[380] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhikkhuniyo
ūnadvādasavassaṁ gihigataṁ vuṭṭhāpenti. Tā akkhamā honti sītassa
uṇhassa jighacchāya pipāsāya ḍaṁsamakasavātātapasiriṁsapasamphassānaṁ
duruttānaṁ durāgatānaṁ vacanapathānaṁ uppannānaṁ sārīrikānaṁ vedanānaṁ
dukkhānaṁ tibbānaṁ kharānaṁ kaṭukānaṁ asātānaṁ amanāpānaṁ pāṇaharānaṁ
anadhivāsakajātikā honti. Yā tā bhikkhuniyo appicchā .pe.
Tā ujjhāyanti khīyanti vipācenti kathaṁ hi nāma bhikkhuniyo
Ūnadvādasavassaṁ gihigataṁ vuṭṭhāpessantīti .pe. Saccaṁ kira bhikkhave
bhikkhuniyo ūnadvādasavassaṁ gihigataṁ vuṭṭhāpentīti. Saccaṁ bhagavāti.
Vigarahi buddho bhagavā kathaṁ hi nāma bhikkhave bhikkhuniyo ūnadvādasavassaṁ
gihigataṁ vuṭṭhāpessanti ūnadvādasavassā hi 1 bhikkhave
gihigatā akkhamā hoti sītassa uṇhassa jighacchāya pipāsāya
ḍaṁsamakasavātātapasiriṁsapasamphassānaṁ duruttānaṁ durāgatānaṁ vacanapathānaṁ
uppannānaṁ sārīrikānaṁ vedanānaṁ dukkhānaṁ tibbānaṁ kharānaṁ kaṭukānaṁ
asātānaṁ amanāpānaṁ pāṇaharānaṁ anadhivāsakajātikā hoti dvādasavassā
ca kho bhikkhave gihigatā khamā hoti sītassa uṇhassa jighacchāya
pipāsāya ḍaṁsamakasavātātapasiriṁsapasamphassānaṁ duruttānaṁ durāgatānaṁ
vacanapathānaṁ uppannānaṁ sārīrikānaṁ vedanānaṁ dukkhānaṁ tibbānaṁ kharānaṁ
kaṭukānaṁ asātānaṁ amanāpānaṁ pāṇaharānaṁ adhivāsakajātikā hoti
netaṁ bhikkhave appasannānaṁ vā pasādāya .pe. Evañca pana
bhikkhave bhikkhuniyo imaṁ sikkhāpadaṁ uddisantu yā pana bhikkhunī
ūnadvādasavassaṁ gihigataṁ vuṭṭhāpeyya pācittiyanti.

[381] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Ūnadvādasavassā nāma
appattadvādasavassā. Gihigatā nāma purisantaragatā vuccati.
Vuṭṭhāpeyyāti upasampādeyya. Vuṭṭhāpessāmīti gaṇaṁ vā ācariniṁ
1 Yu. ayaṁ saddo na hoti.
Vā pattaṁ vā cīvaraṁ vā pariyesati sīmaṁ vā sammannati āpatti
dukkaṭassa ñattiyā dukkaṭaṁ dvīhi kammavācāhi dukkaṭā
kammavācāpariyosāne upajjhāyāya āpatti pācittiyassa gaṇassa ca
ācariniyā ca āpatti dukkaṭassa.

[382] Ūnadvādasavassāya ūnadvādasavassasaññā vuṭṭhāpeti
āpatti pācittiyassa. Ūnadvādasavassāya vematikā vuṭṭhāpeti
āpatti dukkaṭassa. Ūnadvādasavassāya paripuṇṇasaññā vuṭṭhāpeti
anāpatti. Paripuṇṇadvādasavassāya ūnadvādasavassasaññā
āpatti dukkaṭassa. Paripuṇṇadvādasavassāya vematikā āpatti
dukkaṭassa. Paripuṇṇadvādasavassāya paripuṇṇasaññā anāpatti.

