[86] Kathaṁ sutvāna saṁvare paññā sīlamaye ñāṇaṁ pañca
sīlāni pariyantapārisuddhisīlaṁ apariyantapārisuddhisīlaṁ paripuṇṇapārisuddhisīlaṁ
aparāmaṭṭhapārisuddhisīlaṁ paṭippassaddhipārisuddhisīlanti.
Tattha katamaṁ pariyantapārisuddhisīlaṁ anupasampannānaṁ pariyantasikkhāpadānaṁ
idaṁ pariyantapārisuddhisīlaṁ.
Katamaṁ apariyantapārisuddhisīlaṁ upasampannānaṁ apariyantasikkhāpadānaṁ
idaṁ apariyantapārisuddhisīlaṁ.
Katamaṁ paripuṇṇapārisuddhisīlaṁ puthujjanakalyāṇakānaṁ kusaladhamme
yuttānaṁ asekkhapariyante paripūrikārīnaṁ 1 kāye ca jīvite ca
anapekkhānaṁ pariccattajīvitānaṁ idaṁ paripuṇṇapārisuddhisīlaṁ.
Katamaṁ aparāmaṭṭhapārisuddhisīlaṁ sattannaṁ sekkhānaṁ idaṁ
aparāmaṭṭhapārisuddhisīlaṁ.
Katamaṁ paṭippassaddhipārisuddhisīlaṁ tathāgatasāvakānaṁ khīṇāsavānaṁ
paccekabuddhānaṁ tathāgatānaṁ arahantānaṁ sammāsambuddhānaṁ idaṁ
paṭippassaddhipārisuddhisīlaṁ.
1 Ma. Yu. paripūrakārīnaṁ.

[87] Atthi sīlaṁ pariyantaṁ atthi sīlaṁ apariyantaṁ. Tattha
katamantaṁ sīlaṁ pariyantaṁ atthi sīlaṁ lābhapariyantaṁ atthi sīlaṁ
yasapariyantaṁ atthi sīlaṁ ñātipariyantaṁ atthi sīlaṁ aṅgapariyantaṁ
atthi sīlaṁ jīvitapariyantaṁ.
Katamantaṁ sīlaṁ lābhapariyantaṁ idhekacco lābhahetu lābhapaccayā
lābhakāraṇā yathāsamādinnaṁ sikkhāpadaṁ vītikkamati idantaṁ sīlaṁ
lābhapariyantaṁ.
Katamantaṁ sīlaṁ yasapariyantaṁ idhekacco yasahetu yasapaccayā
yasakāraṇā yathāsamādinnaṁ sikkhāpadaṁ vītikkamati idantaṁ sīlaṁ
yasapariyantaṁ.
Katamantaṁ sīlaṁ ñātipariyantaṁ idhekacco ñātihetu
ñātipaccayā ñātikāraṇā yathāsamādinnaṁ sikkhāpadaṁ vītikkamati
idantaṁ sīlaṁ ñātipariyantaṁ.
Katamantaṁ sīlaṁ aṅgapariyantaṁ idhekacco aṅgahetu aṅgapaccayā
aṅgakāraṇā yathāsamādinnaṁ sikkhāpadaṁ vītikkamati idantaṁ sīlaṁ
aṅgapariyantaṁ.
Katamantaṁ sīlaṁ jīvitapariyantaṁ idhekacco jīvitahetu jīvitapaccayā
jīvitakāraṇā yathāsamādinnaṁ sikkhāpadaṁ vītikkamati idantaṁ sīlaṁ
jīvitapariyantaṁ. Evarūpāni sīlāni khaṇḍāni chiddāni sabalāni
kammāsāni nabhujissāni naviññupasatthāni parāmaṭṭhāni asamādhisaṁvattanikāni
Nāvippaṭisāravatthukāni napāmujjavatthukāni napītivatthukāni
napassaddhivatthukāni nasukhavatthukāni nasamādhivatthukāni
nayathābhūtañāṇadassanavatthukāni na ekantanibbidāya virāgāya nirodhāya
upasamāya abhiññāya sambodhāya nibbānāya saṁvattanti idantaṁ
sīlaṁ pariyantaṁ.

[88] Katamantaṁ sīlaṁ apariyantaṁ atthi sīlaṁ nalābhapariyantaṁ
atthi sīlaṁ nayasapariyantaṁ atthi sīlaṁ nañātipariyantaṁ atthi sīlaṁ
nāṅgapariyantaṁ atthi sīlaṁ najīvitapariyantaṁ.
