[430] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Puriso nāma pattavīsativasso.
Kumārako nāma appattavīsativasso. Saṁsaṭṭhā nāma ananulomikena
kāyikavācasikena saṁsaṭṭhā. Caṇḍī nāma kodhanā vuccati. Sokāvassaṁ
nāma paresaṁ dukkhaṁ uppādeti sokaṁ āvisati. Sikkhamānā nāma
dve vassāni chasu dhammesu sikkhitasikkhā. Vuṭṭhāpeyyāti
upasampādeyya. Vuṭṭhāpessāmīti gaṇaṁ vā ācariniṁ vā pattaṁ vā
1 Ma. Yu. sokāvāsaṁ. 2 Ma. Yu. vuṭṭhāpesīti.
Cīvaraṁ vā pariyesati sīmaṁ vā sammannati āpatti dukkaṭassa.
Ñattiyā dukkaṭaṁ dvīhi kammavācāhi dukkaṭā kammavācāpariyosāne
upajjhāyāya āpatti pācittiyassa gaṇassa ca ācariniyā ca
āpatti dukkaṭassa.

[431] Anāpatti ajānantī vuṭṭhāpeti ummattikāya
ādikammikāyāti.
-------
Kumārībhūtavaggassa dasamasikkhāpadaṁ

[432] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena thullanandā
bhikkhunī mātāpitūhipi sāmikenapi ananuññātaṁ sikkhamānaṁ vuṭṭhāpeti.
Mātāpitaropi sāmikopi ujjhāyanti khīyanti vipācenti kathaṁ hi nāma
ayyā thullanandā amhehi ananuññātaṁ sikkhamānaṁ vuṭṭhāpessatīti.
Assosuṁ kho bhikkhuniyo mātāpitūnaṁpi sāmikassapi ujjhāyantānaṁ
khīyantānaṁ vipācentānaṁ. Yā tā bhikkhuniyo appicchā .pe. Tā
ujjhāyanti khīyanti vipācenti kathaṁ hi nāma ayyā thullanandā
mātāpitūhipi sāmikenapi ananuññātaṁ sikkhamānaṁ vuṭṭhāpessatīti
.pe. Saccaṁ kira bhikkhave thullanandā bhikkhunī mātāpitūhipi
sāmikenapi ananuññātaṁ sikkhamānaṁ vuṭṭhāpetīti. Saccaṁ bhagavāti.
Vigarahi buddho bhagavā kathaṁ hi nāma bhikkhave thullanandā bhikkhunī
Mātāpitūhipi sāmikenapi ananuññātaṁ sikkhamānaṁ vuṭṭhāpessatīti netaṁ
bhikkhave appasannānaṁ vā pasādāya .pe. Evañca pana bhikkhave
bhikkhuniyo imaṁ sikkhāpadaṁ uddisantu yā pana bhikkhunī mātāpitūhi
vā sāmikena vā ananuññātaṁ sikkhamānaṁ vuṭṭhāpeyya pācittiyanti.

[433] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Mātāpitaro nāma janakā
vuccanti. Sāmiko nāma yena pariggahitā hoti. Ananuññātāti
anāpucchā. Sikkhamānā nāma dve vassāni chasu dhammesu
sikkhitasikkhā. Vuṭṭhāpeyyāti upasampādeyya. Vuṭṭhāpessāmīti
gaṇaṁ vā ācariniṁ vā pattaṁ vā cīvaraṁ vā pariyesati sīmaṁ vā
sammannati āpatti dukkaṭassa. Ñattiyā dukkaṭaṁ dvīhi
kammavācāhi dukkaṭā kammavācāpariyosāne upajjhāyāya āpatti
pācittiyassa gaṇassa ca ācariniyā ca āpatti dukkaṭassa.

