[125] Tena kho pana samayena aññataro paṇḍako bhikkhūsu
pabbajito hoti. So dahare dahare bhikkhū upasaṅkamitvā evaṁ
vadeti etha maṁ āyasmanto dūsethāti. Bhikkhū apasādenti
nassa paṇḍaka vinassa paṇḍaka ko tayā atthoti. So
bhikkhūhi apasādito mahante mahante moligalle sāmaṇere upasaṅkamitvā
evaṁ vadeti etha maṁ āyasmanto 1 dūsethāti. Sāmaṇerā
apasādenti nassa paṇḍaka vinassa paṇḍaka ko tayā
atthoti. So sāmaṇerehi apasādito hatthibhaṇḍe assabhaṇḍe
upasaṅkamitvā evaṁ vadeti etha maṁ āvuso dūsethāti. Hatthibhaṇḍā
assabhaṇḍā dūsesuṁ. Te ujjhāyanti khīyanti vipācenti
1 Ma. Yu. āvuso.
Paṇḍakā ime samaṇā sakyaputtiyā yepi imesaṁ na paṇḍakā
tepi [1]- paṇḍake dūsenti evaṁ ime sabbe va abrahmacārinoti.
Assosuṁ kho bhikkhū [2]- hatthibhaṇḍānaṁ assabhaṇḍānaṁ ujjhāyantānaṁ
khīyantānaṁ vipācentānaṁ. Athakho te bhikkhū bhagavato etamatthaṁ
ārocesuṁ. Paṇḍako bhikkhave anupasampanano na upasampādetabbo
upasampanno nāsetabboti.

[126] Tena kho pana samayena aññataro purāṇakulaputto
khīṇakolañño sukhumālo hoti. Athakho tassa purāṇakulaputtassa
khīṇakolaññassa etadahosi ahaṁ kho sukhumālo na paṭibalo
anadhigataṁ vā bhogaṁ adhigantuṁ adhigataṁ vā bhogaṁ dhātiṁ kātuṁ kena
nu kho ahaṁ upāyena sukhaṁ 3 jīveyyaṁ na ca kilameyyanti. Athakho
tassa purāṇakulaputtassa khīṇakolaññassa etadahosi ime kho
samaṇā sakyaputtiyā sukhasīlā sukhasamācārā subhojanāni bhuñjitvā
nīvātesu sayanesu sayanti yannūnāhaṁ sāmaṁ pattacīvaraṁ paṭiyādetvā
kesamassuṁ ohāretvā kāsāyāni vatthāni acchādetvā ārāmaṁ
gantvā bhikkhūhi saddhiṁ saṁvaseyyanti. Athakho so purāṇakulaputto
khīṇakolañño sāmaṁ pattacīvaraṁ paṭiyādetvā kesamassuṁ ohāretvā
kāsāyāni vatthāni acchādetvā ārāmaṁ gantvā bhikkhū abhivādeti.
Bhikkhū evamāhaṁsu kativassosi tvaṁ āvusoti. Kiṁ etaṁ āvuso
kativasso nāmāti. Ko pana te āvuso upajjhāyoti. Kiṁ
1 Ma. ime. Ma. tesaṁ. 3 Ma. Yu. sukhañca.
Etaṁ āvuso upajjhāyo nāmāti. Bhikkhū āyasmantaṁ upāliṁ
etadavocuṁ iṅghāvuso upāli imaṁ pabbajitaṁ anuyuñjāhīti.
Athakho so purāṇakulaputto khīṇakolañño āyasmatā upālinā
anuyuñjiyamāno etamatthaṁ ārocesi. Āyasmā upāli bhikkhūnaṁ
etamatthaṁ ārocesi. Bhikkhū bhagavato etamatthaṁ ārocesuṁ.
Theyyasaṁvāsako bhikkhave anupasampanno na upasampādetabbo
upasampanno nāsetabbo 1 . Titthiyapakkantako bhikkhave anupasampanno
na upasampādetabbo upasampanno nāsetabboti.