Katamantaṁ sīlaṁ nalābhapariyantaṁ idhekacco lābhahetu lābhapaccayā
lābhakāraṇā yathāsamādinnaṁ sikkhāpadaṁ vītikkamāya cittaṁpi na
uppādeti kiṁ so vītikkamissati idantaṁ sīlaṁ nalābhapariyantaṁ.
Katamantaṁ sīlaṁ nayasapariyantaṁ idhekacco yasahetu yasapaccayā
yasakāraṇā yathāsamādinnaṁ sikkhāpadaṁ vītikkamāya cittaṁpi na
uppādeti kiṁ so vītikkamissati idantaṁ sīlaṁ nayasapariyantaṁ.
Katamantaṁ sīlaṁ nañātipariyantaṁ idhekacco ñātihetu ñātipaccayā
ñātikāraṇā yathāsamādinnaṁ sikkhāpadaṁ vītikkamāya cittaṁpi na
uppādeti kiṁ so vītikkamissati idantaṁ sīlaṁ nañātipariyantaṁ.
Katamantaṁ sīlaṁ nāṅgapariyantaṁ idhekacco aṅgahetu aṅgapaccayā
aṅgakāraṇā yathāsamādinnaṁ sikkhāpadaṁ vītikkamāya cittaṁpi na
uppādeti kiṁ so vītikkamissati idantaṁ sīlaṁ nāṅgapariyantaṁ.
Katamantaṁ sīlaṁ najīvitapariyantaṁ idhekacco jīvitahetu jīvitapaccayā
jīvitakāraṇā yathāsamādinnaṁ sikkhāpadaṁ vītikkamāya cittaṁpi na
uppādeti kiṁ so vītikkamissati idantaṁ sīlaṁ najīvitapariyantaṁ.
Evarūpāni sīlāni akkhaṇḍāni acchiddāni asabalāni akammāsāni
bhujissāni viññūpasatthāni aparāmaṭṭhāni samādhisaṁvattanikāni
avippaṭisāravatthukāni pāmujjavatthukāni pītivatthukāni passaddhivatthukāni
sukhavatthukāni samādhivatthukāni yathābhūtañāṇadassanavatthukāni ekantanibbidāya
virāgāya nirodhāya upasamāya abhiññāya sambodhāya
nibbānāya saṁvattanti idantaṁ sīlaṁ apariyantaṁ.

[89] Kiṁ sīlaṁ kati sīlāni kiṁsamuṭṭhānaṁ sīlaṁ katidhammasamodhānaṁ
sīlaṁ.
Kiṁ sīlanti cetanā sīlaṁ cetasikaṁ sīlaṁ saṁvaro sīlaṁ
avītikkamo sīlaṁ.
Kati sīlānīti tīṇi sīlāni kusalasīlaṁ akusalasīlaṁ abyākatasīlaṁ.
Kīsamuṭṭhānaṁ sīlanti kusalacittasamuṭṭhānaṁ kusalasīlaṁ akusalacittasamuṭṭhānaṁ
akusalasīlaṁ abyākatacittasamuṭṭhānaṁ abyākatasīlaṁ.
