[105] Tena kho pana samayena aññataro puriso corikaṁ katvā
palāyitvā bhikkhūsu pabbajito hoti. So ca rañño antepure
likhito hoti yattha passitabbo tattha hantabboti. Manussā
passitvā evamāhaṁsu ayaṁ so likhitako coro handa naṁ hanāmāti.
Ekacce evamāhaṁsu māyyā evaṁ avacuttha anuññātaṁ raññā
māgadhena seniyena bimbisārena ye samaṇesu sakyaputtiyesu
pabbajanti na te labbhā kiñci kātuṁ svākkhāto dhammo carantu
brahmacariyaṁ sammā dukkhassa antakiriyāyāti. Manussā ujjhāyanti
khīyanti vipācenti abhayūvarā ime samaṇā sakyaputtiyā
nayime labbhā kiñci kātuṁ kathaṁ hi nāma [1]- likhitakaṁ coraṁ
pabbājessantīti. Bhagavato etamatthaṁ ārocesuṁ. Na bhikkhave likhitako
coro pabbājetabbo yo pabbājeyya āpatti dukkaṭassāti.

[106] Tena kho pana samayena aññataro puriso kasāhato
katadaṇḍakammo bhikkhūsu pabbajito hoti. Manussā ujjhāyanti
khīyanti vipācenti kathaṁ hi nāma samaṇā sakyaputtiyā kasāhataṁ
katadaṇḍakammaṁ pabbājessantīti. Bhagavato etamatthaṁ ārocesuṁ.
1 Ma. samaṇā sakyaputtiyā. ito paraṁ īdisaṭṭhāne evaṁ ñātabbaṁ.
Na bhikkhave kasāhato katadaṇḍakammo pabbājetabbo yo
pabbājeyya āpatti dukkaṭassāti.

[107] Tena kho pana samayena aññataro puriso lakkhaṇāhato
katadaṇḍakammo bhikkhūsu pabbajito hoti. Manussā ujjhāyanti
khīyanti vipācenti kathaṁ hi nāma samaṇā sakyaputtiyā lakkhaṇāhataṁ
katadaṇḍakammaṁ pabbājessantīti. Bhagavato etamatthaṁ ārocesuṁ.
Na bhikkhave lakkhaṇāhato katadaṇḍakammo pabbājetabbo yo
pabbājeyya āpatti dukkaṭassāti.

[108] Tena kho pana samayena aññataro [1]- iṇāyiko palāyitvā
bhikkhūsu pabbajito hoti. Dhaniyā passitvā evamāhaṁsu ayaṁ
so amhākaṁ iṇāyiko handa naṁ nemāti. Ekacce evamāhaṁsu
māyyā evaṁ avacuttha anuññātaṁ raññā māgadhena seniyena
bimbisārena ye samaṇesu sakyaputtiyesu pabbajanti na te
labbhā kiñci kātuṁ svākkhāto dhammo carantu brahmacariyaṁ
sammā dukkhassa antakiriyāyāti. Manussā ujjhāyanti khīyanti
vipācenti abhayūvarā ime samaṇā sakyaputtiyā nayime labbhā
kiñci kātuṁ kathaṁ hi nāma iṇāyikaṁ pabbājessantīti. Bhagavato
etamatthaṁ ārocesuṁ. Na bhikkhave iṇāyiko pabbājetabbo
yo pabbājeyya āpatti dukkaṭassāti.

[109] Tena kho pana samayena aññataro dāso palāyitvā
1 Ma. Yu. puriso.
Bhikkhūsu pabbajito hoti. Ayyikā 1 passitvā evamāhaṁsu ayaṁ
so amhākaṁ dāso handa naṁ nemāti. Ekacce evamāhaṁsu
māyyā evaṁ avacuttha anuññātaṁ raññā māgadhena seniyena
bimbisārena ye samaṇesu sakyaputtiyesu pabbajanti na te labbhā
kiñci kātuṁ svākkhāto dhammo carantu brahmacariyaṁ sammā
dukkhassa antakiriyāyāti. Manussā ujjhāyanti khīyanti vipācenti
abhayūvarā ime samaṇā sakyaputtiyā nayime labbhā kiñci
kātuṁ kathaṁ hi nāma dāsaṁ pabbājessantīti. Bhagavato etamatthaṁ
ārocesuṁ. Na bhikkhave dāso pabbājetabbo yo pabbājeyya
āpatti dukkaṭassāti.

