneti paṭivedhaṭṭhena vijjaṁ samodhāneti pariccāgaṭṭhena
vimuttiṁ samodhāneti samucchedaṭṭhena khaye ñāṇaṁ
samodhāneti paṭippassaṭṭhena anuppāde ñāṇaṁ samodhāneti chandaṁ
mūlaṭṭhena samodhāneti manasikāraṁ samuṭṭhānaṭṭhena samodhāneti
phassaṁ samodhānaṭṭhena samodhāneti vedanaṁ samosaraṇaṭṭhena
samodhāneti samādhiṁ pamukhaṭṭhena samodhāneti satiṁ ādhipateyyaṭṭhena
samodhāneti satisampajaññaṁ 1 tatuttaraṭṭhena samodhāneti vimuttiṁ
sāraṭṭhena samodhāneti amatogadhaṁ nibbānaṁ pariyosānaṭṭhena
samodhāneti ayaṁ puggalo ime dhamme imasmiṁ ārammaṇe
samodhānetīti tena vuccati dhamme samodhāneti.
Gocarañca pajānātīti yantassa ārammaṇaṁ taṁ tassa gocaraṁ
yantassa gocaraṁ taṁ tassa ārammaṇaṁ pajānātīti puggalo
pajānanā paññā.
Samanti ārammaṇassa upaṭṭhānaṁ samaṁ cittassa avikkhepo
samaṁ cittassa adhiṭṭhānaṁ samaṁ cittassa vodānaṁ samaṁ.
Atthoti anavajjaṭṭho nikkilesaṭṭho vodānaṭṭho paramaṭṭho.
1 Ma. Yu. paññaṁ.
Paṭivijjhatīti ārammaṇassa upaṭṭhānaṭṭhaṁ paṭivijjhati
cittassa avikkhepaṭṭhaṁ paṭivijjhati cittassa adhiṭṭhānaṭṭhaṁ paṭivijjhati
cittassa vodānaṭṭhaṁ paṭivijjhati tena vuccati samatthañca
paṭivijjhati.

[401] Kathaṁ rassaṁ assasanto rassaṁ assasāmīti pajānāti
rassaṁ passasanto rassaṁ passasāmīti pajānāti. Rassaṁ assāsaṁ
ittarasaṅkhāte assasati rassaṁ passāsaṁ ittarasaṅkhāte passasati
rassaṁ assāsapassāsaṁ ittarasaṅkhāte assasatipi passasatipi rassaṁ
assāsapassāsaṁ ittarasaṅkhāte assasatopi passasatopi chando
uppajjati chandavasena tato sukhumataraṁ rassaṁ assāsaṁ ittarasaṅkhāte
assasati chandavasena tato sukhumataraṁ rassaṁ passāsaṁ ittarasaṅkhāte
passasati chandavasena tato sukhumataraṁ rassaṁ assāsapassāsaṁ ittarasaṅkhāte
assasatipi passasatipi chandavasena tato sukhumataraṁ rassaṁ
assāsapassāsaṁ ittarasaṅkhāte assasatopi passasatopi pāmujjaṁ
uppajjati pāmujjavasena tato sukhumataraṁ rassaṁ assāsaṁ ittarasaṅkhāte
assasati pāmujjavasena tato sukhumataraṁ rassaṁ passāsaṁ ittarasaṅkhāte
passasati pāmujjavasena tato sukhumataraṁ rassaṁ assāsapassāsaṁ
ittarasaṅkhāte assasatipi passasatipi pāmujjavasena tato
sukhumataraṁ rassaṁ assāsapassāsaṁ ittarasaṅkhāte assasatopi
passasatopi rassaṁ assāsapassāsā cittaṁ vivaṭṭati upekkhā saṇṭhāti
Imehi navahākārehi rassaṁ assāsapassāsakāyo upaṭṭhānaṁ sati
anupassanāñāṇaṁ kāyo upaṭṭhānaṁ no sati sati upaṭṭhānaṁ ceva
sati ca tāya satiyā tena ñāṇena taṁ kāyaṁ anupassatīti tena
vuccati kāye kāyānupassanā satipaṭṭhānabhāvanā.

[402] Anupassatīti kathaṁ taṁ kāyaṁ anupassati .pe.
Evantaṁ kāyaṁ anupassati.
Bhāvanāti catasso bhāvanā .pe. Āsevanaṭṭhena bhāvanā
rassaṁ assāsapassāsavasena cittassa ekaggataṁ avikkhepaṁ pajānato
viditā vedanā uppajjanti .pe. Rassaṁ assāsapassāsavasena
cittassa ekaggataṁ avikkhepaṁ pajānanto indriyānaṁ samodhāneti .pe.
Tena vuccati samatthañca paṭivijjhati.