[383] Anāpatti ūnadvādasavassaṁ paripuṇṇasaññā
vuṭṭhāpeti paripuṇṇadvādasavassaṁ paripuṇṇasaññā vuṭṭhāpeti
ummattikāya ādikammikāyāti.
---------
Gabbhinīvaggassa chaṭṭhasikkhāpadaṁ

[384] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhikkhuniyo
paripuṇṇadvādasavassaṁ gihigataṁ dve vassāni chasu dhammesu asikkhitasikkhaṁ
vuṭṭhāpenti. Tā bālā honti abyattā na jānanti kappiyaṁ
vā akappiyaṁ vā. Yā tā bhikkhuniyo appicchā .pe. Tā
Ujjhāyanti khīyanti vipācenti kathaṁ hi nāma bhikkhuniyo paripuṇṇadvādasavassaṁ
gihigataṁ dve vassāni chasu dhammesu asikkhitasikkhaṁ
vuṭṭhāpessantīti .pe. Saccaṁ kira bhikkhave bhikkhuniyo pariputhaṇṇadvādasavassaṁ
gihigataṁ dve vassāni chasu dhammesu asikkhitasikkhaṁ
vuṭṭhāpentīti. Saccaṁ bhagavāti. Vigarahi buddho bhagavā kathaṁ hi nāma
bhikkhave bhikkhuniyo paripuṇṇadvādasavassaṁ gihigataṁ dve vassāni chasu
dhammesu asikkhitasikkhaṁ vuṭṭhāpenti 1 netaṁ bhikkhave appasannānaṁ
vā pasādāya .pe. Vigarahitvā dhammiṁ kathaṁ katvā bhikkhū āmantesi
anujānāmi bhikkhave paripuṇṇadvādasavassāya gihigatāya dve vassāni
chasu dhammesu sikkhāsammatiṁ dātuṁ. Evañca pana bhikkhave dātabbā.
Tāya paripuṇṇadvādasavassāya gihigatāya saṅghaṁ upasaṅkamitvā ekaṁsaṁ
uttarāsaṅgaṁ karitvā bhikkhunīnaṁ pāde vanditvā ukkuṭikaṁ nisīditvā
añjaliṁ paggahetvā evamassa vacanīyo ahaṁ ayye itthannāmā
itthannāmāya ayyāya paripuṇṇadvādasavassā gihigatā saṅghaṁ dve
vassāni chasu dhammesu sikkhāsammatiṁ yācāmīti. Dutiyampi yācitabbā
tatiyampi yācitabbā. Byattāya bhikkhuniyā paṭibalāya saṅgho
ñāpetabbo suṇātu me ayye saṅgho ayaṁ itthannāmā itthannāmāya
ayyāya paripuṇṇadvādasavassā gihigatā saṅghaṁ dve vassāni
chasu dhammesu sikkhāsammatiṁ yācati. Yadi saṅghassa pattakallaṁ saṅgho
itthannāmāya paripuṇṇadvādasavassāya gihigatāya dve vassāni chasu
1 Ma. Yu. vuṭaṭhāpessanti.
Dhammesu sikkhāsammatiṁ dadeyya. Esā ñatti. Suṇātu me ayye
saṅgho ayaṁ itthannāmā itthannāmāya ayyāya paripuṇṇadvādasavassā
gihigatā saṅghaṁ dve vassāni chasu dhammesu sikkhāsammatiṁ
yācati. Saṅgho itthannāmāya paripuṇṇadvādasavassāya gihigatāya
dve vassāni chasu dhammesu sikkhāsammatiṁ deti. Yassā ayyāya
khamati itthannāmāya paripuṇṇadvādasavassāya gihigatāya dve vassāni
chasu dhammesu sikkhāsammatiyā dānaṁ sā tuṇhassa yassā
nakkhamati sā bhāseyya. Dinnā saṅghena itthannāmāya paripuṇṇadvādasavassāya
gihigatāya dve vassāni chasu dhammesu sikkhāsammati.
Khamati saṅghassa tasmā tuṇhī. Evametaṁ dhārayāmīti.
Sā paripuṇṇadvādasavassā gihigatā evaṁ vadehīti vattabbā
pāṇātipātā veramaṇiṁ dve vassāni avītikkamasamādānaṁ samādiyāmi
.pe. Vikālabhojanā veramaṇiṁ dve vassāni avītikkamasamādānaṁ
samādiyāmīti. Athakho bhagavā tā bhikkhuniyo anekapariyāyena vigarahitvā
dubbharatāya .pe. Evañca pana bhikkhave bhikkhuniyo imaṁ sikkhāpadaṁ
uddisantu yā pana bhikkhunī paripuṇṇadvādasavassaṁ gihigataṁ dve
vassāni chasu dhammesu asikkhitasikkhaṁ vuṭṭhāpeyya pācittiyanti.

