[135] Tena kho pana samayena bhikkhū hatthacchinnaṁ pabbājenti
.pe. Pādacchinnaṁ pabbājenti. Hatthapādacchinnaṁ pabbājenti.
Kaṇṇacchinnaṁ pabbājenti. Nāsacchinnaṁ pabbājenti. Kaṇṇanāsacchinnaṁ
pabbājenti. Aṅgulicchinnaṁ pabbājenti. Aḷacchinnaṁ
pabbājenti. Kaṇḍaracchinnaṁ pabbājenti. Phaṇahatthakaṁ pabbājenti.
Khujjaṁ pabbājenti. Vāmanaṁ pabbājenti. Galagaṇḍikaṁ 1
pabbājenti. Lakkhaṇāhataṁ pabbājenti. Kasāhataṁ pabbājenti.
Likhitakaṁ pabbājenti. Sīpadiṁ pabbājenti. Pāparogiṁ pabbājenti.
Parisadūsakaṁ 2 pabbājenti. Kāṇaṁ pabbājenti. Kuṇiṁ pabbājenti.
Khañjaṁ pabbājenti. Pakkhahataṁ pabbājenti. Chinniriyāpathaṁ
pabbājenti. Jarādubbalaṁ pabbājenti. Andhaṁ pabbājenti.
Mūgaṁ pabbājenti. Badhiraṁ pabbājenti. Andhamūgaṁ pabbājenti.
Andhabadhiraṁ pabbājenti. Mūgabadhiraṁ pabbājenti. Andhamūgabadhiraṁ
pabbājenti. Bhagavato etamatthaṁ ārocesuṁ. Na bhikkhave hatthacchinno
1 Sī. Ma. Yu. galagaṇḍiṁ. 2 aṭṭhakathā. parisadūsanaṁ.
Pabbājetabbo na pādacchinno pabbājetabbo na
hatthapādacchinno pabbājetabbo na kaṇṇacchinno pabbājetabbo
na nāsacchinno pabbājetabbo na kaṇṇanāsacchinno pabbājetabbo
na aṅgulicchinno pabbājetabbo na aḷacchinno
pabbājetabbo na kaṇḍaracchinno pabbājetabbo na phaṇahatthako
pabbājetabbo na khujjo pabbājetabbo na vāmano pabbājetabbo
na galagaṇḍiko pabbājetabbo na lakkhaṇāhato
pabbājetabbo na kasāhato pabbājetabbo na likhitako
pabbājetabbo na sīpadī pabbājetabbo na pāparogī
pabbājetabbo na parisadūsako pabbājetabbo na kāṇo
pabbājetabbo na kuṇī pabbājetabbo na khañjo pabbājetabbo
na pakkhahato pabbājetabbo na chinniriyāpatho pabbājetabbo
na jarādubbalo pabbājetabbo na andho pabbājetabbo na
mūgo pabbājetabbo na badhiro pabbājetabbo na andhamūgo
pabbājetabbo na andhabadhiro pabbājetabbo na mūgabadhiro
pabbājetabbo na andhamūgabadhiro pabbājetabbo yo
pabbājeyya āpatti dukkaṭassāti.
Napabbājetabbadvattiṁsavāraṁ niṭṭhitaṁ.
Dāyajjabhāṇavāraṁ niṭṭhitaṁ navamaṁ.

[136] Tena kho pana samayena chabbaggiyā bhikkhū alajjīnaṁ
Nissayaṁ denti. Bhagavato etamatthaṁ ārocesuṁ. Na bhikkhave
alajjīnaṁ nissayo dātabbo yo dadeyya āpatti dukkaṭassāti.
