[96] Avijjā paṭicca saṅkhārā paṭiccasamuppannā ubhopete
dhammā paṭiccasamuppannāti paccayapariggahe paññā dhammaṭṭhitiñāṇaṁ
atītampi addhānaṁ anāgatampi addhānaṁ avijjā paṭicca
saṅkhārā paṭiccasamuppannā ubhopete dhammā paṭiccasamuppannāti
paccayapariggahe paññā dhammaṭṭhitiñāṇaṁ saṅkhārā paṭicca viññāṇaṁ
paṭiccasamuppannaṁ viññāṇaṁ paṭicca nāmarūpaṁ paṭiccasamuppannaṁ
nāmarūpaṁ paṭicca saḷāyatanaṁ paṭiccasamuppannaṁ
saḷāyatanaṁ paṭicca phasso paṭiccasamuppanno phasso paṭiccavedanā
paṭiccasamuppannā vedanā paṭicca taṇhā paṭiccasamuppannā
taṇhā paṭicca upādānaṁ paṭiccasamuppannaṁ upādānaṁ
paṭicca bhavo paṭiccasamuppanno bhavo paṭicca jāti
paṭiccasamuppannā jāti paṭicca jarāmaraṇaṁ paṭiccasamuppannaṁ
ubhopete dhammā paṭiccasamuppannāti paccayapariggahe paññā dhammaṭṭhitiñāṇaṁ
atītampi addhānaṁ anāgatampi addhānaṁ jāti paṭicca
jarāmaraṇaṁ paṭiccasamuppannaṁ ubhopete dhammā paṭiccasamuppannāti
paccayapariggahe paññā dhammaṭṭhitiñāṇaṁ.

[97] Avijjā paccayo saṅkhārā paccayasamuppannā ubhopete
dhammā paccayasamuppannāti paccayapariggahe paññā dhammaṭṭhitiñāṇaṁ
Atītampi addhānaṁ anāgatampi addhānaṁ avijjā
paccayo saṅkhārā paccayasamuppannā ubhopete dhammā paccayasamuppannāti
paccayapariggahe paññā dhammaṭṭhitiñāṇaṁ saṅkhārā
paccayo viññāṇaṁ paccayasamuppannaṁ viññāṇaṁ paccayo nāmarūpaṁ
paccayasamuppannaṁ nāmarūpaṁ paccayo saḷāyatanaṁ paccayasamuppannaṁ
saḷāyatanaṁ paccayo phasso paccayasamuppanno phasso paccayo
vedanā paccayasamuppannā vedanā paccayo taṇhā paccayasamuppannā
taṇhā paccayo upādānaṁ paccayasamuppannaṁ upādānaṁ
paccayo bhavo paccayasamuppanno bhavo paccayo jāti paccayasamuppannā
jāti paccayo jarāmaraṇaṁ paccayasamuppannaṁ ubhopete
dhammā paccayasamuppannāti paccayapariggahe paññā dhammaṭṭhitiñāṇaṁ
atītampi addhānaṁ anāgatampi addhānaṁ jāti paccayo
jarāmaraṇaṁ paccayasamuppannaṁ ubhopete dhammā paccayasamuppannāti
paccayapariggahe paññā dhammaṭṭhitiñāṇaṁ.

[98] Purimakammabhavasmiṁ moho avijjā āyuhanā saṅkhārā
nikanti taṇhā upagamanaṁ upādānaṁ cetanā bhavo ime
pañca dhammā purimakammabhavasmiṁ idha paṭisandhiyā paccayā idha
paṭisandhi viññāṇaṁ okkanti nāmarūpaṁ pasādo āyatanaṁ phuṭṭho
phasso vedayitaṁ vedanā ime pañca dhammā idhupapattibhavasmiṁ
pure katassa kammassa paccayā idha paripakkattā
Āyatanānaṁ moho avijjā āyuhanā saṅkhārā nikanti taṇhā
upagamanaṁ upādānaṁ cetanā bhavo ime pañca dhammā idha
kammabhavasmiṁ āyatipaṭisandhiyā 1 paccayā āyatipaṭisandhi viññāṇaṁ
okkanti nāmarūpaṁ pasādo āyatanaṁ phuṭṭho phasso vedayitaṁ
vedanā ime pañca dhammā āyatiṁ upapattibhavasmiṁ idha katassa
kammassa paccayā iti ime catusaṅkhepe tayo addhe vīsatiyā
ākārehi tisandhiṁ paṭicca samuppādaṁ jānāti passati aññāti
paṭivijjhati taṁ ñātaṭṭhena ñāṇaṁ pajānanaṭṭhena paññā tena
vuccati paccayapariggahe paññā dhammaṭṭhitiñāṇaṁ.
-------

[99] Kathaṁ atītānāgatapaccuppannānaṁ dhammānaṁ saṅkhipitvā
vavatthāne paññā sammasane ñāṇaṁ yaṅkiñci rūpaṁ atītānāgatapaccuppannaṁ
ajjhattaṁ vā bahiddhā vā oḷārikaṁ vā sukhumaṁ vā
hīnaṁ vā paṇītaṁ vā yaṁ dūre santike vā sabbaṁ rūpaṁ aniccato
vavattheti ekaṁ sammasanaṁ dukkhato vavattheti ekaṁ sammasanaṁ
anattato vavattheti ekaṁ sammasanaṁ yā kāci vedanā .pe.
Yā kāci saññā ye keci saṅkhārā yaṅkiñci viññāṇaṁ
atītānāgatapaccuppannaṁ ajjhattaṁ vā bahiddhā vā oḷārikaṁ
vā sukhumaṁ vā hīnaṁ vā paṇītaṁ vā yaṁ dūre santike vā sabbaṁ
viññāṇaṁ aniccato vavattheti ekaṁ sammasanaṁ dukkhato vavattheti
1 Ma. Yu. āyatiṁ paṭisandhiyā. evamuparipi.
Ekaṁ sammasanaṁ anattato vavattheti ekaṁ sammasanaṁ cakkhuṁ .pe.
Jarāmaraṇaṁ atītānāgatapaccuppannaṁ aniccato vavattheti ekaṁ
sammasanaṁ dukkhato vavattheti ekaṁ sammasanaṁ anattato vavattheti
ekaṁ sammasanaṁ.