[385] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Paripuṇṇadvādasavassā nāma
pattadvādasavassā. Gihigatā nāma purisantaragatā vuccati. Dve
Vassānīti dve saṁvaccharāni. Asikkhitasikkhā nāma sikkhā vā na
dinnā hoti dinnā vā sikkhā kupitā. Vuṭṭhāpeyyāti
upasampādeyya. Vuṭṭhāpessāmīti gaṇaṁ vā ācariniṁ vā pattaṁ
vā cīvaraṁ vā pariyesati sīmaṁ vā sammannati āpatti dukkaṭassa
ñattiyā dukkaṭaṁ dvīhi kammavācāhi dukkaṭā kammavācāpariyosāne
upajjhāyāya āpatti pācittiyassa gaṇassa ca ācariniyā
ca āpatti dukkaṭassa.

[386] Dhammakamme dhammakammasaññā vuṭṭhāpeti āpatti
pācittiyassa. Dhammakamme vematikā vuṭṭhāpeti āpatti pācittiyassa.
Dhammakamme adhammakammasaññā vuṭṭhāpeti āpatti pācittiyassa.
Adhammakamme dhammakammasaññā [1]- āpatti dukkaṭassa. Adhammakamme
vematikā [2]- āpatti dukkaṭassa. Adhammakamme adhammakammasaññā
[3]- Āpatti dukkaṭassa.

[387] Anāpatti paripuṇṇadvādasavassaṁ gihigataṁ dve vassāni
chasu dhammesu sikkhitasikkhaṁ vuṭṭhāpeti ummattikāya ādikammikāyāti.
--------
Gabbhinīvaggassa sattamasikkhāpadaṁ

