[45] Athakho uruvelakassapo jaṭilo tassā rattiyā accayena
yena bhagavā tenupasaṅkami upasaṅkamitvā bhagavato kālaṁ ārocesi
kālo mahāsamaṇa niṭṭhitaṁ bhattanti. Gaccha tvaṁ kassapa
āyāmahanti. Uruvelakassapaṁ jaṭilaṁ uyyojetvā yāya jambuyā 1
jambudīpo paññāyati tato phalaṁ gahetvā paṭhamataraṁ āgantvā
agyāgāre nisīdi. Addasā kho uruvelakassapo jaṭilo bhagavantaṁ
agyāgāre nisinnaṁ disvāna bhagavantaṁ etadavoca katamena tvaṁ
mahāsamaṇa maggena āgato ahaṁ tayā paṭhamataraṁ pakkanto
so tvaṁ paṭhamataraṁ āgantvā agyāgāre nisinnoti. Idhāhaṁ
kassapa taṁ uyyojetvā yāya jambuyā jambudīpo paññāyati
tato phalaṁ gahetvā paṭhamataraṁ āgantvā agyāgāre nisinno
idaṁ kho kassapa jambuphalaṁ vaṇṇasampannaṁ gandhasampannaṁ rasasampannaṁ
sace ākaṅkhasi paribhuñjāti. Alaṁ mahāsamaṇa tvaṁyevetaṁ 2
1 Yu. jambuyāyaṁ. ito paraṁ īdisameva. 2 Ma. tvaṁyeva taṁ.
Āharasi tvaṁyevetaṁ paribhuñjāti 1 . Athakho uruvelakassapassa
jaṭilassa etadahosi mahiddhiko kho mahāsamaṇo mahānubhāvo
yatra hi nāma maṁ paṭhamataraṁ uyyojetvā yāya jambuyā jambudīpo
paññāyati tato phalaṁ gahetvā paṭhamataraṁ āgantvā agyāgāre
nisīdissati na tveva ca kho arahā yathā ahanti. Athakho
bhagavā uruvelakassapassa jaṭilassa bhattaṁ bhuñjitvā tasmiṁyeva
vanasaṇḍe vihāsi. Athakho uruvelakassapo jaṭilo tassā rattiyā
accayena yena bhagavā tenupasaṅkami upasaṅkamitvā bhagavato
kālaṁ ārocesi kālo mahāsamaṇa niṭṭhitaṁ bhattanti. Gaccha
tvaṁ kassapa āyāmahanti uruvelakassapaṁ jaṭilaṁ uyyojetvā
yāya jambuyā jambudīpo paññāyati tassā avidūre ambo
.pe. Tassā avidūre āmalakī .pe. Tassā avidūre harītakī
.pe. Tāvatiṁsaṁ gantvā pāricchattakapupphaṁ gahetvā paṭhamataraṁ
āgantvā agyāgāre nisīdi. Addasā kho uruvelakassapo jaṭilo
bhagavantaṁ agyāgāre nisinnaṁ disvāna bhagavantaṁ etadavoca katamena
tvaṁ mahāsamaṇa maggena āgato ahaṁ tayā paṭhamataraṁ pakkanto
so tvaṁ paṭhamataraṁ āgantvā agyāgāre nisinnoti. Idhāhaṁ
kassapa taṁ uyyojetvā tāvatiṁsaṁ gantvā pāricchattakapupphaṁ gahetvā
paṭhamataraṁ āgantvā agyāgāre nisinno idaṁ kho kassapa
1 Yu. paribhuñjāhīti.
Pāricchattakapupphaṁ vaṇṇasampannaṁ gandhasampannanti 1 . Athakho
uruvelakassapassa jaṭilassa etadahosi mahiddhiko kho mahāsamaṇo
mahānubhāvo yatra hi nāma maṁ paṭhamataraṁ uyyojetvā tāvatiṁsaṁ
gantvā pāricchattakapupphaṁ gahetvā paṭhamataraṁ āgantvā agyāgāre
nisīdissati na tveva ca kho arahā yathā ahanti.

[46] Tena kho pana samayena te jaṭilā aggī paricaritukāmā
na sakkonti kaṭṭhāni phāletuṁ. Athakho tesaṁ jaṭilānaṁ etadahosi
nissaṁsayaṁ kho mahāsamaṇassa iddhānubhāvo yathā mayaṁ na sakkoma
kaṭṭhāni phāletunti. Athakho bhagavā uruvelakassapaṁ jaṭilaṁ etadavoca
phāliyantu kassapa kaṭṭhānīti. Phāliyantu mahāsamaṇāti. Sakideva
pañca kaṭṭhasatāni phāliyiṁsu. Athakho uruvelakassapassa jaṭilassa
etadahosi mahiddhiko kho mahāsamaṇo mahānubhāvo yatra hi
nāma kaṭṭhānipi phāliyissanti na tveva ca kho arahā yathā
ahanti.

