[956] Kiṁsū asissāmi 1 kuvaṁ vā asissaṁ
dukkhaṁ vata settha kuvajja sessaṁ
ete vitakke paridevaneyye
vinayetha sekkho aniketasārī 2 .

[957] Kiṁsū asissāmi kuvaṁ vā asissanti kiṁsū asissāmīti
kiṁ bhuñjissāmi odanaṁ vā kummāsaṁ vā sattuṁ vā macchaṁ vā maṁsaṁ
vāti kiṁsū asissāmi. Kuvaṁ vā asissanti kattha bhuñjissāmi
khattiyakule vā brāhmaṇakule vā vessakule vā suddakule vāti
kiṁsū asissāmi kuvaṁ vā asissaṁ.

[958] Dukkhaṁ vata settha kuvajja sessanti imaṁ rattiṁ dukkhaṁ
sayiṁ 3 phalake 4 vā taṭṭikāya vā cammakhaṇḍe vā tiṇasanthāre vā
paṇṇasanthāre vā palāsasanthāre vā āgamanarattiṁ 5 kattha sukhaṁ
sayissāmi mañce vā pīṭhe vā bhisiyā vā bibbohane vā vihāre
vā aḍḍhayoge vā pāsāde vā hammiyaṁ vā guhāya vāti
dukkhaṁ vata settha kuvajja sessaṁ.

[959] Ete vitakke paridevaneyyeti ete vitakketi dve
1 Ma. sabbattha asissaṁ kuva vā. 2 Ma. aniketacārī. 3 Ma. sayittha
4 Yu. saphalake. 5 Ma. āgāmirattiṁ.
Piṇḍapātapaṭisaññutte vitakke dve senāsanapaṭisaññutte vitakke
paridevaneyye 1 ādevaneyya paridevaneyyāti ete vitakke
paridevaneyye.

[960] Vinayetha sekkho aniketasārīti sekkhoti kiṁkāraṇā
vuccati sekkho. Sikkhatīti sekkho. Kiñca sikkhati. Adhisīlampi
sikkhati adhicittampi sikkhati adhipaññampi sikkhati. Katamā
adhisīlasikkhā .pe. Ayaṁ adhipaññāsikkhā. Imā tisso sikkhā
āvajjento sikkhati jānanto sikkhati passanto sikkhati
paccavekkhanto sikkhati cittaṁ adhiṭṭhahanto sikkhati saddhāya
adhimuccanto sikkhati viriyaṁ paggaṇhanto sikkhati satiṁ upaṭṭhahanto
sikkhati cittaṁ samādahanto sikkhati paññāya pajānanto sikkhati
abhiññeyyaṁ abhijānanto sikkhati pariññeyyaṁ parijānanto sikkhati
pahātabbaṁ pajahanto sikkhati sacchikātabbaṁ sacchikaronto sikkhati
bhāvetabbaṁ bhāvento sikkhati ācarati samācarati samādāya sikkhati.
Taṁkāraṇā vuccati sekkho. Sekkho vinayāya paṭivinayāya pahānāya
vūpasamāya paṭinissaggāya paṭippassaddhiyā adhisīlampi sikkheyya
adhicittampi sikkheyya adhipaññampi sikkheyya imā tisso sikkhā
āvajjanto sikkheyya jānanto .pe. Sacchikātabbaṁ sacchikaronto
sikkheyya ācareyya samācareyya samādāya vatteyyāti vinayetha
sekkho.
1 Ma. paridevaneyyeti.