Tena kho pana samayena bhikkhū alajjīnaṁ nissāya vasanti. Tepi
nacirasseva alajjino honti pāpabhikkhū. Bhagavato etamatthaṁ
ārocesuṁ. Na bhikkhave alajjīnaṁ nissāya vatthabbaṁ yo vaseyya
āpatti dukkaṭassāti. Athakho bhikkhūnaṁ etadahosi bhagavatā
paññattaṁ na alajjīnaṁ nissayo dātabbo na alajjīnaṁ nissāya
vatthabbanti kathaṁ nu kho mayaṁ jāneyyāma lajjiṁ vā alajjiṁ
vāti. Bhagavato etamatthaṁ ārocesuṁ. Anujānāmi bhikkhave
catūhapañcāhaṁ āgametuṁ yāva bhikkhusabhāgataṁ jānāmīti.

[137] Tena kho pana samayena aññataro bhikkhu kosalesu
janapadesu addhānamaggapaṭipanno hoti. Athakho tassa bhikkhuno
etadahosi bhagavatā paññattaṁ na anissitena vatthabbanti
ahañcamhi nissayakaraṇīyo addhānamaggapaṭipanno kathaṁ nu kho mayā
paṭipajjitabbanti. Bhagavato etamatthaṁ ārocesuṁ. Anujānāmi
bhikkhave addhānamaggapaṭipannena bhikkhunā nissayaṁ alabhamānena
anissitena vatthunti.

[138] Tena kho pana samayena dve bhikkhū kosalesu janapadesu
addhānamaggapaṭipannā honti. Te aññataraṁ āvāsaṁ upagacchiṁsu.
Tattha eko bhikkhu gilāno hoti. Athakho tassa gilānassa bhikkhuno
1 Ma. pāpakā bhikkhū.
Etadahosi bhagavatā paññattaṁ na anissitena vatthabbanti
ahañcamhi nissayakaraṇīyo gilāno kathaṁ nu kho mayā paṭipajjitabbanti.
Bhagavato etamatthaṁ ārocesuṁ. Anujānāmi bhikkhave
gilānena bhikkhunā nissayaṁ alabhamānena anissitena vatthunti.
Athakho tassa gilānupaṭṭhākassa bhikkhuno etadahosi bhagavatā
paññattaṁ na anissitena vatthabbanti ahañcamhi nissayakaraṇīyo
ayañca bhikkhu gilāno kathaṁ nu kho mayā paṭipajjitabbanti.
Bhagavato etamatthaṁ ārocesuṁ. Anujānāmi bhikkhave gilānupaṭṭhākena
bhikkhunā nissayaṁ alabhamānena yāciyamānena anissitena vatthunti.
Tena kho pana samayena aññataro bhikkhu araññe viharati. Tassa
ca tasmiṁ senāsane phāsu hoti. Athakho tassa bhikkhuno etadahosi
bhagavatā paññattaṁ na anissitena vatthabbanti ahañcamhi nissayakaraṇīyo
araññe viharāmi mayhañca imasmiṁ senāsane phāsu
hoti kathaṁ nu kho mayā paṭipajjitabbanti. Bhagavato etamatthaṁ
ārocesuṁ. Anujānāmi bhikkhave āraññakena bhikkhunā phāsuvihāraṁ
sallakkhentena nissayaṁ alabhamānena anissitena vatthuṁ yadā paṭirūpo
nissayadāyako āgacchissati tassa nissāya vasissāmīti.

[139] Tena kho pana samayena āyasmato mahākassapassa
upasampadāpekkho hoti. Athakho āyasmā mahākassapo āyasmato
ānandassa santike dūtaṁ pāhesi āgacchatu ānando imaṁ
Anussāvessatīti 1 . Āyasmā ānando evamāha nāhaṁ ussahāmi
therassa nāmaṁ gahetuṁ garu me theroti. Bhagavato etamatthaṁ
ārocesuṁ. Anujānāmi bhikkhave gottenapi anussāvetunti.

[140] Tena kho pana samayena āyasmato mahākassapassa dve
upasampadāpekkhā honti. Te vivadanti ahaṁ paṭhamaṁ upasampajjissāmi
ahaṁ paṭhamaṁ upasampajjissāmīti. Bhagavato etamatthaṁ
ārocesuṁ. Anujānāmi bhikkhave dve ekānussāvane kātunti.