[47] Tena kho pana samayena te jaṭilā aggī paricaritukāmā
na sakkonti aggī ujjaletuṁ 2 . Athakho tesaṁ jaṭilānaṁ etadahosi
nissaṁsayaṁ kho mahāsamaṇassa iddhānubhāvo yathā mayaṁ na sakkoma
1 Yu. idaṁ kho kassapa pāricchattakapupphaṁ vaṇṇasampannaṁ gandhasampannaṁ sace ākaṅkhasi
gaṇhāti. alaṁ mahāsamaṇa tvaṁyevetaṁ āharasi tvaṁyevetaṁ gaṇhātīti dissati.
2 Sī. jāletuṁ.
Aggī ujjaletunti 1 . Athakho bhagavā uruvelakassapaṁ jaṭilaṁ etadavoca
ujjaliyantu kassapa aggīti. Ujjaliyantu mahāsamaṇāti. Sakideva
pañca aggisatāni ujjaliṁsu 2 . Athakho uruvelakassapassa jaṭilassa
etadahosi mahiddhiko kho mahāsamaṇo mahānubhāvo yatra hi
nāma aggīpi ujjaliyissanti na tveva ca kho arahā yathā ahanti.

[48] Tena kho pana samayena te jaṭilā aggī paricaritvā na
sakkonti aggī vijjhāpetuṁ. Athakho tesaṁ jaṭilānaṁ etadahosi
nissaṁsayaṁ kho mahāsamaṇassa iddhānubhāvo yathā mayaṁ na sakkoma
aggī vijjhāpetunti. Athakho bhagavā uruvelakassapaṁ jaṭilaṁ etadavoca
vijjhāyantu kassapa aggīti. Vijjhāyantu mahāsamaṇāti. Sakideva
pañca aggisatāni vijjhāyiṁsu. Athakho uruvelakassapassa jaṭilassa
etadahosi mahiddhiko kho mahāsamaṇo mahānubhāvo yatra hi
nāma aggīpi vijjhāyissanti na tveva ca kho arahā yathā
ahanti.

[49] Tena kho pana samayena te jaṭilā sītāsu hemantikāsu
rattīsu antaraṭṭhakāsu himapātasamaye najjā nerañjarāyaṁ nimujjantipi 3
ummujjantipi ummujjanimujjampi karonti. Athakho bhagavā
pañcamattāni mandāmukhisatāni abhinimmini yattha te jaṭilā
uttaritvā visibbesuṁ. Athakho tesaṁ jaṭilānaṁ etadahosi nissaṁsayaṁ
1 Sī. jāletunti. 2 Ma. ujjaliyiṁsu. 3 Ma. ummujjantipi nimujjantipi
ummujjananimujjanaṁpi.
Kho mahāsamaṇassa iddhānubhāvo yathāyimā 1 mandāmukhiyo nimmitāti.
Athakho uruvelakassapassa jaṭilassa etadahosi mahiddhiko kho
mahāsamaṇo mahānubhāvo yatra hi nāma tāvabahū mandāmukhiyopi 2
abhinimminissati na tveva ca kho arahā yathā ahanti.

[50] Tena kho pana samayena mahāakālamegho pāvassi
mahāudakavāhako sañjāyi. Yasmiṁ padese bhagavā viharati so padeso
udakena otthato 3 hoti. Athakho bhagavato etadahosi yannūnāhaṁ
samantā udakaṁ ussādetvā 4 majjhe reṇuhatāya bhūmiyā caṅkameyyanti.
Athakho bhagavā samantā udakaṁ ussādetvā majjhe reṇuhatāya
bhūmiyā caṅkami. Athakho uruvelakassapo jaṭilo mā heva
kho mahāsamaṇo udakena vuḷho ahosīti. Nāvāya sambahulehi
jaṭilehi saddhiṁ yasmiṁ padese bhagavā viharati taṁ padesaṁ agamāsi.
Addasā kho uruvelakassapo jaṭilo bhagavantaṁ samantā udakaṁ
ussādetvā majjhe reṇuhatāya bhūmiyā caṅkamantaṁ disvāna
bhagavantaṁ etadavoca idha nu tvaṁ mahāsamaṇāti. Āma ahamasmi 5
kassapāti bhagavā vehāsaṁ abbhuggantvā nāvāya paccuṭṭhāsi.
Athakho uruvelakassapassa jaṭilassa etadahosi mahiddhiko kho
mahāsamaṇo mahānubhāvo yatra hi nāma udakaṁpi nappavāhissati 6
1 Ma. yathayimā. Yu. yathāhimā. 2 Yu. mahāmandāmukhiyo.
3 Ma. na otthaṭo. Yu. anuotthaṭo. 4 Ma. Yu. ussāretvā.
5 Sī. Ma. Yu. ayamahamasmi. 6 Sī. nappasahissati. Yu. na pavahisusati.
Na tveva ca kho arahā yathā ahanti.