Katidhammasamodhānaṁ sīlanti saṁvarasamodhānaṁ sīlaṁ avītikkamasamodhānaṁ
sīlaṁ tathābhāve jātacetanāsamodhānaṁ sīlaṁ. Pāṇātipātaṁ
saṁvaraṭṭhena sīlaṁ avītikkamaṭṭhena sīlaṁ adinnādānaṁ saṁvaraṭṭhena
sīlaṁ avītikkamaṭṭhena sīlaṁ kāmesu micchācāraṁ saṁvaraṭṭhena sīlaṁ
Avītikkamaṭṭhena sīlaṁ musāvādaṁ saṁvaraṭṭhena sīlaṁ avītikkamaṭṭhena
sīlaṁ pisuṇāvācaṁ saṁvaraṭṭhena sīlaṁ avītikkamaṭṭhena sīlaṁ pharusavācaṁ
saṁvaraṭṭhena sīlaṁ avītikkamaṭṭhena sīlaṁ samphappalāpaṁ
saṁvaraṭṭhena sīlaṁ avītikkamaṭṭhena sīlaṁ abhijjhaṁ saṁvaraṭṭhena sīlaṁ
avītikkamaṭṭhena sīlaṁ byāpādaṁ saṁvaraṭṭhena sīlaṁ avītikkamaṭṭhena
sīlaṁ micchādiṭṭhiṁ saṁvaraṭṭhena sīlaṁ avītikkamaṭṭhena sīlaṁ
nekkhammena kāmacchandaṁ saṁvaraṭṭhena sīlaṁ avītikkamaṭṭhena sīlaṁ
abyāpādena byāpādaṁ saṁvaraṭṭhena sīlaṁ avītikkamaṭṭhena sīlaṁ
ālokasaññāya thīnamiddhaṁ avikkhepaṭṭhena uddhaccaṁ dhammavavatthānena
vicikicchaṁ ñāṇena avijjaṁ pāmujjena aratiṁ paṭhamajjhānena 1
nīvaraṇe dutiyajjhānena vitakkavicāre tatiyajjhānena pītiṁ catutthajjhānena
sukhadukkhaṁ ākāsānañcāyatanasamāpattiyā rūpasaññaṁ paṭighasaññaṁ
nānattasaññaṁ viññāṇañcāyatanasamāpattiyā ākāsānañcāyatanasaññaṁ
ākiñcaññāyatanasamāpattiyā viññāṇañcāyatanasaññaṁ
nevasaññānāsaññāyatanasamāpattiyā ākiñcaññāyatanasaññaṁ
aniccānupassanāya niccasaññaṁ dukkhānupassanāya
sukhasaññaṁ anattānupassanāya attasaññaṁ nibbidānupassanāya
nandiṁ virāgānupassanāya rāgaṁ nirodhānupassanāya samudayaṁ
paṭinissaggānupassanāya ādānaṁ khayānupassanāya ghanasaññaṁ
vayānupassanāya āyuhanaṁ vipariṇāmānupassanāya dhuvasaññaṁ
1 Ma. paṭhamena jhānena. evamuparipi.
Animittānupassanāya nimittaṁ appaṇihitānupassanāya paṇidhiṁ suññatānupassanāya
abhinivesaṁ adhipaññādhammavipassanāya sārādānābhinivesaṁ
yathābhūtañāṇadassanena sammohābhinivesaṁ ādīnavānupassanāya
ālayābhinivesaṁ paṭisaṅkhānupassanāya appaṭisaṅkhaṁ vivaṭṭanānupassanāya
saññogābhinivesaṁ sotāpattimaggena diṭṭhekaṭṭhe
kilese sakadāgāmimaggena oḷārike kilese anāgāmimaggena
aṇusahagate kilese arahattamaggena sabbakilese saṁvaraṭṭhena
sīlaṁ avītikkamaṭṭhena sīlaṁ.

[90] Pañca sīlāni pāṇātipātassa pahānaṁ sīlaṁ veramaṇī
sīlaṁ cetanā sīlaṁ saṁvaro sīlaṁ avītikkamo sīlaṁ evarūpāni
sīlāni cittassa avippaṭisārāya saṁvattanti pāmujjāya 1 saṁvattanti
pītiyā saṁvattanti passaddhiyā saṁvattanti somanassāya saṁvattanti
āsevanāya saṁvattanti bhāvanāya saṁvattanti bahulīkammāya
saṁvattanti alaṅkārāya saṁvattanti parikkhārāya saṁvattanti
parivārāya saṁvattanti pāripūriyā saṁvattanti ekantanibbidāya
virāgāya nirodhāya upasamāya abhiññāya sambodhāya nibbānāya
saṁvattanti evarūpānaṁ sīlānaṁ saṁvarapārisuddhi adhisīlaṁ saṁvarapārisuddhiyā
ṭhitaṁ cittaṁ na vikkhepaṁ gacchati avikkhepapārisuddhi
adhicittaṁ saṁvarapārisuddhiṁ sammā passati avikkhepapārisuddhiṁ sammā
passati dassanapārisuddhi adhipaññā yo tattha saṁvaraṭṭho ayaṁ
1 Ma. Yu. pāmojjāya. evamuparipi.
Adhisīlasikkhā yo tattha avikkhepaṭṭho ayaṁ adhicittasikkhā yo
tattha dassanaṭṭho ayaṁ adhipaññāsikkhā imā tisso sikkhāyo
āvajjanto sikkhati jānanto sikkhati passanto sikkhati paccavekkhanto
sikkhati cittaṁ adhiṭṭhahanto sikkhati saddhāya adhimuccanto
sikkhati viriyaṁ paggaṇhanto sikkhati satiṁ upaṭṭhahanto
sikkhati cittaṁ samādahanto sikkhati paññāya pajānanto
sikkhati abhiññeyyaṁ abhijānanto sikkhati pariññeyyaṁ parijānanto
sikkhati pahātabbaṁ pajahanto sikkhati bhāvetabbaṁ bhāvento
sikkhati sacchikātabbaṁ sacchikaronto sikkhati.

