[307] Pubbeva natthī yadidaṁ yudhāyāti pubbeva bodhiyā mūle
ye paṭisenikarā kilesā paṭilomakarā paṭikaṇṭakakarā paṭipakkhakarā
te natthi na santi na saṁvijjanti nupalabbhanti pahīnā samucchinnā
vūpasantā paṭippassaddhā abhabbuppattikā ñāṇagginā daḍḍhā.
1 Ma. atikkama.
Yadidaṁ yudhāyāti yadidaṁ yuddhatthāya kalahatthāya bhaṇḍanatthāya
viggahatthāya vivādatthāya medhagatthāyāti pubbeva natthī yadidaṁ
yudhāya. Tenāha bhagavā
sūro yathā rājakhadāya puṭṭho
abhigajjameti paṭisūramicchaṁ
yeneva so tena palehi sūra
pubbeva natthī yadidaṁ yudhāyāti.

[308] Ye diṭṭhimuggayha vivādayanti
idameva saccanti ca vādayanti
te tvaṁ vadassū na hi tedha atthi
vādamhi jāte paṭisenikattā.

[309] Ye diṭṭhimuggayha vivādayantīti ye dvāsaṭṭhiyā diṭṭhigatānaṁ
aññataraññataraṁ diṭṭhigataṁ gahetvā uggahitvā gaṇhitvā
parāmasitvā abhinivisitvā vivādayanti kalahaṁ karonti bhaṇḍanaṁ
karonti viggahaṁ karonti vivādaṁ karonti medhagaṁ karonti na tvaṁ
imaṁ dhammavinayaṁ ājānāsi ahaṁ imaṁ dhammavinayaṁ ājānāmi kiṁ tvaṁ
imaṁ dhammavinayaṁ ājānissasi micchāpaṭipanno tvamasi ahamasmi
sammāpaṭipanno sahitamme asahitante pure vacanīyaṁ pacchā avaca
pacchā vacanīyaṁ pure avaca adhiciṇṇante viparāvattaṁ āropito
te vādo niggahitosi [1]- cara vādappamokkhāya nibbedhehi vā
1 Ma. tvamasi.
Sace pahosīti ye diṭṭhimuggayha vivādayanti.

[310] Idameva saccanti ca vādayantīti sassato loko idameva
saccaṁ moghamaññanti vādayanti kathenti bhaṇanti dīpayanti voharanti
asassato loko .pe. Neva hoti na na hoti tathāgato
parammaraṇā idameva saccaṁ moghamaññanti vādayanti kathenti bhaṇanti
dīpayanti voharantīti idameva saccanti ca vādayanti.

[311] Te tvaṁ vadassū na hi tedha atthi vādamhi jāte
paṭisenikattāti te tvaṁ diṭṭhigatike vadassu [1]- niggahena niggahaṁ
paṭikkammena paṭikkammaṁ visesena visesaṁ paṭivisesena paṭivisesaṁ
āvedhiyāya āvedhiyaṁ nibbedhiyāya nibbedhiyaṁ chedena chedaṁ maṇḍalena
maṇḍalaṁ te tuyhaṁ paṭisūrā paṭipurisā paṭisattū paṭimallāti te
tvaṁ vadassu. Na hi tedha atthi vādamhi jāte paṭisenikattāti vāde
jāte sañjāte nibbatte abhinibbatte pātubhūte 2 ye paṭisenikattā
paṭilomakattā paṭikaṇṭakakattā paṭipakkhakattā kalahaṁ kareyyuṁ bhaṇḍanaṁ
kareyyuṁ viggahaṁ kareyyuṁ vivādaṁ kareyyuṁ medhagaṁ kareyyuṁ te natthi
na santi na saṁvijjanti nupalabbhanti pahīnā samucchinnā vūpasantā
paṭippassaddhā abhabbuppattikā ñāṇagginā daḍḍhāti te tvaṁ
vadassū na hi tedha atthi vādamhi jāte paṭisenikattā. Tenāha bhagavā
ye diṭṭhimuggayha vivādayanti
idameva saccanti ca vādayanti
1 Ma. Yu. vādena vādaṁ. 2 Ma. pātubhūteyeva.
Te tvaṁ vadassū na hi tedha atthi
vādamhi jāte paṭisenikattāti.

[312] Visenikatvā pana ye caranti
diṭṭhīhi diṭṭhiṁ avirujjhamānā
tesu tvaṁ kiṁ labhetho 1 pasūra
yesīdha natthī paramuggahītaṁ.

[313] Visenikatvā pana ye carantīti senā vuccati mārasenā.
Kāyaduccaritaṁ mārasenā vacīduccaritaṁ mārasenā manoduccaritaṁ mārasenā
rāgo mārasenā doso mārasenā moho mārasenā kodho
upanāho makkho paḷāso issā macchariyaṁ māyā sāṭheyyaṁ
thambho sārambho māno atimāno mado pamādo sabbe
kilesā sabbe duccaritā sabbe darathā sabbe pariḷāhā
sabbe santāpā sabbākusalābhisaṅkhārā mārasenā. Vuttaṁ hetaṁ
bhagavatā kāmā te paṭhamā senā dutiyārati vuccati .pe. Jetvā
ca labhate sukhanti. Yato catūhi ariyamaggehi sabbā ca mārasenā
sabbe ca paṭisenikarā kilesā jitā ca parājitā ca bhaggā
vippaluttā parammukhā tena vuccanti visenikatvā. Yeti arahanto
khīṇāsavā. Carantīti caranti viharanti iriyanti vattenti pālenti
yapenti yāpentīti visenikatvā pana ye caranti.

[314] Diṭṭhīhi diṭṭhiṁ avirujjhamānāti tesaṁ dvāsaṭṭhī diṭṭhigatāni
1 Ma. labhetha.
Pahīnāni samucchinnāni vūpasantāni paṭippassaddhāni abhabbuppattikāni
ñāṇagginā daḍḍhāni te diṭṭhīhi diṭṭhiṁ avirujjhamānā
aghaṭṭiyamānā appaṭihaññamānā appaṭihatamānāti diṭṭhīhi diṭṭhiṁ
avirujjhamānā.

[315] Tesu tvaṁ kiṁ labhetho pasūrāti tesu arahantesu khīṇāsavesu
kiṁ labhetho paṭisūra paṭipurisa paṭisattu paṭimallāti 1 tesu tvaṁ kiṁ
labhetho pasūra.

[316] Yesīdha natthī paramuggahītanti yesaṁ arahantānaṁ khīṇāsavānaṁ
idaṁ paramaṁ aggaṁ seṭṭhaṁ viseṭṭhaṁ pāmokkhaṁ uttamaṁ pavaranti gahitaṁ
parāmaṭṭhaṁ ajjhositaṁ adhimuttaṁ natthi na saṁvijjati nupalabbhati pahīnaṁ
samucchinnaṁ vūpasantaṁ paṭippassaddhaṁ abhabbuppattikaṁ ñāṇagginā
daḍḍhanti yesīdha natthī paramuggahītaṁ. Tenāha bhagavā
visenikatvā pana ye caranti
diṭṭhīhi diṭṭhiṁ avirujjhamānā
tesu tvaṁ kiṁ labhetho pasūra
yesīdha natthī paramuggahītanti.