[51] Athakho bhagavato etadahosi ciraṁpi kho imassa moghapurisassa
evaṁ bhavissati mahiddhiko kho mahāsamaṇo mahānubhāvo
na tveva ca kho arahā yathā ahanti yannūnāhaṁ imaṁ jaṭilaṁ
saṁvejeyyanti. Athakho bhagavā uruvelakassapaṁ jaṭilaṁ etadavoca
neva 1 kho tvaṁ kassapa arahā nāpi arahattamaggaṁ samāpanno
sāpi te paṭipadā natthi yāya tvaṁ arahā vā assasi 2 arahattamaggaṁ
vā samāpannoti. Athakho uruvelakassapo jaṭilo bhagavato pādesu
sirasā nipatitvā bhagavantaṁ etadavoca labheyyāmahaṁ bhante bhagavato
santike pabbajjaṁ labheyyāmi upasampadanti. Tvaṁ khosi kassapa
pañcannaṁ jaṭilasatānaṁ nāyako vināyako aggo pamukho pāmokkho
tepi tāva apalokehi yathā te maññissanti tathā karissantīti.
Athakho uruvelakassapo jaṭilo yena te jaṭilā tenupasaṅkami
upasaṅkamitvā te jaṭile etadavoca icchāmahaṁ bho mahāsamaṇe
brahmacariyaṁ carituṁ yathā bhavanto maññanti tathā karontūti.
Cirapaṭikā mayaṁ bho mahāsamaṇe abhippasannā sace bhavaṁ mahāsamaṇe
brahmacariyaṁ carissati sabbe va mayaṁ mahāsamaṇe brahmacariyaṁ
carissāmāti. Athakho te jaṭilā kesamissaṁ jaṭāmissaṁ khārikājamissaṁ
aggihuttamissaṁ udake pavāhetvā yena bhagavā tenupasaṅkamiṁsu
upasaṅkamitvā bhagavato pādesu sirasā nipatitvā bhagavantaṁ etadavocuṁ
1 Ma. neva ca kho .... 2 Yu. assa.
Labheyyāma mayaṁ bhante bhagavato santike pabbajjaṁ labheyyāma
upasampadanti. Etha bhikkhavoti bhagavā avoca svākkhāto
dhammo caratha brahmacariyaṁ sammā dukkhassa antakiriyāyāti.
Sā va tesaṁ āyasmantānaṁ upasampadā ahosi.

[52] Addasā kho nadīkassapo jaṭilo kesamissaṁ jaṭāmissaṁ
khārikājamissaṁ aggihuttamissaṁ udake vuyhamāne. Disvānassa
etadahosi mā heva me bhātuno upasaggo ahosīti. Jaṭile
pāhesi gacchatha me bhātaraṁ jānāthāti sāmañca tīhi jaṭilasatehi
saddhiṁ yenāyasmā uruvelakassapo tenupasaṅkami upasaṅkamitvā
āyasmantaṁ uruvelakassapaṁ etadavoca idaṁ nu kho kassapa seyyoti.
Āmāvuso idaṁ seyyoti. Athakho te jaṭilā kesamissaṁ jaṭāmissaṁ
khārikājamissaṁ aggihuttamissaṁ udake pavāhetvā yena bhagavā
tenupasaṅkamiṁsu upasaṅkamitvā bhagavato pādesu sirasā nipatitvā
bhagavantaṁ etadavocuṁ labheyyāma mayaṁ bhante bhagavato santike
pabbajjaṁ labheyyāma upasampadanti. Etha bhikkhavoti bhagavā
avoca svākkhāto dhammo caratha brahmacariyaṁ sammā dukkhassa
antakiriyāyāti. Sā va tesaṁ āyasmantānaṁ upasampadā ahosi.

[53] Addasā kho gayākassapo jaṭilo kesamissaṁ jaṭāmissaṁ
khārikājamissaṁ aggihuttamissaṁ udake vuyhamāne. Disvānassa
etadahosi mā heva me bhātūnaṁ upasaggo ahosīti. Jaṭile
Pāhesi gacchatha me bhātaro jānāthāti sāmañca dvīhi
jaṭilasatehi [1]- yenāyasmā uruvelakassapo tenupasaṅkami upasaṅkamitvā
āyasmantaṁ uruvelakassapaṁ etadavoca idaṁ nu kho
kassapa seyyoti. Āmāvuso idaṁ seyyoti. Athakho te jaṭilā
kesamissaṁ jaṭāmissaṁ khārikājamissaṁ aggihuttamissaṁ udake pavāhetvā
yena bhagavā tenupasaṅkamiṁsu upasaṅkamitvā bhagavato pādesu
sirasā nipatitvā bhagavantaṁ etadavocuṁ labheyyāma mayaṁ bhante
bhagavato santike pabbajjaṁ labheyyāma upasampadanti. Etha bhikkhavoti
bhagavā avoca svākkhāto dhammo caratha brahmacariyaṁ sammā
dukkhassa antakiriyāyāti. Sā va tesaṁ āyasmantānaṁ upasampadā
ahosi.

[54] Bhagavato adhiṭṭhānena pañca kaṭṭhasatāni na phāliyiṁsu
phāliyiṁsu aggī na ujjaliṁsu ujjaliṁsu na vijjhāyiṁsu vijjhāyiṁsu
pañca mandāmukhisatāni abhinimmini. Etena nayena aḍḍhuḍḍhapāṭihāriyasahassāni
honti.