[110] Tena kho pana samayena aññataro kammārabhaṇḍu
mātāpitūhi saddhiṁ bhaṇḍitvā ārāmaṁ gantvā bhikkhūsu pabbajito
hoti. Athakho tassa kammārabhaṇḍussa mātāpitaro taṁ kammārabhaṇḍuṁ
vicinantā ārāmaṁ gantvā bhikkhū pucchiṁsu api bhante evarūpaṁ
dārakaṁ passeyyāthāti. Bhikkhū ajānantāyeva āhaṁsu na jānāmāti
apassantāyeva āhaṁsu na passāmāti. Athakho tassa kammārabhaṇḍussa
mātāpitaro taṁ kammārabhaṇḍuṁ vicinantā bhikkhūsu pabbajitaṁ
disvā ujjhāyanti khīyanti vipācenti alajjino ime samaṇā
sakyaputtiyā dussīlā musāvādino jānantāyeva āhaṁsu na
jānāmāti passantāyeva āhaṁsu na passāmāti ayaṁ dārako
1 Ma. ayyakā.
Bhikkhūsu pabbajitoti. Assosuṁ kho bhikkhū tassa kammārabhaṇḍussa
mātāpitūnaṁ ujjhāyantānaṁ khīyantānaṁ vipācentānaṁ. Athakho te
bhikkhū bhagavato etamatthaṁ ārocesuṁ. Anujānāmi bhikkhave saṅghaṁ
apaloketuṁ bhaṇḍukammāyāti.

[111] Tena kho pana samayena rājagahe sattarasavaggiyā dārakā
sahāyakā honti upāli dārako tesaṁ pāmokkho hoti.
Athakho upālissa mātāpitūnaṁ etadahosi kena nu kho upāyena
upāli amhākaṁ accayena sukhañca jīveyya na ca kilameyyāti.
Athakho upālissa mātāpitūnaṁ etadahosi sace kho upāli lekhaṁ
sikkheyya evaṁ kho upāli amhākaṁ accayena sukhañca jīveyya
na ca kilameyyāti. Athakho upālissa mātāpitūnaṁ etadahosi
sace kho upāli lekhaṁ sikkhissati aṅguliyo dukkhā bhavissanti
sace kho upāli gaṇanaṁ sikkheyya evaṁ kho upāli amhākaṁ
accayena sukhañca jīveyya na ca kilameyyāti. Athakho upālissa
mātāpitūnaṁ etadahosi sace kho upāli gaṇanaṁ sikkhissati
urassa dukkho bhavissati sace kho upāli rūpaṁ sikkheyya evaṁ
kho upāli amhākaṁ accayena sukhañca jīveyya na ca kilameyyāti.
Athakho upālissa mātāpitūnaṁ etadahosi sace kho upāli rūpaṁ
sikkhissati akkhīni dukkhāni bhavissanti ime kho samaṇā sakyaputtiyā
sukhasīlā sukhasamācārā subhojanāni bhuñjitvā nīvātesu sayanesu
Sayanti sace kho upāli samaṇesu sakyaputtiyesu pabbajeyya evaṁ
kho upāli amhākaṁ accayena sukhañca jīveyya na ca kilameyyāti.
Assosi kho upāli dārako mātāpitūnaṁ imaṁ kathāsallāpaṁ.
Athakho upāli dārako yena te dārakā tenupasaṅkami
upasaṅkamitvā te dārake etadavoca etha mayaṁ ayyā 1 samaṇesu
sakyaputtiyesu pabbajissāmāti. Sace kho tvaṁ ayya 2 pabbajissasi
evaṁ mayampi pabbajissāmāti. Athakho te dārakā ekamekassa
mātāpitaro upasaṅkamitvā etadavocuṁ anujānātha maṁ agārasmā
anagāriyaṁ pabbajjāyāti. Athakho tesaṁ dārakānaṁ mātāpitaro
sabbepime dārakā samānacchandā kalyāṇādhippāyāti anujāniṁsu.
Te bhikkhū upasaṅkamitvā pabbajjaṁ yāciṁsu. Te bhikkhū pabbājesuṁ
upasampādesuṁ. Te rattiyā paccūsasamayaṁ paccuṭṭhāya rodanti
yāguṁ detha bhattaṁ detha khādanīyaṁ dethāti. Bhikkhū evamāhaṁsu
āgametha āvuso yāva [3]- vibhāyati sace yāgu bhavissati pivissatha
sace bhattaṁ bhavissati bhuñjissatha sace khādanīyaṁ bhavissati
khādissatha no ce bhavissati yāgu vā bhattaṁ vā khādanīyaṁ vā
piṇḍāya caritvā bhuñjissathāti. Evampi kho te bhikkhū bhikkhūhi
vuccamānā rodanteva 4 yāguṁ detha bhattaṁ detha khādanīyaṁ dethāti
senāsanaṁ ūhadantipi ummihantipi. Assosi kho bhagavā rattiyā
1-2 sabbattha ayyoti dissati. 3 Ma. ratti. 4 Ma. rodantiyeva.
Paccūsasamayaṁ paccuṭṭhāya dārakasaddaṁ sutvāna āyasmantaṁ ānandaṁ
āmantesi kinnu kho so ānanda dārakasaddoti. Athakho āyasmā
ānando bhagavato etamatthaṁ ārocesi. Saccaṁ kira bhikkhave bhikkhū
jānaṁ ūnavīsativassaṁ puggalaṁ upasampādentīti. Saccaṁ bhagavāti. Vigarahi
buddho bhagavā kathaṁ hi nāma te bhikkhave moghapurisā jānaṁ
ūnavīsativassaṁ puggalaṁ upasampādessanti ūnavīsativasso bhikkhave
puggalo akkhamo hoti sītassa uṇhassa jighacchāya pipāsāya
ḍaṁsamakasavātātapasiriṁsapasamphassānaṁ duruttānaṁ durāgatānaṁ vacanapathānaṁ
uppannānaṁ sārīrikānaṁ vedanānaṁ dukkhānaṁ tibbānaṁ kharānaṁ kaṭukānaṁ
asātānaṁ amanāpānaṁ pāṇaharānaṁ anadhivāsakajātiko hoti vīsativasso
ca kho bhikkhave puggalo khamo hoti sītassa uṇhassa jighacchāya
pipāsāya ḍaṁsamakasavātātapasiriṁsapasamphassānaṁ duruttānaṁ durāgatānaṁ
vacanapathānaṁ uppannānaṁ sārīrikānaṁ vedanānaṁ dukkhānaṁ tibbānaṁ
kharānaṁ kaṭukānaṁ asātānaṁ amanāpānaṁ pāṇaharānaṁ adhivāsakajātiko
hoti netaṁ bhikkhave appasannānaṁ vā pasādāya pasannānaṁ vā
bhiyyobhāvāya .pe. Vigarahitvā dhammiṁ kathaṁ katvā bhikkhū āmantesi
na bhikkhave jānaṁ ūnavīsativasso puggalo upasampādetabbo yo
upasampādeyya yathādhammo kāretabboti.