[127] Tena kho pana samayena aññataro nāgo nāgayoniyā
aṭṭiyati harāyati jigucchati. Athakho tassa nāgassa etadahosi
kena nu kho ahaṁ upāyena nāgayoniyā ca parimucceyyaṁ khippañca
manussattaṁ paṭilabheyyanti. Athakho tassa nāgassa etadahosi
ime kho samaṇā sakyaputtiyā dhammacārino samacārino brahmacārino
saccavādino sīlavanto kalyāṇadhammā sace kho ahaṁ samaṇesu
sakyaputtiyesu pabbajeyyaṁ evāhaṁ nāgayoniyā ca parimucceyyaṁ
khippañca manussattaṁ paṭilabheyyanti. Athakho so nāgo māṇavakavaṇṇena
bhikkhū upasaṅkamitvā pabbajjaṁ yāci. Taṁ bhikkhū pabbājesuṁ
upasampādesuṁ. Tena kho pana samayena so nāgo aññatarena
bhikkhunā saddhiṁ paccantime vihāre paṭivasati. Athakho so bhikkhu
rattiyā paccūsasamayaṁ paccuṭṭhāya ajjhokāse caṅkamati. Athakho
1 Ma. itisaddo dissati.
So nāgo tassa bhikkhuno nikkhante vissaṭṭho niddaṁ okkami.
Sabbo vihāro ahinā puṇṇo. Vātapānehi bhogā nikkhantā
honti. Athakho so bhikkhu vihāraṁ pavisissāmīti kavāṭaṁ paṇāmento
addasa sabbaṁ vihāraṁ ahinā puṇṇaṁ vātapānehi bhoge
nikkhante disvāna bhīto vissaramakāsi. Bhikkhū upadhāvitvā taṁ
bhikkhuṁ etadavocuṁ kissa tvaṁ āvuso vissaramakāsīti. Ayaṁ
āvuso sabbo vihāro ahinā puṇṇo vātapānehi bhogā
nikkhantāti. Athakho so nāgo tena saddena paṭibujjhitvā
sake āsane nisīdi. Bhikkhū evamāhaṁsu kosi tvaṁ āvusoti.
Ahaṁ bhante nāgoti. Kissa pana tvaṁ āvuso evarūpamakāsīti.
Athakho so nāgo bhikkhūnaṁ etamatthaṁ ārocesi. Bhikkhū bhagavato
etamatthaṁ ārocesuṁ. Athakho bhagavā etasmiṁ nidāne etasmiṁ
pakaraṇe bhikkhusaṅghaṁ sannipātāpetvā taṁ nāgaṁ etadavoca tumhe
khvattha 1 nāgā aviruḷhidhammā imasmiṁ dhammavinaye gaccha tvaṁ nāga
tattheva cātuddase paṇṇarase aṭṭhamiyā ca pakkhassa uposathaṁ
upavasa evaṁ tvaṁ nāgayoniyā ca parimuccissasi khippañca manussattaṁ
paṭilabhissasīti. Athakho so nāgo aviruḷhidhammo kirāhaṁ imasmiṁ
dhammavinayeti dukkhī dummano assūni pavattayamāno vissaraṁ karitvā
pakkāmi. Athakho bhagavā bhikkhū āmantesi dveme bhikkhave
paccayā nāgassa sabhāvapātukammāya yadā ca sajātiyā methunaṁ
1 Ma. khottha.
Dhammaṁ paṭisevati yadā ca vissaṭṭho niddaṁ okkamati ime kho
bhikkhave dve paccayā nāgassa sabhāvapātukammāya. Tiracchānagato
bhikkhave anupasampanno na upasampādetabbo upasampanno
nāsetabboti.

[128] Tena kho pana samayena aññataro māṇavako mātaraṁ
jīvitā voropesi. So tena pāpakena kammena aṭṭiyati harāyati
jigucchati. Athakho tassa māṇavakassa etadahosi kena nu kho
ahaṁ upāyena imassa pāpakassa kammassa nikkhantiṁ kareyyanti.
Athakho tassa māṇavakassa etadahosi ime kho samaṇā sakyaputtiyā
dhammacārino samacārino brahmacārino saccavādino sīlavanto
kalyāṇadhammā sace kho ahaṁ samaṇesu sakyaputtiyesu pabbajeyyaṁ
evāhaṁ imassa pāpakassa kammassa nikkhantiṁ kareyyanti. Athakho
so māṇavako bhikkhū upasaṅkamitvā pabbajjaṁ yāci. Bhikkhū
āyasmantaṁ upāliṁ etadavocuṁ pubbepi kho āvuso upāli
nāgo māṇavakavaṇṇena bhikkhūsu pabbajito iṅghāvuso upāli
imaṁ māṇavakaṁ anuyuñjāhīti. Athakho so māṇavako āyasmatā
upālinā anuyuñjiyamāno etamatthaṁ ārocesi. Āyasmā upāli
bhikkhūnaṁ etamatthaṁ ārocesi. Bhikkhū bhagavato etamatthaṁ ārocesuṁ.
Mātughātako bhikkhave anupasampanno na upasampādetabbo upasampanno
nāsetabboti.