[91] Pañca sīlāni pāṇātipātassa adinnādānassa
kāmesu micchācārassa musāvādassa pisuṇāya vācāya pharusāya
vācāya samphappalāpassa abhijjhāya byāpādassa micchādiṭṭhiyā
nekkhammena kāmacchandassa abyāpādena byāpādassa ālokasaññāya
thīnamiddhassa avikkhepena uddhaccassa dhammavavatthānena
vicikicchāya ñāṇena avijjāya pāmujjena aratiyā paṭhamajjhānena
nīvaraṇānaṁ dutiyajjhānena vitakkavicārānaṁ tatiyajjhānena
pītiyā catutthajjhānena sukhadukkhānaṁ ākāsānañcāyatanasamāpattiyā
rūpasaññāya paṭighasaññāya nānattasaññāya viññāṇañcāyatanasamāpattiyā
ākāsānañcāyatanasaññāya ākiñcaññāyatanasamāpattiyā
viññāṇañcāyatanasaññāya nevasaññānāsaññāyatanasamāpattiyā
Ākiñcaññāyatanasaññāya aniccānupassanāya
niccasaññāya dukkhānupassanāya sukhasaññāya anattānupassanāya
attasaññāya nibbidānupassanāya nandiyā virāgānupassanāya
rāgassa nirodhānupassanāya samudayassa paṭinissaggānupassanāya
ādānassa khayānupassanāya ghanasaññāya vayānupassanāya
āyuhanassa vipariṇāmānupassanāya dhuvasaññāya animittānupassanāya
nimittassa appaṇihitānupassanāya paṇidhiyā
suññatānupassanāya abhinivesassa adhipaññādhammavipassanāya sārādānābhinivesassa
yathābhūtañāṇadassanena sammohābhinivesassa ādīnavānupassāya
ālayābhinivesassa paṭisaṅkhānupassanāya appaṭisaṅkhāya
vivaṭṭanānupassanāya saññogābhinivesassa sotāpattimaggena
diṭṭhekaṭṭhānaṁ kilesānaṁ sakadāgāmimaggena oḷārikānaṁ
kilesānaṁ anāgāmimaggena aṇusahagatānaṁ kilesānaṁ arahatta
maggena sabbakilesānaṁ pahānaṁ sīlaṁ veramaṇī sīlaṁ cetanā silaṁ
saṁvaro sīlaṁ avītikkamo sīlaṁ. Evarūpāni sīlāni cittassa
avippaṭisārāya saṁvattanti pāmujjāya saṁvattanti pītiyā
saṁvattanti passaddhiyā saṁvattanti somanassāya saṁvattanti āsevanāya
saṁvattanti bhāvanāya saṁvattanti bahulīkammāya saṁvattanti
alaṅkārāya saṁvattanti parikkhārāya saṁvattanti parivārāya
saṁvattanti pāripūriyā saṁvattanti ekantanibbidāya virāgāya
Nirodhāya upasamāya abhiññāya sambodhāya nibbānāya saṁvattanti
evarūpānaṁ sīlānaṁ saṁvarapārisuddhi adhisīlaṁ saṁvarapārisuddhiyā ṭhitaṁ
cittaṁ na 1 vikkhepaṁ gacchati avikkhepapārisuddhi adhicittaṁ saṁvarapārisuddhiṁ
sammā passati avikkhepapārisuddhiṁ sammā passati
dassanapārisuddhi adhipaññā yo tattha saṁvaraṭṭho ayaṁ adhisīlasikkhā
yo tattha avikkhepaṭṭho ayaṁ adhicittasikkhā yo tattha
dassanaṭṭho ayaṁ adhipaññāsikkhā imā tisso sikkhāyo
āvajjanto sikkhati jānanto sikkhati passanto sikkhati paccavekkhanto
sikkhati cittaṁ adhiṭṭhahanto sikkhati saddhāya adhimuccanto
sikkhati viriyaṁ paggaṇhanto sikkhati satiṁ upaṭṭhapento
sikkhati cittaṁ samādahanto sikkhati paññāya jānanto 2
sikkhati abhiññeyyaṁ abhijānanto sikkhati pariññeyyaṁ parijānanto
sikkhati pahātabbaṁ pajahanto sikkhati bhāvetabbaṁ
bhāvento sikkhati sacchikātabbaṁ sacchikaronto sikkhati taṁ ñātaṭṭhena
ñāṇaṁ pajānanaṭṭhena paññā tena vuccati sutvāna
saṁvare paññā sīlamaye ñāṇaṁ.