Tena kho pana samayena sambahulānaṁ therānaṁ upasampadāpekkhā
honti. Te vivadanti ahaṁ paṭhamaṁ upasampajjissāmi ahaṁ
paṭhamaṁ upasampajjissāmīti. Therā evamāhaṁsu handa mayaṁ āvuso
sabbe va ekānussāvane karomāti. Bhagavato etamatthaṁ ārocesuṁ.
Anujānāmi bhikkhave dve tayo ekānussāvane kātuṁ tañca kho
ekena upajjhāyena na tveva nānupajjhāyenāti.

[141] Tena kho pana samayena āyasmā kumārakassapo gabbhavīso
upasampanno hoti. Athakho āyasmato kumārakassapassa etadahosi
bhagavatā paññattaṁ na ūnavīsativasso puggalo upasampādetabboti
ahañcamhi gabbhavīso upasampanno upasampanno nu khomhi
na nu kho upasampannoti. Bhagavato etamatthaṁ ārocesuṁ.
Yaṁ bhikkhave mātu kucchismiṁ paṭhamaṁ cittaṁ uppannaṁ paṭhamaṁ viññāṇaṁ
1 Sī. Ma. anusāvessatūti.
Pātubhūtaṁ tadupādāya sāvassa jāti anujānāmi bhikkhave gabbhavīsaṁ
upasampādetunti.

[142] Tena kho pana samayena [1]- upasampannā dissanti kuṭṭhikāpi
gaṇḍikāpi kilāsikāpi sosikāpi apamārikāpi. Bhagavato etamatthaṁ
ārocesuṁ. Anujānāmi bhikkhave upasampādentena terasa 2
antarāyike dhamme pucchituṁ. Evañca pana bhikkhave pucchitabbo
santi te evarūpā ābādhā kuṭṭhaṁ gaṇḍo kilāso soso
apamāro manussosi purisosi bhujissosi anaṇosi nasi
rājabhaṭo anuññātosi mātāpitūhi paripuṇṇavīsativassosi
paripuṇṇante pattacīvaraṁ kinnāmosi 3 konāmo 4 te upajjhāyoti.
Tena kho pana samayena bhikkhū ananusiṭṭhe upasampadāpekkhe
antarāyike dhamme pucchanti. Upasampadāpekkhā vitthāyanti maṅkū
honti na sakkonti vissajjetuṁ. Bhagavato etamatthaṁ ārocesuṁ.
Anujānāmi bhikkhave paṭhamaṁ anusāsitvā pacchā antarāyike dhamme
pucchitunti. Tattheva saṅghamajjhe anusāsanti. Upasampadāpekkhā
tatheva vitthāyanti maṅkū honti na sakkonti vissajjetuṁ. Bhagavato
etamatthaṁ ārocesuṁ. Anujānāmi bhikkhave ekamantaṁ anusāsitvā
saṅghamajjhe antarāyike dhamme pucchituṁ. Evañca pana bhikkhave
anusāsitabbo. Paṭhamaṁ upajjhaṁ gāhāpetabbo. Upajjhaṁ
1 Po. bhikkhū. 2 Yu. tassa. 3 Ma. Yu. kiṁnāmo so. 4 ko nāmāti amhākaṁ ruci.
Gāhāpetvā pattacīvaraṁ ācikkhitabbaṁ ayante patto ayaṁ saṅghāṭi
ayaṁ uttarāsaṅgo ayaṁ antaravāsako gaccha amumhi okāse
tiṭṭhāhīti. Bālā abyattā anusāsanti duranusiṭṭhā upasampadāpekkhā
vitthāyanti maṅkū honti na sakkonti vissajjetuṁ.
Bhagavato etamatthaṁ ārocesuṁ. Na bhikkhave bālena abyattena
anusāsitabbo yo anusāseyya āpatti dukkaṭassa. Anujānāmi
bhikkhave byattena bhikkhunā paṭibalena anusāsitunti. Asammatā
anusāsanti. Bhagavato etamatthaṁ ārocesuṁ. Na bhikkhave asammatena
anusāsitabbo yo anusāseyya āpatti dukkaṭassa.