[129] Tena kho pana samayena aññataro māṇavako pitaraṁ
jīvitā voropesi. So tena pāpakena kammena aṭṭiyati harāyati
jigucchati. Athakho tassa māṇavakassa etadahosi kena nu kho
ahaṁ upāyena imassa pāpakassa kammassa nikkhantiṁ kareyyanti.
Athakho tassa māṇavakassa etadahosi ime kho samaṇā sakyaputtiyā
dhammacārino samacārino brahmacārino saccavādino sīlavanto
kalyāṇadhammā sace kho ahaṁ samaṇesu sakyaputtiyesu pabbajeyyaṁ
evāhaṁ imassa pāpakassa kammassa nikkhantiṁ kareyyanti. Athakho
so māṇavako bhikkhū upasaṅkamitvā pabbajjaṁ yāci. Bhikkhū
āyasmantaṁ upāliṁ etadavocuṁ pubbepi kho āvuso upāli nāgo
māṇavakavaṇṇena bhikkhūsu pabbajito iṅghāvuso upāli imaṁ
māṇavakaṁ anuyuñjāhīti. Athakho so māṇavako āyasmatā
upālinā anuyuñjiyamāno etamatthaṁ ārocesi. Āyasmā upāli
bhikkhūnaṁ etamatthaṁ ārocesi. Bhikkhū bhagavato etamatthaṁ ārocesuṁ.
Pitughātako bhikkhave anupasampanno na anupasampādetabbo upasampanno
nāsetabboti.

[130] Tena kho pana samayena sambahulā bhikkhū sāketā
sāvatthiṁ addhānamaggapaṭipannā honti. Antarāmagge corā
nikkhamitvā ekacce bhikkhū acchindiṁsu ekacce bhikkhū haniṁsu.
Sāvatthiyā rājabhaṭā nikkhamitvā ekacce core aggahesuṁ.
Ekacce corā palāyiṁsu. Ye te palāyiṁsu te bhikkhūsu
pabbajiṁsu. Ye te gahitā te vadhāya onīyanti. Addasaṁsu
kho te pabbajitā te core vadhāya onīyamāne disvāna
evamāhaṁsu sādhu kho mayaṁ palāyimhā sacajja 1 mayaṁ gayheyyāma
mayampi evameva haññeyyāmāti. Bhikkhū evamāhaṁsu kiṁ pana
tumhe āvuso akatthāti. Athakho te pabbajitā bhikkhūnaṁ etamatthaṁ
ārocesuṁ. Bhikkhū bhagavato etamatthaṁ ārocesuṁ. Arahanto
ete bhikkhave bhikkhū arahantaghātako bhikkhave anupasampanno
na upasampādetabbo upasampanno nāsetabboti.

[131] Tena kho pana samayena sambahulā bhikkhuniyo sāketā
sāvatthiṁ addhānamaggapaṭipannā honti. Antarāmagge corā
nikkhamitvā ekaccā bhikkhuniyo acchindiṁsu ekaccā bhikkhuniyo
dūsesuṁ. Sāvatthiyā rājabhaṭā nikkhamitvā ekacce core aggahesuṁ.
Ekacce corā palāyiṁsu. Ye te palāyiṁsu te bhikkhūsu
pabbajiṁsu. Ye te gahitā te vadhāya onīyanti. Addasaṁsu
kho te [2]- pabbajitā te core vadhāya onīyamāne disvāna
evamāhaṁsu sādhu kho mayaṁ palāyimhā sacajja mayaṁ gayheyyāma
mayampi evameva haññeyyāmāti. Bhikkhū evamāhaṁsu kiṁ pana
tumhe āvuso akatthāti. Athakho te pabbajitā bhikkhūnaṁ etamatthaṁ
ārocesuṁ. Bhikkhū bhagavato etamatthaṁ ārocesuṁ. Bhikkhunīdūsako
1 Ma. Yu. sacā ca. ito paraṁ īdisameva. 2 Ma. palāyitvā.
Bhikkhave anupasampanno na upasampādetabbo upasampanno
nāsetabbo. Saṅghabhedako bhikkhave anupasampanno na upasampādetabbo
upasampanno nāsetabbo. Lohituppādako bhikkhave
anupasampanno na upasampādetabbo upasampanno nāsetabboti.

[132] Tena kho pana samayena aññataro ubhatobyañjanako
bhikkhūsu pabbajito hoti. So karotipi kārāpetipi. Bhagavato
etamatthaṁ ārocesuṁ. Ubhatobyañjanako bhikkhave anupasampanno
na upasampādetabbo upasampanno nāsetabboti.