--------

[92] Kathaṁ saṁvaritvā samādahane paññā samādhibhāvanāmaye
ñāṇaṁ eko samādhi cittassa ekaggatā. Dve samādhī
lokiyo samādhi lokuttaro samādhi. Tayo samādhī savitakkasavicāro
1 Ma. avikkhepaṁ. 2 Ma. Yu. pajānanto.
Samādhi avitakkavicāramatto samādhi avitakkāvicāro
samādhi. Cattāro samādhī hānabhāgiyo samādhi ṭhitibhāgiyo samādhi
visesabhāgiyo samādhi nibbedhabhāgiyo samādhi. Pañca samādhī
pītipharaṇatā sukhapharaṇatā cetopharaṇatā ālokapharaṇatā paccavekkhaṇānimittaṁ.
Cha samādhī buddhānussativasena cittassa ekaggatā
avikkhepo samādhi dhammānussativasena cittassa ekaggatā
avikkhepo samādhi saṅghānussativasena cittassa ekaggatā
avikkhepo samādhi sīlānussativasena cittassa ekaggatā avikkhepo
samādhi cāgānussativasena cittassa ekaggatā avikkhepo samādhi
devatānussativasena cittassa ekaggatā avikkhepo samādhi. Satta
samādhī samādhissa kusalatā samādhissa samāpattikusalatā
samādhissa ṭhitikusalatā samādhissa vuṭṭhānakusalatā samādhissa
kallitakusalatā 1 samādhissa gocarakusalatā samādhissa abhinīhārakusalatā.
Aṭṭha samādhī paṭhavīkasiṇavasena cittassa ekaggatā
avikkhepo samādhi āpokasiṇavasena .pe. Tejokasiṇavasena
vāyokasiṇavasena nīlakasiṇavasena pītakasiṇavasena lohitakasiṇavasena
odātakasiṇavasena cittassa ekaggatā avikkhepo samādhi.
Nava samādhī rūpāvacaro samādhi atthi hīno atthi majjhimo
atthi paṇīto arūpāvacaro samādhi atthi hīno atthi
majjhimo atthi paṇīto suññato samādhi animitto samādhi
1 Ma. Yu. kalyatākusalatā.
Appaṇihito samādhi. Dasa samādhī uddhumātakasaññāvasena
cittassa ekaggatā avikkhepo samādhi vinīlakasaññāvasena .pe.
Vipubbakasaññāvasena vicchiddakasaññāvasena vikkhāyitakasaññāvasena
vikkhittakasaññāvasena hatavikkhāyitakasaññāvasena lohitakasaññāvasena
pulavakasaññāvasena 1 aṭṭhikasaññāvasena cittassa
ekaggatā avikkhepo samādhi ime pañcapaññāsa samādhī.

[93] Api ca pañcavīsati samādhissa samādhiṭṭhā pariggahaṭṭhena
samādhi parivāraṭṭhena samādhi paripūraṭṭhena samādhi
ekaggaṭṭhena samādhi avikkhepaṭṭhena samādhi avisāraṭṭhena samādhi
anāvilaṭṭhena samādhi aniñjanaṭṭhena samādhi vimuttaṭṭhena
samādhi ekattupaṭṭhānavasena cittassa ṭhitattā samādhi samaṁ
esatīti samādhi visamaṁ nesatīti samādhi samaṁ esitattā samādhi
visamaṁ nesitattā samādhi samaṁ ādiyatīti samādhi visamaṁ nādiyatīti
samādhi samaṁ ādinnattā samādhi visamaṁ anādinnattā samādhi
samaṁ paṭipajjatīti samādhi visamaṁ nappaṭipajjatīti samādhi samaṁ paṭipannattā
samādhi visamaṁ nappaṭipannattā samādhi samaṁ jhāyatīti
samādhi visamaṁ jhāpetīti samādhi samaṁ jhātattā samādhi visamaṁ
jhāpitattā samādhi samo ca hito ca sukho cāti samādhi ime
pañcavīsati samādhissa samādhiṭṭhā taṁ ñātaṭṭhena ñāṇaṁ pajānanaṭṭhena
paññā tena vuccati saṁvaritvā samādahane paññā
1 Ma. puḷuvakasaññāvasena.
Samādhibhāvanāmaye ñāṇaṁ.
