[400] Anāpatti sati antarāye pariyesitvā dutiyikaṁ bhikkhuniṁ
na labhati āpadāsu ummattikāya ādikammikāyāti.
Gabbhinīvaggo sattamo.
--------
1 Ma. Yu. neva vūpakāsesi. 2 Ma. Yu. na vūpakāsāpesi.
Kumārībhūtavaggassa paṭhamasikkhāpadaṁ

[401] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhikkhuniyo
ūnavīsativassaṁ kumārībhūtaṁ vuṭṭhāpenti. Tā akkhamā honti sītassa
uṇhassa jighacchāya pipāsāya ḍaṁsamakasavātātapasiriṁsapasamphassānaṁ
duruttānaṁ durāgatānaṁ vacanapathānaṁ uppannānaṁ sārīrikānaṁ vedanānaṁ
dukkhānaṁ tibbānaṁ kharānaṁ kaṭukānaṁ asātānaṁ amanāpānaṁ pāṇaharānaṁ
anadhivāsakajātikā honti. Yā tā bhikkhuniyo appicchā .pe.
Tā ujjhāyanti khīyanti vipācenti kathaṁ hi nāma bhikkhuniyo
ūnavīsativassaṁ kumārībhūtaṁ vuṭṭhāpessantīti .pe. Saccaṁ kira bhikkhave
bhikkhuniyo ūnavīsativassaṁ kumārībhūtaṁ vuṭṭhāpentīti. Saccaṁ bhagavāti.
Vigarahi buddho bhagavā kathaṁ hi nāma bhikkhave bhikkhuniyo ūnavīsativassaṁ
kumārībhūtaṁ vuṭṭhāpessanti ūnavīsativassā hi 1 bhikkhave kumārībhūtā
akkhamā hoti sītassa uṇhassa .pe. Pāṇaharānaṁ
anadhivāsakajātikā hoti vīsativassā ca kho bhikkhave kumārībhūtā khamā
hoti sītassa uṇhassa .pe. Pāṇaharānaṁ adhivāsakajātikā hoti
netaṁ bhikkhave appasannānaṁ vā pasādāya .pe. Evañca pana bhikkhave
bhikkhuniyo imaṁ sikkhāpadaṁ uddisantu yā pana bhikkhunī
1 Ma. Yu. hisaddo na hoti.
Ūnavīsativassaṁ kumārībhūtaṁ vuṭṭhāpeyya pācittiyanti.

[402] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Ūnavīsativassā nāma appattavīsativassā.
Kumārībhūtā nāma sāmaṇerī vuccati. Vuṭṭhāpeyyāti
upasampādeyya. Vuṭṭhāpessāmīti gaṇaṁ vā ācariniṁ vā pattaṁ
vā cīvaraṁ vā pariyesati sīmaṁ vā sammannati āpatti dukkaṭassa
ñattiyā dukkaṭaṁ dvīhi kammavācāhi dukkaṭā kammavācāpariyosāne
upajjhāyāya āpatti pācittiyassa gaṇassa ca ācariniyā
ca āpatti dukkaṭassa.

[403] Ūnavīsativassāya ūnavīsativassasaññā vuṭṭhāpeti āpatti
pācittiyassa. Ūnavīsativassāya vematikā vuṭṭhāpeti āpatti
dukkaṭassa. Ūnavīsativassāya paripuṇṇasaññā vuṭṭhāpeti
anāpatti. Paripuṇṇavīsativassāya ūnavīsativassasaññā āpatti
dukkaṭassa. Paripuṇṇavīsativassāya vematikā āpatti
dukkaṭassa. Paripuṇṇavīsativassāya paripuṇṇasaññā anāpatti.

[404] Anāpatti ūnavīsativassaṁ paripuṇṇasaññā vuṭṭhāpeti
paripuṇṇavīsativassaṁ paripuṇṇasaññā vuṭṭhāpeti ummattikāya
ādikammikāyāti.
-------
Kumārībhūtavaggassa dutiyasikkhāpadaṁ

