[470] Yā panāti yā yādisā .pe. Bhikkhunīti .pe. Ayaṁ
Imasmiṁ atthe adhippetā bhikkhunīti. Sikkhamānā nāma dve vassāni
chasu dhammesu sikkhitasikkhā. Sāmaṇerī nāma dasasikkhāpadikā.
Gihinī nāma āgārinī 1 vuccati. Ummaddāpeyya vāti ummaddāpeti
āpatti pācittiyassa. Parimaddāpeyya vāti sambāhāpeti āpatti
pācittiyassa.

[471] Anāpatti ābādhappaccayā āpadāsu ummattikāya
ādikammikāyāti.
-------
Chattupāhanavaggassa ekādasamasikkhāpadaṁ

[472] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhikkhuniyo
bhikkhussa purato anāpucchā āsane nisīdanti. Bhikkhū ujjhāyanti
khīyanti vipācenti kathaṁ hi nāma bhikkhuniyo bhikkhussa purato
anāpucchā āsane nisīdissantīti .pe. Saccaṁ kira bhikkhave bhikkhuniyo
bhikkhussa purato anāpucchā āsane nisīdantīti. Saccaṁ bhagavāti.
Vigarahi buddho bhagavā kathaṁ hi nāma bhikkhave bhikkhuniyo bhikkhussa
purato anāpucchā āsane nisīdanti netaṁ bhikkhave appasannānaṁ
vā pasādāya .pe. Evañca pana bhikkhave bhikkhuniyo imaṁ sikkhāpadaṁ
uddisantu yā pana bhikkhunī bhikkhussa purato anāpucchā āsane
nisīdeyya pācittiyanti.
1 Ma. Yu. agārinī.

[473] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Bhikkhussa puratoti
upasampannassa purato. Anāpucchāti anapaloketvā. Āsane
nisīdeyyāti antamaso chamāyampi 1 nisīdati āpatti pācittiyassa.

[474] Anāpucchite anāpucchitasaññā āsane nisīdati āpatti
pācittiyassa. Anāpucchite vematikā āsane nisīdati āpatti
pācittiyassa. Anāpucchite āpucchitasaññā āsane nisīdati āpatti
pācittiyassa. Āpucchite anāpucchitasaññā āpatti dukkaṭassa.
Āpucchite vematikā āpatti dukkaṭassa. Āpucchite āpucchitasaññā
anāpatti.

[475] Anāpatti āpucchā āsane nisīdati gilānāya āpadāsu
ummattikāya ādikammikāyāti.
--------
Chattupāhanavaggassa dvādasamasikkhāpadaṁ

[476] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhikkhuniyo
anokāsakataṁ bhikkhuṁ pañhaṁ pucchanti. Bhikkhū ujjhāyanti khīyanti
vipācenti kathaṁ hi nāma bhikkhuniyo anokāsakataṁ bhikkhuṁ pañhaṁ
pucchissantīti .pe. Saccaṁ kira bhikkhave bhikkhuniyo anokāsakataṁ bhikkhuṁ
1 Ma. Yu. chamāyapi.
Pañhaṁ pucchantīti. Saccaṁ bhagavāti. Vigarahi buddho bhagavā kathaṁ
hi nāma bhikkhave bhikkhuniyo anokāsakataṁ bhikkhuṁ pañhaṁ pucchissanti
netaṁ bhikkhave appasannānaṁ vā pasādāya .pe. Evañca pana
bhikkhave bhikkhuniyo imaṁ sikkhāpadaṁ uddisantu yā pana bhikkhunī
anokāsakataṁ bhikkhuṁ pañhaṁ puccheyya pācittiyanti.

[477] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Anokāsakatanti anāpucchā.
Bhikkhunti upasampannaṁ. Pañhaṁ puccheyyāti suttante okāsaṁ
kārāpetvā vinayaṁ vā abhidhammaṁ vā pucchati āpatti pācittiyassa.
Vinaye okāsaṁ kārāpetvā suttantaṁ vā abhidhammaṁ vā pucchati
āpatti pācittiyassa. Abhidhamme okāsaṁ kārāpetvā suttantaṁ
vā vinayaṁ vā pucchati āpatti pācittiyassa.

[478] Anāpucchite anāpucchitasaññā pañhaṁ pucchati āpatti
pācittiyassa. Anāpucchite vematikā pañhaṁ pucchati āpatti
pācittiyassa. Anāpucchite āpucchitasaññā pañhaṁ pucchati āpatti
pācittiyassa. Āpucchite anāpucchitasaññā āpatti
dukkaṭassa. Āpucchite vematikā āpatti dukkaṭassa. Āpucchite
āpucchitasaññā anāpatti.

[479] Anāpatti okāsaṁ kārāpetvā pucchati anodissa
okāsaṁ kārāpetvā yattha katthaci pucchati ummattikāya
ādikammikāyāti.
Chattupāhanavaggassa terasamasikkhāpadaṁ