Anujānāmi bhikkhave sammatena anusāsituṁ. Evañca pana bhikkhave
sammannitabbo. Attanā va attānaṁ sammannitabbaṁ parena vā
paro sammannitabbo. Kathañca attanā va attānaṁ sammannitabbaṁ.
Byattena bhikkhunā paṭibalena saṅgho ñāpetabbo suṇātu me bhante
saṅgho itthannāmo itthannāmassa āyasmato upasampadāpekkho.
Yadi saṅghassa pattakallaṁ ahaṁ itthannāmaṁ anusāseyyanti. Evaṁ
attanā va attānaṁ sammannitabbaṁ. Kathañca parena paro sammannitabbo.
Byattena bhikkhunā paṭibalena saṅgho ñāpetabbo suṇātu me
bhante saṅgho itthannāmo itthannāmassa āyasmato upasampadāpekkho 1
yadi saṅghassa pattakallaṁ itthannāmo itthannāmaṁ anusāseyyāti.
1 upasampadāpekhoti vā pāṭho.
Evaṁ parena paro sammannitabbo. Tena sammatena
bhikkhunā upasampadāpekkho upasaṅkamitvā evamassa vacanīyo suṇasi
itthannāma ayante saccakālo bhūtakālo yaṁ jātaṁ taṁ
saṅghamajjhe pucchante santaṁ atthīti vattabbaṁ asantaṁ natthīti
vattabbaṁ mā kho vitthāsi mā kho maṅku ahosi evantaṁ
pucchissanti santi te evarūpā ābādhā kuṭṭhaṁ gaṇḍo
kilāso soso apamāro manussosi purisosi bhujissosi
anaṇosi nasi rājabhaṭo anuññātosi mātāpitūhi paripuṇṇavīsativassosi
paripuṇṇante pattacīvaraṁ kinnāmosi konāmo te
upajjhāyoti. Ekato āgacchanti 1 . Na [2]- ekato āgantabbaṁ.
Anusāsakena paṭhamataraṁ āgantvā saṅgho ñāpetabbo suṇātu me
bhante saṅgho itthannāmo itthannāmassa āyasmato upasampadāpekkho.
Anusiṭṭho so mayā. Yadi saṅghassa pattakallaṁ itthannāmo
āgaccheyyāti. Āgacchāhīti vattabbo. Ekaṁsaṁ uttarāsaṅgaṁ
kārāpetvā bhikkhūnaṁ pāde vandāpetvā ukkuṭikaṁ nisīdāpetvā añjaliṁ
paggaṇhāpetvā upasampadaṁ yācāpetabbo saṅghambhante upasampadaṁ
yācāmi ullumpatu maṁ bhante saṅgho anukampaṁ upādāya. Dutiyampi
bhante saṅghaṁ upasampadaṁ yācāmi ullumpatu maṁ bhante saṅgho anukampaṁ
upādāya. Tatiyampi bhante saṅghaṁ upasampadaṁ yācāmi ullumpatu
1 idaṁ pāṭhadvayaṁ antarā pakkhittaṁ viya khāyati. 2 Ma. bhikkhave.
Maṁ bhante saṅgho anukampaṁ upādāyāti. Byattena bhikkhunā
paṭibalena saṅgho ñāpetabbo suṇātu me bhante saṅgho ayaṁ
itthannāmo itthannāmassa āyasmato upasampadāpekkho. Yadi
saṅghassa pattakallaṁ ahaṁ itthannāmaṁ antarāyike dhamme puccheyyanti.
Suṇasi itthannāma ayante saccakālo bhūtakālo yaṁ jātaṁ taṁ
pucchāmi santaṁ atthīti vattabbaṁ asantaṁ natthīti vattabbaṁ
santi te evarūpā ābādhā kuṭṭhaṁ gaṇḍo kilāso soso
apamāro manussosi purisosi bhujissosi anaṇosi nasi
rājabhaṭo anuññātosi mātāpitūhi paripuṇṇavīsativassosi
paripuṇṇante pattacīvaraṁ kinnāmosi konāmo te upajjhāyoti.
