[450] Tena kho pana samayena aññatarā bhikkhunī gilānā
hoti na sakkoti padasā gantuṁ. Bhagavato etamatthaṁ ārocesuṁ .pe.
Anujānāmi bhikkhave gilānāya bhikkhuniyā yānaṁ. Evañca pana
bhikkhave bhikkhuniyo imaṁ sikkhāpadaṁ uddisantu yā pana bhikkhunī
agilānā yānena yāyeyya pācittiyanti.

[451] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Agilānā nāma sakkoti
padasā gantuṁ. Gilānā nāma na sakkoti padasā gantuṁ. Yānaṁ
nāma vayhaṁ ratho sakaṭaṁ sandamānikā sivikā pāṭaṅkī. Yāyeyyāti
sakiṁpi yāyati āpatti pācittiyassa.

[452] Agilānā agilānasaññā yānena yāyati āpatti
pācittiyassa. Agilānā vematikā yānena yāyati āpatti
Pācittiyassa. Agilānā gilānasaññā yānena yāyati āpatti
pācittiyassa. Gilānā agilānasaññā āpatti dukkaṭassa.
Gilānā vematikā āpatti dukkaṭassa. Gilānā gilānasaññā
anāpatti.

[453] Anāpatti gilānāya āpadāsu ummattikāya
ādikammikāyāti.
------
Chattupāhanavaggassa tatiyasikkhāpadaṁ

[454] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena aññatarā
bhikkhunī aññatarissā itthiyā kulupikā hoti. Athakho sā itthī
taṁ bhikkhuniṁ etadavoca handayye imaṁ saṅghāṇiṁ amukāya nāma
itthiyā dehīti. Athakho sā bhikkhunī sacāhaṁ pattena ādāya
gacchāmi vissaro me bhavissatīti paṭimuñcitvā agamāsi. Tassā
rathiyāya suttake chinne vippakiriyiṁsu. Manussā ujjhāyanti khīyanti
vipācenti kathaṁ hi nāma bhikkhuniyo saṅghāṇiṁ dhāressanti
seyyathāpi gihiniyo kāmabhoginiyoti. Assosuṁ kho bhikkhuniyo tesaṁ
manussānaṁ ujjhāyantānaṁ khīyantānaṁ vipācentānaṁ. Yā tā bhikkhuniyo
appicchā .pe. Tā ujjhāyanti khīyanti vipācenti kathaṁ hi
nāma bhikkhunī saṅghāṇiṁ dhāressatīti .pe. Saccaṁ kira bhikkhave
Bhikkhunī saṅghāṇiṁ dhāretīti 1 . Saccaṁ bhagavāti. Vigarahi buddho bhagavā
kathaṁ hi nāma bhikkhave bhikkhunī saṅghāṇiṁ dhāressati netaṁ bhikkhave
appasannānaṁ vā pasādāya .pe. Evañca pana bhikkhave bhikkhuniyo
imaṁ sikkhāpadaṁ uddisantu yā pana bhikkhunī saṅghāṇiṁ dhāreyya
pācittiyanti.

[455] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Saṅghāṇi nāma yā kāci
kaṭupagā. Dhāreyyāti sakiṁpi dhāreti āpatti pācittiyassa.

[456] Anāpatti ābādhappaccayā kaṭisuttakaṁ dhāreti
ummattikāya ādikammikāyāti.
-------
Chattupāhanavaggassa catutthasikkhāpadaṁ

[457] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā
bhikkhuniyo itthālaṅkāraṁ dhārenti. Manussā ujjhāyanti khīyanti
vipācenti kathaṁ hi nāma bhikkhuniyo itthālaṅkāraṁ dhāressanti
seyyathāpi gihiniyo kāmabhoginiyoti. Assosuṁ kho bhikkhuniyo tesaṁ
manussānaṁ ujjhāyantānaṁ khīyantānaṁ vipācentānaṁ. Yā tā bhikkhuniyo
appicchā .pe. Tā ujjhāyanti khīyanti vipācenti kathaṁ
1 Ma. Yu. dhāresīti.
Hi nāma chabbaggiyā bhikkhuniyo itthālaṅkāraṁ dhāressantīti .pe.
Saccaṁ kira bhikkhave chabbaggiyā bhikkhuniyo itthālaṅkāraṁ dhārentīti.
Saccaṁ bhagavāti. Vigarahi buddho bhagavā kathaṁ hi nāma bhikkhave
chabbaggiyā bhikkhuniyo itthālaṅkāraṁ dhāressanti 1 netaṁ bhikkhave
appasannānaṁ vā pasādāya .pe. Evañca pana bhikkhave bhikkhuniyo
imaṁ sikkhāpadaṁ uddisantu yā pana bhikkhunī itthālaṅkāraṁ dhāreyya
pācittiyanti.

[458] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Itthālaṅkāro nāma sīsupago
gīvupago hatthupago pādupago kaṭupago. Dhāreyyāti sakiṁpi dhāreti
āpatti pācittiyassa.

[459] Anāpatti ābādhappaccayā ummattikāya
ādikammikāyāti.
-------
Chattupāhanavaggassa pañcamasikkhāpadaṁ