[65] Athakho āyasmā assaji sārīputtassa paribbājakassa
imaṁ dhammapariyāyaṁ abhāsi
ye dhammā hetuppabhavā tesaṁ hetuṁ tathāgato (āha)
tesañca yo nirodho evaṁvādī mahāsamaṇoti.

[66] Athakho sārīputtassa paribbājakassa imaṁ dhammapariyāyaṁ sutvā
virajaṁ vītamalaṁ dhammacakkhuṁ udapādi yaṅkiñci samudayadhammaṁ sabbantaṁ
nirodhadhammanti.
Eseva dhammo yadi tāvadeva paccabyathā 1 padamasokaṁ
adiṭṭhaṁ abbhatītaṁ bahukehi kappanahutehīti.

[67] Athakho sārīputto paribbājako yena moggallāno
paribbājako tenupasaṅkami. Addasā kho moggallāno paribbājako
sārīputtaṁ paribbājakaṁ dūrato va āgacchantaṁ disvāna
sārīputtaṁ paribbājakaṁ etadavoca vippasannāni kho te āvuso
indriyāni parisuddho chavivaṇṇo pariyodāto kacci nu 2 tvaṁ
āvuso amatamadhigatoti. Āma āvuso amatamadhigatoti. Yathā
kathaṁ pana tvaṁ āvuso amatamadhigatoti. Idhāhaṁ āvuso addasaṁ
1 Ma. paccabyattha. ito paraṁ īdisameva. 2 Ma. no.
Assajiṁ bhikkhuṁ rājagahe piṇḍāya carantaṁ pāsādikena abhikkantena
paṭikkantena ālokitena vilokitena sammiñjitena pasāritena okkhittacakkhuṁ
iriyāpathasampannaṁ disvāna me etadahosi ye vata loke
arahanto vā arahattamaggaṁ vā samāpannā ayaṁ tesaṁ bhikkhu 1
aññataro yannūnāhaṁ imaṁ bhikkhuṁ upasaṅkamitvā puccheyyaṁ kaṁsi
tvaṁ āvuso uddissa pabbajito ko vā te satthā kassa
vā tvaṁ dhammaṁ rocesīti tassa mayhaṁ āvuso etadahosi
akālo kho imaṁ bhikkhuṁ pucchituṁ antaragharaṁ paviṭṭho piṇḍāya
carati yannūnāhaṁ imaṁ bhikkhuṁ piṭṭhito piṭṭhito anubandheyyaṁ
atthikehi upaññātaṁ magganti athakho āvuso assaji bhikkhu
rājagahe piṇḍāya caritvā piṇḍapātaṁ ādāya paṭikkami athakhvāhaṁ
āvuso yena assaji bhikkhu tenupasaṅkamiṁ upasaṅkamitvā
assajinā bhikkhunā saddhiṁ sammodiṁ sammodanīyaṁ kathaṁ sārāṇīyaṁ
vītisāretvā ekamantaṁ aṭṭhāsiṁ ekamantaṁ ṭhito kho ahaṁ āvuso
assajiṁ bhikkhuṁ etadavocaṁ vippasannāni kho te āvuso indriyāni
parisuddho chavivaṇṇo pariyodāto kaṁsi tvaṁ āvuso uddissa
pabbajito ko vā te satthā kassa vā tvaṁ dhammaṁ rocesīti
atthāvuso mahāsamaṇo sakyaputto sakyakulā pabbajito tāhaṁ
bhagavantaṁ uddissa pabbajito so ca me bhagavā satthā tassa
cāhaṁ bhagavato dhammaṁ rocemīti kiṁvādī panāyasmato satthā
1 Yu. bhikkhūnaṁ.
Kimakkhāyīti ahaṁ kho āvuso navo acirapabbajito adhunāgato
imaṁ dhammavinayaṁ na tāhaṁ sakkomi vitthārena dhammaṁ desetuṁ
apica te saṅkhittena atthaṁ vakkhāmīti
appaṁ vā bahuṁ vā bhāsassu atthaṁyeva me brūhi
attheneva me attho kiṁ kāhasi byañjanaṁ bahunti.

[68] Athakho āvuso assaji bhikkhu imaṁ dhammapariyāyaṁ abhāsi
ye dhammā hetuppabhavā tesaṁ hetuṁ tathāgato (āha)
tesañca yo nirodho evaṁvādī mahāsamaṇoti.

[69] Athakho moggallānassa paribbājakassa imaṁ dhammapariyāyaṁ
sutvā virajaṁ vītamalaṁ dhammacakkhuṁ udapādi yaṅkiñci samudayadhammaṁ
sabbantaṁ nirodhadhammanti.
Eseva dhammo yadi tāvadeva paccabyathā padamasokaṁ
adiṭṭhaṁ abbhatītaṁ bahukehi kappanahutehīti.