--------

[94] Kathaṁ paccayapariggahe paññā dhammaṭṭhitiñāṇaṁ avijjā
saṅkhārānaṁ uppādaṭṭhiti ca pavattaṭṭhiti ca nimittaṭṭhiti ca
āyuhanaṭṭhiti ca saññogaṭṭhiti ca palibodhaṭṭhiti ca samudayaṭṭhiti ca
hetuṭṭhiti ca paccayaṭṭhiti ca imehi navahākārehi avijjā paccayo
saṅkhārā paccayasamuppannā ubhopete dhammā paccayasamuppannāti
paccayapariggahe paññā dhammaṭṭhitiñāṇaṁ atītampi addhānaṁ avijjāsaṅkhārānaṁ
anāgatampi addhānaṁ avijjā saṅkhārānaṁ uppādaṭṭhiti
ca pavattaṭṭhiti ca nimittaṭṭhiti ca āyuhanaṭṭhiti ca saññogaṭṭhiti ca
palibodhaṭṭhiti ca samudayaṭṭhiti ca hetuṭṭhiti ca paccayaṭṭhiti ca imehi
navahākārehi avijjā paccayo saṅkhārā paccayasamuppannā ubhopete
dhammā paccayasamuppannāti paccayapariggahe paññā dhammaṭṭhitiñāṇaṁ
saṅkhārā viññāṇassa .pe. Viññāṇaṁ nāmarūpassa
nāmarūpaṁ saḷāyatanassa saḷāyatanaṁ phassassa phasso
vedanāya vedanā taṇhāya taṇhā upādānassa upādānaṁ bhavassa
bhavo jātiyā jāti jarāmaraṇassa uppādaṭṭhiti ca pavattaṭṭhiti
ca nimittaṭṭhiti ca āyuhanaṭṭhiti ca saññogaṭṭhiti ca palibodhaṭṭhiti
ca samudayaṭṭhiti ca hetuṭṭhiti ca paccayaṭṭhiti ca imehi
navahākārehi jāti paccayo jarāmaraṇaṁ paccayasamuppannaṁ
Ubhopete dhammā paccayasamuppannāti paccayapariggahe paññā
dhammaṭṭhitiñāṇaṁ atītampi addhānaṁ anāgatampi addhānaṁ jāti
jarāmaraṇassa uppādaṭṭhiti ca pavattaṭṭhiti ca nimittaṭṭhiti ca
āyuhanaṭṭhiti ca saññogaṭṭhiti ca palibodhaṭṭhiti ca samudayaṭṭhiti ca
hetuṭṭhiti ca paccayaṭṭhiti ca imehi navahākārehi jāti paccayo
jarāmaraṇaṁ paccayasamuppannaṁ ubhopete dhammā paccayasamuppannāti
paccayapariggahe paññā dhammaṭṭhitiñāṇaṁ.

[95] Avijjā hetu saṅkhārā hetusamuppannā ubhopete
dhammā hetusamuppannāti paccayapariggahe paññā dhammaṭṭhitiñāṇaṁ
atītampi addhānaṁ anāgatampi addhānaṁ avijjā hetu saṅkhārā
hetusamuppannā ubhopete dhammā hetusamuppannāti paccayapariggahe
paññā dhammaṭṭhitiñāṇaṁ saṅkhārā hetu viññāṇaṁ hetusamuppannaṁ
viññāṇaṁ hetu nāmarūpaṁ hetusamuppannaṁ nāmarūpaṁ
hetu saḷāyatanaṁ hetusamuppannaṁ saḷāyatanaṁ hetu phasso
hetusamuppanno phasso hetu vedanā hetusamuppannā vedanā
hetu taṇhā hetusamuppannā taṇhā hetu upādānaṁ hetusamuppannaṁ
upādānaṁ hetu bhavo hetusamuppanno bhavo hetu
jāti hetusamuppannā jāti hetu jarāmaraṇaṁ hetusamuppannaṁ
ubhopete dhammā hetusamuppannāti paccayapariggahe paññā dhammaṭṭhitiñāṇaṁ
atītampi addhānaṁ anāgatampi addhānaṁ jāti hetu
Jarāmaraṇaṁ hetusamuppannaṁ ubhopete dhammā hetusamuppannāti
paccayapariggahe paññā dhammaṭṭhitiñāṇaṁ.