Byattena bhikkhunā paṭibalena saṅgho ñāpetabbo suṇātu me
bhante saṅgho ayaṁ itthannāmo itthannāmassa āyasmato
upasampadāpekkho parisuddho antarāyikehi dhammehi. Paripuṇṇassa
pattacīvaraṁ. Itthannāmo saṅghaṁ upasampadaṁ yācati itthannāmena
upajjhāyena. Yadi saṅghassa pattakallaṁ saṅgho itthannāmaṁ upasampādeyya
itthannāmena upajjhāyena. Esā ñatti. Suṇātu
me bhante saṅgho ayaṁ itthannāmo itthannāmassa āyasmato
upasampadāpekkho parisuddho antarāyikehi dhammehi. Paripuṇṇassa
pattacīvaraṁ. Itthannāmo saṅghaṁ upasampadaṁ yācati itthannāmena
upajjhāyena. Saṅgho itthannāmaṁ upasampādeti itthannāmena
Upajjhāyena. Yassāyasmato khamati itthannāmassa upasampadā
itthannāmena upajjhāyena so tuṇhassa yassa nakkhamati so
bhāseyya. Dutiyampi etamatthaṁ vadāmi. Suṇātu me bhante saṅgho
ayaṁ itthannāmo itthannāmassa āyasmato upasampadāpekkho
parisuddho antarāyikehi dhammehi. Paripuṇṇassa pattacīvaraṁ.
Itthannāmo saṅghaṁ upasampadaṁ yācati itthannāmena upajjhāyena.
Saṅgho itthannāmaṁ upasampādeti itthannāmena upajjhāyena.
Yassāyasmato khamati itthannāmassa upasampadā itthannāmena
upajjhāyena so tuṇhassa yassa nakkhamati so bhāseyya.
Tatiyampi etamatthaṁ vadāmi. Suṇātu me bhante saṅgho ayaṁ
itthannāmo itthannāmassa āyasmato upasampadāpekkho parisuddho
antarāyikehi dhammehi. Paripuṇṇassa pattacīvaraṁ. Itthannāmo
saṅghaṁ upasampadaṁ yācati itthannāmena upajjhāyena. Saṅgho itthannāmaṁ
upasampādeti itthannāmena upajjhāyena. Yassāyasmato
khamati itthannāmassa upasampadā itthannāmena upajjhāyena so
tuṇhassa yassa nakkhamati so bhāseyya. Upasampanno saṅghena
itthannāmo itthannāmena upajjhāyena. Khamati saṅghassa tasmā
tuṇhī. Evametaṁ dhārayāmīti.
Upasampadākammaṁ niṭṭhitaṁ.

[143] Tāvadeva chāyā metabbā utuppamāṇaṁ ācikkhitabbaṁ
Divasabhāgo ācikkhitabbo saṅgīti ācikkhitabbā cattāro nissayā
ācikkhitabbā piṇḍiyālopabhojanaṁ nissāya pabbajjā tattha
te yāvajīvaṁ ussāho karaṇīyo. Atirekalābho saṅghabhattaṁ
uddesabhattaṁ nimantanaṁ salākabhattaṁ pakkhikaṁ uposathikaṁ pāṭipadikaṁ.
Paṁsukūlacīvaraṁ nissāya pabbajjā tattha te yāvajīvaṁ ussāho
karaṇīyo. Atirekalābho khomaṁ kappāsikaṁ koseyyaṁ kambalaṁ
sāṇaṁ bhaṅgaṁ. Rukkhamūlasenāsanaṁ nissāya pabbajjā tattha te
yāvajīvaṁ ussāho karaṇīyo. Atirekalābho vihāro aḍḍhayogo
pāsādo hammiyaṁ guhā. Pūtimuttabhesajjaṁ nissāya pabbajjā
tattha te yāvajīvaṁ ussāho karaṇīyo. Atirekalābho sappi
navanītaṁ telaṁ madhu phāṇitanti.
Cattāro nissayā niṭṭhitā.