[961] Aniketasārīti kathaṁ niketasārī hoti. Idhekacco
kulapalibodhena samannāgato hoti gaṇapalibodhena āvāsapalibodhena
cīvarapalibodhena piṇḍapātapalibodhena senāsanapalibodhena gilānapaccaya-
bhesajjaparikkhārapalibodhena samannāgato hoti evaṁ niketasārī
hoti.
Kathaṁ aniketasārī hoti. Idha bhikkhu na kulapalibodhena
samannāgato hoti na gaṇa āvāsa cīvarapiṇḍapātasenāsanagilāna-
paccayabhesajjaparikkhārapalibodhena samannāgato hoti evaṁ aniketasārī
hoti.
Magadhaṁ gatā kosalaṁ gatā
ekacciyā [1]- vajjibhūmiyā
māgadhā 2 visaṅghacārino
aniketā viharanti bhikkhavo
sādhu caritaṁ 3 sādhu sucaritaṁ
sādhu sadā aniketavihāro
atthapucchanaṁ dakkhakammaṁ 4
etaṁ sāmaññaṁ ākiñcanassāti.
Vinayetha sekkho aniketasārī. Tenāha bhagavā
kiṁsū asissāmi kuvaṁ vā asissaṁ
dukkhaṁ vata settha kuvajja sessaṁ
1 Po. Ma. panasaddo dissati. 2 Ma. migā viya asaṅghacārino. 3 Ma. caritakaṁ.
4 Ma. padakkhiṇaṁ kammaṁ.
Ete vitakke paridevaneyye
vinayetha sekkho aniketasārīti.

[962] Annañca laddhā vasanañca kāle
mattaṁ so jaññā 1 idha tosanatthaṁ
so tesu gutto yatacāri gāme
rusitopi vācaṁ pharusaṁ na vajjā.

[963] Annañca laddhā vasanañca kāleti annanti odano
kummāso sattu maccho maṁsaṁ. Vasananti cha cīvarāni khomaṁ
kappāsikaṁ koseyyaṁ kambalaṁ sāṇaṁ bhaṅgaṁ. Annañca laddhā
vasanañca kāleti cīvaraṁ labhitvā piṇḍapātaṁ labhitvā na kuhanāya
na lapanāya na nemittikatāya na nippesikatāya na lābhena lābhaṁ
nijigiṁsanatāya na dārudānena na veḷudānena na pattadānena na
pupphadānena na phaladānena na sinānadānena na cuṇṇadānena na
mattikadānena na dantakaṭṭhadānena na mukhodakadānena na pātukamyatāya 2
na muggasūpatāya na pāribhaṭyatāya na pīṭhamaddikatāya na
vatthuvijjāya na tiracchānavijjāya na aṅgavijjāya na nakkhattavijjāya
na dūtagamanena na pahīnagamanena na jaṅghapesanena 3 na vejjakammena
na piṇḍakena 4 na dānānuppadānena dhammena samena laddhā labhitvā
abhivinditvā 5 paṭilabhitvāti annañca laddhā vasanañca kāle.

[964] Mattaṁ so jaññā idha tosanatthanti mattaṁ so
1 Ma. mattaṁ sa jaññā. 2 Ma. cātu ... 3 Ma. jaṅghapesanikena.
4 Ma. piṇḍapaṭipiṇḍakena. 5 Ma. adhigantvā vinditvā.
Jaññāti dvīhi kāraṇehi mattaṁ jānāti 1 paṭiggahaṇato vā
paribhogato vā.
Kathaṁ paṭiggahaṇato mattaṁ jānāti. Thokepi diyamāne
kulānudayāya kulānurakkhāya kulānukampāya paṭiggaṇhāti bahukepi
diyamāne kāyaparihārikaṁ cīvaraṁ paṭiggaṇhāti kucchiparihārikaṁ
piṇḍapātaṁ paṭiggaṇhāti evaṁ paṭiggahaṇato mattaṁ jānāti.
Kathaṁ paribhogato mattaṁ jānāti. Paṭisaṅkhā yoniso cīvaraṁ
paṭisevati yāvadeva sītassa paṭighātāya uṇhassa paṭighātāya
ḍaṁsamakasavātātapasiriṁsapasamphassānaṁ paṭighātāya yāvadeva hirikopinapaṭicchādanatthaṁ.
Paṭisaṅkhā yoniso piṇḍapātaṁ paṭisevati neva davāya
na madāya na maṇḍanāya na vibhūsanāya yāvadeva imassa kāyassa
ṭhitiyā yāpanāya vihiṁsuparatiyā brahmacariyānuggahāya iti purāṇañca
vedanaṁ paṭihaṅkhāmi navañca vedanaṁ na uppādessāmi yātrā
ca me bhavissati anavajjatā ca phāsuvihāro cāti. Paṭisaṅkhā
yoniso senāsanaṁ paṭisevati yāvadeva sītassa paṭighātāya uṇhassa
paṭighātāya ḍaṁsamakasavātātapasiriṁsapasamphassānaṁ paṭighātāya yāvadeva
utuparissayavinodanaṁ paṭisallānārāmatthaṁ. Paṭisaṅkhā yoniso gilāna-
paccayabhesajjaparikkhāraṁ paṭisevati yāvadeva uppannānaṁ veyyābādhikānaṁ 2
vedanānaṁ paṭighātāya abyāpajjhaparamatāya. Evaṁ paribhogato mattaṁ
jānāti.
1 Ma. jāneyya. 2 Ma. byābādhikānaṁ.
Mattaṁ so jaññāti imehi dvīhi kāraṇehi mattaṁ jāneyya
ājāneyya vijāneyya paṭivijāneyya paṭivijjheyyāti mattaṁ so
jaññā.