[70] Athakho moggallāno paribbājako sārīputtaṁ paribbājakaṁ
etadavoca gacchāma mayaṁ āvuso bhagavato santike so no bhagavā
satthāti. Imāni kho āvuso aḍḍhateyyāni paribbājakasatāni amhe
nissāya amhe sampassantā idha viharanti tepi tāva apalokema 1
yathā te maññissanti tathā [2]- karissantīti. Athakho sārīputtamoggallānā
yena te paribbājakā tenupasaṅkamiṁsu upasaṅkamitvā
1 Sī. Yu. apalokāma. 2 Ma. te.
Te paribbājake etadavocuṁ gacchāma mayaṁ āvuso bhagavato
santike so no bhagavā satthāti. Mayaṁ āyasmante nissāya
āyasmante sampassantā idha viharāma sace āyasmantā
mahāsamaṇe brahmacariyaṁ carissanti sabbe va mayaṁ mahāsamaṇe
brahmacariyaṁ carissāmāti. Athakho sārīputtamoggallānā yena
sañjayo paribbājako tenupasaṅkamiṁsu upasaṅkamitvā sañjayaṁ
paribbājakaṁ etadavocuṁ gacchāma mayaṁ āvuso bhagavato santike
so no bhagavā satthāti. Alaṁ āvuso mā gamittha sabbe va
tayo imaṁ gaṇaṁ pariharissāmāti. Dutiyampi kho .pe. Tatiyampi
kho sārīputtamoggallānā sañjayaṁ paribbājakaṁ etadavocuṁ gacchāma
mayaṁ āvuso bhagavato santike so no bhagavā satthāti. Alaṁ
āvuso mā gamittha sabbe va tayo imaṁ gaṇaṁ pariharissāmāti.
Athakho sārīputtamoggallānā tāni aḍḍhateyyāni paribbājakasatāni
ādāya yena veḷuvanaṁ tenupasaṅkamiṁsu. Sañjayassa pana
paribbājakassa tattheva uṇhaṁ lohitaṁ mukhato uggacchi 1

[71] Addasā kho bhagavā sārīputtamoggallāne dūrato va
āgacchante disvāna bhikkhū āmantesi ete bhikkhave dve
sahāyā āgacchanti kolito upatisso ca etaṁ me sāvakayugaṁ
bhavissati aggaṁ bhaddayuganti.
1 uggañchītipi pāṭho.
Gambhīre ñāṇavisaye anuttare upadhisaṅkhaye
vimutte appatte veḷuvanaṁ atha ne satthā byākāsi
ete dve sahāyā āgacchanti kolito upatisso ca.
Etaṁ me sāvakayugaṁ bhavissati aggaṁ bhaddayuganti.

[72] Athakho sārīputtamoggallānā yena bhagavā tenupasaṅkamiṁsu
upasaṅkamitvā bhagavato pādesu sirasā nipatitvā bhagavantaṁ
etadavocuṁ labheyyāma mayaṁ bhante bhagavato santike pabbajjaṁ
labheyyāma upasampadanti. Etha bhikkhavoti bhagavā avoca svākkhāto
dhammo caratha brahmacariyaṁ sammā dukkhassa antakiriyāyāti.
Sā va tesaṁ āyasmantānaṁ upasampadā ahosi.

[73] Tena kho pana samayena abhiññātā abhiññātā māgadhikā
kulaputtā bhagavati brahmacariyaṁ caranti. Manussā ujjhāyanti
khīyanti vipācenti aputtakatāya paṭipanno samaṇo gotamo
vedhabyāya paṭipanno samaṇo gotamo kulupacchedāya paṭipanno
samaṇo gotamo idāni tena 1 jaṭilasahassaṁ pabbājitaṁ imāni
ca aḍḍhateyyāni paribbājakasatāni sañjayāni pabbājitāni ime
ca abhiññātā abhiññātā māgadhikā kulaputtā samaṇe gotame
brahmacariyaṁ carantīti. Apissu bhikkhū disvā imāya gāthāya
codenti
1 Ma. Yu. anena.
Āgato kho mahāsamaṇo māgadhānaṁ giribbajaṁ
sabbe sañjaye netvāna kaṁsudāni nayissatīti.

[74] Assosuṁ kho bhikkhū tesaṁ manussānaṁ ujjhāyantānaṁ khīyantānaṁ
vipācentānaṁ. Athakho te bhikkhū bhagavato etamatthaṁ ārocesuṁ.
Na bhikkhave so saddo ciraṁ bhavissati sattāhameva bhavissati
sattāhassa accayena antaradhāyissati tenahi bhikkhave ye tumhe
imāya gāthāya codenti
āgato kho mahāsamaṇo māgadhānaṁ giribbajaṁ
sabbe sañjaye netvāna kaṁsudāni nayissatīti.