[420] Tena samayena buddho bhagavā sāvatthiyaṁ viharati jetavane
Anāthapiṇḍikassa ārāme. Tena kho pana samayena caṇḍakālī
bhikkhunī bhikkhunīsaṅghaṁ upasaṅkamitvā vuṭṭhāpanasammatiṁ yācati. Athakho
bhikkhunīsaṅgho caṇḍakāliṁ bhikkhuniṁ paricchinditvā alantāva te
ayye vuṭṭhāpitenāti vuṭṭhāpanasammatiṁ na adāsi. Caṇḍakālī
bhikkhunī sādhūti paṭissuṇi. Tena kho pana samayena bhikkhunīsaṅgho
aññāsaṁ bhikkhunīnaṁ vuṭṭhāpanasammatiṁ deti. Caṇḍakālī bhikkhunī
ujjhāyati khīyati vipāceti ahameva nūna bālā ahameva 1 alajjinī
yaṁ saṅgho aññāsaṁ bhikkhunīnaṁ vuṭṭhāpanasammatiṁ deti mayhameva
na detīti. Yā tā bhikkhuniyo appicchā .pe. Tā ujjhāyanti
khīyanti vipācenti kathaṁ hi nāma ayyā caṇḍakālī alantāva
te ayye vuṭṭhāpitenāti vuccamānā sādhūti paṭissuṇitvā pacchā
khīyanadhammaṁ 2 āpajjissatīti .pe. Saccaṁ kira bhikkhave caṇḍakālī
bhikkhunī alantāva te ayye vuṭṭhāpitenāti vuccamānā sādhūti
paṭissuṇitvā pacchā khīyanadhammaṁ āpajjatīti. Saccaṁ bhagavāti. Vigarahi
buddho bhagavā kathaṁ hi nāma bhikkhave caṇḍakālī bhikkhunī alantāva
te ayye vuṭṭhāpitenāti vuccamānā sādhūti paṭissuṇitvā pacchā
khīyanadhammaṁ āpajjissati netaṁ bhikkhave appasannānaṁ vā pasādāya
.pe. Evañca pana bhikkhave bhikkhuniyo imaṁ sikkhāpadaṁ uddisantu
yā pana bhikkhunī alantāva te ayye vuṭṭhāpitenāti vuccamānā
1 Yu. nūna. 2 Ma. Yu. khīyadhammaṁ. evaṁ sabbattha ñātabbaṁ.
Sādhūti paṭissuṇitvā pacchā khīyanadhammaṁ āpajjeyya pācittiyanti.

[421] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Alantāva te ayye
vuṭṭhāpitenāti alantāva te ayye upasampāditena. Sādhūti
paṭissuṇitvā pacchā khīyanadhammaṁ āpajjati āpatti pācittiyassa.

[422] Anāpatti pakatiyā chandā dosā mohā bhayā karontaṁ
khīyati ummattikāya ādikammikāyāti.
---------
Kumārībhūtavaggassa sattamasikkhāpadaṁ

[423] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena aññatarā
sikkhamānā thullanandaṁ bhikkhuniṁ upasaṅkamitvā upasampadaṁ yāci.
Thullanandā bhikkhunī taṁ sikkhamānaṁ sace me tvaṁ ayye cīvaraṁ dassasi
evāhantaṁ vuṭṭhāpessāmīti vatvā neva vuṭṭhāpeti na vuṭṭhāpanāya
ussukkaṁ karoti. Athakho sā sikkhamānā bhikkhunīnaṁ etamatthaṁ ārocesi.
Yā tā bhikkhuniyo appicchā .pe. Tā ujjhāyanti khīyanti
vipācenti kathaṁ hi nāma ayyā thullanandā sikkhamānaṁ sace
me tvaṁ ayye cīvaraṁ dassasi evāhantaṁ vuṭṭhāpessāmīti vatvā
neva vuṭṭhāpessati na vuṭṭhāpanāya ussukkaṁ karissatīti .pe.
Saccaṁ kira bhikkhave thullanandā bhikkhunī sikkhamānaṁ sace me tvaṁ
Ayye cīvaraṁ dassasi evāhantaṁ vuṭṭhāpessāmīti vatvā neva
vuṭṭhāpeti na vuṭṭhāpanāya ussukkaṁ karotīti. Saccaṁ bhagavāti.
Vigarahi buddho bhagavā kathaṁ hi nāma bhikkhave thullanandā bhikkhunī
sikkhamānaṁ sace me tvaṁ ayye cīvaraṁ dassasi evāhantaṁ
vuṭṭhāpessāmīti vatvā neva vuṭṭhāpessati na vuṭṭhāpanāya ussukkaṁ
karissati netaṁ bhikkhave appasannānaṁ vā pasādāya .pe. Evañca
pana bhikkhave bhikkhuniyo imaṁ sikkhāpadaṁ uddisantu yā pana bhikkhunī
sikkhamānaṁ sace me tvaṁ ayye cīvaraṁ dassasi evāhantaṁ
vuṭṭhāpessāmīti vatvā sā pacchā anantarāyikinī neva vuṭṭhāpeyya
na vuṭṭhāpanāya ussukkaṁ kareyya pācittiyanti.

[424] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Sikkhamānā nāma dve vassāni
chasu dhammesu sikkhitasikkhā. Sace me tvaṁ ayye cīvaraṁ dassasi
evāhantaṁ vuṭṭhāpessāmīti evāhantaṁ upasampādessāmi. Sā
pacchā anantarāyikinīti asati antarāye. Neva vuṭṭhāpeyyāti na
sayaṁ vuṭṭhāpeyya. Na vuṭṭhāpanāya ussukkaṁ kareyyāti na aññaṁ
āṇāpeyya. Neva vuṭṭhāpessāmi na vuṭṭhāpanāya ussukkaṁ
karissāmīti dhuraṁ nikkhittamatte āpatti pācittiyassa.