[388] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhikkhuniyo
1-2-3 Ma. etthantare vuṭṭhāpetīti dissati.
Paripuṇṇadvādasavassaṁ gihigataṁ dve vassāni chasu dhammesu sikkhitasikkhaṁ
saṅghena asammataṁ vuṭṭhāpenti. Bhikkhuniyo evamāhaṁsu etha
sikkhamānā imaṁ jānātha imaṁ detha imaṁ āharatha iminā
attho imaṁ kappiyaṁ karothāti. Tā evamāhaṁsu na mayaṁ ayye
sikkhamānā bhikkhuniyo mayanti. Yā tā bhikkhuniyo appicchā
.pe. Tā ujjhāyanti khīyanti vipācenti kathaṁ hi nāma bhikkhuniyo
paripuṇṇadvādasavassaṁ gihigataṁ dve vassāni chasu dhammesu sikkhitasikkhaṁ
saṅghena asammataṁ vuṭṭhāpessantīti .pe. Saccaṁ kira bhikkhave
bhikkhuniyo paripuṇṇadvādasavassaṁ gihigataṁ dve vassāni chasu dhammesu
sikkhitasikkhaṁ saṅghena asammataṁ vuṭṭhāpentīti. Saccaṁ bhagavāti.
Vigarahi buddho bhagavā kathaṁ hi nāma bhikkhave bhikkhuniyo paripuṇṇadvādasavassaṁ
gihigataṁ dve vassāni chasu dhammesu sikkhitasikkhaṁ
saṅghena asammataṁ vuṭṭhāpessanti netaṁ bhikkhave appasannānaṁ vā
pasādāya .pe. Vigarahitvā dhammiṁ kathaṁ katvā bhikkhū āmantesi
anujānāmi bhikkhave paripuṇṇadvādasavassāya gihigatāya dve vassāni
chasu dhammesu sikkhitasikkhāya vuṭṭhānasammatiṁ dātuṁ. Evañca pana
bhikkhave dātabbā. Tāya paripuṇṇadvādasavassāya gihigatāya dve
vassāni chasu dhammesu sikkhitasikkhāya saṅghaṁ upasaṅkamitvā ekaṁsaṁ
uttarāsaṅgaṁ karitvā bhikkhunīnaṁ pāde vanditvā ukkuṭikaṁ nisīditvā
añjaliṁ paggahetvā evamassa vacanīyo ahaṁ ayye itthannāmā
Itthannāmāya ayyāya paripuṇṇadvādasavassā gihigatā dve vassāni
chasu dhammesu sikkhitasikkhā saṅghaṁ vuṭṭhānasammatiṁ yācāmīti. Dutiyampi
yācitabbā tatiyampi yācitabbā. Byattāya bhikkhuniyā paṭibalāya
saṅgho ñāpetabbo suṇātu me ayye saṅgho ayaṁ itthannāmā
itthannāmāya ayyāya paripuṇṇadvādasavassā gihigatā dve vassāni
chasu dhammesu sikkhitasikkhā saṅghaṁ vuṭṭhānasammatiṁ yācati. Yadi
saṅghassa pattakallaṁ saṅgho itthannāmāya paripuṇṇadvādasavassāya
gihigatāya dve vassāni chasu dhammesu sikkhitasikkhāya vuṭṭhānasammatiṁ
dadeyya. Esā ñatti. Suṇātu me ayye saṅgho ayaṁ
itthannāmā itthannāmāya ayyāya paripuṇṇadvādasavassā gihigatā
dve vassāni chasu dhammesu sikkhitasikkhā saṅghaṁ vuṭṭhānasammatiṁ
yācati. Saṅgho itthannāmāya paripuṇṇadvādasavassāya gihigatāya
dve vassāni chasu dhammesu sikkhitasikkhāya vuṭṭhānasammatiṁ deti.
Yassā ayyāya khamati itthannāmāya paripuṇṇadvādasavassāya
gihigatāya dve vassāni chasu dhammesu sikkhitasikkhāya vuṭṭhānasammatiyā
dānaṁ sā tuṇhassa yassā nakkhamati sā bhāseyya. Dinnā
saṅghena itthannāmāya paripuṇṇadvādasavassāya gihigatāya dve vassāni
chasu dhammesu sikkhitasikkhāya vuṭṭhānasammati. Khamati saṅghassa
tasmā tuṇhī. Evametaṁ dhārayāmīti. Athakho bhagavā tā bhikkhuniyo
anekapariyāyena vigarahitvā dubbharatāya .pe. Evañca pana bhikkhave
Bhikkhuniyo imaṁ sikkhāpadaṁ uddisantu yā pana bhikkhunī paripuṇṇadvādasavassaṁ
gihigataṁ dve vassāni chasu dhammesu sikkhitasikkhaṁ
saṅghena asammataṁ vuṭṭhāpeyya pācittiyanti.

[389] Yā panāti yā yādisā .pe. Bhikkhunīti .pe. Ayaṁ
imasmiṁ atthe adhippetā bhikkhunīti. Paripuṇṇadvādasavassā
nāma pattadvādasavassā. Gihigatā nāma purisantaragatā vuccati.
Dve vassānīti dve saṁvaccharāni. Sikkhitasikkhā nāma chasu dhammesu
sikkhitasikkhā. Asammatā nāma ñattidutiyena kammena vuṭṭhānasammati
na dinnā hoti. Vuṭṭhāpeyyāti upasampādeyya. Vuṭṭhāpessāmīti
gaṇaṁ vā ācariniṁ vā pattaṁ vā cīvaraṁ vā pariyesati sīmaṁ
vā sammannati āpatti dukkaṭassa ñattiyā dukkaṭaṁ dvīhi
kammavācāhi dukkaṭā kammavācāpariyosāne upajjhāyāya āpatti
pācittiyassa gaṇassa ca ācariniyā ca āpatti dukkaṭassa.