[434] Anāpatti ajānantī vuṭṭhāpeti apaloketvā
vuṭṭhāpeti ummattikāya ādikammikāyāti.
--------
Kumārībhūtavaggassa ekādasamasikkhāpadaṁ

[435] Tena samayena buddho bhagavā rājagahe viharati veḷuvane
kalandakanivāpe. Tena kho pana samayena thullanandā bhikkhunī
Sikkhamānaṁ vuṭṭhāpessāmīti there bhikkhū sannipātetvā pahūtaṁ khādanīyaṁ
bhojanīyaṁ passitvā na tāvāhaṁ ayyā sikkhamānaṁ vuṭṭhāpessāmīti
there bhikkhū uyyojetvā devadattaṁ kokālikaṁ kaṭamorakatissakaṁ khaṇḍadeviyā
puttaṁ samuddadattaṁ sannipātetvā sikkhamānaṁ vuṭṭhāpeti 1 .
Yā tā bhikkhuniyo appicchā .pe. Tā ujjhāyanti khīyanti vipācenti
kathaṁ hi nāma ayyā thullanandā pārivāsikacchandadānena sikkhamānaṁ
vuṭṭhāpessatīti .pe. Saccaṁ kira bhikkhave thullanandā bhikkhunī
pārivāsikacchandadānena sikkhamānaṁ vuṭṭhāpetīti. Saccaṁ bhagavāti.
Vigarahi buddho bhagavā kathaṁ hi nāma bhikkhave thullanandā bhikkhunī
pārivāsikacchandadānena sikkhamānaṁ vuṭṭhāpessati netaṁ bhikkhave
appasannānaṁ vā pasādāya .pe. Evañca pana bhikkhave bhikkhuniyo
imaṁ sikkhāpadaṁ uddisantu yā pana bhikkhunī pārivāsikacchandadānena
sikkhamānaṁ vuṭṭhāpeyya pācittiyanti.

[436] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Pārivāsikacchandadānenāti
vuṭṭhitāya parisāya. Sikkhamānā nāma dve vassāni chasu dhammesu
sikkhitasikkhā. Vuṭṭhāpeyyāti upasampādeyya. Vuṭṭhāpessāmīti
gaṇaṁ vā ācariniṁ vā pattaṁ vā cīvaraṁ vā pariyesati sīmaṁ vā
sammannati āpatti dukkaṭassa. Ñattiyā dukkaṭaṁ dvīhi
kammavācāhi dukkaṭā kammavācāpariyosāne upajjhāyāya āpatti
1 Ma. Yu. vuṭṭhāpesi. sabbattha evameva dissati.
Pācittiyassa gaṇassa ca ācariniyā ca āpatti dukkaṭassa.

[437] Anāpatti avuṭṭhitāya parisāya vuṭṭhāpeti ummattikāya
ādikammikāyāti.
--------
Kumārībhūtavaggassa dvādasamasikkhāpadaṁ

[438] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhikkhuniyo
anuvassaṁ vuṭṭhāpenti. Upassayo na sammati. Manussā
ujjhāyanti khīyanti vipācenti kathaṁ hi nāma bhikkhuniyo anuvassaṁ
vuṭṭhāpessanti upassayo na sammatīti. Assosuṁ kho bhikkhuniyo tesaṁ
manussānaṁ ujjhāyantānaṁ khīyantānaṁ vipācentānaṁ. Yā tā
bhikkhuniyo appicchā .pe. Tā ujjhāyanti khīyanti vipācenti
kathaṁ hi nāma bhikkhuniyo anuvassaṁ vuṭṭhāpessantīti .pe. Saccaṁ kira
bhikkhave bhikkhuniyo anuvassaṁ vuṭṭhāpentīti. Saccaṁ bhagavāti. Vigarahi
buddho bhagavā kathaṁ hi nāma bhikkhave bhikkhuniyo anuvassaṁ vuṭṭhāpessanti
netaṁ bhikkhave appasannānaṁ vā pasādāya .pe. Evañca
pana bhikkhave bhikkhuniyo imaṁ sikkhāpadaṁ uddisantu yā pana bhikkhunī
anuvassaṁ vuṭṭhāpeyya pācittiyanti.

[439] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Anuvassanti anusaṁvaccharaṁ.
Vuṭṭhāpeyyāti upasampādeyya. Vuṭṭhāpessāmīti gaṇaṁ vā ācariniṁ
vā pattaṁ vā cīvaraṁ vā pariyesati sīmaṁ vā sammannati āpatti
dukkaṭassa. Ñattiyā dukkaṭaṁ dvīhi kammavācāhi dukkaṭā
kammavācāpariyosāne upajjhāyāya āpatti pācittiyassa gaṇassa
ca ācariniyā ca āpatti dukkaṭassa.