[133] Tena kho pana samayena bhikkhū anupajjhāyakaṁ upasampādenti.
Bhagavato etamatthaṁ ārocesuṁ. Na bhikkhave anupajjhāyako
upasampādetabbo yo upasampādeyya āpatti
dukkaṭassāti. Tena kho pana samayena bhikkhū saṅghena upajjhāyena
upasampādenti. Bhagavato etamatthaṁ ārocesuṁ. Na bhikkhave
saṅghena upajjhāyena upasampādetabbo yo upasampādeyya
āpatti dukkaṭassāti. Tena kho pana samayena bhikkhū gaṇena
upajjhāyena upasampādenti. Bhagavato etamatthaṁ ārocesuṁ.
Na bhikkhave gaṇena upajjhāyena upasampādetabbo yo upasampādeyya
āpatti dukkaṭassāti. Tena kho pana samayena
bhikkhū paṇḍakupajjhāyena upasampādenti .pe. Theyyasaṁvāsakupajjhāyena
upasampādenti. Titthiyapakkantakupajjhāyena upasampādenti.
Tiracchānagatupajjhāyena upasampādenti. Mātughātakupajjhāyena
upasampādenti. Pitughātakupajjhāyena upasampādenti.
Arahantaghātakupajjhāyena upasampādenti. Bhikkhunīdūsakupajjhāyena
upasampādenti. Saṅghabhedakupajjhāyena upasampādenti.
Lohituppādakupajjhāyena upasampādenti. Ubhatobyañjanakupajjhāyena
upasampādenti. Bhagavato etamatthaṁ ārocesuṁ. Na bhikkhave
paṇḍakupajjhāyena upasampādetabbo na theyyasaṁvāsakupajjhāyena
upasampādetabbo na titthiyapakkantakupajjhāyena upasampādetabbo
na tiracchānagatupajjhāyena upasampādetabbo na mātughātakupajjhāyena
upasampādetabbo na pitughātakupajjhāyena upasampādetabbo
na arahantaghātakupajjhāyena upasampādetabbo na
bhikkhunīdūsakupajjhāyena upasampādetabbo na saṅghabhedakupajjhāyena
upasampādetabbo na lohituppādakupajjhayena upasampādetabbo
na ubhatobyañjanakupajjhāyena upasampādetabbo yo upasampādeyya
āpatti dukkaṭassāti.

[134] Tena kho pana samayena bhikkhū apattakaṁ upasampādenti
hatthesu piṇḍāya caranti. Manussā ujjhāyanti khīyanti vipācenti
seyyathāpi titthiyāti. Bhagavato etamatthaṁ ārocesuṁ.
Na bhikkhave apattako upasampādetabbo yo upasampādeyya
āpatti dukkaṭassāti. Tena kho pana samayena bhikkhū acīvarakaṁ
Upasampādenti. Naggā piṇḍāya caranti. Manussā ujjhāyanti
khīyanti vipācenti seyyathāpi titthiyāti. Bhagavato etamatthaṁ
ārocesuṁ. Na bhikkhave acīvarako upasampādetabbo yo
upasampādeyya āpatti dukkaṭassāti. Tena kho pana samayena
bhikkhū apattacīvarakaṁ upasampādenti. Naggā hatthesu piṇḍāya
caranti. Manussā ujjhāyanti khīyanti vipācenti seyyathāpi
titthiyāti. Bhagavato etamatthaṁ ārocesuṁ. Na bhikkhave apattacīvarako
upasampādetabbo yo upasampādeyya āpatti
dukkaṭassāti. Tena kho pana samayena bhikkhū yācitakena pattena
upasampādenti. Upasampanne pattaṁ paṭiharanti. Hatthesu
piṇḍāya caranti. Manussā ujjhāyanti khīyanti vipācenti seyyathāpi
titthiyāti. Bhagavato etamatthaṁ ārocesuṁ. Na bhikkhave yācitakena
pattena upasampādetabbo yo upasampādeyya āpatti
dukkaṭassāti. Tena kho pana samayena bhikkhū yācitakena cīvarena
upasampādenti. Upasampanne cīvaraṁ paṭiharanti. Naggā piṇḍāya
caranti. Manussā ujjhāyanti khīyanti vipācenti seyyathāpi
titthiyāti. Bhagavato etamatthaṁ ārocesuṁ. Na bhikkhave yācitakena
cīvarena upasampādetabbo yo upasampādeyya āpatti
dukkaṭassāti. Tena kho pana samayena bhikkhū yācitakena pattacīvarena
upasampādenti. Upasampanne pattacīvaraṁ paṭiharanti. Naggā
Hatthesu piṇḍāya caranti. Manussā ujjhāyanti khīyanti vipācenti
seyyathāpi titthiyāti. Bhagavato etamatthaṁ ārocesuṁ. Na bhikkhave
yācitakena pattacīvarena upasampādetabbo yo upasampādeyya
āpatti dukkaṭassāti.
Naupasampādetabbakavīsativāraṁ niṭṭhitaṁ.