[112] Tena kho pana samayena aññataraṁ kulaṁ ahivātakarogena
kālakataṁ hoti. Tassa pitāputtakā sesā honti. Te bhikkhūsu
1 Po. onavīsativassaṁ.
Pabbajitvā ekato va piṇḍāya caranti. Athakho so dārako
pituno bhikkhāya dinnāya upadhāvitvā etadavoca mayhampi tāta
dehi mayhampi tāta dehīti. Manussā ujjhāyanti khīyanti
vipācenti abrahmacārino ime samaṇā sakyaputtiyā ayaṁ
dārako bhikkhuniyā jātoti. Assosuṁ kho bhikkhū tesaṁ manussānaṁ
ujjhāyantānaṁ khīyantānaṁ vipācentānaṁ. Athakho te bhikkhū bhagavato
etamatthaṁ ārocesuṁ. Na bhikkhave ūnapaṇṇarasavasso dārako
pabbājetabbo yo pabbājeyya āpatti dukkaṭassāti.

[113] Tena kho pana samayena āyasmato ānandassa upaṭṭhākakulaṁ
saddhaṁ pasannaṁ ahivātakarogena kālakataṁ hoti. Dve ca dārakā
sesā honti. Te porāṇakena āciṇṇakappena bhikkhū
passitvā upadhāvanti. Bhikkhū apasādenti. Te bhikkhūhi
apasādiyamānā rodanti. Athakho āyasmato ānandassa etadahosi
bhagavatā paññattaṁ na ūnapaṇṇarasavasso dārako pabbājetabboti
ime ca dārakā ūnapaṇṇarasavassā kena nu kho upāyena ime
dārakā na vinasseyyunti. Athakho āyasmā ānando bhagavato
etamatthaṁ ārocesi. Ussahanti pana te ānanda dārakā kāke
uḍḍepetunti 1 . Ussahanti bhagavāti. Athakho bhagavā etasmiṁ nidāne
etasmiṁ pakaraṇe dhammiṁ kathaṁ katvā bhikkhū āmantesi anujānāmi
bhikkhave ūnapaṇṇarasavassaṁ dārakaṁ kākuḍḍepakaṁ 2 pabbājetunti.
1 Ma. uḍḍāpetunti. Yu. uṭṭepetunti. 2 Yu. kākuṭṭepakaṁ.

[114] Tena kho pana samayena āyasmato upanandassa sakyaputtassa
dve sāmaṇerā honti kaṇṭako ca mahako ca. Te aññamaññaṁ
dūsesuṁ. Bhikkhū ujjhāyanti khīyanti vipācenti kathaṁ hi nāma
sāmaṇerā evarūpaṁ anācāraṁ ācarissantīti. Bhagavato etamatthaṁ
ārocesuṁ. Na bhikkhave ekena dve sāmaṇerā upaṭṭhāpetabbā
yo upaṭṭhāpeyya āpatti dukkaṭassāti.