[116] Uppādo dukkhaṁ anuppādo sukhanti santipade
ñāṇaṁ pavattaṁ dukkhaṁ appavattaṁ sukhanti santipade ñāṇaṁ .pe.
Upāyāso dukkhaṁ anupāyāso sukhanti santipade ñāṇaṁ.

[117] Uppādo sāmisanti bhayatupaṭṭhāne paññā ādīnave
ñāṇaṁ pavattaṁ sāmisanti bhayatupaṭṭhāne paññā ādīnave ñāṇaṁ
.pe. Upāyāso sāmisanti bhayatupaṭṭhāne paññā ādīnave
ñāṇaṁ anuppādo nirāmisanti santipade ñāṇaṁ appavattaṁ
nirāmisanti santipade ñāṇaṁ .pe. Anupāyāso nirāmisanti santipade
ñāṇaṁ uppādo sāmisaṁ anuppādo nirāmisanti santipade
Ñāṇaṁ pavattaṁ sāmisaṁ appavattaṁ nirāmisanti santipade
ñāṇaṁ .pe. Upāyāso sāmisaṁ anupāyāso nirāmisanti santipade
ñāṇaṁ.

[118] Uppādo saṅkhārāti bhayatupaṭṭhāne paññā ādīnave
ñāṇaṁ .pe. Upāyāso saṅkhārāti bhayatupaṭṭhāne paññā
ādīnave ñāṇaṁ anuppādo nibbānanti santipade ñāṇaṁ
appavattaṁ nibbānanti santipade ñāṇaṁ .pe. Anupāyāso
nibbānanti santipade ñāṇaṁ uppādo saṅkhārā anuppādo
nibbānanti santipade ñāṇaṁ pavattaṁ saṅkhārā appavattaṁ
nibbānanti santipade ñāṇaṁ .pe. Upāyāso saṅkhārā anupāyāso
nibbānanti santipade ñāṇaṁ.

[119] Uppādañca pavattañca nimittaṁ dukkhanti passati
āyuhanaṁ paṭisandhiṁ ñāṇaṁ ādīnave idaṁ
anuppādaṁ appavattaṁ animittaṁ sukhanti ca
anāyuhanaṁ appaṭisandhiṁ ñāṇaṁ santipade idaṁ
idaṁ ādīnave ñāṇaṁ pañcaṭṭhānesu jāyati
pañcaṭṭhāne santipade dasa ñāṇe pajānāti
dvinnaṁ ñāṇānaṁ kusalatā nānādiṭṭhīsu na kampatīti.
Taṁ ñātaṭṭhena ñāṇaṁ pajānanaṭṭhena paññā tena vuccati
bhayatupaṭṭhāne paññā ādīnave ñāṇaṁ.

[120] Kathaṁ muñcitukamyatāpaṭisaṅkhāsantiṭṭhanā paññā
saṅkhārupekkhāsu ñāṇaṁ uppādamuñcitukamyatāpaṭisaṅkhāsantiṭṭhanā 1
paññā saṅkhārupekkhāsu ñāṇaṁ pavattamuñcitukamyatāpaṭisaṅkhāsantiṭṭhanā
paññā saṅkhārupekkhāsu ñāṇaṁ nimittamuñcitukamyatā .pe.
Āyuhanamuñcitukamyatā paṭisandhimuñcitukamyatā gatimuñcitukamyatā
nibbattimuñcitukamyatā upapattimuñcitukamyatā jātimuñcitukamyatā
jarāmuñcitukamyatā byādhimuñcitukamyatā maraṇamuñcitukamyatā
sokamuñcitukamyatā paridevamuñcitukamyatā
upāyāsamuñcitukamyatāpaṭisaṅkhāsantiṭṭhanā paññā saṅkhārupekkhāsu
ñāṇaṁ.

[121] Uppādo dukkhanti muñcitukamyatāpaṭisaṅkhāsantiṭṭhanā
paññā saṅkhārupekkhāsu ñāṇaṁ pavattaṁ dukkhanti muñcitukamyatāpaṭisaṅkhāsantiṭṭhanā
paññā saṅkhārupekkhāsu ñāṇaṁ nimittaṁ dukkhantimuñcitukamyatā-
paṭisaṅkhāsantiṭṭhanā paññā saṅkhārupekkhāsu ñāṇaṁ
.pe. Upāyāso dukkhanti muñcitukamyatāpaṭisaṅkhāsantiṭṭhanā
paññā saṅkhārupekkhāsu ñāṇaṁ uppādo bhayanti muñcitukamyatāpaṭisaṅkhāsantiṭṭhanā
paññā saṅkhārupekkhāsu ñāṇaṁ pavattaṁ bhayanti
muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṁ
.pe. Upāyāso bhayanti muñcitukamyatāpaṭisaṅkhāsantiṭṭhanā
paññā saṅkhārupekkhāsu ñāṇaṁ.
1 Ma. Yu. uppādaṁ ... upāyāsaṁ ....