[100] Rūpaṁ atītānāgatapaccuppannaṁ aniccaṁ khayaṭṭhena dukkhaṁ
bhayaṭṭhena anattā asārakaṭṭhenāti saṅkhipitvā vavatthāne paññā
sammasane ñāṇaṁ vedanā saññā saṅkhārā viññāṇaṁ
cakkhuṁ .pe. Jarāmaraṇaṁ atītānāgatapaccuppannaṁ aniccaṁ khayaṭṭhena
dukkhaṁ bhayaṭṭhena anattā asārakaṭṭhenāti saṅkhipitvā vavatthāne
paññā sammasane ñāṇaṁ.

[101] Rūpaṁ atītānāgatapaccuppannaṁ aniccaṁ saṅkhataṁ paṭiccasamuppannaṁ
khayadhammaṁ vayadhammaṁ virāgadhammaṁ nirodhadhammanti saṅkhipitvā
vavatthāne paññā sammasane ñāṇaṁ vedanā saññā saṅkhārā
viññāṇaṁ cakkhuṁ .pe. Jarāmaraṇaṁ atītānāgatapaccuppannaṁ
aniccaṁ saṅkhataṁ paṭiccasamuppannaṁ khayadhammaṁ vayadhammaṁ virāgadhammaṁ
nirodhadhammanti saṅkhipitvā vavatthāne paññā sammasane ñāṇaṁ.

[102] Jātipaccayā jarāmaraṇaṁ asati jātiyā natthi jarāmaraṇanti
saṅkhipitvā vavatthāne paññā sammasane ñāṇaṁ atītampi
addhānaṁ anāgatampi addhānaṁ jātipaccayā jarāmaraṇaṁ asati
jātiyā natthi jarāmaraṇanti saṅkhipitvā vavatthāne paññā
Sammasane ñāṇaṁ bhavapaccayā jāti asati .pe. Upādānapaccayā
bhavo asati taṇhāpaccayā upādānaṁ asati vedanāpaccayā
taṇhā asati phassapaccayā vedanā asati saḷāyatanapaccayā
phasso asati nāmarūpapaccayā saḷāyatanaṁ asati
viññāṇapaccayā nāmarūpaṁ asati saṅkhārapaccayā viññāṇaṁ
asati avijjāpaccayā saṅkhārā asati avijjāya natthi saṅkhārāti
saṅkhipitvā vavatthāne paññā sammasane ñāṇaṁ atītampi addhānaṁ
anāgatampi addhānaṁ avijjāpaccayā saṅkhārā asati avijjāya
natthi saṅkhārāti saṅkhipitvā vavatthāne paññā sammasane ñāṇaṁ taṁ
ñātaṭṭhena ñāṇaṁ pajānanaṭṭhena paññā tena vuccati atītānāgata-
paccuppannānaṁ dhammānaṁ saṅkhipitvā vavatthāne paññā
sammasane ñāṇaṁ.
--------

[103] Kathaṁ paccuppannānaṁ dhammānaṁ vipariṇāmānupassane
paññā udayabbayānupassane ñāṇaṁ jātaṁ rūpaṁ paccuppannaṁ tassa
nibbattilakkhaṇaṁ udayo vipariṇāmalakkhaṇaṁ vayo anupassanāñāṇaṁ
jātā vedanā jātā saññā jātā saṅkhārā jātaṁ
viññāṇaṁ jātaṁ cakkhuṁ .pe. Jāto bhavo paccuppanno tassa
nibbattilakkhaṇaṁ udayo vipariṇāmalakkhaṇaṁ vayo anupassanāñāṇaṁ.

[104] Pañcannaṁ khandhānaṁ udayaṁ passanto kati lakkhaṇāni
passati vayaṁ passanto kati lakkhaṇāni passati udayabbayaṁ
passanto kati lakkhaṇāni passati. Pañcannaṁ khandhānaṁ udayaṁ
passanto pañcavīsati lakkhaṇāni passati vayaṁ passanto pañcavīsati
lakkhaṇāni passati udayabbayaṁ passanto paññāsaṁ
lakkhaṇāni passati.

[105] Rūpakkhandhassa udayaṁ passanto kati lakkhaṇāni
passati vayaṁ passanto kati lakkhaṇāni passati udayabbayaṁ
passanto kati lakkhaṇāni passati vedanākkhandhassa saññākkhandhassa
saṅkhārakkhandhassa viññāṇakkhandhassa udayaṁ passanto kati
lakkhaṇāni passati vayaṁ passanto kati lakkhaṇāni passati
udayabbayaṁ passanto kati lakkhaṇāni passati. Rūpakkhandhassa udayaṁ
passanto pañca lakkhaṇāni passati vayaṁ passanto pañca
lakkhaṇāni passati udayabbayaṁ passanto dasa lakkhaṇāni passati
vedanākkhandhassa saññākkhandhassa saṅkhārakkhandhassa viññāṇakkhandhassa
udayaṁ passanto pañca lakkhaṇāni passati vayaṁ
passanto pañca lakkhaṇāni passati udayabbayaṁ passanto dasa
lakkhaṇāni passati.