[144] Tena kho pana samayena bhikkhū aññataraṁ bhikkhuṁ
upasampādetvā ekakaṁ ohāya pakkamiṁsu. So pacchā ekako va
āgacchanto antarāmagge purāṇadutiyikāya samāgacchi. Sā evamāha
kindāni pabbajitosīti. Āma pabbajitomhīti. Dullabho kho
pabbajitānaṁ methuno dhammo ehi methunaṁ dhammaṁ paṭisevāti.
So tassā methunaṁ dhammaṁ paṭisevitvā pacchā 1 cirena agamāsi.
Bhikkhū evamāhaṁsu kissa tvaṁ āvuso evaṁ ciraṁ akāsīti. Athakho
so [2]- bhikkhūnaṁ etamatthaṁ ārocesi. Bhikkhū bhagavato etamatthaṁ
1 Ma. Yu. ayaṁ pāṭho natthi. 2 Ma. Yu. bhikkhu.
Ārocesuṁ. Athakho bhagavā etasmiṁ nidāne etasmiṁ pakaraṇe
dhammiṁ kathaṁ katvā bhikkhū āmantesi anujānāmi bhikkhave
upasampādetvā dutiyaṁ dātuṁ cattāri ca akaraṇīyāni ācikkhituṁ
upasampannena bhikkhunā methuno dhammo na paṭisevitabbo antamaso
tiracchānagatāyapi. Yo bhikkhu methunaṁ dhammaṁ paṭisevati assamaṇo
hoti asakyaputtiyo. Seyyathāpi nāma puriso sīsacchinno abhabbo
tena sarīrabandhanena jīvituṁ evameva bhikkhu methunaṁ dhammaṁ paṭisevitvā
assamaṇo hoti asakyaputtiyo. Tante yāvajīvaṁ akaraṇīyaṁ.
Upasampannena bhikkhunā adinnaṁ theyyasaṅkhātaṁ na ādātabbaṁ antamaso
tiṇasalākaṁ upādāya. Yo bhikkhu pādaṁ vā pādārahaṁ vā atirekapādaṁ
vā adinnaṁ theyyasaṅkhātaṁ ādiyati assamaṇo hoti asakyaputtiyo.
Seyyathāpi nāma paṇḍupalāso bandhanā pamutto abhabbo haritattāya
evameva bhikkhu pādaṁ vā pādārahaṁ vā atirekapādaṁ vā adinnaṁ
theyyasaṅkhātaṁ ādiyitvā assamaṇo hoti asakyaputtiyo. Tante
yāvajīvaṁ akaraṇīyaṁ. Upasampannena bhikkhunā sañcicca pāṇo
jīvitā na 1 voropetabbo antamaso kunthakipillikaṁ upādāya. Yo
bhikkhu sañcicca manussaviggahaṁ jīvitā voropeti antamaso gabbhapātanaṁ
upādāya assamaṇo hoti asakyaputtiyo. Seyyathāpi nāma
puthusilā dvedhā bhinnā appaṭisandhikā hoti evameva bhikkhu
sañcicca manussaviggahaṁ jīvitā voropetvā assamaṇo hoti
1 Yu. no.
Asakyaputtiyo. Tante yāvajīvaṁ akaraṇīyaṁ. Upasampannena bhikkhunā
uttarimanussadhammo na ullapitabbo antamaso suññāgāre abhiramāmīti.
Yo bhikkhu pāpiccho icchāpakato asantaṁ abhūtaṁ uttarimanussadhammaṁ
ullapati jhānaṁ vā vimokkhaṁ vā samādhiṁ vā samāpattiṁ vā
maggaṁ vā phalaṁ vā assamaṇo hoti asakyaputtiyo. Seyyathāpi
nāma tālo matthakacchinno abhabbo puna viruḷhiyā evameva
bhikkhu pāpiccho icchāpakato asantaṁ abhūtaṁ uttarimanussadhammaṁ
ullapitvā assamaṇo hoti asakyaputtiyo. Tante yāvajīvaṁ
akaraṇīyanti.
Cattāri akaraṇīyāni niṭṭhitāni.