[965] Idha tosanatthanti idha bhikkhu santuṭṭho hoti
itarītarena cīvarena itarītaracīvarasantuṭṭhiyā ca vaṇṇavādī na ca
cīvarahetu anesanaṁ appaṭirūpaṁ āpajjati aladdhā ca cīvaraṁ na
paritassati laddhā ca cīvaraṁ agadhito amucchito anajjhāpanno
ādīnavadassāvī nissaraṇapañño paribhuñjati tāya ca pana
itarītaracīvarasantuṭṭhiyā nevattānukkaṁseti na paraṁ vambheti yo hi tattha
dakkho analaso sampajāno paṭissato ayaṁ vuccati bhikkhu porāṇe
aggaññe ariyavaṁse ṭhito. Punacaparaṁ bhikkhu santuṭṭho hoti
itarītarena piṇḍapātena itarītarapiṇḍapātasantuṭṭhiyā ca vaṇṇavādī
na ca piṇḍapātahetu anesanaṁ appaṭirūpaṁ āpajjati aladdhā
ca piṇḍapātaṁ na paritassati laddhā ca piṇḍapātaṁ agadhito
amucchito anajjhāpanno ādīnavadassāvī nissaraṇapañño paribhuñjati
tāya ca pana itarītarapiṇḍapātasantuṭṭhiyā nevattānukkaṁseti na paraṁ
vambheti yo hi tattha dakkho analaso sampajāno paṭissato
ayaṁ vuccati bhikkhu porāṇe aggaññe ariyavaṁse ṭhito. Punacaparaṁ
bhikkhu santuṭṭho hoti itarītarena senāsanena itarītarasenāsanasantuṭṭhiyā
ca vaṇṇavādī na ca senāsanahetu anesanaṁ appaṭirūpaṁ
Āpajjati aladdhā ca senāsanaṁ na paritassati laddhā ca senāsanaṁ
agadhito amucchito anajjhāpanno ādīnavadassāvī nissaraṇapañño
paribhuñjati tāya ca pana itarītarasenāsanasantuṭṭhiyā nevattānukkaṁseti
na paraṁ vambheti yo hi tattha dakkho analaso sampajāno
paṭissato ayaṁ vuccati bhikkhu porāṇe aggaññe ariyavaṁse ṭhito.
Punacaparaṁ bhikkhu santuṭṭho hoti itarītarena gilānapaccayabhesajjaparikkhārena
itarītaragilānapaccayabhesajjaparikkhārasantuṭṭhiyā ca vaṇṇavādī
na ca gilānapaccayabhesajjaparikkhārahetu anesanaṁ appaṭirūpaṁ
āpajjati aladdhā ca gilānapaccayabhesajjaparikkhāraṁ na paritassati
laddhā ca gilānapaccayabhesajjaparikkhāraṁ agadhito amucchito anajjhāpanno
ādīnavadassāvī nissaraṇapañño paribhuñjati tāya ca pana
itarītaragilānapaccayabhesajjaparikkhārasantuṭṭhiyā nevattānukkaṁseti na
paraṁ vambheti yo hi tattha dakkho analaso sampajāno paṭissato
ayaṁ vuccati bhikkhu porāṇe aggaññe ariyavaṁse ṭhitoti mattaṁ
so jaññā idha tosanatthaṁ.