[122] Uppādo sāmisanti muñcitukamyatāpaṭisaṅkhāsantiṭṭhanā
paññā saṅkhārupekkhāsu ñāṇaṁ pavattaṁ sāmisanti muñcitukamyatāpaṭisaṅkhāsantiṭṭhanā
paññā saṅkhārupekkhāsu ñāṇaṁ .pe. Upāyāso
sāmisanti muñcitukamyatāpaṭisaṅkhāsantiṭṭhanā paññā
saṅkhārupekkhāsu ñāṇaṁ uppādo saṅkhārāti muñcitukamyatāpaṭisaṅkhāsantiṭṭhanā
paññā saṅkhārupekkhāsu ñāṇaṁ pavattaṁ saṅkhārāti
muñcitukamyatāpaṭisaṅkhāsantiṭṭhanā paññā saṅkhārupekkhāsu ñāṇaṁ
.pe. Upāyāso saṅkhārāti muñcitukamyatāpaṭisaṅkhāsantiṭṭhanā
paññā saṅkhārupekkhāsu ñāṇaṁ.

[123] Uppādo saṅkhārā te saṅkhāre ajjhupekkhatīti
saṅkhārupekkhā ye ca saṅkhārā yā ca upekkhā ubhopete saṅkhārā te
saṅkhārā ajjhupekkhatīti saṅkhārupekkhā pavattaṁ saṅkhārā .pe.
Nimittaṁ saṅkhārā āyuhanā saṅkhārā paṭisandhi saṅkhārā gati
saṅkhārā nibbatti saṅkhārā upapatti saṅkhārā jāti saṅkhārā jarā
saṅkhārā byādhi saṅkhārā maraṇaṁ saṅkhārā soko saṅkhārā paridevo
saṅkhārā upāyāso saṅkhārā te saṅkhāre ajjhupekkhatīti
saṅkhārupekkhā ye ca saṅkhārā yā ca upekkhā ubhopete
saṅkhārā te saṅkhāre ajjhupekkhatīti saṅkhārupekkhā.

[124] Katihākārehi saṅkhārupekkhāya cittassa abhinīhāro hoti.
Aṭṭhahākārehi saṅkhārupekkhāya cittassa abhinīhāro hoti.
Puthujjanassa katihākārehi saṅkhārupekkhāya cittassa abhinīhāro
hoti sekkhassa katihākārehi saṅkhārupekkhāya cittassa abhinīhāro
hoti vītarāgassa katihākārehi saṅkhārupekkhāya cittassa abhinīhāro
hoti. Puthujjanassa dvīhākārehi saṅkhārupekkhāya
cittassa abhinīhāro hoti sekkhassa tīhākārehi saṅkhārupekkhāya
cittassa abhinīhāro hoti vītarāgassa tīhākārehi saṅkhārupekkhāya
cittassa abhinīhāro hoti.

[125] Puthujjanassa katamehi dvīhākārehi saṅkhārupekkhāya
cittassa abhinīhāro hoti. Puthujjano saṅkhārupekkhaṁ abhinandati vā
vipassati vā puthujjanassa imehi dvīhākārehi saṅkhārupekkhāya
cittassa abhinīhāro hoti.
Sekkhassa katamehi tīhākāre saṅkhārupekkhāya cittassa abhinīhāro
hoti. Sekkho saṅkhārupekkhaṁ abhinandati vā vipassati vā paṭisaṅkhāya
vā phalasamāpattiṁ samāpajjati sekkhassa imehi tīhākārehi
saṅkhārupekkhāya cittassa abhinīhāro hoti.
Vītarāgassa katamehi tīhākārehi saṅkhārupekkhāya cittassa abhinīhāro
hoti. Vītarāgo saṅkhārupekkhaṁ vipassati vā paṭisaṅkhāya
vā phalasamāpattiṁ samāpajjati tadajjhupekkhitvā suññatavihārena
vā animittavihārena vā appaṇihitavihārena vā viharati vītarāgassa
imehi tīhākārehi saṅkhārupekkhāya cittassa abhinīhāro hoti.