[405] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhikkhuniyo
paripuṇṇavīsativassaṁ kumārībhūtaṁ dve vassāni chasu dhammesu asikkhitasikkhaṁ
vuṭṭhāpenti. Tā bālā honti abyattā na jānanti
kappiyaṁ vā akappiyaṁ vā. Yā tā bhikkhuniyo appicchā .pe.
Tā ujjhāyanti khīyanti vipācenti kathaṁ hi nāma bhikkhuniyo
paripuṇṇavīsativassaṁ kumārībhūtaṁ dve vassāni chasu dhammesu asikkhitasikkhaṁ
vuṭṭhāpessantīti .pe. Saccaṁ kira bhikkhave bhikkhuniyo paripuṇṇavīsativassaṁ
kumārībhūtaṁ dve vassāni chasu dhammesu sikkhitasikkhaṁ
vuṭṭhāpentīti. Saccaṁ bhagavāti. Vigarahi buddho bhagavā kathaṁ hi
nāma bhikkhave bhikkhuniyo paripuṇṇavīsativassaṁ kumārībhūtaṁ dve vassāni
chasu dhammesu asikkhitasikkhaṁ vuṭṭhāpessanti netaṁ bhikkhave
appasannānaṁ vā pasādāya .pe. Vigarahitvā dhammiṁ kathaṁ katvā bhikkhū
āmantesi anujānāmi bhikkhave aṭṭhārasavassāya kumārībhūtāya dve
vassāni chasu dhammesu sikkhāsammatiṁ dātuṁ. Evañca pana bhikkhave
dātabbā. Tāya aṭṭhārasavassāya kumārībhūtāya saṅghaṁ upasaṅkamitvā
ekaṁsaṁ uttarāsaṅgaṁ karitvā bhikkhunīnaṁ pāde vanditvā
ukkuṭikaṁ nisīditvā añjaliṁ paggahetvā evamassa vacanīyo ahaṁ
Ayye itthannāmā itthannāmāya ayyāya aṭṭhārasavassā kumārībhūtā
saṅghaṁ dve vassāni chasu dhammesu sikkhāsammatiṁ yācāmīti.
Dutiyampi yācitabbā tatiyampi yācitabbā. Byattāya bhikkhuniyā
paṭibalāya saṅgho ñāpetabbo suṇātu me ayye saṅgho
ayaṁ itthannāmā itthannāmāya ayyāya aṭṭhārasavassā kumārībhūtā
saṅghaṁ dve vassāni chasu dhammesu sikkhāsammatiṁ yācati. Yadi saṅghassa
pattakallaṁ saṅgho itthannāmāya aṭṭhārasavassāya kumārībhūtāya
dve vassāni chasu dhammesu sikkhāsammatiṁ dadeyya. Esā ñatti.
Suṇātu me ayye saṅgho ayaṁ itthannāmā itthannāmāya ayyāya
aṭṭhārasavassā kumārībhūtā saṅghaṁ dve vassāni chasu dhammesu sikkhāsammatiṁ
yācati. Saṅgho itthannāmāya aṭṭhārasavassāya kumārībhūtāya
dve vassāni chasu dhammesu sikkhāsammatiṁ deti. Yassā
ayyāya khamati itthannāmāya aṭṭhārasavassāya kumārībhūtāya dve
vassāni chasu dhammesu sikkhāsammatiyā dānaṁ sā tuṇhassa yassā
nakkhamati sā bhāseyya. Dinnā saṅghena itthannāmāya aṭṭhārasavassāya
kumārībhūtāya dve vassāni chasu dhammesu sikkhāsammati.
Khamati saṅghassa tasmā tuṇhī. Evametaṁ dhārayāmīti. Sā
aṭṭhārasavassā kumārībhūtā evaṁ vadehīti vattabbā pāṇātipātā
veramaṇiṁ dve vassāni avītikkamasamādānaṁ samādiyāmi adinnādānā
veramaṇiṁ dve vassāni avītikkamasamādānaṁ samādiyāmi abrahmacariyā
Veramaṇiṁ dve vassāni avītikkamasamādānaṁ samādiyāmi musāvādā
veramaṇiṁ dve vassāni avītikkamasamādānaṁ samādiyāmi
surāmerayamajjapamādaṭṭhānā veramaṇiṁ dve vassāni avītikkamasamādānaṁ
samādiyāmi vikālabhojanā veramaṇiṁ dve vassāni avītikkamasamādānaṁ
samādiyāmīti. Athakho bhagavā tā bhikkhuniyo anekapariyāyena
vigarahitvā dubbharatāya .pe. Evañca pana bhikkhave bhikkhuniyo imaṁ
sikkhāpadaṁ uddisantu yā pana bhikkhunī paripuṇṇavīsativassaṁ kumārībhūtaṁ
dve vassāni chasu dhammesu asikkhitasikkhaṁ vuṭṭhāpeyya
pācittiyanti.

[406] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Paripuṇṇavīsativassā nāma
pattavīsativassā. Kumārībhūtā nāma sāmaṇerī vuccati. Dve
vassānīti dve saṁvaccharāni. Asikkhitasikkhā nāma sikkhā vā na
dinnā hoti dinnā vā sikkhā kupitā. Vuṭṭhāpeyyāti upasampādeyya.
Vuṭṭhāpessāmīti gaṇaṁ vā ācariniṁ vā pattaṁ vā cīvaraṁ
vā pariyesati sīmaṁ vā sammannati āpatti dukkaṭassa ñattiyā
dukkaṭaṁ dvīhi kammavācāhi dukkaṭā kammavācāpariyosāne
upajjhāyāya āpatti pācittiyassa gaṇassa ca ācariniyā ca
āpatti dukkaṭassa.

[407] Dhammakamme dhammakammasaññā vuṭṭhāpeti āpatti
Pācittiyassa. Dhammakamme vematikā vuṭṭhāpeti āpatti pācittiyassa.
Dhammakamme adhammakammasaññā vuṭṭhāpeti āpatti pācittiyassa.
Adhammakamme dhammakammasaññā āpatti dukkaṭassa. Adhammakamme
vematikā āpatti dukkaṭassa. Adhammakamme adhammakammasaññā
āpatti dukkaṭassa.