[403] Kathaṁ sabbakāyapaṭisaṁvedī assasissāmīti sikkhati
sabbakāyapaṭisaṁvedī passasissāmīti sikkhati.
Kāyoti dve kāyā nāmakāyo ca rūpakāyo ca. Katamo
nāmakāyo. Vedanā saññā cetanā phasso manasikāro nāmañca
nāmakāyo ca ye ca vuccanti cittasaṅkhārā ayaṁ nāmakāyo.
Katamo rūpakāyo. Cattāro ca mahābhūtā catunnañca mahābhūtānaṁ
upādāyarūpaṁ assāso ca passāso ca nimittañca upanibandhanā
ye ca vuccanti kāyasaṅkhārā ayaṁ rūpakāyo.

[404] Kathante kāyā paṭividitā honti dīghaṁ assāsavasena
Cittassa ekaggataṁ avikkhepaṁ pajānato sati upaṭṭhitā hoti tāya
satiyā tena ñāṇena te kāyā paṭividitā honti dīghaṁ passāsavasena
cittassa ekaggataṁ avikkhepaṁ pajānato sati upaṭṭhitā
hoti tāya satiyā tena ñāṇena te kāyā paṭividitā honti
rassaṁ assāsavasena cittassa ekaggataṁ avikkhepaṁ pajānato sati
upaṭṭhitā hoti tāya satiyā tena ñāṇena te kāyā paṭividitā
honti rassaṁ passāsavasena cittassa ekaggataṁ avikkhepaṁ
pajānato sati upaṭṭhitā hoti tāya satiyā tena ñāṇena te
kāyā paṭividitā honti āvajjato te kāyā paṭividitā honti
jānato te kāyā paṭividitā honti passato te kāyā paṭividitā
honti paccavekkhato te kāyā paṭividitā honti cittaṁ
adhiṭṭhahato te kāyā paṭividitā honti saddhāya adhimuccato
te kāyā paṭividitā honti viriyaṁ paggaṇhato te kāyā paṭividitā
honti satiṁ upaṭṭhāpayato te kāyā paṭividitā honti
cittaṁ samādahato te kāyā paṭividitā honti paññāya pajānato
te kāyā paṭividitā honti abhiññeyyaṁ abhijānato te
kāyā paṭividitā honti pariññeyyaṁ parijānato te kāyā paṭividitā
honti pahātabbaṁ pajahato te kāyā paṭividitā honti
bhāvetabbaṁ bhāvayato te kāyā paṭividitā honti sacchikātabbaṁ
sacchikaroto te kāyā paṭividitā honti evante kāyā paṭividitā
Honti sabbakāyapaṭisaṁvedī assāsapassāsakāyo upaṭṭhānaṁ
sati anupassanāñāṇaṁ kāyo upaṭṭhānaṁ no sati sati upaṭṭhānaṁ
ceva sati ca tāya satiyā tena ñāṇena taṁ kāyaṁ anupassatīti
tena vuccati kāye kāyānupassanā satipaṭṭhānabhāvanā.

[405] Anupassatīti .pe. Sabbakāyapaṭisaṁvedī assāsapassāsā 1
saṁvaraṭṭhena sīlavisuddhi avikkhepaṭṭhena cittavisuddhi
dassanaṭṭhena diṭṭhivisuddhi yo tattha saṁvaraṭṭho ayaṁ adhisīlasikkhā
yo tattha avikkhepaṭṭho ayaṁ adhicittasikkhā yo tattha dassanaṭṭho
ayaṁ adhipaññāsikkhā imā tisso sikkhāyo āvajjanto
sikkhati jānanto sikkhati passanto sikkhati paccavekkhanto
sikkhati cittaṁ adhiṭṭhahanto sikkhati saddhāya adhimuccanto
sikakhati viriyaṁ paggaṇhanto sikkhati satiṁ upaṭṭhāpento
sikkhati cittaṁ samādahanto sikkhati paññāya pajānanto sikkhati
abhiññeyyaṁ abhijānanto sikkhati pariññeyyaṁ parijānanto sikkhati
pahātabbaṁ pajahanto sikkhati bhāvetabbaṁ bhāvento sikkhati sacchikātabbaṁ
sacchikaronto sikkhati sabbakāyapaṭisaṁvedī assāsapassāsavasena
cittassa ekaggataṁ avikkhepaṁ pajānato viditā vedanā
uppajjanti .pe. Sabbakāyapaṭisaṁvedī assāsapassāsavasena cittassa
ekaggataṁ avikkhepaṁ pajānanto indriyāni samodhāneti .pe.
Tena vuccati samatthañca paṭivijjhatīti.
1 Ma. Yu. assāsapassāsānaṁ.