[425] Anāpatti sati antarāye pariyesitvā na labhati
gilānāya āpadāsu ummattikāya ādikammikāyāti.
Kumārībhūtavaggassa aṭṭhamasikkhāpadaṁ

[426] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena aññatarā
sikkhamānā thullanandaṁ bhikkhuniṁ upasaṅkamitvā upasampadaṁ yāci.
Thullanandā bhikkhunī taṁ sikkhamānaṁ [1]- sace maṁ 2 tvaṁ ayye dve vassāni
anubandhissasi evāhantaṁ vuṭṭhāpessāmīti vatvā neva vuṭṭhāpeti
na vuṭṭhāpanāya ussukkaṁ karoti. Athakho sā sikkhamānā bhikkhunīnaṁ
etamatthaṁ ārocesi. Yā tā bhikkhuniyo appicchā .pe. Tā
ujjhāyanti khīyanti vipācenti kathaṁ hi nāma ayyā thullanandā
sikkhamānaṁ sace maṁ tvaṁ ayye dve vassāni anubandhissasi
evāhantaṁ vuṭṭhāpessāmīti vatvā neva vuṭṭhāpessati na vuṭṭhāpanāya
ussukkaṁ karissatīti .pe. Saccaṁ kira bhikkhave thullanandā bhikkhunī
sikkhamānaṁ sace maṁ tvaṁ ayye dve vassāni anubandhissasi evāhantaṁ
vuṭṭhāpessāmīti vatvā neva vuṭṭhāpeti na vuṭṭhāpanāya ussukkaṁ
karotīti. Saccaṁ bhagavāti. Vigarahi buddho bhagavā kathaṁ hi nāma
bhikkhave thullanandā bhikkhunī sikkhamānaṁ sace maṁ tvaṁ ayye dve
vassāni anubandhissasi evāhantaṁ vuṭṭhāpessāmīti vatvā neva
vuṭṭhāpessati na vuṭṭhāpanāya ussukkaṁ karissati netaṁ bhikkhave
appasannānaṁ vā pasādāya .pe. Evañca pana bhikkhave bhikkhuniyo
1 Ma. Yu. etadavoca. 2 Ma. meti pāṭho hoti. sabbattha evameva ñātabbaṁ.
Imaṁ sikkhāpadaṁ uddisantu yā pana bhikkhunī sikkhamānaṁ sace maṁ
tvaṁ ayye dve vassāni anubandhissasi evāhantaṁ vuṭṭhāpessāmīti
vatvā sā pacchā anantarāyikinī neva vuṭṭhāpeyya na vuṭṭhāpanāya
ussukkaṁ kareyya pācittiyanti.

[427] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Sikkhamānā nāma dve vassāni
chasu dhammesu sikkhitasikkhā. Sace maṁ tvaṁ ayye dve vassāni
anubandhissasīti dve saṁvaccharāni upaṭṭhahissasi. Evāhantaṁ
vuṭṭhāpessāmīti evāhantaṁ upasampādessāmi. Sā pacchā
anantarāyikinīti asati antarāye. Neva vuṭṭhāpeyyāti na sayaṁ
vuṭṭhāpeyya. Na vuṭṭhāpanāya ussukkaṁ kareyyāti na aññaṁ
āṇāpeyya. Neva vuṭṭhāpessāmi na vuṭṭhāpanāya ussukkaṁ karissāmīti
dhuraṁ nikkhittamatte āpatti pācittiyassa.

[428] Anāpatti sati antarāye pariyesitvā na labhati
gilānāya āpadāsu ummattikāya ādikammikāyāti.
--------
Kumārībhūtavaggassa navamasikkhāpadaṁ

[429] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena thullanandā
bhikkhunī purisasaṁsaṭṭhaṁ kumārakasaṁsaṭṭhaṁ caṇḍiṁ sokāvassaṁ 1 caṇḍakāliṁ
1 Ma. Yu. sokāvāsaṁ. evaṁ sabbattha ñātabbaṁ.
Sikkhamānaṁ vuṭṭhāpeti. Yā tā bhikkhuniyo appicchā .pe. Tā
ujjhāyanti khīyanti vipācenti kathaṁ hi nāma ayyā thullanandā
purisasaṁsaṭṭhaṁ kumārakasaṁsaṭṭhaṁ caṇḍiṁ sokāvassaṁ 1 caṇḍakāliṁ sikkhamānaṁ
vuṭṭhāpessatīti .pe. Saccaṁ kira bhikkhave thullanandā bhikkhunī
purisasaṁsaṭṭhaṁ kumārakasaṁsaṭṭhaṁ caṇḍiṁ sokāvassaṁ caṇḍakāliṁ sikkhamānaṁ
vuṭṭhāpetīti 2 . Saccaṁ bhagavāti. Vigarahi buddho bhagavā kathaṁ hi
nāma bhikkhave thullanandā bhikkhunī purisasaṁsaṭṭhaṁ kumārakasaṁsaṭṭhaṁ caṇḍiṁ
sokāvassaṁ caṇḍakāliṁ sikkhamānaṁ vuṭṭhāpessati netaṁ bhikkhave
appasannānaṁ vā pasādāya .pe. Evañca pana bhikkhave bhikkhuniyo
imaṁ sikkhāpadaṁ uddisantu yā pana bhikkhunī purisasaṁsaṭṭhaṁ kumārakasaṁsaṭṭhaṁ
caṇḍiṁ sokāvassaṁ sikkhamānaṁ vuṭṭhāpeyya pācittiyanti.