[408] Anāpatti paripuṇṇavīsativassaṁ kumārībhūtaṁ dve
vassāni chasu dhammesu sikkhitasikkhaṁ vuṭṭhāpeti ummattikāya
ādikammikāyāti.
-------
Kumārībhūtavaggassa tatiyasikkhāpadaṁ

[409] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhikkhuniyo
paripuṇṇavīsativassaṁ kumārībhūtaṁ dve vassāni chasu dhammesu sikkhitasikkhaṁ
saṅghena asammataṁ vuṭṭhāpenti. Bhikkhuniyo evamāhaṁsu etha
sikkhamānā imaṁ jānātha imaṁ detha imaṁ āharatha iminā
attho imaṁ kappiyaṁ karothāti. Tā evamāhaṁsu na mayaṁ ayye
sikkhamānā bhikkhuniyo mayanti. Yā tā bhikkhuniyo appicchā
.pe. Tā ujjhāyanti khīyanti vipācenti kathaṁ hi nāma bhikkhuniyo
paripuṇṇavīsativassaṁ kumārībhūtaṁ dve vassāni chasu dhammesu sikkhitasikkhaṁ
saṅghena asammataṁ vuṭṭhāpessantīti .pe. Saccaṁ kira bhikkhave
Bhikkhuniyo paripuṇṇavīsativassaṁ kumārībhūtaṁ dve vassāni chasu dhammesu
sikkhitasikkhaṁ saṅghena asammataṁ vuṭṭhāpentīti. Saccaṁ bhagavāti.
Vigarahi buddho bhagavā kathaṁ hi nāma bhikkhave bhikkhuniyo paripuṇṇavīsativassaṁ
kumārībhūtaṁ dve vassāni chasu dhammesu sikkhitasikkhaṁ
saṅghena asammataṁ vuṭṭhāpessanti netaṁ bhikkhave appasannānaṁ vā
pasādāya .pe. Vigarahitvā dhammiṁ kathaṁ katvā bhikkhū āmantesi
anujānāmi bhikkhave paripuṇṇavīsativassāya kumārībhūtāya dve
vassāni chasu dhammesu sikkhitasikkhāya vuṭṭhānasammatiṁ dātuṁ. Evañca
pana bhikkhave dātabbā. Tāya paripuṇṇavīsativassāya kumārībhūtāya
dve vassāni chasu dhammesu sikkhitasikkhāya saṅghaṁ upasaṅkamitvā
ekaṁsaṁ uttarāsaṅgaṁ karitvā bhikkhunīnaṁ pāde vanditvā ukkuṭikaṁ
nisīditvā añjaliṁ paggahetvā evamassa vacanīyo ahaṁ ayye
itthannāmā itthannāmāya ayyāya paripuṇṇavīsativassā kumārībhūtā
dve vassāni chasu dhammesu sikkhitasikkhā saṅghaṁ vuṭṭhānasammatiṁ
yācāmīti. Dutiyampi yācitabbā tatiyampi yācitabbā. Byattāya
bhikkhuniyā paṭibalāya saṅgho ñāpetabbo suṇātu me ayye
saṅgho ayaṁ itthannāmā itthannāmāya ayyāya paripuṇṇavīsativassā
kumārībhūtā dve vassāni chasu dhammesu sikkhitasikkhā saṅghaṁ
vuṭṭhānasammatiṁ yācati. Yadi saṅghassa pattakallaṁ saṅgho
itthannāmāya paripuṇṇavīsativassāya kumārībhūtāya dve vassāni chasu
Dhammesu sikkhitasikkhāya vuṭṭhānasammatiṁ dadeyya. Esā ñatti.
Suṇātu me ayye saṅgho ayaṁ itthannāmā itthannāmāya
ayyāya paripuṇṇavīsativassā kumārībhūtā dve vassāni chasu dhammesu
sikkhitasikkhā saṅghaṁ vuṭṭhānasammatiṁ yācati. Saṅgho itthannāmāya
paripuṇṇavīsativassāya kumārībhūtāya dve vassāni chasu dhammesu
sikkhitasikkhāya vuṭṭhānasammatiṁ deti. Yassā ayyāya khamati
itthannāmāya paripuṇṇavīsativassāya kumārībhūtāya dve vassāni chasu
dhammesu sikkhitasikkhāya vuṭṭhānasammatiyā dānaṁ sā tuṇhassa
yassā nakkhamati sā bhāseyya. Dinnā saṅghena itthannāmāya
paripuṇṇavīsativassāya kumārībhūtāya dve vassāni chasu dhammesu
sikkhitasikkhāya vuṭṭhānasammati. Khamati saṅghassa tasmā tuṇhī.
Evametaṁ dhārayāmīti. Athakho bhagavā tā bhikkhuniyo anekapariyāyena
vigarahitvā dubbharatāya .pe. Evañca pana bhikkhave bhikkhuniyo
imaṁ sikkhāpadaṁ uddisantu yā pana bhikkhunī paripuṇṇavīsativassaṁ
kumārībhūtaṁ dve vassāni chasu dhammesu sikkhitasikkhaṁ saṅghena
asammataṁ vuṭṭhāpeyya pācittiyanti.